設定貼子語言 Set language for posts :
中文
English
中英雙文 English & Chinese

31.12.2006 | 再見2006

話咁快又一年喇.. 過去365日或8760小時或525600分鐘或31536000秒係點過, 係做過D咩野咧? 我覺得今年都幾好, 舊年令我感到人生低潮既事業不如意, 今年有好大既轉變, 覺得畀到我一支好大強心針, 來年希望可以有一番突破一番作為啦.. 依家既心情, 除左屋企人同埋一班close friends之外, 我諗我會好專注事業, 其他野我覺得順其自然會好D.. 有緣既話自然會黎, 冇緣既話點強求都唔會係你架喇.. 哈哈!! 點都好啦, 覺得最緊要都係要活得健康快樂..

再見, 2006.. 係度預祝各位新年快樂, 一年好過一年啊..

30.12.2006 | 網絡大災難

十二月廿六日太南發生7.2級大地震, 由於地震損毀鋪設於台灣周邊全部六條深海電纜, 整個亞太地區既互聯網服務幾乎癱瘓, 香港與19個國家及地區的通信大受影響.. 結果返工時, 上唔到網, 入唔到MSN, 長途電話又打唔到.. 真係陷於通訊孤立既網絡大災難.. 不過不幸中大幸, 好彩都仲用到email.. 就咁持續幾日, 直至今日下晝.. 發覺科技越係先進, 我地就越係依賴, 好似今次咁, 反而係個一路以來冇乜「進化」既天災, 輕咁易就影響到我地束手無策.. 係唔係人類越進化, 科技越進步, 人類就越係vulnerable??

27.12.2006 | 聖誕勁緊湊(V)

總結過去四日勁緊湊既聖誕假日節目所影落D相.. 雖然未成功影夠佢2000張, 但係睇番晒都用作幾耐時間, 篩選砌成以下呢張montage雜錦相, 都要花點功夫架.. 感覺好開心!!

26.12.2006 | 聖誕勁緊湊(IV)

今日都冇乜特別節目, 因為朋友仔聽日就各自飛離香港歸家.. 所以飲完早茶就去左last minute shopping喇.. 本以為除左長洲步行之外, 應該都冇乜野可以累得過佢呱?? 點不知, 呢個shopping仲累.. 可能之前三日頻頻扑扑, 加上要買D野唔係冇貨就冇size.. 好悶啊!! 本以為前幾日睇仲幾件衫今日要買, 到時小娜結婚可以著下啦.. 點不知去到幾間分店都一於不見影蹤, 好邪啊!! 結果做左成日空手而歸既觀音兵, 哈哈..

25.12.2006 | 聖誕勁緊湊(III)

好耐之前就已經祈禱希望今日海洋公園唔會太多人, 希望D人去晒迪斯尼.. 結果一到步, 不得了喇.. 嘩, 人潮洶湧到啊, 係去到當你同個朋友行甩左超過50步你會好難係咋人潮中搵返佢果種程度囉.. 見到咁多人, 真係冇晒胃口.. 我地原本target要玩呢個玩果個, 影番500張相留念.. 結果咪就係因為太多人, 淪落到淨係玩到個白痴機動, 睇左個海豚表演, 同埋排成兩個鐘先至睇到果幾粒既螢光水母囉.. 感覺今日好似畀200蚊黎呢度排隊睇人潮咁..

點解海洋公園冇控制入場人數架?? 唉, 算吧啦.. 講起都一殼眼淚啊.. 哈哈!!

24.12.2006 | 聖誕勁緊湊(II)

今日應該係四日個plan內時間最長既一日喇.. 長洲拼廣東道聖誕街頭party.. 結果長洲步行漫遊真係令到朋友仔累到趴係地, 短短三小時路程足以令佢地覺得已經行晒三個月既路, 哈哈.. 都話平時唔好成日坐係office度, 隔兩條街唔好搭的士, 行多點路架啦.. 我諗成個長洲之旅, 朋友仔最enjoy都非晚餐果一刻莫屬喇, 因為終於可以安安定定咁坐番低歇一歇補充體力喇.. 哈哈!!

夜晚由中環搭天星小輪過尖沙咀, 自從棄用鐘樓舊碼頭以後都係第一次係新碼頭搭船.. 個聖誕街頭party由李浩林MC, 歌手嘉賓有張敬軒, 王菀之, 黃貫中, 2R, Rednoon.. 當然仲有主角-加埋起黎成300歲既溫拿樂隊喇.. 最過癮就係全場互動唱《L-O-V-E》同埋最後廿秒倒數聖誕, 有煙火有飛霜碎紙好聖誕feel啊..

不過成日最意想不到既就係搭地鐵歸家時竟然不見擠逼人潮, 真係通暢無阻架.. 預計成點靚兩點鐘到屋企, 點知返到去都未夠一點鐘啵.. 都好既, 因為好累早D休息都好既..

23.12.2006 | 聖誕勁緊湊(I)

今朝興致勃勃晨早起身, 準備迎接連續四日緊湊既聖誕假期節目.. 臨準備既時候, 收到上海朋友SMS, 以為佢到步啦.. 點不知佢話我知「焚車, 我仲係上海, 架機都未知幾時起飛」.. 嘩, 唔係啊嘛?? 咁豈不是精心plan左畀今日既節目要石沉大海?? 冇法啦, 唯有睇佢幾點到步先另作打算啦..

原本諗住去赤柱再上山頂再飛過南丫島食海鮮dinner.. 咁就因為佢班機極度嚴重delay所以今日就只得個南丫島喇.. 不過大家一見面就勁開心, 一路上坐船食野影相都好鬼正feel.. 其實我地四個朋友以前都係唔同班唔同background, 但係估唔到竟然可以捆埋一齊都仲咁夾, 果然係諗都未諗過會有咁既一日.. 就咁開始左我地連續四日緊湊既聖誕假期節目喇..

22.12.2006 | MI: Accomplished

識左十八年既朋友小娜明年一月七號同男朋友拉埋天窗.. 咁就派畀我兩個任務, 第一就係幫佢設計張thank you card畀所有去婚宴「撼」既親友, 第二就係幫佢埋對繡花鞋.. 開始接受呢兩個MI (Mission Impossible)喇..

第一份任務對我來講, 簡單任務但係其實又有點難度.. 設計方面不成問題, 但係要將自己既idea搞出黎, 以我一個門外漢黎講單單靠個MS Office軟件都好難可以發揮啦.. 不過最終終於都係搞左出黎, 新娘子都點頭批左喇..

第二份任務, 更加難啦.. 著裙褂D繡花鞋啵, 嘩大佬, 我邊有idea啊, 不過好彩得小春D版我過, 結果剛才係太子金都商場一搵就有喇, 果然係踏破鐵無覓處啊.. 其實都唔係咁難嗟, 哈哈..

20.12.2006 | 緊湊緊湊

得知有朋友分別由上海同吉隆坡到訪.. 今日見冇乜mood做野, 就索性plan下聖誕四日假期做啲乜啦.. 咁就詢眾要求將佢地想去想做既都一一夾落去.. 結果夾夾下, 不得了喇, 真係好似柴娃娃旅行團咁, 緊湊到吖, 自己睇返都幾乎嚇親咁滯.. 不過都好嘅, 橫掂聖誕都冇乜野做, 就做下臨記導遊啦, 哈哈.. 好期待聖誕假期來臨啊.. 係度預祝各方人士聖誕快樂先..

18.12.2006 | 新曲+精選

唔記得幾時開始歌手出精選集都會好例牌咁攝兩三首新歌落去.. 可以一次過擁有個歌手咁耐以來既靚歌.. 咁當然要排除D為左賺錢呃fans, 又或者舊公司賣大包撼新公司新專輯個D啦.. 咁其實我就好喜歡買呢D稱之為"新曲+精選"既玩意架.. 除非我真係好欣賞個歌手, 通常我都會好耐心咁等待佢地既精選既.. 最enjoy就係買返去聽既時候, 由頭到尾發覺其實每一首歌都係好熟悉, 一首接一首咁動聽咁有feel, 跟住唱都不成問題.. 當然最開心就係有時發現新大陸咁「哦, 原來呢首歌係佢唱架? 都搵左呢首歌好耐喇...」

16.12.2006 | 慣性的八卦

最近發現一個現象, 就係條街度, 原本急步前進的人, 經過書報攤時往往都會好慣性咁放慢腳步, 自自然然咁望下D八卦雜誌封面.. 真係十個都有八個會係咁架.. 其實又唔係要買D乜野, 但係就一定會望望D雜誌架啦.. 原本就以為得我自己係咁(哈哈哈哈), 但係其實我都不過是其中一份子嗟.. 我諗應該係發自內心潛意識既八卦心態, 定係D雜誌標題實在係標新立異得令人讚嘆然而要我地呢D小市民產生好奇感咧?? 你睇下D雜誌擺正個書報攤最有利位置就略知一二啦..

14.12.2006 | 一於要慳

住得近公司其實真係一大樂事.. 最近幾日lunch time都會行返間apartment自己煮下晏仔食, 又或者用微波爐叮叮前一晚dinner煮多左個份, 咁就搞掂一餐.. 可以舒舒服服坐低一路食一路睇電視, 唔駛係出邊排隊等位搭檯又要同人逼.. 食完又可以順便瞌下15分鐘晏覺養下神.. 好享受啊, 而且咁樣又可以慳返廿幾卅蚊食飯錢.. 唔錯唔錯.. winter sales又開始喇, 慳慳埋埋都差唔多可以買多幾件靚衫架喇.. 話晒冬天點都要著返暖D嘅..

13.12.2006 | 小小成就感

對我黎講, 其實每次可以成功咁寫一篇文入個blog度, 係一件值得令我振奮既事情, 甚至每次都會帶畀我某種程度既小小成就感架.. 而且過後仲會不經意咁自我重睇幾遍添, 哈哈!!

點解咁講咧?? 咪就係因為我須要用好大既effort先至可以寫出一篇文囉.. 試過好多好, 好努力咁要update個blog, 但係對住個mon左諗右諗發晒呆咁都寫唔到一句野.. 睇下個鐘, 嘩, 成12點幾架喇?? 都係算數上床睡覺吧啦.. 咪就係咁, 有幾排都唔見我有update個blog囉.. 可能真係睇得書少, 如果好似小年咁七日睇晒一本幾吋厚既書, 我諗我應該都可以好似佢咁每日必定有篇勁長文章post左上去架.. 哈哈!!

12.12.2006 | 不堪入目

睇返十幾年前既相.. 除左諗返起好多以前既回憶之外, 最搞笑就係睇返自己以前個薯頭樣.. 簡直係不堪入目得唔好意思認係自己啊.. 都唔明白當時係乜野潮流觸覺?? 郭富城招牌經典「蟹鉗頭」+鮮色樽領長袖tee配銀色大吊咀頸鏈+高腰窄身牛仔褲(兼且件衫緊攝褲頭內)+大舊NIKE籃球波鞋+薯頭薯腦大眼鏡.. 成身撞到「撼撼」聲, OMG點解會打扮成咁既樣架?? 至抵死就係仲擺埋D不知乜型格鋪士, 懶以為好有型咁啵, 哈哈.. 好老土啊!! 不過再多十年睇返依家D相入邊個樣, 我諗都應該係得啖笑.. 哈哈

11.12.2006 | 閱讀=耐性??

好欣賞個D可以拎住本幾吋厚既書黎慢慢閱讀既人.. 見到佢地好投入咁目光掃射, 一頁一頁咁翻過去, 唔使幾日時間就可以睇晒成本書, 跟住露出好enjoy好有成就感既樣.. 覺得佢地好得啊.. 因為我從來都未有咁個耐性去慢慢欣賞一本幾吋厚既書, 甚至連一本長篇漫畫公仔書我都永遠唔會睇完.. 或者我對閱讀從來不感興趣呱?? 又或者讀左咁多年書而產生恐懼?? 哈哈.. 不過咧, 記得以前讀書每年D老師都一定會出個「我的嗜好」作文題, 我又偏偏寫閱讀噃?? 我諗個時候來來去去都應該唔係閱讀就係劃畫架啦.. 哈哈..

09.10.2006 | 平時做乜野多啊?

通常剛認識既新朋友或者新同事, 都好中意問:「平時做乜野多啊?」 其實我對呢個咁行既問題都好抗拒, 就係每次畀人咁咧, 都唔知道要點答好.. 講真啊, 平時除左返工放工都已經成只屐咁啦, 都好難可以做D乜啦.. 唔通答佢沖涼食飯睡覺咩??

咁又繼續問:「有乜野嗜好啊?」嘩, 呢個問題仲 要命.. 我以為係小學生畀老師逼寫作文先至會有既題材.. 哈哈!! 老實講, 我真係講不出我有乜嗜好, 因為我都冇特別中意做乜喎.. 平時都有去下gym行下街, 但係並不代表我中意啵, 係搵D野黎做攝下時間咋啵..

我諗應該係我個人問題, 冇理由咁簡單咁普遍既寒喧問題我都答唔出丫?? 應該先自我檢討檢討..

07.12.2006 | Golden Eye

占士邦007電影系列每一齣都會有首主題曲, 而呢一首1996年Tina Turner主唱既《Golden Eye》係至今我覺得最好架.. 我覺得呢個祖母級搖滾殿堂歌手, 將首歌演繹得淋漓盡致,氣勢磅礡.. 十年前聽後為之驚艷, 十年後係MTV台睇返個MV, 仍然係咁有味道.. 好得啊!!

可惜美中不足,呢個MV竟然係成首歌最精彩最氣勢個兩秒毄住左, 真係一大遺憾啊..

06.12.2006 | 久違的冷氣機

都醒唔起由幾時開始, 唔駛開冷氣就係齋開窗都可以睡喇.. 應該係上兩個禮拜因為天氣轉涼而病倒開始呱?? 今日靜靜咁坐係度, 都唔經唔覺咁流左D汗.. 嘩, 呢個係唔係冬天黎架?? 終於頂唔順, 沖完個涼, 開返呢部久違既冷氣機喇.. 但係覺得有D嘈, 印象中佢好似唔會發出任何 噪音架?? 唔通太耐冇開, 佢都病埋??

05.12.2006 | 回味無窮

最近無線播映既台慶劇《東方之珠》, 應該係以70年代作為故事背景.. 當中故事人物以當時得令歌手作為藍本, 劇中當然不乏一幕幕懷舊歌舞戲啦.. 其實對於劇中D懷舊歌, 我大部份都聽過.. 雖然話D演員始終唔係唱家班, 唱D懷舊歌始終爭咁D野, 但係我其實都過晒癮咁跟住唱喎..

卡門, 像霧又像花, 往事只能回味, 梅蘭梅蘭我愛你, 一見你就笑, 我的心裡只有你, Kowloon Hong Kong, 淚的小雨, 說不出的快活, 不了情, 相思河畔, 鑽石鑽石亮晶晶, Circle Game.. 首首都回味無窮啊..

04.12.2006 | 真情流露

三十年前1976年度香港小姐競選最經典場面.. 你睇下你睇下, 冠軍林良蕙佢笑得幾開心幾燦爛, 幾咁真情流露啊.. 見到佢既表情, 確實真真正正感受得到佢既喜悅啊.. 可能就係咁, 從此以後所有佳麗都先要學習基本儀態..

唔知點解, 佢令我聯想起莫文蔚小姐..

01.12.2006 | 小鳳姐vs夏惠姨

剛剛睇完個娛樂新聞節目, 電視台訪問徐小鳳同楊千嬅.. 本來平平無奇既一則報導, 點不知小鳳姐突然之間殺出個笑話.. 佢話: 「記得有日係夜總會唱完放工咧, 係個門口撞到黃夏惠.. 跟住佢好興奮咁同我講:"哎呀小鳳姐啊, 點解D人成日都話我似妳架?"」此語一出, 成村人即刻笑到碌地.. 楊千嬅聽後就話: 「小鳳姐你就話可以笑嗟, 但係我笑既話會好大鍋架嘛, 靠害啊?」.. 但係唔使講佢始終梗係勁喪咁笑啦..

