設定貼子語言 Set language for posts :
中文
English
中英雙文 English & Chinese

30.06.2007 | 三十

今日喺某個網站更新自己嘅會員質料, 首次見到自己嘅年齡欄上顯示30呢個數字.. 當時覺得30呢個數字好陌生噃, 因為幾乎(甚至係完全)冇「喂, 我已經係三十歲人喇」嗰種感覺, 所以今日可以話係驚覺三十而立呢一回事.. 未嚟到三十歲呢個大關之前, 確實係對佢有好多憧憬, 因為對於一個男人嚟講, 三十歲就係黃金歲月嘅起步, 應係好雄心壯志咁幹出一番光明前途.. 不過時到今日, 感覺上都冇咩唔同, 仍然係咁樣嘅一個我, 唔覺自己有乜大搞作, 都淨係安安定定咁打份牛工啫.. 我諗我最主要係應該變得更加積極進取, 唔好每日都得過且過happy go lucky咁, 要好好諗吓自己嘅現在同將來, 做人要有啲目標.. 我記得生日許咗個好白痴嘅願望, 就係心想事成.. 好冇target嘅一個願望, 就好似遇上仙人嘅時候, 要求佢畀十個願望你實現咁.. 雖然我永遠都會夢想呢一刻嘅來臨, 因為真係可以少奮鬥十年架.. 哈哈!!

29.06.2007 | 加油..

已經唔記得幾時開始, 每日都需要OT趕工, 為就係為咗個永遠都不能夠改嘅deadline.. 好似全副心機都擺晒落去, 其他事情都一概無暇理會.. 一早返工, 就不停需要內應外合, 其實夾喺中間就係最辛苦嗰個.. 一來要儘量滿足同埋達到顧客要求, 二來又要睇住自己成team人.. 好多時候都需要絞盡腦汁諗番個兩全其美嘅方法, 所以最近耗盡好多腦細胞, 飲晒一打雞精都補唔返.. 點講都係先以自己為大前題啦, 梗係先要protect自己個team, 個顧客嘅要求儘量避得就避啦, 所以都真係需要煉得一身銅皮鐵骨刀槍不入之軀架.. 對於呢份工, 的確係又愛又恨, 愛佢係因為工作環境同埋同事之間嗰種好teamwork嘅關係, 恨佢係因為實在太多嘢做, 太大壓力喇!! 所以真係要加油, 要學習如何去handle呢份工作, 自問仲有好多嘢要學識, 好多經驗要累積.. 一路走過, 唯有死撐, 加油呀..

28.06.2007 | 300th

呢篇係本人個blog第300篇post喇,不經不覺都已經喺呢邊寫咗咁嘢.. 有時覺得無聊, 再睇返自己曾經寫過嘅嘢, 個感覺好特別, 就好似睇返自己影過啲相咁, 好多回憶即刻歷歷在目地呈現喺個腦海裡邊.. 首先會expand右邊全部archive post個list, 好有成就感, 逐個標題去睇下仲記唔記得自己喺個內容裡邊寫過乜嘢.. 全部expand晒個list都真係好長, 由頭scroll到尾都有排scoll, 是但click條link就可以睇返以前寫過嘅嘢, 有種喺度細細品味陳年醇酒嘅感覺, 好回味無窮架..

諗返起美好嘅回憶當然要珍惜要感謝曾經擁有, 諗返起唔美好嘅回憶就要慶幸一切已經雨過天晴.. 因為我哋係應該為現在為未來而生活, 過去只不過係時間嘅考驗, 只可當作回憶看待..

27.06.2007 | 政壇笑話兩則

[笑話一]
總統希望提高自己嘅聲望, 於是發行咗套印有自己肖像嘅郵票.. 一個月後, 佢去郵政總局一趟探聽銷量..
總統: 銷售情況如何?
局長: 良好.. 只不過人人抱怨貼唔穩!
總統覺得奇怪, 於是就用口水沾咗郵票背面, 將郵票牢牢貼喺信封上
總統: 你睇吓, 咁樣咪貼得好穩?
局長: 但係啲人一見到張郵票, 就將啖口水吐喺郵票正面喎...

