設定貼子語言 Set language for posts :
中文
English
中英雙文 English & Chinese

31.01.2007 | 編寫回憶

話咁快, 2007年就咁過左一個月, 真係有D好「忽然之間」既感覺.. 其實如果感覺時間過得快, 係件好事定係件壞事咧? 有可能係充充實實, 有可能係渾渾噩噩, 有可能係開開心心, 有可能係憂憂鬱鬱.. 點都好啦, 我自己就覺得千祈唔好畀時間白白流逝都唔知發生左咩事.. 話晒時間一去就永遠都搵唔返, 所以有個回憶係好重要.. 開心既回憶固然之係好啦, 咁唔開心既回憶就要以佢黎讓自己可以更積極咁面對人生喇.. 如果可以每晚臨睡前, 係床上細細回想一日所發生過既事, 都應該算係編寫回憶既一種動作吧??

30.01.2007 | 願

得知一位朋友因為同老細飯局之後, 被壓人工而令到佢唔開心.. 其實都有少少戥佢唔值, 見佢平時都好賣力做野, 最多都係平時發下嘮蘇嗟.. 冇辦法啦, 人生不如意事情十常八九, 始終都要積極面對.. 唯有係度希望佢守得雲開, 快快搵到另一份更好更高薪既工啦..

突然見諗起一首歌, 好激勵既歌詞.. 「我自信有日如願。縱使天高地厚。仍被我逆轉。假使一生會沒了沒完。總有日會如願」送畀呢位朋友..

29.01.2007 | 搞乜鬼啊??

早幾日興致勃勃咁想update下個blog啦, 誰不知就被個blogger逼住upgrade新既版本.. 冇辦法啦, 以前beta時點避都得, 但係果日就逼住花一輪功夫做左個migration.. 好喇, 終於搞掂喇, 本以為升級版可以有一番作為啦, 點知咪就係換左少少樣加左少少功能?? 都冇所謂啦.. 好衰唔衰, 偏偏等我要繼續寫blog時, 唔係login唔到就係publish唔到個blog.. 好鬼激氣架真係, 而且仲係連續幾日都係咁至斃咧.. 都唔知搞乜鬼?? 我諗實係一大堆人同時逼住upgrade所以搞到大滯塞啦..

26.01.2007 | 頂..

點解呢個細路可以咁自私?
點解呢個細路可以咁唔醒目?
點解呢個細路唔識睇人眉頭眼額?
點解呢個細路永遠taking things for granted?
點解呢個細路唔識挑通眼眉?
點解呢個細路唔會為他人著想?
點解呢個細路可以完全忽視別人的存在?

頂.. 唔通要畫晒公仔畫晒腸咩??

25.01.2007 | 各處鄉村各處例

[日本東京] 在人流不息的銀座廣場, 一日本男子不小心刮開了一日本單身女人的超短裙.. 日本男人還沒有開口, 那日本單身女人一個90度的大鞠躬:"不好意思, 給您添麻煩了,都怪裙子的質量不好.." 說完取出一個別針別好, 又匆匆走掉..

[美國紐約] 在人來人往的時代廣場, 一美國男子不小心刮開了一美國單身女人的超短裙.. 美國男人還沒開口, 那美國單身女人立刻從身上摸出一張名片來:"這是我律師的電話, 他會找你詳細談關于你性騷擾我的事情, 你可以做好準備, 我們法庭上見.." 說完記下美國男子的姓名電話, 揚頭走掉..

[法國巴黎] 在聞名于世的凱旋門廣場上, 一法國男子不小心刮開了一法國單身女人的超短裙.. 法國男人還沒開口, 那法國單身女人咯咯一笑, 然後細手搭肩的說道:"如果你不介意的話, 送我一枝玫瑰來向我道歉.." 說完, 法國男人從花店買了一枝玫瑰, 還請她去酒吧喝上一杯, 然後兩人一起去一家小旅館再研究一下超短裙以內的事情了..

[台灣西門町] 在台灣的西門町裡, 一台客不小心刮開了一女學生的超短學生裙.. 台客還沒開口, 那個女學生咯咯一笑, 對著他說:"價錢還沒談攏就要先看貨了啊?"

[香港銅鑼灣] 在人山人海的時代廣場, 一中年男子不小心刮開了一年約18 女生的超短裙.. 中年男人還沒有開口, 那女生就開口:"我屌你老母! 你當我流架? 你咪撚走呀! 我依家拖馬來收你皮!"

[泰國曼谷] 在曼谷的街上, 一中年男子不小心刮開了一年約18女生的超短裙.. 中年男人忙亂地道歉, 那女生優雅地雙手合十於面前, 緩慢地作一姿勢優美的敬禮, 以嬌人欲滴的聲音說:"沙哇地卡,先生, 不要緊, 其實我也是個男人.."

23.01.2007 | 隨意門..