30.11.2006 | 人神共憤

今朝睇新聞報導, 美國一個年輕媽媽竟然將自己親生剛剛一個月大既BB女擺落微波爐入邊叮.. 結果個BB表面皮膚毫無受損, 但係就因為內部器官高度受熱導致死亡.. 我覺得個媽媽好殘忍好變態啊!! 點解要咁喎?? 個BB好無辜丫嘛, 個媽媽忍心咁黎謀殺自己親生BB, 真係人神共憤啊!! 如果係咁, 當初就咪鬼生佢出黎啦!!

29.11.2006 | 勁正

無意中發現既一個勁正MV.. 兩位香港數一數二重量級殿堂歌手好難得既一次合作.. 果然聽出耳油啊..


如果唔覺有幾勁正, 不妨用呢一個(又係無意中發現既)版本比較一下丫..
http://www.youtube.com/watch?v=lluoOKy56FA

28.11.2006 | 出神入化

一向來至討厭D突如其來既telemarketing來電.. 通常一接聽, 個sales就實行殺你一個措手不及, 一輪咀咁介紹完佢要sell你既產品.. 當然好多時候你會好客氣咁話佢知冇興趣啦, 咁佢跟住就一定會好似冤鬼纏身咁打爛沙盤問到篤.. 直至你忍耐性爆燈為止, 兇兇狠狠咁一野回絕, 佢先至肯言謝罷休..

講真啊, 究竟一日打幾百個call會有幾多既成功率咧?? 就算有成果, 咁又係唔係cover到所用既人力物力咧?? 今日下晝就接到一個telemarketing call.. 但係呢個call確係與眾不同前所未有, 係用預錄音訊架啵!! 冇興趣既大可以即刻收線唔怕hurt到人, 有興趣既可以按個掣後有個專人繼續特別接待.. 幾好啵呢一招.. 所以話咧, 做marketing呢行, 除左要無孔不入之外, 更應該要出神入化得唔乞人憎丫嘛..

26.11.2006 | 係乜嘢推論啊??

剛剛喺網上讀到呢則好好笑嘅blog.. 關於測試一個男人嘅同性戀傾向.. 真係唔知係乜嘢推論, 竟然可以由聽歌唱歌嘅品味嚟推論, 就好搞笑係啦..

測試(一) : 喺karaoke點哥哥張國榮後期啲歌嚟唱, 得1分.. 點林憶蓮啲歌分明係唱唔起又死都唔肯降key嘅, 得5分..

測試(二) : 買齊晒顛妮姐葉德嫻啲唱片嘅, 得1分.. 收齊晒林憶蓮啲華粵日英語大碟兼所有再版精選碟嘅, 得5分.. 連古天樂啲碟都買嘅, 不得了要得30分!!

23.11.2006 | 快捷簡易煮粟米

通常去超級市場買返黎一碌碌粟米, 須要褒成大甏水去煮熟佢.. 不過稍稍動下腦筋, 借用自然科學定理同埋科技廚具, 呢個步驟可以變得好快捷好方便, 仲可以慳埋成大甏水添..

哪, 好簡單.. 將粟米去皮去鬚後, 用餐紙巾成碌包實, 濕水後擺入微波爐用高火叮佢8-10分鐘.. 就係咁簡單喇!! 其實個原理都好簡單, 就係用濕餐紙巾加熱後既蒸汽包住黎蒸熟碌粟米喇.. 呢個方法不妨一試喎..

20.11.2006 | 空+懶

又係個部落格一段冷場期.. 我諗最大因素都係「空」同埋「懶」呢兩個字-- blog靈感一篇空白的空, 一於死得懶理的懶.. 對於小年每日如泉水爆涌既blog靈感, 竟然快得我無暇跟進, 實在係令我嗤嗤稱奇啊..

08.11.2006 | 兩公婆的SMS

老公畀老婆既SMS
我掛住妳, 好掛住妳啊
每日發條短訊畀妳
掛住你粉紅色的嘴唇
令我牽腸掛肚, 冇左你
生命似行屍走肉般全無意義
請跟我開心地度過每一個時刻
應承我啦, 要永遠愛我一生一世
[我對妳的愛, 盡在以上每行第四個字]

老婆覆返老公既SMS
老公你咁忙都發條短訊畀我
其實好多女人都冇咁既福氣
作為女人, 有你咁既丈夫
為你而死都值得啦
但你知唔知, 每一分每一秒
我都想見住你, 你咁好
當初對你既付出, 全部都賺返晒
對你至死不渝, 今生無悔
[我對你的愛, 盡在以上每行第四個字]

07.11.2006 | 好似打場仗咁..

09:00 到office開始check下email
09:30 同大馬office兩個同事conference-call傾個proposal
11:00 同另外一個客conference-call彙報project進展
11:30 繼續同大馬office兩個同事conference-call傾個proposal
13:00 傾完之後趕起份proposal畀個客
14:30 send左份proposal畀個客戶之後, 覆覆成朝未睇既email
15:00 終於有時間落對面街買份麥當勞上office食lunch喇
15:30 開始同其他office既同事MSN問下project進度
17:00 同個同事傾傾project事宜
18:00 同新加坡同事conference-call彙報所有project事宜
19:00 是日最後衝刺, 覆覆成個下晝未睇既email
19:30 完全虛脫

成日四個conference-call, 又要顧住趕起份proposal畀個客戶, 又要兼顧其他project事宜.. 今日認真係好忙, 好stressed, 好似打場仗咁..

06.11.2006 | 虛像

今日workout完, 咁就循例須要係個gym度沖涼換衫啦.. 平時都冇乜注意鏡入邊既自己 (其實應該係話冇眼睇) 啦.. 咁今日就唔知點解, 就順便望望.. 咦?? 好似瘦左D咁喎, 個腩又好似冇咁肥啵.. 一眼望落的確係修長左少少.. 再望真D, 扯, 咪就係塊鏡照出黎既效果嗟嘛.. 諗深一層, 其實依家去到邊D鏡都係照到人瘦D架啦, 應該係要畀D客多點視覺上既滿足感.. 查實都唔使咁開心住嗟, 完全係虛像黎咋啵.. 自己屋企部磅一企上去就知道自己到底有幾多「斤兩」啦..

04.11.2006 | 好耐唔見..

何韻詩尾場演唱會請左個所謂「殿堂級」歌手做壓軸嘉賓.. 估唔估到邊個啊?? 咪就係好耐冇見既鄭秀文囉.. 佢一出黎果然博得全場掌聲, 而且仲妙語連珠, 好盞鬼咁講左番話, 大致上係:

「嘩, 啊詩.. 乜你請左個殿堂級歌手做壓軸嘉賓咩? 點解成晚都唔見阿小鳳姐架? 你唔係當我係殿堂級歌手係嘛?? 嘩, 人地殿堂級歌手係幾年出張碟幾年拍齣戲架, 我都只不過係收埋幾個月冇出黎嗟, 你唔係咁係嘛?? 大家一睇我身材, 就知道我係平輩啦..」

好耐冇見既Sammi.. 依然咁正, 依然咁鬼馬, 依然咁喜愛自嘲身材..

03.11.2006 | 點解..

點解我每日都要返足至少九小時工?
點解我每日都要為左去邊度食晏而煩?
點解我每日都要睇睇sandyandme.com呢個網站?
點解我每日都要係去gym之前掙扎一輪?
點解我每日都要用好耐先至寫好個blog post?
點解我每日都要想瘦但係又瘦唔到?
點解我每日都要照幾廿輪鏡先有信心出街?

點解我今日咁多問題??

02.11.2006 | 孔雀東南飛

突然間諗返起《孔雀東南飛》.. 唔係記得呢首詞, 而係中六時候果一堂令人爆笑既「戲演課文」..

話說老師要求班上分成幾組, 係佢教完一篇文之後, 就各組輪流表演篇課文.. 我覺得最爆笑既就係輪到我地呢組表演既《孔雀東南飛》.. 同學阿Lin反串飾演女主角劉蘭芝, 出乎意料之外既生動演出再加埋即興咸濕笑料, 果然豁晒出去.. D俯身洗「奶」, 搖樹求「愛」等動作果然爆笑全場..

難怪事隔幾年同個老師傾返, 佢都忘記不了呢場戲, 仲投訴之後幾屆既同學都演得好鬼嚴肅添.. 哈哈!! 老師跩跩啊..

01.11.2006 | 祇可活一次

冷冷的雨 陪伴世間的諷刺
像告訴我不可再嘗試
潮流由人作主 反叛沒用處
一顆心偏繼續堅持
錯過幾次 曾亦痛心幾多次
但錯了再改 失了又試
就算這次我輸 不輸掉心意
明日我又再捲起壯志
生存只可得一次
要後退要後悔不可以
盡全力在這生尋求自身意義
光陰裡記下我的詩
生存即使得一次
也願意繼續試不管風雨
是成敗也好 誰能預知際遇
祇知 用心活一次

31.10.2006 | 精彩之作

Evanescence三年前既處女大碟《Fallen》令我為之驚艷, 三年後既今天呢張《The Open Door》同樣冇令我失望, 果然堪稱「精彩」之作.. 曲風大致承接上張超級白金專輯, 搖滾演奏加上主音Amy Lee"詭異"式唱腔, 剛烈中既一把陰柔歌聲, 絕絕對對將gothic rock個種味道發揮出來.. 專輯開始一路貫穿聽到最後一首, 一氣呵成咁澎湃到尾, 好有一種震撼人心既感覺.. 推薦首波主打《Call Me When You're Sober》同迴腸盪氣《Sweet Sacrifice》, 再搭埋專輯內其餘11首作品.. 好掂啊!!

29.10.2006 | 開心之旅

二○○六年十月十八日至十月廿五日..
小徽同埋小怡趁雙節假期飛過黎香港探我, 其實係飛過黎香港玩, 順便探下我嗟, 哈哈.. 不過我都好開心咁, 連續七日頻扑于工作和玩樂之間, 帶佢地週圍去玩.. 除左閒日一D遊客必到之景點, 趁週末我地去左大嶼山啦, 山頂啦, 澳門同埋迪斯尼既.. 可以講係非常非常之疲累, 洗左好多好多錢.. 但係個心境真係非常之開心架.. 見唔見我地D開心靚相啊?? 哈哈..

小徽: 對唔住啊, 你千里迢迢黎到竟然冇機會一嚐你至愛既叉燒包添.. 不過你好中意菠蘿油喎!!
小怡: 對唔住啊, 原來你咁中意朗豪坊架?? 早知一早建議你去果度瘋狂掃貨啦..

28.10.2006 | 實在是太過份喇..

嘩嘩嘩.. 不得了喇!! 眨下眼轉個身.. 原來我已經足足一個月冇update我既blog喎!! 實在係太過份喇.. 比起D日日不停update既朋友, 我當然自知慚愧同自嘆不如啦.. 但係相對於我一D朋友幾個月先得個桔既, 我算唔錯啦, 係就係今次失手嗟.. 唔緊要, 相信我一定唔會就此將[SK/0617]置之不理架!! 敬請留意下個post..

28.09.2006 | 撞鬼囉..

噚晚執間apartment, 咁執就梗係有D垃圾要丟既啦.. 因為個垃圾桶就係隔離個樓梯口度, 所以平時丟垃圾都係會順手開大個門, 就咁兜個圈返番入黎.. 點不知噚晚就無啦啦係個樓梯口度聽到有道門閂埋把聲, 於是好奇咁擰返個頭望過去.. Oh my god.. 原來係自己道門啊!! 當時真係愣住係度, 束手無策咁眼白白望住道門唪一聲咁閂埋..

撞鬼囉.. 裡邊又冇人, 我又一身哩哩啡啡咁, 身上又冇門匙又冇電話, 而且又冇著鞋.. 當時真係好無奈好awkward啊.. 不過回過神後, 就決定坐係個樓梯口都等個樓友返黎啦, 都冇其他方法啦.. 當時真係唔知會等到幾時架.. 不過不幸中大幸, 好彩唔知邊位善長仁翁丟左疊八卦雜誌係度, 就索性坐係梯級度邊等邊睇消磨時間啦.. 嘩, D八卦雜誌都好抵死嗟, 乜「蔡X林G奶塌地」啦, 「梁X琪濕吻法佬」啦.. 睇下睇下, 約莫廿分鐘後隱約聽到開門聲, 即刻彈起, 果然係個 樓友啊.. 真係上天打救, 佢噚晚竟然捨得咁早返黎啊.. 不過佢就畀我突然係樓梯口出現嚇襯, 唔好意思, 因為太心急要入屋啊.. 哈哈..

26.09.2006 | 駛唔駛咁啊??

曾經遇著一個怪人.. 佢無論食完乜野飲完乜野, 硬係要儲埋D大大細細紙盒啊, 發泡膠盒啊, 玻璃樽啊, 塑膠樽啊, 鐵罐啊, 鋁罐啊, 膠袋啊, 包裝紙啊.. 但係又唔係亂丟果種, 又唔係自己收收埋埋喎.. 而係一堆野企企理理咁擺埋一齊係個顯眼處.. 唔知係要孤芳自賞丫, 定係要無聲咁話人知呢D係佢傑作咁..

初頭就以為佢想儲埋第時可以用黎裝野啦.. 點不知越積越多, 搞到成堆廢物惹晒塵仲原封不動咁擺係度.. 嘩, 大佬.. 我真係定唔順, 覺得好阻訂好眼冤囉, 駛唔駛咁啊?? 駛唔駛搞到自己成個垃圾佬咁啊?? 週圍都係佢D野啦.. 結果有日我真係忍無可忍, 話知你丫, 真係趁佢一個唔覺意, 哪哪聲一野將D垃圾狠狠咁全部丟晒啦.. 當堂覺得眼前一片光明啊..

25.09.2006 | 夏日繽紛大戰熱浪狂嘩鮮果沙律


上星期六搞左個housewarming party, 咁我就好即興咁整左呢味「」.. 個賣相都幾好呵?? 火龍果+啤梨+蘋果+桃駁李+奇異果+橙+椰籤果, 灑些少鹽吊出D鮮果原味, 最後淋番D賓治果汁埋尾, 撈兩撈就搞掂喇.. D人都話好睇又好食啊.. 突然間好admire自己既即興創意 -- 材料搭配唔在講, 個名取得就已經係霸氣十足, 贏盡九條街啦.. 哈哈!!

24.09.2006 | 偷得浮生兩日閒

星期六日去邊, 有乜野做?? 留係屋企度冇野做..

其實覺得有時留係屋企, 做番D平時冇乜時間可以做既野, 都真係一種享受黎架.. 例如訓到「皇施百晏」養足精神, 跟住打掃層樓得乾乾淨淨舒舒服服, 跟住落街吃碟明爐燒味飯搭杯冰凍檸茶, 跟住係超級市場推住架車仔埋野, 跟住懶係梳化上好peh咁煲劇, 跟住瞌個靚晏覺, 跟住擘大眼倒頭再瞌多round, 跟住親自落廚整番味攔手小菜細細品嘗, 跟住沖個靚涼敷個面膜, 跟住再懶係梳化上睇電視, 跟住上上網同老友chat下.. 嘩, 呢D咁「奢侈」既事平時邊有心邊有力去做啊??

偷得浮生兩日閒.. 大概就係話咁既享受, 咁既奢侈時間, 咁樣既pamper自己.. 冇錯啊, pamper自己啊..