[笑話二]
某日, 總統同埋五院院長一齊出席會議, 結果喺途中發生連環車禍, 送入醫院急救, 記者們都聞風而到..
記者: 醫生, 五院院長有救嗎?
醫生: 唉, 冇得救喇..
記者: 醫生, 咁總統有救嗎?
醫生: 唉, 都係冇得救喇..
記者: 醫生, 咁邊位有救啊?
醫生霎時變得精神一陣: 國家人民, 有救喇!!

26.06.2007 | 老化跡象...

以下種種跡象, 如果你覺得親身經歷緊, 甚至係親身經歷過嘅話, 我覺得應該輕嘆一聲「老喇」..
  • 公司請返嚟啲新同事, 個個都係細過你, 仲係遲一個年代出世
  • 開始覺得熱茶其實係好飲過雪凍嘅茶, 而且覺得飲熱嘢會對身體好啲
  • 唔再堅持朋友啲仔仔囡囡一定要叫你哥哥姐姐, 唔可以叫auntie,uncle
  • 唱K嘅時候, 唱嚟唱去永遠都係唱返嗰幾首歌
  • 通頂一個晚上, 需要至少兩日時間嚟復原
  • 發覺自己食浦飛, 食完第二round後已經覺得飽飽地
  • 唔駛返工嘅早上, 會晨咁早就起咗身, 跟住就點樣瞓都瞓唔返落去
  • 開始避免去人多嘅地方, 如果要排長龍就索性掉頭行開
  • 發覺減磅速度永遠都追唔上增磅速度
  • 接受唔到自己著好cutie嘅服飾作好cutie嘅打扮, 潮爆裝扮更加免談
  • 以前唔食苦瓜, 依家覺得其實苦瓜都幾好味噃

仲有冇乜嘢要補充?? 歡迎提點提點吖, 各位老人家..

25.06.2007 | 頭髮(終於)長了...

引頸長盼嘅一刻終於來臨喇.. 一個月前令我傷心欲絕, 令人驚訝一陣後笑到面黃嘅一頭怪雞髮型, 今日起身發覺佢已經不經意地長咗喇.. 諗起當時頂住呢嗰個頭, 仲要去上海北京玩, 我覺得我同某些大陸人嘅look相當神似.. 所以無時無刻都儘量戴番頂帽, 戴番幅黑超遮醜.. 搞到有個朋友見到我啲相, 問我點解天陰陰你仲戴住幅黑超架, 好曬咩? 當時即刻啞口無言, 唔知道點答佢好.. 算啦, 最難頂嘅日子總算過去, 依家總算似返個人.. 發誓以後都唔可以再剪呢種髮型.. 其實家吓把頭髮唔長唔短咁, 有時都好煩惱需唔需要去執執佢, 定係等佢再長啲先咧?? 好多嘢的確一叉隻腳落去就返唔到轉頭, 所以真係要三思而後行啊.. 尤其係換個髮型呢家嘢, 冇十足把握都唔好試啊, 有個版你睇啦..

23.06.2007 | 週末工作天

今日星期六, officially係唔需要返工嘅.. 但係因為要趕起個project, 雖然已經好累好累, 今朝都仍然逼自己起身返工.. 既然係非工作日, 加上都係自願性返工, 咁當然就唔係踏正九點鐘啦.. 九點半逼自己起身, 十點鐘出門食早餐, 到公司都十一點喇, 上上網睇睇email過後, 大概十一點半開工喇.. 一開始就好似未聽過喇, 除咗上廁所, 去茶水間斟水食吓餅干充飢之外, 都未離開過座位, 對眼永遠對住個mon, 對手永遠癡喺個keyboard或者隻老鼠上.. 就咁一成日過去喇, 走人時候為時8:50pm, 果然係返足成日工.. 我計過喇, 今日用咗最多嘅Ctrl+C, Ctrl+V同埋backspace(搞到家吓個食指同無名指有點殭硬添).. 哈哈!! 都算好productive同efficient吖今日, 因為冇任何干擾, 所以可以好專心好安靜咁做嘢, 我諗個專心程度可以去到死人箖樓我都後知後覺嗰個程度.. 可能係自己嘅性格, 一係就一於懶理話之佢, 到時到後先至執生.. 一係就要做晒佢, 一定要搞掂為止.. 確實有點不平衡吖呵?