每日都會搭層樓同埋公司大廈既昇降機, 有時都真係會搞錯樓字同埋D掣.. 譬如話貴家30樓返工20樓, 有時晨早返工, 你知啦仲係懵惺惺咁, 確實會搵30字搵極搵唔到, 先至醒起我係返工唔係歸家.. 仲有就係層樓部昇降機個開門關門掣係樓字上邊, 而公司既就係下邊, 搞到有時個手指要轉多個180度.. 突然間有個奇想, 如果可以有個多啦A夢既隨意門就好喇.. 咁就唔駛咁失魂啦, 兼且去邊都唔成問題..

22.01.2007 | 卡門

詢眾要求, 好戲連場.. 嘩嘩嘩, 呢個卡門不得了啊.. 我都係第一次睇.. 本以為袁靚靚係電影《金玉滿堂》果兩句「愛~~情... 男~~人...」夠晒震撼啦.. 點不知呢個葛蘭姐姐(係啊, 又係佢啊), 竟然技高一籌, 肉緊得贏足九條街啦.. 留心注意1'59 到2'19果一段, 拍爛手掌啊, 必定令《東方之珠》個姣佘甘拜下風..

21.01.2007 | 說不出的快活

呢一句JA JAM BO真經典, 好鬼風情萬種好有感染力, 我好中意啊!! 唔得喇, 一定要用佢黎做我既text message ringtone至得喇.. 哈哈.. 佢係葛蘭, 聽後真係有D說不出的快活啊!!

20.01.2007 | 流行曲的趨勢??

剛才同朋友去間西餐廳食晚餐, 除左享受鋸扒之外, 最大驚喜就係餐廳播放D歌.. 剛開始都冇留意聽D歌, 因為來來去去咪都係果D熱爆流行曲.. 但係鋸鋸下, 突然間聽到把久違的聲音獨白著「未曾酒醉已清醒, 未曾深愛已無情」, 即刻引起我地注意.. 係喇冇錯, 就係蛇腰美人鄺美雲佢喇!!

跟住就開始播放D八十年代後期至九十年代初期D歌.. 咁我地既話題就轉移去到D「懷舊」歌曲上.. 每首歌開始播過們音樂時, 好鬼搞笑, 個心竟然噗噗跳, 因為好想即刻可以嗡得出歌名, 雖然好多都嗡唔出, 但係都好熟悉唱得上一兩句架.. 什麼陳百強, 林憶蓮, 張學友, 陳慧嫻.. 通通出晒黎..

其後我因而發覺一個現象, 就係發覺以前D歌通常都係簡簡單單甜到漏既情歌, 而依家D歌就好多都係分手療傷歌, 分手咒人歌.. 難道聽流行歌已經演變成一個咁沉重既趨勢??

19.01.2007 | 求其兼是但

最近發覺自己對於食呢一方面變得好鬼求其.. 講既係自己落手整午餐晚餐, 一點要求都冇.. 真係好鬼是但咁, 見雪櫃有乜就一野擗晒落個褒度等佢成兜野一鍋熟.. 好大可能係因為懶, 加上快速慳時間.. 橫掂都係擺落個口, 咬兩咬, 吞落個肚入邊, 第二日又唔係便晒出黎?? 嘩, 我竟然有咁既諗法, 真係好pathetic啊!! 死喇, 所謂民以食為先, 難道我真係咁唔識得享受人生?? 哈哈..

18.01.2007 | 當你只得一小時生命

好多時候都會係電視節目上聽到主持人問某某人「當你只得一小時生命, 你會做D乜野」呢個問題.. 每次都係得個聽字, 自己真係未曾真真正正咁諗過到底自己會做D乜野.. 其實都唔係霎時間可以回答到既一個問題.. 可能會好驚慌, 又可能會好無奈, 又可能會好積極咁珍惜呢僅有既短暫時間.. 可能會集齊晒家人朋友歡聚, 又可能會自己靜靜一個人讀過.. 其實真係好難講, 倒不如就睇下到時係乜野情況, 一切順其自然咪黎得更真實??

16.01.2007 | 重溫- 回溫

有時候我會突然間記返起以前聽落D歌.. 跟住就會揭盡所能四週圍去搵返首歌出黎.. 然之後就會重複不停咁聽, 果種感覺真係非常之好.. 其實D好歌真係可以經得起時間考驗, 雖然話隔左一段時間冇去聽佢, 但係之後再聽返, 確實係比初初聽既時候黎得更有味道.. 就好似支紅酒咁, 越釀就越醇.. 聽下聽下, 個腦就經常會浮現首個既旋律.. 哈哈, 好搞笑, 舊歌重溫竟然令佢係我腦海裡回溫..

15.01.2007 | 一切又重來..