22.09.2006 | 動動腦筋, 猜猜謎語

weekend來臨喇, 不如大家黎猜猜謎語啦.. 唔係好難既, 動動腦筋好易就會估到架喇..
  • 究竟係邊一個字人人都會讀錯架??
  • 邊一種水果每次出親街都會唔記得返屋企架??
  • 點解三文魚刺身同吞那魚刺身係街度碰到面都唔打聲招呼啊??
  • 數字3係街度行下行下, 突然間翻左兩次筋斗, 行前十步, 佢又翻多兩次筋斗.. 估個成語丫..
  • 龍躉先生同花枝小姐隔住道門, 但係點解龍躉先生猛咁敲門, 花枝小姐 只係應門唔開門咧??

21.09.2006 | Medley..

寫緊呢個post既時候係聽緊Sammi既《粉紅色的神奇女俠大戰灰色的非男非女》.. 好盞鬼既歌名, 好玩野既一首medley.. 其實一向以來都好enjoy聽medley串燒歌.. 但係就要睇整首既流暢同埋銜接, 再加上究竟mix得夠唔夠放.. 唔係話一乍歌撈埋一齊就叫做medley喎, 點都要靠個編曲賜予生命, catch到每首歌既精髓, 都好講究功力架.. 上個年代比較有代表性既非啊Lam既《十分十二寸》莫屬啦, 每次去K唱呢首實唱到氣甩.. 近期既就有基仔唱到街知巷聞既《勁歌金曲》啦, 個個都爭住唱到欲罷不能.. 咁講到medley, D演唱會上又點少得一連串既medley啊?? 40歲歌手林憶蓮演唱會上長達20分鐘又唱又跳毫不氣喘既Diva Dancing Medley, 全館起立, 都果真令人屏息啦.. 所以話咧, medley的確係可以帶動氣氛, 如果再配埋個霸氣型爆或者騎哩盞鬼既歌名, 我覺得真係好掂..

18.09.2006 | 潮騷

一向一來都欣賞藍奕邦呢個唱作人.. 果日行行下街無意中發現佢既最新大碟, 於是就毫不猶豫咁就買左落黎.. 成張大碟用左stricking pink做主題顏色, hmmm OK, 或者要夾個《潮騷》大碟名呱?? 一手包辦所有13首曲, 果然才華洋溢.. 雖然係話唱功仲可以改善, 但係始終係自己寫既歌, 點都係唱得游刃有餘, 聽起黎都覺唔錯既.. 聽藍奕邦D歌其實可以發現一點就係: 佢D歌都畀我一種好積極向上既感覺, 可以完全好放松咁一take過聽晒全張碟.. 其實一張專輯唔須要一定格硬鍥個概念既, 但求一路順暢聽得舒服既話就係好正架喇..

個人喜歡《蓬萊》原來你信有愛你就有愛/心思比世事應該更精彩, 《烈》當所有大城無詩意/所有馬路無天使/只要願意/愛上你這麼容易, 《盲年》全部美麗就在盲年/即使伸手不見/信就能一起上演..

注: 潮騷, 日本語, 浪潮衝擊海石所發出的聲音..

15.09.2006 | 小旋風

最近開始嘗試準時返工.. 咁就試過有幾次畀個同事係條街都撞到, 係佢撞到我唔係我撞到佢.. 點解咁講咧?? 因為我習慣「殊」一聲咁一路向前行, 好focus咁就唔會四圍望.. 除非係你叫住我啦, 又或者咁好彩你係我面前經過, 如果唔係我實唔會發現你既存在.. 所以個同事就係遠處見到我, 但係見我一支箭咁嗌都嗌唔切.. 結果我到左office成十分種後, 佢先至姍姍來遲咁話我知頭先係條街度撞到我.. 就因此畀左個「小旋風」綽號我喇..

所以以後當你係條街都撞到我, 而我又當你透明, 千祈唔好以為我對眼生係個頭頂度唔識你啵.. 其實我係見你唔到咋..

12.09.2006 | Feminism 女權主義

If the world is totally controlled by feminism.. 女權當道, 圖文並茂..



** Disclaimer: Re-post of artwork from chain email not representing my standings 聲明: 圖片轉載自連鎖電子郵件, 並不代表本人立場..

10.09.2006 | 沙律

都唔知係邊位仁兄發明沙律呢樣野, 真係要歌頌佢既智慧.. 其實沙律真係冇個版畀你跟, 你可以天馬行空任憑你既創意去整, 又可以好講究各種材料既配搭去整, 又可以好跟當時個mood去整, 更加可以好鬼是但咁落晒全部材料撈佢一撈咁整.. 無論點整都稱得上係沙律一味(味道好壞令計)..

而我就雖然屬于好鬼是但個只, 不過是但得黎又確實會講究D材料夾唔夾既, 都食得落肚架.. 最近為左收下身, 實行要遠離 carbohydrates呢個魔鬼, 所以沙律就變成個幾好既alternative喇.. 懶懶地求祈切紮romanian lettuce加幾粒cherry tomato halves開罐水浸tuna flakes最後再唧D咁多italian dressing全部撈埋一齊.. 輕輕鬆鬆簡簡單單好enjoy咁, 唔駛幾分鐘就一份美食盡在眼前喇.. 至緊要係冇油煙低卡高蛋白質丫嘛..

08.09.2006 | www.engrish.com

無驚無險又到星期五喇, 係www.engrish.com度搵到D笑料, 輕鬆下啦..
So am i allowed to get in??
咁我係入得唔入得啊??
Yaaa, i would be very very furious if someone farts..
有人放屁屁既話, 我都會好「撞火」架
Ooooh, i think my saliva is too little to totally lick my car..
我驚舔完部車之後條舌頭會抽筋啵.. 唔舔得唔得啊??
I had a hard time digesting this menu, and the food perhaps..
嘩, 譯得好高深啊.. 劍橋英史文學係畢業架??
Well, then press it if you do not want to get hurt..
玻璃點會受傷啊?? 咪當我傻仔至得架..
*********************************
and... the best of the best..
壓軸呈現.. 極品中之極品!!
Warning: never come back again..
記得千祈唔好再返黎幫襯喇..

06.09.2006 | 當呢個世界冇來電顯示..

剛才接到個call, 把聲好熟悉但係霎時間又醒唔起係邊個.. 因為個來電顯示係unknown, 跟住佢又冇話低係邊個就一輪嘴咁打開個conversation喎.. 結果好開心咁傾左幾句之後就收線喇.. 之後就回一回神, 絞盡腦汁諗下頭先我究竟係同緊邊個friend講電話啊?? 左諗右諗, 終於醒起--原來係佢.. 哈哈!!

我諗我應該係太過依賴來電顯示, 往往收到call就必定望望係邊個call黎先.. 依家就因為係用緊roaming, 所以全部來電顯示都係unknown.. 真係要難倒我去認人把聲囉.. 下次各位若來電, 唔該先報告下閣下大名丫.. 如果唔係我會好lost架..

05.09.2006 | 夜色無邊

如果話呢張相係由我間房度影出黎既, 你信唔信啊?? 哈哈.. 講下笑嗟, 邊有咁靚啊?? 張相係尖沙咀星光大道影既.. 不過話是話丫, 我間房的而且確係可以好清楚咁望到中銀大廈, IFC 同埋Central Plaza架.. 如果你唔知係邊幾棟, 張相由左至右至高尖果三棟..

hmmm, 眨眼間原來我係香港都兩個幾月喇.. 迎著了中銀競賽, 匯豐燈飾給你剪綵..

03.09.2006 | Ringtone

上兩個星期買左部新手提電話Samsung E900可以播放mp3, wma之類既.. 終於可以撇甩以前部手機D普遍到唔可以再普遍既midi鈴聲喇.. 係條街響起, 隨時都有幾廿個人以為係自己既電話響啦.. 所以以前部機我都係set左去silent mode架.. 家下唔同啦, 可以用自己personalized既鈴聲喇.. 早幾日裝左個software可以edit我辛辛苦苦儲落黎既mp3, wma.. 咁就自己DIY搞左幾只, 其中一只我extract左《本色》前邊個過門音樂.. 跟住就bluetooth(係bluetooth啊冇錯)去部mobile作鈴聲.. 電話一響, 簡直係型到爆啦!! 真係唔可以唔佩服自己業余式既專業啊, 哈哈.. 其實又駛乜徙錢download鈴聲丫.. 自己DIY, follow your own style, trust your own taste咪幾好??

31.08.2006 | 詞不達意 Communication

最近愛上了由瑞典樂隊The Cardigans吉它手Peter Svensson寫既呢一首歌.. 英文原版由佢自己填詞, 主音Nina Persson唱出, 收錄係2003年 《Long Gone Before Daylight》大碟 .. 中文版由小寒填詞, 林憶蓮cover係2006年最新《呼吸》大碟裡邊.. 兩首詞都寫得好靚, 歌都唱得好內斂好好聽..


詞不達意
有些人用一輩子去學習
化解溝通的難題
為你我也可以
我的快樂與恐懼猜疑
很想都翻譯成言語
帶你進我心底
我們就像隔著一層玻璃
看得見卻觸不及
雖然我離你幾毫米
你不會知道我有多著急
無心的坐視不理
我尷尬的沉默裡
淚水在滴
我無法傳達我自己
從何說起
要如何翻譯我愛你
寂寞不已
我也想 能與你
搭起橋梁
建立默契
卻詞不達意
在你的盲點裡寸步不移
不論天晴或下雨
陪著你悲傷歡喜
你難道從來不覺得好奇
你身旁冷清擁擠
我一直在這裡
不說一句
我無法傳達我自己
從何說起
要如何翻譯我愛你
遺憾不已
我也想 能與你
搭起橋梁 建立默契
我必須得先看明白我自己
翻譯成一句我愛你
我也想 能與你
搭起橋梁 建立默契
卻詞不達意
詞不達意


Communication
For 27 years I’ve been trying to believe and confide in
Different people I’ve found.
Some of them got closer than others
Some wouldn’t even bother and then you came around
I didn’t really know what to call you, you didn’t know me at all
But I was happy to explain.
I never really knew how to move you
So I tried to intrude through the little holes in your veins
And I saw you
But that’s not an invitation
That’s all I get
If this is communication
I disconnect
I’ve seen you, I know you
But I don’t know
How to connect, so I disconnect
You always seem to know where to find me and I’m still here behind you
In the corner of your eye.
I’ll never really learn how to love you
But I know that I love you through the hole in the sky.
Where I see you
And that’s not an invitation
That’s all I get
If this is communication
I disconnect
I’ve seen you, I know you
But I don’t know
How to connect, so I disconnect
Well this is an invitation
It’s not a threat
If you want communication
That’s what you get
I’m talking and talking
But I don’t know
How to connect
And I hold a record for being patient
With your kind of hesitation
I need you, you want me
But I don’t know
How to connect, so I disconnect
I disconnect.

30.08.2006 | 呼吸 Breathe Me

引頸長盼既呢一張全新華語大碟, 果然冇令我失望.. 有既話都應該係最後plug落去既兩首K式台灣情歌, 覺得係張大碟入邊格格不入, 可能係考慮到市場銷量既問題呱.. 感覺上成張大碟既製作都好新派[好《S/L》既鋪排], 憶蓮做左很多以前未有既曲風[好《鏗鏘玫瑰》既嘗試] .. 聽完整張大碟之後, 唔知點解硬係覺得佢係度盡顯Diva風范, 實行用功力同埋天后架勢狠狠咁送畀當今樂壇好多女歌手一巴耳光..

體驗情感裡的起滅磨煉, 品味愛戀中的氣味.. [一個人/面對面/日子/詞不達意/南方的風/放開手/箴言/要不要/呼吸/斷線/相信/玩伴].. 本人誠意推介三首唔同風格既《日子》《詞不達意》《放開手》..

28.06.2006 | 重見天日

唔覺意咁瀏覽到http://comebacktolove.blogspot.com.. 裡邊post左幾個80年代重見天日既MV, 果然係極品中既極品啊..

  • 葉德嫻《我要》 濃妝艷抹, 發姣發燉, 癲妮姐七情上面, 永遠都咁正..
  • 阮兆祥《我心深處》 (和聲 : 彭羚) Rock-In最勇既投資, 為有聲冇樣既祥仔出了2張碟, 口腫面腫扮文質彬彬,仲有泳褲背泳look, 勇!
  • 李麗蕊《小妹妹日記》 同樣腫過豬仔包既阿蕊, 扮學生妹,青春迫人踩單車,MV製作簡陋,係九龍塘馬路旁公園仔拍,行行企企,真係非常是但..
  • 太極《紅色跑車》 欣賞重點係女主角吳君如,扮香艷神秘艷女郎,嘔十次!!!
  • 林憶蓮《愛情I Don't Know》 扮可愛日本妹都OK;扮在太空飛然後跌落張厚墊都OK;挪刀切西瓜,哈哈哈哈哈..
  • 夢劇院《狐狸先生的尾巴》 好想知邊個為李敏同劉文娟執形象? 嘩,靚到咧,鴛鴦色手套,仲有那些手勢, 舞姿和表情,Twins隨時都畀佢地比下去啦..
  • 黎姿《白恤衫》 個MV好多造型,又扮藝伎,又著宮廷裝,又排勁舞,好似賣廣告咁認真.. 重點係欣賞懶可愛既男主角古巨基..

各位, 係唔係好正啊???

26.08.2006 | 新居

頻頻扑扑成個星期, 今日終於搬入新既apartment喇.. 同個新加坡同事好逼夾咁share左成兩個月一人式studio, 今日開始終於可以有D私人空間.. 地方雖然唔大, 但係麻雀雖小五臟齊全, 好有家既感覺囉.. 其實成世人都未住過30樓咁高, 窗外望出去一片居高臨下既感覺.. 間房遙對IFC同埋中銀, 而且仲望到少少海景咁「個濟」添.. 不過依家都仲有好多濕碎野要搞, 但係將就住住先啦, 求其有張舒適既床就夠啦, 何況我都係住住兩個幾月嗟..

24.08.2006 | 嚇??

早幾日前返去KL, 係KLCC一間餐廳食野, 個waitress竟然問我「邊度黎架??」.. 我當時真係愣左一陣唔知點答佢好.. 我就話佢知我係local啦, 結果佢有D驚奇咁話返我知佢以為我係外國遊客.. 嘩, 大佬.. 我係KL食左卅年米, 著左咁多年短褲, 踢左咁耐拖.. 果次都係第一次遇到咁天方夜譚既事.. 惦睇我都係陀地一個啦, 係嘛?? 可能我話我由香港飛返黎度假 (注意: 係飛黎度假, 唔係飛黎度假) 佢都會信十足架啵.. 哈哈, 真係可愛既小妹妹..

22.08.2006 | 假期結束

硬係覺得返黎KL短短兩三日好唔夠喉.. 真係有好多野要做好多人要見, 而且總係覺得爭咁D野係未完成咁?? 如果可以留多兩日你話幾好咧.. 哈哈, 不過都係時候清醒喇, 假期永遠會結束, 現實永遠冇盡頭.. 再過幾個鐘就要飛返香港啦, 都係時候收拾心情架喇.. 突然諗起林夕寫畀王菲既《假期》呢首歌..

燦爛假期結束, 無法讓節目延續..
隨時預備假期結束, 仿彿趕上學鐘聲宣佈一切又回復..
總算呼吸過一口空氣, 這世界將會多美多美多美..

20.08.2006 | 盡興

今日約左班朋友睇戲唱K食飯直落, 真係好耐都冇咁盡興過喇.. 睇左齣戲《CLICK》, 原先都對佢冇乜expectation架喇, Adam Sandler又咪係一般既胡鬧?? 結果出乎意料之外, 由開頭既搞笑胡鬧漸漸帶入探討親情既深入鋪訴, 睇過之後都真係有D啟發性架, 都真係唔錯既一部電影黎架..

睇完戲就緊接Redbox一役, 昔日同小李叱吒K場風雲涌現既地方, 今日竟然淪落到咁冷清既場面, 怪都係怪佢以前獨家生意太過囂張啦.. anyway咁耐冇唱K, 今次果然一解K隱, 雖然唱功大大退步, 但係其實都志在個過程嗟, 係好enjoy果種啵..