22.06.2007 | 忙+忙-忙×忙÷忙=??

最近為咗趕起個大project, 搞到成team人都日以繼夜咁喺度趕工.. 一來個schedule其實都已經好緊, 加上處處遇到疑問同埋難題, 最吃力就係個客多多要求.. 一方面要照顧自己嗰範, 另一方面又要應酬個客要求.. 好多時候個客要嘅嘢, 會畀你二百個理由一定要喺幾日入邊交貨, 好難推, 除非我自己係老細, 就一於玩性格you follow my style.. 不過現實歸現實, 等我自己做老細先講啦..

連續幾日都做到凌晨點幾鐘, 如果照平常返工都尚算有覺好瞓.. 但係最可憐就係呢兩日很坎坷地需要晨早去attend兩個seminar.. 個地點又離自己屋業鬼死咁遠, 所以需要比平時早個半鐘出門, 換而言之就係瞓少好多啦, 每朝谷住要起身嗰一下, 真係好想死嘅感覺.. 弊就弊在, 一個早上唔喺公司, 啲人就偏偏要咁啱喺呢個時候大鑼咁刮你.. 下晝返到公司, 以為可以哪哪臨catch up今早啲時間啦, 點知就一大堆嘢一齊嚟煩惱你..

忙+忙-忙×忙÷忙= ?? 睇落好似幾複雜嘅數學題, 其實個答案好簡單, 咪就係「=忙」囉.. 哈哈!!

19.06.2007 | 好盞鬼..

前一排一路喺度聽鄭秀文復出誓言重奪樂壇一姐地位嘅主打快歌《Mi》.. 覺得個旋律幾好, 佢仍然寶刀未老仲係唱得幾好聽, 加埋個型爆look的確氣勢如虹, 仲加上有個演唱會簡直係勢如破竹啦.. 其實都幾中意Sammi架覺得佢好正, 不過今次我係要同大家分享《Mi》呢首歌嘅歌詞啫.. 去youtube搵好耐都搵唔到個MV可以睇, 有嘅係華語版-但係歌詞差成九條街咁遠, 所以無謂擺喺度喇.. 以下係廣東版歌詞chorus部份精華, 用咗好多朋友個名, 好盞鬼架.. 填詞嘅朋友係林若寧, 聽聞係詞神林夕徒弟, 的確好唔錯..

麥當娜 並未像我吧
楊千嬅 並未像你吧
陳秋霞 並未像我吧
It's MI 無關其他 迷人娃娃
劉德華 亦是獨有吧
林青霞 亦是獨有吧
黃子華 亦是獨有吧
It's MI It's You 人人都只得一個吧
Ayumi 並未像我吧
容祖兒 並未像你吧
何超儀 並未像我吧
It's MI 無關其他 迷人娃娃
劉青雲 亦是獨有吧
黃凱芹 亦是獨有吧
黃Wyman 亦是獨有吧
It's MI It's You 人人都有動人創疤
劉嘉玲 並未像我吧
楊紫瓊 並未像你吧
陶晶瑩 並未像我吧
It's MI 無關其他 迷人娃娃
何星馳 亦是獨有吧
黃楚紅 亦是獨有吧
陳欣宜 亦是獨有吧
It's MI It's You 人人的風采都會說話

留意到最後三位, 好purposely咁幫人換咗個姓, 尤其以陳欣宜埋尾, 我要畀阿林若寧110分啊..