我諗應該係時候好好咁下定決心去減肥去操fit下自己喇.. 覺得自己依家已經去返以前巔峰肥既狀態, 而且係越來越有逼近既趨勢.. 話說當年無意中認識左個PT朋友之後, 係佢既激勵之下, 我竟然下左從來未有過既決心同恆心.. 結果四個月之後令所有人對我刮目相看.. 甚至乎經已樹立左一個人人都覺得我係fit人一個既image.. 但係可惜, 花好難百日紅.. 家下我咁既嘜樣, 真係多得呢一兩年來既鬆懈咯.. 所以話嗟, 肥人可以減到肥, 但係就好難keep得住架喎!! 我諗我又要一切重頭黎過, 好艱難啊..

12.01.2007 | 守得雲開總會見到明月

今日下晝同個好耐冇見既朋友食晏, 都有成年冇見喇.. 當初就係個健身院識佢既, 後來跟佢學健身,之後就成為稱兄道弟既朋友喇.. 果時我仲係間舊公司度, 事業陷於最低潮.. 而佢就事業剛起步, 好似佢話齋如魚得水咁.. 估唔到一年後既今日, 我就換左份工而且都做得唔錯, 佢就好似前途茫茫冇點起色, 而且仲係一年之內畀公司調動去四間唔同分行.. 其實我都係過來人, 好明白事業陷於瓶頸所帶來既各種懮慮同無奈.. 慶幸既係守得雲開見明月, 依家總算搵到事業既方向同曙光.. 其實除左聽佢訴苦同埋鼓勵佢之外, 都好難可以幫到佢喇, 唯有希望佢好快雨過天晴啦..

10.01.2007 | 十年前後..

十年前同三個兒時老朋友難得一聚, 係個high-tea聚會上影左張珍貴既相.. 之後大家都因為學業同就業各散東西, 永遠未能湊足四個一齊.. 十年後一個婚禮上, 再次難得一聚.. 之前話明要擺返同樣一個pose影返張十週年相.. 感覺就係歲月不留人啊.. 當時既清澀換著今日既成熟穩重, 哈哈.. 如果再多個十年再影返同一個pose相, 情景又會係點樣咧??

08.01.2007 | 今非昔比

之前兩日為左老朋友小娜結婚而頻頻扑扑咁.. 要為佢剪輯一班朋友錄畀佢既movie clips諗住到時婚宴突如其來咁畀佢一個感動既驚喜, 又要晨早爬起床充當佢D「陪嫁姊妹」, 婚宴當晚又睇下有乜可以幫手, 婚宴過後又鬧洞房(不過都算非常合作一D都唔扭擰).. 結果連續兩日頻扑之後, 今日又晨早返工.. 好累好想係張床度繼續訓覺啊.. 結果差不多成個上晝係度打瞌睡(但係都仲橕得住冇訓著啵).. 咁人老喇, 果然係唔可以太勞碌既.. 點似得以前後生時連踩幾晚通宵都仲係精力充沛啊?? 真係今非昔比囉..

07.01.2007 | 終於嫁得出喇..

今日老朋友小娜大囍之日.. 好多朋友都戥佢高興, 因為好多朋友始終認為「恭喜你啊, 終於嫁得出喇..」哈哈!! 但係果日睇見呢個老朋友, 的確係今時唔同往日.. 以前男仔頭一個, 家下眼前女人味十足既靚爆鏡新娘一個.. 好事黎既, 話晒女大十八變呀嘛..

其實今日除左高興佢結婚之外, 另外更高興既係可以見返好多舊朋友.. 大家聚埋一齊戥佢高興.. 係度祝福佢同佢老公新婚快樂, 白頭諧老, 永結同心..

03.01.2007 | 白恤衫十載情

打開衣櫃, 發現裡頭有件白恤衫.. 好記得係我畢業後買黎見工既第一件恤衫, 到依家都係會著住佢.. 數數日子, 都應該有十年咁耐喇, 而佢都仍然係度未被我遺棄.. 雖然經過歲月洗磨, 個樣有少少殘舊.. 但係白恤衫啊嘛, 係一個男人基本上最須要既一件衫, 所以永遠都唔會過時.. 至抵死就係佢既裁剪完全合晒我身型, 永遠都係著得我fit fit地添.. 買果時仲係大特價原價三折, 十年計落都真係物超所值啊.. 哈哈!!

02.01.2007 | 茶餐廳

嘩!! 好鬼中意黃秋生個茶餐廳侍應D對白..好寫實啊!! 平時睇落超多既選擇, 竟然係短短兩分鐘內一輪嘴講晒.. 尤其是2'06"至2’28" 勁介紹燒臘味果段, 果然夠晒功力.. 哈哈!!

01.01.2007 | Happy New Year 2007


Should auld acquaintance be forgot
and never brought to mind?
Should auld acquaintance be forgot
and days of auld lang syne?
For auld lang syne, my dear
For auld lang syne
We'll take a cup o kindness yet
For auld lang syne