最後一繫晚飯, 其中一個friend帶左我地去食粥底火鍋.. 好耐冇打邊爐喇, 今次個粥底火鍋都幾特別, 係用滾粥黎灼熟D野架, 而且個粥底清甜不溜, 配料又新鮮, 份量剛剛足夠.. 所以食得好滋味好滿足.. 食完過後就傾左成個仲偈先至拍拍屁股走人..

今日果然好盡興好enjoy, 多謝晒喇個位朋友..

18.08.2006 | 這麼近, 那麼遠..

喺香港做嘢都成兩個月喇, 今日終於有機會返馬來西亞break break佢喇.. 到步後由機場直飛市區, 第一間事就係drop by公司遞上啲文件.. 可能離開了一段時間, 竟然對之前差唔多日日到嘅地方感到陌生.. 其實唔完全陌生, 就係霎時間眼前一切好熟悉, 但係個腦就hesitate咗下先至適應返嚟.. 搞完啲文件之後折返屋企, 竟敢喺個車站搞錯咗個方向, 要停低諗諗兩秒鐘.. 到咗屋企, 第一個感覺就係突然覺得好大好多空間, 有些少唔習慣咁大嘅空間感, 始終自己間房都已經係香港apartment個客廳加埋個飯廳咁大啦.. 不過一切都係虛像嚟, 好快過後一切又變得很好熟悉好親切喇.. 所以個「感覺好遠但其實好近」嘅感覺都只係一瞬間嗟, 家始終係最好嘅..

14.08.2006 | 一個人

也許是我太敏感
總是在問最近是否有點悶
清早直到黃昏
有多個小時動人
什麼都擁有卻想別的可能

也許是我太遊魂
總害怕自己變成一個人
大街走到大門
有多段故事發生
我算不算是幸福的人

我只想要好好過一生
也想對自己更誠懇
才享受偶而一個人

11.08.2006 | 突然之間…

突然間覺得自己好肥, 接受唔黎既肥
突然間覺得自己搵唔番以前對工作果種衝勁同魄力
突然間覺得自己冇乜人生目標同方向
突然間覺得自己過於安于現狀, 對於未來冇乜展望
突然間覺得自己好唔積極, 好唔進取
突然間覺得自己好冇恆心, 的唔起心機
突然間覺得自己好多時得過且過, 冇乜規劃要求
突然間覺得自己一無所長

突然間覺得自己..
應該係時候靜心細想, 趁一把年紀之前積極做番D野
灰色背後, 就係一片雨後陽光

10.08.2006 | 死喇, 真係肥左..

真係唔覺唔覺, 最終發覺自己真係肥左, 唔係話一兩磅果D啊... 平時都冇乜點量體重, 結果前日突然間企上個磅度.. 晴天霹靂咁竟然去到一個我難以向自己交代, 接近我巔峰fat時期既磅數.. 又係既, 最近都發覺以前鬆鬆地D褲著落都窄窄地喎.. 條腰係咁意都唧得出寸幾兩寸肥腩肉啊陰公.. 唯有一聲嘆息..

好似提過自己要控制下好多好多次既喇.. 但係就次次衰犯賤的唔起心肝, 抵擋唔住零食誘惑,又疏于操fit自己.. 真係乞自己憎啊!!! 突然間, 好掛住個好朋友「借粒米」.. 當年佢幫我係三個月之間由fat變fit架.. 但係宜家, 我由fit變返fat, 真係愧對佢啊.. fit 同埋fat係唔係一線之差我唔知, 但係要飛返巔峰fit就真係好艱辛囉..

08.08.2006 | Shopping...

小君係個blog度提到個購物嘉年華.. 好多人覺得shopping係一種享受一種樂趣, 但係shopping背後其實都隱藏住一D煩惱架:-

(1) 突然間唔知係邊度撒出來既人群, 擂埋過黎好興奮咁同你爭住買同一款衫.. 於是你就上下打量佢兩眼, 覺得橫睇掂睇你理應會著得好睇佢十倍.. 於是乎就決定放棄, 無畏同佢一般見識.. 費事有日唔覺意咁係條街度同佢唪唪聲撞衫撞到正丫嘛..

(2) 好唔容易物色到款幾合心意既, 結果左搵右搵, 硬係得個細兩碼同埋大三碼.. 唔咁心之余就諗住不妨一試細兩碼件, 話唔定著上身掂咧?? 就咁排左15分鐘隊等到間試衣室, 結果發覺事實就係事實, 撐唔落就係撐唔落既啦..

(3) 你尖銳既潮流觸覺話你知, D特價貨品應該係你一年前就應該著過既款色.. 稍為起眼, 稍為潮爆既就往往New Arrival, mark-up到鬼咁貴又冇折頭..

(4) 終於係咁意買左件衫, 唔係因為特別中意, 而係因為佢比平時平好多.. 而且總要畀個交代自己, 唔好空手而去架.. 返到屋企, 興致勃勃咁係面鏡前左閃右閃, 結果最終索性擺埋一二角, 都係著返D舊衫順眼多D..

後記: shopping都係種學問.. 都真係要挾對時間同運氣架..

07.08.2006 | 滚!!!

好鬼鐘意林夕填既呢首詞, 雷頌德既曲都唔錯, 篇曲都好配合整個歌詞既意境.. 第一次聽到開頭幾句, 仲以為係《I Will Survive》譯曲, 覺得好核突就冇繼續聽下去.. 但係前幾日無意中聽到成首歌, 覺得幾正喎, 搞到最近好鬼鐘意呢首歌, 腦海不時浮現“你爱滚 不配做人 爬出去”呢一段.. 我親愛既K友女士們, 麻煩學學到時實要震撼飆歌喇啵.. 哈哈!!

《滚》 梁汉文x杨千嬅
女:你控诉我 接吻接上瘾 密密外遇 令你很痛恨
女:你呷醋呷上瘾 胆敢去讽刺我 不愧是女人
男:平时和人 如何寻开心 捏着浴巾 去拥抱别人
男:苦苦的哑忍 离开你
合:没要紧

女:你作个证据 再对我教训
男:和他搞公司 是你虾我笨
女:我放弃奋斗 你至安心
男:跟他几点钟 方有着快感
女:堂堂男人 别太过份
男:如何缠他 我当顾问
女:何必于一起 没半点信任
男:三天不见了 谈何被信任

女:睡就睡 男:你作对
女:你喝醉 男:请不必屈我喝醉
女:梳化都给你割碎 男:全都因你衰
女:睡就睡 男:你说对
女:你撤退 男:跟他好一对爱侣 我走开你没负累
女:请你滚 滚出去
男:你爱滚 不配做人 爬出去
合:鬼上身 赶不退
男:我有信心 不怕行雷
合:看心虚会是谁
女:你去  男:认罪
合:然后看死你落泪

女:从未了解你   男:我偏太纵宠你
女:我也太纵你   男:你当我已死
女:别日夜在妒忌  男:假得你
女:我也有吻过你  男:是为着好奇
合:天都知 你与我 谁人有理
男:天天想你    女:才叫你妒忌
男:彼此躲避    女:自卑的你 日嘈夜嘈 调情亦无味
男:终于嘲笑我 我爱你不起

男:和人爱吧抱吧吻吧叫吧去吧舞吧 还是算吧
女:酸吧苦吧哭吧饮吧汤吧癫吧 别要醒吧
男:早已输了不怕不怕不怕不怕 随便对他笑我如何小家 
合:咒吧
女:你不化 男:憎你 憎我 惹起对骂
女:讲真 因你极小家
合:你使我羞家 羞家 真羞家

女:再见 男:不见
合:谁又有空再受罪
女:再见 男:分居
合:无谓吻伤我味蕾

02.08.2006 | 潛意識的自然反應

尋晚同個同事一齊去食晚飯, 係間牛腩出晒名好食既茶餐廳.. 咁我就叫碗比較大份既, 個同事就要碗普通份量既啦.. 過後個侍應捧埋過黎既時候, 猶疑左陣.. 結果佢就好潛意識咁將原本屬于我碗比較大份既端係個同事面前, 而將普通份量既端畀我.. 於是我地就自己落手將碗面畀返對方, 跟住就下個結論:「個侍應一定係睇個身型黎做判斷既喇」.. 我個同事都真係幾大件架.. 都唔知要戥佢覺得好笑定係戥佢覺得激氣好..

01.08.2006 | 十年前..

十年前高三理(一)班合照.. [揾唔揾到我??]

見小年係個 blog 度貼過兩張高中時期既相, 覺得好抵死啊.. 不過好彩佢始終冇將我以前副尊容公諸與世, 因為我記得曾幾何時警告過佢唔好搞埋D咁既野, 算你識做.. 睇返以前D相, 尤其呢一張就更加經典, 諗返起好多當年既事情.. 講真啦, 高三果一年其實係我過得最開心最難忘既一年黎架.. 如果你都係幅相度, 你又會諗起乜野咧??

小年, kamkui, 沛淫, mark, botak, chuan, pek, bobby, i'm a girl, i'm a woman, susu, 宏爺, 草上飛, 癡線, 阿山, 老爺忠, 豪哥, zebra, 犀牛, 阿lin, bolok, 枝枝, 阿良, 阿牛, 維偉, 曉君, 筱婷, 徐志豪, 睿建, 古子健, 傳權, 阿鳥, 范國良, 翁詩仁, 韋震雄, 子佳, 毅偉, 秋娣, 長夷, 冠延, 玉堂.. 仲有原本應該係入便既小君.. 我記得晒每個人既名啊, 算係唔話得呱??

31.07.2006 | 混淆

試過有次係個商場部lift入邊, 睇到有個人匆匆忙忙咁行埋過黎想搭lift啦.. 就諗住日行一善hold住道門等埋佢啦.. 點知道門好唔聽話咁繼續閂埋.. 結果四目交流,佢眼神好似話我知「有冇搞錯, 爭兩步都唔等埋」, 而我就一副唔關我事部lift唔等你既樣回應.. 終於道門合埋, 我望望手指原來自己先頭係「急不可待」咁按住個[><]掣喎.. 當時我即刻覺得身後好多對眼係度望住我.. 其實我都唔想架, 真係無心之過黎既喎.. 我個樣唔似咁黑心係嘛?? 就係每次搭lift都會被個開門掣同個閂門掣搞亂.. 或者如果果兩個掣係用文字label既話我就完全冇問題, 但係好多時候的lift 都係用符號黎label開門掣同閂門掣.. [><]代表閂門 [<>]代表開門.. 第一眼望落去我係絕對須要時間去確認呢兩個掣架, 個腦冇咁快synch到一眼睇到既野丫嘛.. 不過我諗安全之計都係企遠D掣穩陣..

25.07.2006 | 經典

翡翠台播緊最新中國版《神雕俠侶》, 硬係覺得睇唔出個味道, 可能係廣東話配音既關係呱?? 始終覺得八十年代劉先生同埋陳小姐果部至經典.. 根住呢個最新版本主題曲竟然揾劉生重唱當年經典《情義兩心堅》喎!! 嘩, 唔係丫嘛?? 點同原唱張小姐比啊?? 真係戥小春激氣啊..

提到經典, 真係唔可以唔讚嘆八十年代武俠劇集D 主題曲啊.. 尤其黃霑顧家輝加羅文甄妮呢個完美絕配.. 曲詞就好似萬馬奔騰咁氣勢澎湃, 歌者就好似揮刀耍劍咁鏗鏘有力.. 再聽返《世間始終你好》同埋《問誰領風騷》呢兩首.. 果然令人熱血沸騰!! 突然間諗起係K度同我合唱呢兩首歌既K友們.. 好 -- 經典..

24.07.2006 | 成長的回憶

最近差唔多每日都會係有線電影一台睇到部星爺既電影.. 不知不覺間, 星爺其實都拍過好多無厘頭作品喎.. 記得以前一有佢電影, 實行夾埋一大班扑飛捧場.. 跟住就懶鐘意咁抄返D電影情節高談闊論一番, 仲引用電影入邊D經典對白黎開玩笑..

睇番起D電影, 諗番起好多以前成長既點點滴滴, 的確好令人懷緬架.. 十幾年來, 的確經歷過好多事情.. 然而細細回味, 無論係遺憾又好, 慶幸又好啦.. 始終都係成長既回憶, 再加上經過歲月品釀既友情就顯得可貴啦.. 所以應該要好好珍惜既..

係度要向所有同我一齊成長, 直到現今都仍然同我保持緊密聯繫既老朋友致謝..

19.07.2006 | 係真唔係啊??

尋日去灣仔一間馬來西亞餐廳食晏.. 其實都唔expect有乜驚喜架喇, 但係就真係好想試試到底係點囉.. 結果去到都滿座, 須要等位等成10分鐘.. 就係出便等位既時候, 就順眼睇睇掛係度既剪報.. 係著名食家蔡先生係芒果日報既一篇評述.. 評得都幾中庸啦, 但係就有兩點我覺得好搞笑, 大概係咁:
  • 呢度既油酥煎餅 (Roti Canai) 連係大馬都食唔到咁好味架..
  • 呢間餐廳成日都有好多大馬領事館人員黎幫襯架..

結果經我分析, 個油酥煎餅應該係localised迎合香港人口味, 所以大馬埋食唔到囉.. 至於成日都有好多大馬領事館人員黎幫襯, 咪就係因為個領事館係正隔離街嗟嘛.. 不過都明白D美食評述點都帶D宣傳味道既.. 點樣都好啦, 永遠係地道既好..

10.07.2006 | 榨到..

講個故仔畀你聽啦..
「話說從前, 有個細路, 佢好唔聽話.. 結果, 第二日佢死左..」

個同事突然講個故仔畀我聽.. 短短廿個字, 真係笑到趴地..

07.07.2006 | 絕句

有個同事係佢個MSN既personal message度寫左訣野.. 實在令我深感震撼:
朝若佳偶暮成空
淚流似雨憶成瘋
緣去方知鳥飛盡
嘆說月老未願從

果然絲絲入扣, 道盡好多人既剌心之處啊, 好句好句.. 突然令我諗起另一首詩:
美人捲珠簾
深座顰娥眉
但見淚痕深
不知心恨誰

04.07.2006 | 今日冇膠袋喎

今日放工後興致勃勃咁同個新加坡同事去百佳超市買野.. 見佢好興奮咁掃左好多野落個推車度, 諗住聽日可以煮番餐住家晚飯, 唔駛餐餐出便捱味精丫嘛.. 而且見佢每個價錢都除5除得好開心添.. 哈哈!! 點知排隊俾錢既時候, 個收銀員話「先生, 今日冇膠袋, 你自己有冇帶啊?」咁喎!! 霎時間果然係晴天霹靂, 不知所措, 成車野冇膠袋算拎返去啊??

原來.. 逢每個月第一個星期二咧, 都係響應環保既無膠袋日, 鼓勵市民使用購物袋既.. 如果須要膠袋既話, 一律征收五毫子一個, 將會變成善款捐俾兒童基金會既.. 知道個原因過後咧, 即刻覺得呢個實施都幾好幾有意義啵, 所以都唔介意俾一蚊要左兩個喇..

03.07.2006 | 一切由博命開始..

尋日係抵港後第一個星期日.. 理應我應該好寫意咁係銅鑼灣度全日行街食野.. 但係咧就剛剛相反.. 今日完全未踏出過apartment半步, 全日除左食brunch食晚飯睇下電視之外, 就只有懶係個床上訓覺喇.. 點解啊?? 因為前一晚冇訓到, 要補番下囉..

星期三到步果日check-in左大概四點幾就過去公司報到, 結果就無啦喇咁幫香港同事砌下個project既野, 係咁就做到成九點幾.. 跟住第二日星期四同樣繼續幫手又搞到成十點幾.. 跟住星期五就仲過離譜, 竟然獨自通宵到第二日星期二朝早七點.. 跟住返apartment度沖個涼閤一陣, 十點幾又返去公司繼續拼命到下晝六點.. 當時簡直係虛脫啊.. 真係無啦啦做左個笨好人俾人呷呵??