18.06.2007 | 阿貓與阿狗

今朝返工經過間屋, 見到個好有趣嘅畫面.. 裡邊養咗隻好可愛嘅狗, 唔清楚咩品種, 總之係人見到都會想抱抱佢玩吓嗰種啦.. 隻狗都幾友善, 見人行過都唔會亂吠.. 但係突然間有隻貓行過, 即刻乞晒佢憎咁, 冇晒儀態好似癲狗咁吠.. 但係隻貓又好啖定噃, 平時狗見到貓實係隔世仇未報完咁吠個不停啦, 跟住狠狠地四目交投, 最後隻狗就會追隻貓九條街, 通常都係貓贏.. 今朝見到呢隻貓就一於懶理, 因為佢知道同隻狗隔咗道閘, 係冇辦法掂親佢一條毛嘅.. 於是好過份咁, 懶洋洋咁趴喺隻狗面前, 一副你耐我咩何嘅態度.. 個貓樣實在係得戚到吖, 真係想刮佢兩巴.. 隻狗仍然好唔甘心咁喺度喪吠, 好似以為自己一定可以嚇走隻貓咁.. 結果三兩分鐘後, 隻貓仍然好享受咁懶喺度享受佢嘅早上, 隻狗喪吠一輪後, 力氣盡耗就索性掉頭入屋喇.. 唉, 早知如此何必當初呢?? 要當手上揸住令箭, 都要睇吓係唔係雞毛先得架, 哈哈..

17.06.2007 | 生日快樂!!!

六月十七日, 終於都嚟到呢一日喇!! 曾幾何時今日係個好遙遠嘅日子, 對於佢其實係既渴望但係又避忌, 好難講得清楚嘅心情, 因為個年齡十位數又要再加一喇, 哈哈.. anyway, 都係值得高興嘅一日, 因為踏入人生另一個新階段, 所謂三十而立, 我覺得應該要對生命有一股新嘅希望..

今日冇乜特別, 冇慶祝生日亦都冇生日feel, 唔似前幾日同事幫我慶祝咁鋪張.. 淨係約咗幾個朋友食飯睇戲, 跟住就散band喇, 好似普通一日咁過啦.. 之後覺得無聊, 就自己一個人趁大減價去shopping買靚衫畀自己, 兼請自己食餐好嘅.. 其實都OK噃, 雖然睇起嚟有啲孤單, 但係自己最錫嘅人就更應係自己啦, 何況係自己大日子? 所以我係開心架..

嗰日有位同事喺Neway點咗呢首歌, 可惜我唔識唱.. 2007.06.17, 我要喺度點多一次, 《祝我生日快樂》..

16.06.2007 | 生日賀語

香港同事噚日send咗張電子賀卡過嚟, 好有創意好有心思.. 你哋睇唔睇明啊? 第一次睇覺得係玩嘢, 應該唔係要帶啲咩message.. 但係第二次再研究研究, 其實係多國語言混合一體.. 就等我喺個original message度加返係咩文畀啲貼士啦.. 有咗貼士就可以上網找翻譯, 就大概可以知道個message大綱喇..

[印度文] Janam Din ki badhai! [法文] Joyeux Anniversaire! [日文] Otanjou-bi Omedetou Gozaimasu! [西班牙文] quando você volta?? wij missen u!!! [荷蘭文] Vind zo spoedig mogelijk een meisjesvriend!! [德文] Et liefert viele Mädchen, um für unseren Jungen zurückzukommen!! [國際文] HAHAHAHAHA!! [拉丁文] Pour finir, li amiamo...

好中意呢個表達形式啊.. 下次都要傚法祝賀啲朋友仔生日至得..

15.06.2007 | 生日前再驚喜

繼噚晚唱完K之後, 今日各位同事都拖住昏昏欲睡嘅疲倦身軀返工.. 不過可能係禮拜五嘅關係, 所以我覺得尚好, 唔似之前想像中好想死咁差, 都依然幾productive做咗幾多嘢架.. 其實全日無驚無險, 好快就到四點半喇.. 突然間隔離個同事話有個客想同我哋concall, 仲係urgent嗰個.. 於是就話20分鐘後會議室準備..

做埋手頭上啲嘢, 即刻飛入會議室準備同個客concall.. 點知個同事部腦上竟然webcam緊香港成班同事, 原來佢哋一早夾埋畀個birthday surprise我嘅, 今日又再一次驚喜喇.. 香港嗰邊同事好有心咁買咗個生日蛋糕插支蠟燭, 加埋一大堆食.. 雖然我吹唔到蠟燭, 食唔到蛋糕.. 但係真係好感動, 竟然越洋webcam唱埋生日歌祝賀我生日.. 其實今日係我農曆生日正日呀, 多謝晒大家, 辛苦晒大家: AW, JC, JL, JW, SW, TT, WY..