其實都冇人expect我咁博命既, 而係唔知點解當時既我突然間意志強勁, 好勝心強.. 誓要非完成手頭上工作不可.. 所以埋搞成咁囉.. 不過 至少都批准可以補番日假期囉.. Anyway始終我專程飛過黎香港都係做另外一個project既.. 宜家我係恢復正常「運作」concentrate我自己既project喇.. 就希望自己既project會係順順利利, 萬事如意啦..

27.06.2006 | 香港x香港

聽日就會飛去香港喇.. 今次一飛就要逗留三個月, 都算係破晒記錄最耐既一次喇, 不過每個半月都仲可以飛返黎一陣既.. 今次過去係要做一個 printing solution project, 係個保險公司黎既, 都幾大下架.. 宜家唔想諗咁多喇, 但求可以順順利利, 醒醒定定, 完完美美咁搞掂就OK喇..

我諗應該會好辛苦好 tense 呱?? 更何況宜家個 project 經已習慣 "government servant style", 你應該知道係幾咁有效率架啦.. 但係往好果方面諗, 今次確實係個好好既機會俾我學習, 俾我自我增值既.. it's a good exposure and experience after all.. 應該全力以赴面對新挑戰既..

22.06.2006 | 驚喜

事發之時應該係今日下午5時30分..

當時我係好忙碌好專心咁做緊我香港project既preparation既.. 突然間我老細失驚無神咁行埋過黎, 好嚴肅咁問我係度做緊乜野.. 我當場愣左下, 因為唔似佢作風啵, 佢從來都唔會過問既.. 誰不知啲同事就全部企晒起身, 捧住個蛋糕行埋黎我個位度.. 雖然都過左生日幾日, 但係都幾surprise同touched架.. 仲唔止咁噃, 原來仲有個好香港既新同事係同我同一個月份生日既啵.. Hmm, 你知你係邊個喇..

可能就係細公司既關係啩.. 人情味係濃啲, 工作環境係溫馨啲架.. 係度多謝大家百忙中部署既驚喜啊.. 個rich moist triple chocolate mousse cake 好正啊 (肥係肥咗啲)..

20.06.2006 | 守得雲開見明月

今日又係個特別既日子.. 20062006.. 咁2006年06月20日, 晚上20點06分你係度做緊乜野咧??

記得20:06 20-06-2006既時候, 我應該係同小春SMS 緊.. 係度恭喜佢終於搵到份新工喇.. 聽佢啽 宜家份工左都啽左成年.. 卒之都所謂守得雲開見明月囉.. 其實無論點都好啦, 至少可以轉個新環境, 可以學多D以前未有機會學既野.. 一切由新既開始, 點樣都會有衝勁同埋憧憬既.. 好過每一日死枯枯咁拖住個疲累既身軀去面對份令你完全不感興趣既工作啦..

我都係過來人.. 所以好明白小春宜家既心情既.. 係度祝福你事事順境啦..

17.06.2006 | 大日子!!!

點解呢個部落格叫做[SK/0617]咧?? 明眼人一睇就知啦.. SK係我個寶號簡寫, 0617係我生日日期.. 所以係呢個咁重大既一日, 就等我係我個場度表揚一下先..今日係我生日啊.. 咪話我唔提醒你啊.. 咪話你唔記得啊.. 仲唔噓噓聲留言祝賀??

ever wonder why is this blog named [SK/0617]?? well, if you are observant enough, SK is the abbreviation of my name and 0617 is my birthdate.. and hence on this great day, allow me to hereby announce a great news -- it's my birthday today!! warn you that i have just reminded you, and no excuse to forget to leave a birthday message down here..

15.06.2006 | 寓言故事 《放得低》

話說有隻驢唔小心跌落口枯井度, 於事乎就大聲呼叫求救.. 個主人聽見後立即去口井一望, 發現原來係隻老驢.. 佢話「原來係隻老驢, 費事救啦.. 口井都枯左, 不如就索性封左口井啦」.. 於是就開始慢慢剷D沙落口井度.. 剛開始隻驢當然係咁猛叫啦, 慘遭活埋啵.. 但係冇耐過後, 咦? 冇聲冇息啵.. 原來係隻驢抖落D沙, 等D沙慢慢累積, 佢就一步一步咁踏上個沙堆度.. 就咁當個主人差唔多快封好口井既時候, 隻驢已經可以活生生咁由口井度爬返出黎喇..

睇完有乜啟示啊?? 其實人生不如事情十常八久, 但係只要可以放得低既話, 都真係可以從中學習, 將不如事情化作推動力, 而達到絕處逢生架..

12.06.2006 | 不復當年勇..

尋晚同朋友去食日式自助餐, 係果隻幾出名S字頭既平民化日式自助餐廳.. 搬左黎呢個新地點, 個interior同氣氛都幾好.. 而且食物準備得都尚算充足, 唔似得以前咁, tempura 蝦同三文魚生一擺上檯就俾D耐心久候既食客一掃而空.. 坐得遠些少既人其實係好難發現原來間餐廳係有呢兩種食物架.. 哈哈!!

其實食物都算OK啦, 應該係志在食個氣氛嗟.. 眼前過百種美食難免令人食指大動既, 加上邊食邊聊, 其實幾enjoy既.. 不過今次個食糧就稱得上不復當年勇喇.. 同樣份量既食物以前都意猶未儘, 但係尋晚簡直係飽到覺得想嘔, 行部路都覺得辛苦果只囉.. 而且仲一路飽到返屋企添..

老喇.. 以前兩包即食面打孖上都未覺飽, 宜家一包未完都覺得飽啦.. buffet 呢家野我諗都係少食為妙, 費事最終俾錢受苦啊..

09.06.2006 | 仍需繼續, 仍需努力

趁我仲未認認真真投入工作之前, 都係先 blog blog 佢啦.. 覺得我一旦投入工作之後咧, 應該乜都會拋諸腦後架喇..

頻扑左三日, 終於又搞掂一個 case 喇.. 呢個週末都總算可以唔駛心掛掛喇.. 今日總算快快粹粹順順利利啦.. 可以安心開始另外一個 case 喇.. 係我去香港之前認真要好好搞靚呢一個 project 俾人接手.. 雖然話個project都差唔多埋尾, 但係我都仍需繼續仍需努力, 費事苦左個接班人丫..

哈哈, case case 聲好似律師打官司咁.. 大家唔好誤會, 應該係 production issue.. 如果你係一個software house 既 IT 人就應該明白究竟係點樣一回事喇.. 呢D真係我地IT界平常如食飯既問題囉..

08.06.2006 | 我返黎喇..

係個部落格度消失左成兩個星期, 今日終於又重臨故地喇.. 其實我唔係去左邊, 而係由印度返黎之後咧, 實在係有太多野要跟, 所以完全抽唔出時間寫blog.. 若果令到大家苦等, 在下實在過意唔去啊,哈哈.. 難道大家會咁渴望讀我既blog咩??

尋晚訓得唔好, 個腦袋一路係度諗住點樣solve個problem, 點樣做先至恰當.. 成晚應該係個腦袋唔「捨得」休息呱.. 宜家有D惺忪添.. concentrate唔到再加上遲D要去出client度, 所以索性留番聽日先做啦.. 趁機會blog blog佢舒展下自己喇, 因為都tense up左好一陣子喇..

希望一陣一切快快粹粹, 順順利利啦.. i'm very tired..

26.05.2006 | 娘氣沖天, 來者何人??

今晚終於的起心肝, 重回我gym的懷抱, 印度一遊十數日的確須要惡補惡補一下.. 結果一到步就俾我撞見到一個娘味十足既半老徐娘.. 嘩, 今次認真係好一個震撼人心既 邂逅啊.. 細讀以下描述之余請用你豐富既想象力..

其實都冇留意佢一身既打扮, 因為睇見佢粒頭我就已經係「驚」為天人果挺喇.. 先黎對墨綠色太空繡眉, 跟住一頭紫紅色長髮.. 哪哪哪, 戲肉黎喇.. 個髮型係後扎馬辮, 前額劉海三七分界, 完全梳起成個 sine wave 裝, 我估計最高點應該有成四寸半高.. 睇落十足似80年代阿梅姐帶領潮流個蚊拍頭咁.. 都唔知佢係娘暴定係潮暴??

哎呀, 咁娘氣沖天既一個人, 我恨不得可以映佢張相黎同大家分享分享下.. 正所謂百聞不如一見丫嘛..

25.05.2006 | 不再十八廿二..

終於由印度返到黎又返工喇.. 尋日早上一落機返屋企沖左個涼就趕住返工喇..

臨塔機前成日係新得里度逛, 晨早十點check-out就開始左我既sight-seeing.. 舟車勞頓, 烈日曝晒左成日大概成11:00pm先至飛吉隆坡.. 到達吉隆坡第二日06:50am, 成晚係架機度真係冇瞌過.. 所以返工時真既頭重重成個人矇惺惺咁.. 放工返到屋企沖完涼食完晚飯, 簡直成個人虛脫晒.. 坐係廳度睇電視唔到十分鐘, 就開始頂唔順睡魔既纏繞喇.. 擘大雙眼就會好自然咁自己慢慢慢慢閤埋.. 結果索性上房搵阿周生算喇..

果然係唔再十八廿二, 以前通宵成個星期絞盡腦汁, 勇赴考場都仲係龍精虎猛.. 但係宜家稍為通頂一晚嗟, 就搞到如斯田地喇.. 可悲可悲啊阿叔..

24.05.2006 | 神奇印度(XI) 完美句點

我返黎喇!! 終於為呢次意外既印度之旅劃上一個完美既句點.. 離家十數日, 雖然都幾enjoy今次個trip , 但係點都係覺得在家千日好既.. 其實大家唔應該將印度諗得咁差啵, 佢其實都有好多野值得我地去見識值得我地去體會架.. 不過宜家就好掛住我張床同埋一碗阿媽靚湯咋.. 哈哈!!

23.05.2006 | 神奇印度(X) 舟車勞頓

係印度最後一日.. 覺得累積的最多既就係路程喇.. 我諗大大話話都有成2000km啊.. 踏足印度金三角(德里-阿格拉-齋爾浦) 係我一路來好想做既事, 宜家無意中就咁實踐左.. 去玩果三日果然係舟車勞頓, 長途跋涉, 路遙顛簸.. 但係對於印度呢個地廣人多既國家, 其實我只不過係到過的咁多既地方嗟.. 但係對於呢次有個咁偶然既機會, 應該去既地方都去過, 應該食既都試過咯咯, 我已經覺得好滿足架喇..

22.05.2006 | 神奇印度(IX) 滾滾沙暴

印度一遊, 終於俾我體驗到風沙暴呢樣野喇.. 呢個沙暴果然係一絕, 好慶幸我當時係係架車度.. 雖然唔係親身體驗到, 但係親眼睇見出邊D情同景我會覺得如果我唔係車內既話, 實會企係度嗌救命啊.. 沙暴掛起既時候成個天都黑晒架, 眼前一片模糊可見D沙塵係風中狂飆, 出便D人都須要停落黎避一避.. 我諗呢場沙暴應該係好勁果級囉 (我係將D沙想象成雨黎睇), 但係個local司機就話好平常嗟.. 應該係我少見多怪呱??

21.05.2006 | 神奇印度(VIII) 流連忘返


聽講睇泰姖陵最佳時刻係晨早或者傍晚.. 所以今朝晨早六點鐘起程, 帶住即興奮又期待既心情準備一睹呢個聞名世界既七大奇觀.. 撇開一眾惹人生厭, 猶如冤鬼纏身既呃食冒牌導遊, 坐地開價既三輪車夫.. 呢個陵墓果然令人為之讚嘆.. 全白大理石建造, 宏偉壯觀背後隱藏一段愛恨纏綿既愛情故事.. 置身泰姖陵呢度凝望全白陵墓, 果然俾佢既媚力深深吸引住, 果然係聞名不如一見.. 睇相就睇得多喇, 但係身歷其境既感覺真係非筆墨形容.. (加上幾剌利既入門費).. 難怪我會流連忘返啦..

20.05.2006 | 神奇印度(VII) 美妙旅程

終於完成連續五日既training喇.. 開始我真正印度之旅喇.. 同旅館個旅遊檯面安排左個三日兩夜既印度金三角之旅, 由德里出發, 到阿格拉睇泰姖陵, 再到齋爾浦睇風之宮, 跟住再返黎德里半日市區遊.. 對於呢一次意外既旅遊, 真係滿心期待.. 唯一美中不足既就係自己一個人, 冇人作伴共分享咯.. 曾經話過要同阿波拉一齊遊印度既, 講下講下都冇乜著落, 最終變左我因公而得呢個機會.. 唔好意思啊, 波拉..

19.05.2006 | 神奇印度(VI) 忽然一黑

係印度, 原來停電呢家野其實係如同食野一樣咁平常既事黎架.. 第一晚黎到就領教三次短暫停電, 都幾驚人架, 想象下你一個人係個龍蛇混雜既夜晚獨自呆係間旅館斗士內.. 跟住training既時候都會無端端停電, 專心聽講既時候會突然眼前一黑, 只係聽見個trainer係度講野.. 不過好彩, 通常D旅館酒店機構都會有24小時後備發電機, 當停電既時候就會自動供應電流, 所以都唔覺有乜不便.. 之但係好多時候你會唔知究竟D電係由邊黎架喇..

18.05.2006 | 神奇印度(V) 路路通暢

差唔多每次出國旅行, 都會有輕微既「唔通暢」問題.. 但係呢一次黎到印度就恰而其反咁「路路通暢」喎.. 而且係一日早晚各一「路」添啵.. 哈哈!! 可能係冇肉清齋攝取比較多植物纖維, 又或者腸胃受唔起呢度既「衛生水平」而引致輕微肚瀉咧?? Anyway 至緊要係健健康康, 平平安安就得喇..

17.05.2006 | 神奇印度(IV) 咖喱天堂

係印度咁多日就叫左room service解決晚餐咁多日.. 因為自己一個人, 冇盯去又唔敢週圍亂食野, 再加上不宜係呢個龍蛇混雜地區一人獨自夜遊.. 其實D印度餐都真係幾好味啵.. 好多黎training既人接受唔到, 但係我就幾中意喎.. 再加上有小春呢個至激咖喱迷從旁提點send左個各式各樣must-eat咖喱列表俾我.. 呢幾日食得都好滿足, 每次叫唔同既野, 第一啖好多次都係美味驚艷.. 原本以為黎到印度實行減肥計劃, 但係睇怕都係凍過水, 唔好增磅實屬好事喇..

16.05.2006 | 神奇印度(III) 跌甩棚牙

今日稍為習慣左印度D交通震撼, 開始欣賞「一路風光」.. 一路上除左人多, 係大道邊露宿既人多, 售賣冰涼青檸水攤多之外.. 有樣野的確係令我跌甩棚牙, 就係隔幾十步就有個「公共廁所」.. 唔好以為咁衛生啵, 其實D所謂既公共廁所係專為男士們而設架.. D廁所係得個頂, 兩三個間隔同埋條渠仔, 係冇門架.. 所以大街大巷週圍都可以見到D印度男士光天化日咁係度射尿.. 有D仲企到好出, 認真係要洗眼啊..

15.05.2006 | 神奇印度(II) 馬路梟雄

今日開始為期五日既training喇.. 晨早起身book左個司機負責連續五日專車接送.. 第一日已經領教印度人高超駕駛技術喇.. 完全可以唔理交通安全, 橫行無忌咁左穿右擺叱吒大街小巷, 果然係膽識過人.. 道路初左D交通工具, 人力拉車之外, 仲有牛馬象驢穿梭.. 所以話咧D人認真係人獸爭路既馬路梟雄啊!!

14.05.2006 | 神奇印度(I) 龍蛇混雜



到步印度第一日正好踏正戌時.. 落機過關, 坐車離開機場, 一切都還可以, 直至到達酒店(應該係三星旅館).. 呢一區落正新德里市中心, 間旅館就係不知何處既一條暗巷度.. 成列巷都係D一二三星級旅館, 人流熙攘看似複雜.. 未到步之前已經做左至壞打算, 我會係呢個龍蛇混雜既地方度過我既印度之旅.. 不過不過神仙保祐, 雖然係龍蛇混雜區三星旅館, 間房的確又幾有五星級酒店feel,幾住得下人既..

12.05.2006 | 印度一遊

過兩日就會飛去印度新德裡喇.. 今次係因位要attend一個training, 係自己一個人單槍匹馬.. 心情有D複雜.. 其實嚮往到印度旅行好耐喇.. 今次終於有機會去當然係好期待啦.. 但係弊就弊係自己一個人咧.. 覺得一個人去到呢D咁個地方, 樣樣都要好小心.. 加上得到好多負面既勸告.. 難免對於衛生同個人安全有D顧慮囉.. 今次training後會自己extend多四日, 打算去德裡, 阿格拉同齋爾浦呢三個城市見下市面.. 今次感覺上就好似backpackers咁.. 對於嬌生慣養, 習慣舒適豪華旅行團既我, 的確係一個全新既考驗同經驗.. 不過都真係唔可以顧慮咁多喇.. 馬死落地行.. 應該輕輕松松好好享受呢個難得既機會既..

11.05.2006 | 不祥6, 神聖7

今朝同兩個同事傾閒偈, 提到6同7呢兩個數字.. 西方習俗普遍上認為6代表邪惡不祥, 7 代表神聖吉祥.. 所以避免係6月6日生世, 教堂通常要用7年建成咁.. 跟住其中一位提到古時西伯利亞人既6字係寫成w咁既, 咁我地宜家每日上网www咪豈不是萬事由惡開始?? 跟住又提到中文祿祿無窮, 祿同6同音, 咁係唔係代表金錢就係邪惡咧?? 不過最搞笑就係挪本地一間電訊服務公司開個玩笑, 間電訊公司英文名D字母調轉黎串, 竟然係6 a.m. 既意思, 咁係唔係表示間公司晨咁早就好像魔鬼咁敲詐我地D用戶咧??

照咁講, 我生日月份同日子合埋都有6同7呢兩個數字, 係不係叫做趨吉避凶咧?? 哈哈.. 呢D飯後話題各位睇過就算喇.. 因為我本人覺得係巧合多D囉..

10.05.2006 | 阿Sir我地跟唔到啊..

尋晚係間gym度跳左個cardio dance class.. 嘩, 個導師簡直就係越黎越變態啊.. 硬係中意教D高難度動作, 又彎身又挺直又轉圈又扭腰, 又要記腳步又要擺手勢又要趴地又要數拍子. 真係當我地同佢一個level咩?? 個class除左幾個高手之外, 大部份都跳得好鬼「輪儘」, 咁當然包括我自己在內啦.. 好多時候唔係慢幾拍, 就係企响度lost左個step眼定定望住導師.. 全場除左音樂同埋個導師係度嗌拍子, 就只係我地呢D跟不上既人無奈既笑聲..

雖然話係跟不上跳到一劈屎咁, 但係成個class其實都幾enjoy架.. 我覺得要自己記清楚全部steps又要孖得住個拍子已經唔簡單啦, 要跳得精彩既話就簡直係妄想啦.. anyway都係志在參與出番身汗嗟.. 阿叔,你仲諗住自己十八廿二咩??

09.05.2006 | 美味人間

搬黎新office後每樣事件都係好新鮮, 尤其係食呢方面.. 可能以前係間舊office每日都係樓下間商場內有限既幾間餐廳食晏, 對於呢一個新環境有幾間唐人茶餐廳十幾檔野選擇, 真係覺得好興奮架..

小李以前係呢一帶返工, 佢唔講我唔知, 經佢刁嘴一食, 原來呢度有好多好好味既野可以食架啵.. 干咖喱板面, 炒鬼刁, 炸年糕, 咖喱角.. 前兩者仲未有機會試, 後兩者試過番尋味.. 星期日小春專程由英國返黎, 本來打算買D咖喱角孝敬下佢, 但係怪佢冇口福, 去到時已經俾人一掃而空喇.. 可惜可惜..
始終同D商場內既餐廳比較起黎, 傳統茶餐廳確實係多左好多親切感同埋人情味架.. 譬如你永遠唔會係D商場餐廳度食到豬肉粉同埋叉燒燒肉咁啦.. Hmmm相信小年一定好羨慕喇, 哈哈..

08.05.2006 | 潮爆大妗姐

上星期六晚飲左場朋友既喜酒.. 成晚夜我諗最出位最令人意想不到既就係個大妗姐上台唱歌既環節喇..

呢一個就算係我見過咁多大妗姐之中最潮爆一個喇.. 先講行頭--金毛卷髮十足玉婆 Elizabeth Taylor 髮型, 全黑tube-top打扮上身釘晒閃閃珠片,外披艷紅斗篷大衣一件.. 簡直係徐娘半老風韻逼人果挺咧.. 佢先唱左首60年代歌曲賀對新人.. 跟住就落台行埋一邊..

咁當大家都好慶幸以為佢唱完之時.. 突然間音樂響起S.H.E.既《superstar》.. 初時仲以為邊位妹妹要上台獻唱.. 誰不知.. 竟然係個大妗姐把聲, 仲好有台風咁一邊唱一邊由一二角慢慢行埋個台上, 十足明星架勢咁.. 上到台上仲跟住chorus部份搖擺身體添.. 不過高音部份始終拉不上囉..

今時今日大妗姐除左須要通曉一般習俗禮儀之外, 仲要識得搞氣氛.. 唱歌助興就成為今時今日大妗姐既必做任務喇.. 而呢一個竟然仲識得出風頭添.. 果然犀利犀利嚇..

05.05.2006 | 世界真細小

尋日朝早係Masjid Jamek輕快鐵站等候同事一齊去client office度開會.. 等下等下既時候竟然俾我連續撞番三個舊同事.. 一個三年前劈炮唔撈, 一個兩年前劈炮唔撈, 一個仲繼續係間舊東家度撈.. 跟住開完會返到公司, 竟然難以置信咁撞到個舊client..

哇.. 乜呢個世界咁細小啊?? 好彩以前都冇同佢地有過過節.. 大家撞到正咪寒喧寒喧一番咁啦.. 其實就算十冤九仇都好啦, 始終大家都各謀高就咯, 話晒同事一場, 好好丑丑都應該問候兩句係嘛??

呢個世界冇緣既話, 擦身而過都唔覺曉.. 有緣既話, 真係隔幾耐都會俾你撞番架.. 所以話嗟, 「今日留一線, 他朝好相見」丫嘛, 尤其我地IT呢個小世界..

04.05.2006 | 01:02:03 04-05-06

01:02:03 04-05-06.. 亦即係06年5月4日凌晨1時2分3秒既時候你係度做緊乜啊?? 會緊周公周小姐, 褒緊長篇韓劇, 刨緊長篇愛情小說, 全神投入咁打緊游戲機?? 我應該係睇完場戲返到屋企, 沖完涼坐係沙發度睇報紙..

其實都冇刻意要係果一刻做D乜特別既野.. 只係後尾察覺到呢一個時間既巧合嗟.. 不過如果真係要刻意既話, 咁下個月06:06:06 06-06-06 都應該算係至經典喇呱?? 仲有11:10:09 08-07-06, 16:14:12 10-08-06 等等.. 其實有心去記得呢D特殊時刻既話, 到時候諗番起都既過癮既啵..

03.05.2006 | 老翻興衰史

今晚睇左場《不可能的任務III》.. 全球5月5日同步公映, 但係偏偏就大馬呢邊早佢兩日上映.. 講得好聽D就係重視大馬電影市場, 講得實在D其實咪就係因為怕左大馬翻版既猖狂..嗟嘛??其實都唔係咁悲哀既.. 尋晚場戲都好多人扑飛, 全場爆滿啵.. 大馬都仲有好多電影迷都係正版支持者黎既..

相比起兩年前, 其實大馬政府杜絕翻版都有既好既成績喇.. 兩年前我果區係KL出晒名既Wangsa Maju兩條街檔連檔高姿態咁大拋翻版VCD, 一年前變成係車站暗角低調流動兜售, 宜家變成鬼影不見一「翻」.. 的確都幾差個天同地喎..

不過仍然好羞家就係.. 本屬高檔既時代廣場(係大馬呢只, 唔係紐約或者香港果只)竟然有幾間老翻專門店喎!! 個商場管理層係唔係應該做D野啊??

02.05.2006 | 中環大廈

今日第一日係新office返工.. 前幾日身水身汗咁搬搬抬抬 packing & unpacking.. 今日終於可以正正式式, 舒舒服服咁坐番係度做野喇.. 以前800幾方呎屈10個人, 宜家有成2000方呎, 突然間一切豁然開朗..

新環境, 新氣象, 新事物.. 我間新office就係KL Sentral旁邊棟Plaza Sentral喇.. 好喜歡呢個地點, 因為夠中心, 又近我屋企, 返工搭LRT又快捷又方便, 而且附近仲有幾多食嗜可以選擇添.. 至開心搵到檔賣茶果同埋絕頂咖喱角既小攤口喇.. 哈哈.. 一件足以令小春欲仙欲死既絕頂咖喱角..

得閒又方便既話, 歡迎隨時drop by搵我食晏架..

28.04.2006 | 一切由新環境開始

今日開始packing準備搬去新office喇.. 下個工作日開始就會係新office返工喇..有少少期待, 因為新環境新氣象丫嘛.. 而且個新地點又近我屋企D, 每朝仲可以訓多十五分鐘添.. 哈哈..

工作咁多年做過兩份工, 不過計埋今次大大話話都搬過4次office喇.. 每次搬都好開心好期待架.. 可能我係一個容易對舊環境厭倦既人呱?? 又或者應該講我喜歡轉換新環境新氣象?? 唔知咧..總之係覺得有種鬥志重獲新生既感覺喇..

一切由新的環境開始, 一切由新的時刻開始..

27.04.2006 | 夜了..

夜了 明月夜空高照
夜了 星光點點閃耀
無邊夜色媚笑

夜了 寂靜四面纏繞
夜了 鐘擺繼續擺搖
時光靜待破曉

夜了 我說時候夜了
夜了 夜了…

26.04.2006 | 唔係啊嘛? 又大減價..

今日收到份Isetan寄黎既傳單.. 第一時間只有一個thought: 唔係丫嘛? 又黎大減價?? 發覺呢度無時無刻都有sales既喎.. 呢一個sales過後接踵而來又另一個sales.. 來來去去又唔係賣番同樣個野?? 上一次五折, 今次四折, 下次三折.. 雖然如此, 每一次sales都仍然吸引到大眾傾巢而出去fing錢既.. 最中意去乘熱鬧睇下D人點樣毫無節制咁洗錢, 佢地掃得開心我都戥佢地開心既..

將shopping譯成「血拼」的確非常貼切.. 因為D人真係有血有淚咁去拼命掃貨架.. 不過又唔好咁話人, 其實當自己有錢又睇中靚野既話, 都會不顧一切咁到商場衝鋒陷陣既.. 大馬人生成係咁怕執輸架喇, 如果唔係又何來咁多大減價嗟??

25.04.2006 | 四面埋伏

今日仍然好專注咁做野, 承蒙大家關心, 經過尋日嘅教訓, 我已經加倍謹慎保住自己嘅work喇.. 今日主題唔係講work.. 而係講做緊嘢嘅時候, 收到個朋友嘅短訊.. 佢話佢搭緊火車由香港北上廣州.. 自己一個OL俾成車廂師奶雞啄唔斷咁重重包圍住, 令到佢好唔自在咁大呼救命..

個情景令我諗起幾個月前我同樣send左個短訊俾身在倫敦既佢.. 我當時簡直比佢時運低廿倍有餘.. 因為我係俾成個車廂嘅印度人重重包圍.. 四面埋伏之下, 我仲要忍受陣陣撲鼻而來嘅椰油味同印度咖喱粉味.. 仲有係耳邊叱吒橫飛, 我一音未明既印度撬口話.. 係度話你知: 嗰日係Thaipussam, 我最罩忌搭LRT嘅一日..

24.04.2006 | 失而復“得”

今日好專注咁用左差唔多成日時間寫左份technical specifications,寫到欲罷不能咁滯, 收工時仲意尤未盡咁帶返屋企諗住寫晒佢添.. 返到屋企沖完涼, 食完飯, 嘆完報紙, 休完息.. 興致勃勃咁開番個document繼續奮鬥..

誰不知, 天啊!! 點解同上個星期既版本一模一樣, 先頭所寫既完全唔係度架?? 嘩, 大佬, 我難得星期一咁有心機做野﹐ 唔係咁玩我係嘛?? 靜心諗下.. 梗係自己keep得太多backup, 唔小心咁overwrite錯左啦.. 唉!! 好唔憤氣啊.. 不過又點丫?? 唯有重新再寫過囉.. 不過可能已經有左個頭緒, 再加上化悲憤為力量, 竟然只係用左個半時辰就將成份specifications完全搞掂..

實在有D不可思議.. 都稱得上失而復“得”-- 加倍努力有所獲得個得.. 正好印證我之前post過既一句話: you can’t go back and make a new beginning, but can always start from now and make a better ending..

21.04.2006 | 比上不足, 比下有餘

越來越覺得寫blog其實唔係件容易既事, 尤其係對我呢一種冇乜文學修養既人而論.. 要keep住每一日都有(至少) 一個post係個部落格度, 其實都須要好多好多既靈感+創作力+恆心+毅力+時間+心情等等等等.. 所以好敬佩小李姐佢可以一日早午晚夜各寫一次blog, 小李你的確係得既!! 不愧係部落界奇才啊.. 哈哈!! 不過話是話, 比較起小春咧, 我又的確好過佢六千三百七十五點二倍既.. 至少我唔係每三幾個月先至寫個post丫嘛.. 哈哈!! 算係比上微少不足, 比下無限有餘啦.. 都算係咁喇..

20.04.2006 | 一個可惡嘅安娣

尋晚搭輕快鐵果陣撞到個安娣.. 希望我係度可以用我有限嘅文字修養準確形容佢當時嘅所作所為..
列車到站, 佢就哪哪聲一支箭咁爭住行入車廂, 跟住就兩眼望望揀位坐.. 揀定喇行埋過去, 但係又覺得個位俾之前個乘客坐熱晒.. 又企番起身.. 跟住又兩眼望望揀位坐.. 哇! 安娣.. 你知唔知我係你後邊等梗架?? 你左揀右揀咁阻住我嘅噃..

OK, forget it.. 佢終於揀定坐係我正對面喇.. 跟住佢開口問我幾多點.. 咁我就話佢知七點搭四 (係啊, 我好記得當時係幾點架).. 誰不知佢問番我個時間準唔準喎!! 當時真係俾佢「榨」得冇聲可出.. 哇! 安娣.. 你唔該都冇句, 仲懷疑我先家你?? 喂, 我駛唔駛先家你啊??

喂, 安娣.. 如果你仲係風韻尤存嗰挺我怕且都會原諒你, 但係.. 我前世欠左你架??

19.04.2006 | 藝人部落格

發覺原來有D藝人都會寫blog既啵.. 心血來潮去左幾個報章刊登出黎既藝人部落格.. 揀黎有大馬R&B小王子同埋台灣原住民天后喇..

其實隨便望兩望者, 因為我始終認為佢地邊會有時間去寫blog既啊?? 亦都因為好奇佢地會寫D點既內容咧?? 未睇之前, 我覺得無非係用部落格黎宣傳下自己.. 但係睇左幾則之後發覺其實都唔係啵, 仲寫得好生活化咁啵..不過我唸最開心既應該係D粉士, 可以feel到同自己偶像傾偈咁.. 但係一大堆既comments藝人應該都好難有閑情一一去詳讀係嘛?

其實藝人都係人者, 佢地寫blog唔出奇丫.. 但係就要有誠意囉, 千祈唔好叫助手代勞啵, 因為咁樣係好虛偽好hurt閣下D粉士既啵..

18.04.2006 | 活在當前

星期日係屋企附近食早餐果陣, 突然間有個相士行埋黎我度.. 其實應該係話有個自稱係相士既人行埋黎我度.. 佢話我“鼻樑正直, 印堂發光, 今日實有好運行”.. 跟住佢就打蛇隨棍上咁問我有冇興趣繼續俾佢睇下個相.. 咁我就當然係一笑婉拒啦..

其實我都冇興趣知道將來既事.. 如果佢話有乜衰運, 我又會心囉囉攣.. 如果如果佢話有乜好運, 我又會俾佢呢番話沖昏頭.. 所以話不如唔好知道會有乜運行仲好啦, 盞自己心神不定既者.. 除非佢真係granted 到我十個奇跡喇, 哈哈.. 所以我認為活在當前就最好不過喇..

老實講, 佢話我“鼻樑正直, 印堂發光, 今日實有好運行”果一霎那.. 都真係幾開心架.. 不過本台柱都唔係乜十八廿二喇.. 我會坦然接受佢呢一句開口想做生意既誠意既..

17.04.2006 | 撞火既power

早幾日係份報章上見到篇短篇文章, 係由個香港嫁黎大馬既太太所寫既.. 咁佢就寫左呢一篇我認為好有趣既文章﹐係關於佢係大馬生活一段時期後所發覺到, 令佢一度一頭霧水既大馬廣東話同香港廣東話既唔同..

譬如話, 香港人講” 第一次“ 大馬人講” 頭一擺”, 香港人講” 學校“ 大馬人講” 書館”, 香港人講” 知唔知“ 大馬人講” 知冇”, 香港人講” 炸雞翼“ 大馬人講” 罩雞翼” , 香港人講” 一萬“ 大馬人講” 十千”.. 細細讀來都真係會意一笑架.. 其實都唔可以話邊個正確邊個唔正確既.. 只可以話香港既比較正統, 大馬呢邊因為受太多方言同埋唔同語言既影響, 所以就比較雜些少者..

不過咧.. 個太太提到香港人講既”好嬲” 同埋大馬人講既”撞火”.. 我就始終覺得”撞火” 比較”好嬲” 起黎, 仲更加可以帶出果種真係好嬲既火藥味啵, 係佛都有火果種境界.. 你 feel 唔 feel 到”撞火” 既 power 咧??

14.04.2006 | Quotes for Life..

no one can go back and make a brand new start,
but anyone can start from now and make a brand new ending;
when you feel down because you didn't get what you want,
just sit tight and be happy, there is something better coming to you..

之前收到呢一封 email 既時候, 就深深咁俾佢感動喇, 即刻copy入個notepad度save起上黎.. 唔知點解, 只係覺得佢俾到個好正面好積極既 message 我喎..

雖然學禽螶姐話齋「講就天下無敵, 做就有心無力」.. 但係當你沮喪既時候, 聽到有人咁黎鼓勵你既話, whether you think it’s true or not, 都真係俾得到好大既 motivation 同埋信心你自己架.. 勉勵人既話, 往往只在乎能夠重新振作提高士氣者, 至於結局能否如理想般實現已經算係其次呱..

人總唔可以回頭改變開始, 但係如果臨涯勒馬既話, 往往有改善結局既機會..
當你覺得自己得非所願時, 不如豁達面對, 因為迎面而黎既,係個更加美好既成果..

13.04.2006 | Full moon toss [SK/0617]

Well, it has been a full month since this blog started.. [SK/0617] is now a moon old!! Two thumbs up.. Let’s all feel happy and blessed that we are alive and be able to read blogs and post comments here.. Thanks for making stay and please don’t complain I wrote in Cantonese and that you hardly or totally can’t read, or hardly post a comment.. This is specially for you out there..

13.04.2006 | [SK/0617] 彌月之囍

唔經唔覺, 本部落格都生存左一個月喇.. 而本台柱亦都不負眾望咁依然維持每一個工作天都寫個post.. 實屬難能可貴啊!! 所以當你可以差唔多每日都有新野睇, 都算係一種幸福架喇.. 而我有你地不厭其煩既留言, 確實係一種福份啊.. 多謝晒大家!! 請繼續多多支持本部落格.. 希望大家仍然咁enjoy讀我既blog啊..

12.04.2006 | 我的老友陳「小春」

有留意我寫D野既話, 你會發現我唔覺意咁都會提到小春呢個人.. 佢係乜水啊?? 冇錯喇, 佢就係我多年青梅竹馬既老友陳小姐喇.. 咁當然佢本名唔係叫陳小春啦.. 小春只不過係佢係部落界既寶號者.. 啊唱歌果位香港陳小春啊, 名呢家野純屬巧合者, 唔好介意..

小春啊小春, 識妳都算長日子咯, 今年係第廿三年喇.. 虧你仲念念不忘我廿二年前癩X件瘀事.. 不過都好既, 至少有個人咁多年黎同我一齊成長, 有個人一路以黎咁關心咁珍惜我.. 好記得我事業遇到低潮時你俾我既鼓勵.. 好記得我地咁耐以黎總係各分西東但係依然保持密切聯系..

重復你婚宴果晚我上台埋尾果句: choon, you could have been anywhere in the world, but you are always here with me.. 多謝你啊陳老友.. 其實我宜家終於搵到個貼切形容我地關係既字喇 -- 【默契】啊..

11.04.2006 | 釋放自己, 豁達面對

尋日同小春MSN成個話題都係圍繞住「佢」, 講得都好灰好灰, 好心淡果種.. 明明係一心一意想助佢一把由谷底爬番起黎, 但係佢又好似無動于衷咁, 搞到大家覺得係"良心當狗肺".. 有時真係有唸過放棄, 但係成廿年朋友又談何容易丫?? 其實心裡真係好矛盾架..

終於, 佢願意搬去小春屋企暫時住住先喇.. 而且主動講笑, 仲主動請小春飲茶食點心.. 小春話我知果陣, 我真係有種莫名既興奮.. 係一種如獲新生重獲希望, 由谷底反彈地面既感覺.. 其實有小春係佢身邊我會覺得安心多囉.. 至少有人同佢一齊生活, 佢唔會咁收埋自己.. 有人不時同佢傾下偈, 佢唔會咁憂鬱.. 有人關心照顧佢, 佢先至會覺得其實呢個世界上仲有好多好愛佢既朋友..

大家相隔成半個地球, 我其實可以做到既, 就只有收於內心對佢既關懷.. 希望佢可以感受得到.. 朋友, 其實大家都好希望見番一個開開心心既你架.. 答應我地, 唔好俾我地再等落去丫..

10.04.2006 | fusion..or copy?

應該係大馬三大民族相處融洽呱.. 所以係呢個文化大熔爐入邊, 可以食到好多不同風味既美食.. 但係呢一期本台主唔係要介紹乜野美食.. 而係發現左一個趨勢..

覺唔覺啊? 尤其係D購物中心既foodcourt度呢.. 你會發覺D唐人食品係由馬來人賣既啵.. 雖然冇「鬼佬賣涼茶」咁怪雞.. 但係你話喇.. 馬來人賣豬腸粉, 福建炒, 鴛鴦, 叉燒包, 蝦餃燒賣.. 你會唔會流晒口水咁爭崩頭走去買黎食啊??

雖然話係sell得似模似樣, 但係我覺得係for佢地自己人only咯.. 你話冇左D豬油點好食啊?? 雖然唔可以要求道道地地, 但係至少都要正統些少呱?? 嚴格黎講應該叫做copy, 唔可以話係fusion呵??

07.04.2008 | 你報稅左未啊?

各位親愛既大馬公民, 你報稅左未啊?? 受薪一族既deadline係4月30號啵.. 如果仲未既話, 就不如黎做個 eFiling - Online Tax Submission 啦.. 我今朝已經submit左喇.. 簡單快捷而準確..

哪, 其實好簡單咋.. 你唔駛特登走去LHDN分行架.. 宜家你可以係屋企舒舒服服咁submit你既個人資料同埋稅務資料架喇.. 一切簡單快捷又準確.. 請到 https://e.hasil.org.my 獲取詳情啦..

Hmm.. 點解我會咁落力推銷呢個睇落與我毫無關係既野咧?? 實不相瞞啦.. 其實我係有份做呢一個project架.. 我間公司係負責個 Adobe PDF.. 你只須要下載張 Form 就可以直接係上邊輸入你既資料架啦.. 而且仲幫埋你計算添.. 係唔係好interesting咧??

喂.. 好哪哪聲啦.. 唔好等到最後一分鐘喇..

06.04.2006 | 清明時節雨紛紛

最近天氣陰沉多雨, 同同事閑聊時候不知不覺間提起"清明時節雨紛紛".. 你如果睇得明我寫乜既話, 就肯定係中學(甚至小學) 時期讀過呢首詩啦, 話不定老師仲要大家講佢背起黎添.. 唔, 你仲記唔記得接住落來果三句啊?? 下有揭曉..

其實覺得古時中國人對於天文地理都頗有研究架.. 例如睇月亮圓缺定月份, 睇天氣變化定廿四節, 甚至詩詞入邊都透露多少端倪.. 都不得不佩服佢地可以係全無精准儀器既情況下有咁既成就.. 唔通古人係俾我地聰明既?? 好難講.. 可能世界越係文明, 人類就越係須要依靠文明..

清明時節雨紛紛, 路上行人欲斷魂,借問酒家何處有,牧童遙指杏花村 -- 唐代詩人杜牧《清明》

06.04.2006 | 今日小徽生日

(倫敦4月6日訊) 今日係小徽生日, 唔知佢一個人係倫敦度過得點咧?? 好久冇佢消息喇.. 係度祝福佢每日富貴, 每小時靚仔, 每分鐘健康, 每秒鐘開心.. 生日快樂啊, 朋友!!

05.04.2006 |你仲識唔識用筆寫中文字啊?

尋晚係報章度睇到篇短文, 作者話因為宜家科技實在太發達, 好多人都已經習慣用電腦打字或者用手機發送短訊, 而且通常都有所謂既 predictive input feature , 唔駛點用腦就可以輕易咁打出"運籌帷幄", "病入膏肓", "紓尊降貴"呢D幾複雜既詞語.. 所以就漸漸咁變成"認字唔記字"呢種病態喇..

發覺我都漸漸有左呢個病態.. 霎時間要挪起支筆寫字中文喇喎, 的確係冇辦法好似以前咁文筆流通喇.. 有時後明明寫對個字, 但係橫睇掂睇始終覺得唔對路咁, 係度拗晒頭皮.. 呵! 你都有試過呢種滋味咧 ?

各位, 為免變成認字唔記字既"半蕉人", 我地都係哪哪聲挪起支筆練練D中文字吧啦..

04.04.2006 | 了了又何不了?

有個朋友教識左我一句話 --"叫到就做, 做左就算, 了了又何不了"

見人見智啦, 其實覺得呢句話都可圈可點既.. 對於一個但求完成責任既人, 就當然係絕世名言啦.. 但係對於力爭上游既人, 就的而且確係敷衍了事喇.. 但係對於我黎講, 就應該係咁樣去理解佢咯: 要做就要盡自己能力做到最好, 事情完結了就但求問心無愧囉..

突然唸起小春.. 你眼前仲有條好長既路要行, 都無謂執著於現況丫, 既然已經決定要走咯, 就應該抱住"了了又何不了"既心態喇..

03.04.2006 | 週記

仲記得中學時期咧, 每個星期有個必定既功課, 就係要寫週記喇.. 其實都好鬼憎寫週記架.. 因為每次都一定要絞盡腦汁咁唧D野出黎寫.. 不過越係高年班之後咧, 就唔會再咁樣逼自己喇.. 睇心情啦, 心情靚既話就係咁意作D野咯, 懶既話就挪番以前既週記重新翻抄一次咯.. 其實都算好學生既喇, 至少我都有交功課丫.. 唔似得蔡X鴻同學咁全年罷休, 哈哈!!

之不過咁, 十幾年後既今日我竟然學人地寫blog啵, 仲係每日都抽時間寫果隻啵.. 可能係因為佢唔係必定功課, 可能係因為我可以寫個天馬行空, 可能因為可以同大家分享.. 其實要寫就寫, 都唔須要乜野理由架, 係嘛??

後編: 呵, 你地話個蔡X鴻同學會唔會都已經有個屬於佢自己既blog丫哪?? 好奇真好奇..

31.03.2006 | 戰友

尋日放工後, 係KLCC度唔覺意咁撞到個舊同事.. 由佢一輪嘴霹靂啪啦講不停既口中, 八到好多關於舊東家D事.. 發覺好多以前既戰友都令覓東家喇, 其實我都算係臨尾幾個喇.. 宜家好似只剩低小恬, SP, 小蒙, 小祥咋.. 不過最好笑就係老袁, 佢辭左職後竟然同太太夫妻檔接番舊東家client既project黎做.. 係唔係咁眷戀啊??

各位舊時戰友: 小恬, SP, 小蒙, 小敏, 小仙, 小丹尼, 老袁, 傑仔, 小強, 小祥, 小倫.. 大家好嗎?? 祝各位工作如意, 生活愉快..

30.03.2006 | trivia..

分享一下關於生活瑣碎事件背後鮮為人知既事實, 都係email收到既..

  • 睇下你條拉鏈係唔係刻上"YKK"?? YKK 就係 Yoshida Kogyo Kabushikikaisha 既簡寫喇.. Hmm, 都真係簡好多啊呵??
  • 鴨既叫聲係唔會有回音既啵.. 冇人知點解?
  • 數學趣題: 111,111,111 乘 111,111,111 等於 12,345,678,987,654,321
  • "上海自來水來自海上"呢句野, 由左讀到右, 由右讀到左, 由上讀到下, 由下讀到上, 都係一樣架..
  • 一隻蟑螂如果冇左個頭, 佢都仲可以活上10日既啵.. 犀利啊!!
  • 世界上最多人用既名字係 Mohammad
  • 你打哈蚩果一刻一定係合埋雙眼, 絕對唔會長大雙眼既啵..
  • 大拇指既指甲長得最慢, 長得最快既係中指指甲..
  • 世界上D雞比人類仲要多.. 唔怪的禽流滅之不去啦..

29.03.2006 | 刀光劍影

先頭去左一個website度試聽D新歌, 隨手click左一pair青春偶像派合唱既歌.. 男既已經單飛, 女既有傳會單飛.. 過門音樂響起, 都幾好.. 但係好唔到幾耐.. 一聽到佢地開聲我就立即close左個window喇.. 嘩! 大佬, 我真係忍受唔住兩把咁幼嫩既聲啊..

唱功同埋演繹技巧真係須要時間同埋經驗磨煉既.. 聽番兩個前輩早兩三年前合唱既一首電台話劇主題曲, 覺得呢句話果然一D都冇錯.. 女前輩一出聲就好似向男前輩揮出一把利劍, 跟住男前輩就以佢渾厚歌聲回敬寶刀一擊, 兩人合唱時就好似兩把刀劍係上空交鋒咁鏗鏘有力.. 都真係過癮架..

Hmm.. 可能就係三五年同埋十幾年既差別呱? 或者我都應該俾D時間兩位青春偶像既.. 個女前輩廿年前出道個陣又唔係得個東洋肥妹樣?? 呢個世界只要肯努力都應該可以架喇..

28.03.2006 | 忙不盲?

今日都算忙喇.. 晨早返工食左早餐 (小春: 係你至愛既齋炒經濟米粉喲!!) 之後就忙到宜家喇.. 不過晏晝當然有小休半個時辰食lunch啦.. 老細听日開始放一個星期假, 所以都幾多野交代落黎.. 再加上自己D野又笠笠亂.. 所以咧成日好似打左場戰咁..

記得有句話係"忙與盲".. 以前返學果陣D懶係"文縐縐"既同學好興掛係口唇邊既啵.. 唔係幾記得佢真正既意思喇, 好似係用黎勸告人唔好忙到天昏地暗, 教人要忙得有價值係嘛?? Hmm.. 咁我今日認真係忙得幾有價值, 忙得幾目標準確.. 總算係有收成既一日喇..

27.03.2006 | 兩性之間, 一線之差

星期一大家黎輕鬆下啦.. 一齊分享以下睇落似笑話, 但係又幾有道理既一D關於兩性之間既網傳"至理名言":
  • A man will pay $2 for an $1 item he needs. A woman will pay $1 for a $2 item that she doesn't need and never know how to use it.
  • A woman worries about the future until she gets a husband. A man never worries about the future until he gets a wife.
  • A successful man is one who makes more money than his wife can spend. A successful woman is one who can find such a man.
  • A woman marries a man expecting he will change, but he doesn't. A man marries a woman expecting that she won't change, but she perpetually does.
  • A woman always has the last word in any argument. Anything a man says after that is the beginning of a new argument.

睇左的而且確會心一笑.. Hmm, 個"作者"係要褒男貶女丫, 還是褒女貶男咧?? 其實兩性之間又真係只有一線之差啵..

25.03.2006 | 今日小年生日

3月25日係小年生日.. 小年啊小年.. 係度恭祝你年年有今日, 歲歲有今朝.. 恭祝你事業有成, 心想事成, 身體健康, 心境開朗, 事事順利.. 生日快樂!! 恭喜恭喜..

24.03.2006 | 出糧喇..朋友

卒之都俾我等到今日喇.. 銀行存款又再次短暫性咁令我振奮喇.. 今日係第一次收到 confirm 之後既人工.. 雖然唔多但係都叫做俾之前多囉.. 哈哈!!

轉左呢一份工都快四個月喇.. 做得都好開心啵.. 不過梗係撇開工作壓力唔講啦.. 同事都好友善好樂于助人.. 對於我黎講, 一份工做得開唔開心, 同事融洽相處同埋良好人際關係呢一方面係佔左一個好重要既比例囉.. 而我好慶幸從來都可以享受到上天係呢一方面對我既眷顧..

係度要衷心感謝一個人.. 係佢出左好多力介紹我入黎, 決冇私心咁傳授好多knowledge俾我, 仲俾我機會可以perform下自己.. 多謝你啊朋友!! 希望好快可以見到你啦..

24.03.2006 | 珍惜眼前

突然間諗起迪拜呢一個地方.. 係阿拉伯聯合酋長國既迪拜啊, 亦即係大家熟悉既Dubai 喇..

舊年仲未轉工個陣, 因為project既關係, 我所謂既"有幸"咁去左迪拜四次, 每一次都逗留成兩三個星期咁耐.. 由第一次既興奮, 第二次既平淡, 第三次既納悶, 到第四次既恐懼.. 家陣換左新東家, 反而因為失去左呢個機會而有D咁多掛住佢添.. 諗番起係迪拜既日子, 除左天氣問題(我感受過最高氣溫係冇花冇假52℃), 其實都幾enjoy架.. 唔知係唔係唔駛日日見到波士咧? 仲有最令人振奮既豐厚 allowance... 哈哈!!

七星超級大賓館Burj Al Arab, 兩岸悠悠 Dubai Creek, 碧海藍天 Jumeirah Beach, 人潮熙攘 Gold & Spice Souq, 時尚摩登 Sheik Zayed Road, 風沙滾滾大沙漠, 香濃可口 Homos 漿, 新奇古怪駱駝奶, 種類繁多燒烤餐.. 實在有好多回憶係度既啵..

難道真係咁犯賤 : 失去既野先至最令人懷念, 得不到既野係最矜貴, 錯過既野先至覺得最遺憾?? 各位, 係度諗起一個四字珍言: 珍惜眼前..

23.03.2006 | get back to work

哈哈.. 今日終於冇被個部落格打擾我工作既衝勁喇.. 都好專心作左幾多野架今日.. 前幾日一邊工作一邊心思思諗住個部落格.. 哈哈! 嘩, 咁真係千祈唔應該俾人知道囉..

難道真係靈驗D辦公室流傳笑話: 星期一收拾心情開工, 星期二準備投入工作, 星期三開始忙碌工作, 星期四工作效率放緩, 星期五憧憬週末來臨??

各位, 當你讀完呢段文字後, 唔好諗住今日可以偷懶啊.. 其實你老細係度眇住你架.. get back to work, kid..

22.03.2006 | 是日雜錦靚串燒

各位部落客, 多謝捧場.. 不如黎個"是日雜錦靚串燒"咧..
  • 晏晝lunch time既時候, 有個同事帶左兩粒咸肉粽黎.. 我當時即刻別無他念, 只係稔起小春流晒口水個嘜樣咋..
  • 兩個鐘前, 有個朋友sms我話佢感冒病左.. (嘩! 咁邪? 唔係禽流係嘛??) 係度希望佢早日康復啦.. 小病是福啊..
  • 放緊產假坐緊月既同事send左佢出世冇耐既囡囡D相黎.. 好可愛啵.. 希望你既囡囡健健康康, 快高長大喎..
  • 有好多野要做啊.. 但是好懶又毫無頭緒.. "萬事起頭難"呢一金句果然係堅既啵.. 真希望自己有三頭六臂, 可以一氣呵成將佢地統統搞掂..
  • 仲係度 install 緊 Windows 2003 入個 virtual PC 度.. 點解咁耐都係郁D唔郁D架?? 點解永遠都係 8 min remaining 架?? 好悶啊..

22.03.2006 | 部落格 vs 聊天室

小李&小春話 : 「SK, 你既部落已經被我地兩個女人變成個chat room喇」 哈哈..講得都唔係冇道理既啵.. 揪番咁耐以來D留言, 發覺有95%都係由SK&小李&小春post上去既啵.. 哈哈!! 真係多謝佢地咁賞面咁支持啊.. 真係令人感動喇..

最近唔覺意咁, 好自然就係先去我既blog度睇下有乜留言.. 然之後就去小李既blog度留言.. 跟住就返黎我既blog度寫D野喇.. 好enjoy讀到小李&小春既留言.. 好鬼搞笑之余, 從中帶俾我好多歡笑既回憶.. 我仍然記得小李既"仙女散花人字拖", 小春既"側身回眸拗鞋掙", 小年既"青春無限superstar", 小君既"天涯歌女小鳳仙"..

各位部落客.. 我都希望你地多多捧場架.. 歡迎大家成為[SK/0617]既擁躉啦..

21.03.2006 | 國際睡眠日

早幾日係份日報既健康副刊度見到"3月21日 國際睡眠日"既標題.. 即刻俾佢吸引住喇.. 心想: "奇聞啊! 乜有咁既一個日子架? 咁係唔係全世界都要放假一日, 全人類都要好好訓番一覺咁咧?" (版主後編: 請恕我無知) 報導話呢一個國際睡眠日其實已經係5年前由一個國際性組織定落黎既啵..

講真丫.. 睡眠的確係好重要架.. 一晚睡眠既多寡同埋質素, 近則足以影響第二日既情緒架, 遠則足以影響日後既生理機能.. 以前後生唔信呢一套, 但是幾年前終於醒覺喇.. 人生有差唔多三份一時間係花係睡眠上, 點到你話佢唔重要啊??

好多野咧, 偏偏就要等到年紀大D個時候先至會靈驗架.. 不如趁自己仲未一枝花之前好好愛惜自己既健康啦.. Pamper yourself by giving yourself a healthy body..

20.03.2006 | 《小雞的隱懮》啟示錄

前幾日收到封唔知算唔算係笑話既email, 內容大致上係咁:

有日小狐, 小熊同埋小雞三位垂頭喪氣咁一齊去樹林散步.. 佢地互相訴苦說道,
小狐 : 人類為左身上有件皮草可以炫耀, 就不惜殺死我地, 將我地剝皮..
小熊 : 人類為左一飽食慾, 不惜鑒生將我地既手掌斬落黎,唔理我地死活..
小雞 : 我只係唔覺意咁打左個哈蚩咋.. 人類就敲鑼打鼓咁要滅我九族喇..

最近一連串天災人禍疾病不停侵蝕地球.. 睇完呢封email後稔一稔.. 當人類越趨文明, 越係弱肉強食既當時.. D天災人禍疾病是否又係不停咁同步強化自己黎到 overcome 我地人類咧?? 嘩.. 好恐怖啊!!

20.03.2006 | 學習享受

又係星期一喇.. 都要好好咁收拾心情, 為呢個星期既忙碌而奮鬥喇..

小李, 小春, 小君.. 你地週末過得開心嘛?? 我既週末都過得幾精彩.. 不過小年留言話佢個週末過得好悶, 只係做下一星期積落黎既家務, 然之後睇睇書, 煲煲電視.. 但係我覺得都唔錯嘛.. 返工好似打足五日仗.. 週末可以清清靜靜偷得浮生兩日閒.. 乜都唔駛做就咁懶係屋企度.. 都算係一種樂趣黎架!!

其實如果可以學識享受自己做既每一件事情.. 咁生活應該可以係幾enjoy幾開心幾有樂趣既.. 生活本應就該如此, that's how life is supposed to be.. 你話咧??

17.03.2006 | S/L本色

S/L本色擱置呢一張專輯都快兩個月喇.. 宜家拎番出黎再聽.. 發覺佢依然係咁好聽啵!! 讚嘆既係歌手無懈可擊既演繹.. 可以將平凡曲詞賜之于應有既意境.. 十首歌十種唔同唱腔.. 廿年功力果然唔係浪得虛名..

成張專輯既run-down編排已經係好靚喇.. 由第一首開始, 一氣呵成連貫聽落到最尾一首.. 覺得個flow好smooth, 感覺好舒服好relax.. 完全冇時下一般流行專輯果種大灑狗血既沉重感.. 有既只係傷過之後看透人生, 重拾希望既一種明澈感覺..

各位部落客, 如果你係欣賞佢既話, 你真係唔可以錯過呢張專輯.. 真係好正架我唔呃你.. 好野齊分享, 好歌齊聆聽.. 佢係林憶蓮..

17.03.2006 | TGIF

各位部落客, 又係星期五喇..

唔知點解, 逢星期五心情都會輕鬆D既啵? 可能係可以著得casual的返工, 所以會覺得冇咁拘緊.. 又或者係接住兩日唔駛返工可以盡情休息.. 又或者係辛苦左成個星期, 今日終於埋尾喇.. 種種原因令我唔覺意咁好享受星期五返工果種輕鬆既感覺.. 所以咧, 通常D人鐘意係星期五請假連住週末, 而我就避免星期五而選擇週末連住星期一, 因為我好多時候都會有所謂既 monday blues 症狀..

就因為咁, TGIF 係我至愛喇.. Thank God It's Friday.. 各位部落客, 你準備盡情享受你既週末未啊??

16.03.2006 | 我要去跳舞

最近瘋狂咁愛上左 gym club 的 hiphop dancing class.. 逢星期二, 四, 六都會儘量去 gym club 度現身.. 覺得一班人一起跳得開心之余又可以順便出番身汗.. 的確係一種唔錯既減壓活動黎架..

其實都好鬼羨慕個 instructor 同埋幾位跳得好出色既"班長"架.. 好有節奏感而且動作利落, 真係一個"型"字鑿係個額頭上架.. 自己就好難做得到囉.. 老喇 body synchronisation 唔係咁好喇.. 不過 join左咁耐點都會有D進步既.. 雖然話跳得一D都唔型, 但係至少都拍得住 instructor 個 beat 啦.. 算係比上不足比下有餘過隻啦..

好多事情其實都係志在參與, 志在 enjoy個過程嗟.. 但求開心快樂已經好足夠啦.. 唔駛太過執著于個 result 既, 畢竟自己有付出過既話都算係對自己有個交待.. 少一點期望,就少一點失望, 話不定仲會多幾份驚喜添!!

16.03.2006 | 缺陷美

lunch 完返黎.. 食左碗"咖喱叻沙".. 家陣覺得好飽仲有少少眼訓添!! 白雪雪既米粉浸係碗香濃既椰漿咖喱湯底內, 再加上爽脆豆芽豆角, 香口豆腐仆, 嫩滑雞肉絲, 惹味蝦米參峇辣椒.. 雖然唔係乜山珍海味, 而且又少左鮮味靚蚶.. 但係都好令我滿足架喇.. (小春﹕當你讀到呢度, 係唔係覺得好肚餓, 好掛住大馬美食啊??)

後記 : 有D野唔需要隆隆重重, 高調行事既.. 相反簡簡單單其實都足以令人心滿意足架喇.. 凡事唔好太苛求, 或者少少缺陷先至係完美咧??

15.03.2006 | (追求) 完美

又一日喇.. 忙碌左成日都好似未停過咁.. 晨早就走去 client office 度開會, 中午折返 office 食左 lunch 之後就對住部 laptop 猛咁做 coding.. 其實應該係話 code 到有點"欲罷不能"呱?? 好希望個 program 會係 bug free 架.. 所以一 code 落去, 就點都要係我有限能力之下將佢做到完完美美...

雖然深知世事始終唔會有完美無瑕.. 但係換另一個角度黎睇, 如果真係有"完美"呢一樣野.. 咁我就唔會享受到一種叫做"追求完美"既樂趣啦..

15.03.2006 | 今日小李生日

三月十五日 - 小李的生日.. 呢一個喜慶既日子我梗係要系度公諸于世啦..
小李啊小李﹕ 恭祝你年年有今日, 歲歲有今朝.. 恭祝你永遠都青春逼人, 嬌悄可愛, 風韻尤存.. (下刪五十祝賀詞)

14.03.2006 | 17年...

上星期六晚有個"小學同學聚舊會".. 係啊係啊, 你冇睇漏眼啊, 真係小學畢業後17年架.. 其實大家平時都冇乜點聯絡架喇.. 但係如果有啲咁嘅event都會俾面出席下嘅, 到時候個場面其實都唔會好似想象中咁尷尬囉.. 因為大家都會細細回味返17年前啲大件事濕碎嘢同埋啲瘀事.. 大聲講大聲笑都幾有趣架..

通常咁嘅event呢, 最大challenge其實就係同坐喺側邊幾熟嗰位議論紛紛: "喂, 嗰個呢嗰個呢, 幾熟口熟面喎, 記唔記得佢係邊個啊?".. 跟住落嚟更加大嘅challenge就係, 佢行埋過嚟同你打招呼, 好友善咁兜口兜面問你 : "喂, 記唔記得我係邊個啊?", 飆冷汗..

其實我都有三個keep得叫人咋驚嘅小學朋友架, 都識咗至少20年嘅喇 - 小春, 小娜, 小徽.. i love you all..

13.03.2006 | monday blues...

又是星期一喇.. 今朝起身嘅時候真係有種"想死"嘅感覺.. 所以噚晚專登將個鬧鐘較早廿分鐘, 等我可以懶床懶夠佢卅分鐘.. 係啊, 係足足卅分鐘, 所以廿分鐘減卅分鐘=遲到十分鐘.. 哈哈!!

又是星期一喇.. 成日都唔係好productive嗰隻囉.. 淨係做咗唔係好多work.. anyway最大收穫係學下朋友仔搞搞新意思, start咗呢一個blog, 榮昇blogger嘅滋味.. 其實都幾好玩架!!!

13.03.2006 | [SK/0617] 的誕生

等我學吓啲朋友仔寫寫blog先... 希望唔係三分鐘熱度啦...
小李, 小春, 小年, 小君.. 我依家正式加入你哋嘅行列喇...