真係估唔到啊, 連續兩日嘅生日驚喜.. 好特別嘅安排, 好感動覺得自己很幸福呀~~

14.06.2007 | 生日前的驚喜

噚日有位同事無端端提起話不如今日放咗工去唱K, 得到全體同事贊成.. 都好, 既然係公司每個月一次嘅get together event, 雖然手頭上成咋嘢未做好, 但係吊頸都抖吓氣啦, 就即管去唱歌發泄吓啦..

全公司上下一共八人去到Neway, 因為搏殺咗成日, 所以每個人開始都淨係好努力咁食嘢.. 一個小時後, 可能大家都恢復咗元氣, 一首接一首咁唱至興起喇.. 就喺至激高潮, 大家都好投入嘅時候, 突然間轉咗首生日歌, 跟住有個waiter捧住個蛋糕入嚟.. 個蛋糕上寫住「Happy Birthday Sherman」.. 嘩, 呢班同事真係唔話得喇, 大家咁忙都為咗我搞埋啲birthday surprise噃.. 雖然唔係正日, 但係都真係好感激架.. 因為太忙嘅關係, 真係唔醒起原來自己就快生日添.. 除咗有蛋糕, 仲有禮物(Body Shop嘅shower gel同body scrub)收架..

由於今日係星期四, 第二日仲要返工, 所以非常感激各位同事肯捱眼瞓.. 喺度逐一多謝咁多位同事: GC, HL, IV, MO, MY, SG, ST.. 好多謝大家嘅一番心意!!

12.06.2007 | 唔同角度, 唔同睇法

有啲嘢就咁睇永遠都唔會覺得起眼, 永遠都唔會吸引別人目光.. 佢好可能係你平時都一定會見到用到嘅嘢, 但係就唔會覺得佢有咩特別.. 最近睇個朋友upload上網嘅相, 發覺佢中意影埋晒啲still objects, 佢話佢係初學者, 但係我覺得佢真係影得好靚好專業.. 譬如話一個街邊電話亭入邊畀人殘忍破壞嘅公共電話, 其實個角度個鏡頭捉得好, 真係覺得係件藝術品多過破壞品.. 喺度撻咗幾幅, 係望佢唔介意, 因為佢事先聲明唔可以用作商業用途..
講真啦, 由呢啲相得到啟發, 每件事每樣嘢, 如果可以換個角度嚟睇, 好可能可以有令一番見解架.. 所以唔好鑽牛角尖喇, 個答案好可能就喺令一個角度嗰邊呀.. 呢個世界其實仲係很美架..

11.06.2007 | 一雨成災..

噚晚七點鐘落咗兩個小時豪雨, 就係呢兩個小時雨導致吉隆坡市中心發生水災.. 繼1971年吉隆坡大水災後, 舊年同一日同樣發生水災, 今次係四年嚟最嚴重嘅一次.. 市中心低窪地區水浸去到腰部, 錄得最深水位有8呎咁深.. 當時我仲係商場入邊唔知道出邊落緊大雨, 九點幾搭輕鐵返屋企時, 廣播市中心範圍幾個地下站水浸, 輕鐵前往市區方向不能運作.. 好彩我係往令一個方向返屋企..

今日報章頭條新聞, 吉隆坡一雨成災, 水浸隆市, 交通癱瘓, 災後狼狽善後.. 都唔知搞乜嘢, 已經唔係第一次啦, 當初口響話建個咩精明水道可以幫助避免水災發生, 耗資馬幣21億聞名世界, 原本呢個星期六就可以測試佢嘅精明功能, 點知就timing唔好, 一場「早到的雨」徹徹底底抹殺咗廣大市民對佢嘅期望.. 唔係場雨早到, 而係工程遲遲未竣工--其中好多因素, 我諗唔駛講到明, 挑通眼眉嘅廣大市民都知道當中原因啦..

就係咁, 樣樣收錢, 樣樣超支, 樣樣緩慢.. 啲錢去晒邊? 你知我知.. 想要成為先進國, 2020年做得到嗎??

08.06.2007 | 女人贏晒

Case (1)
兩公婆因為一啲芝麻綠荳嘅事而嘈起上嚟, 就咁冷戰咗成日.. 老公醒起聽日要搭早機飛去第度開會, 需要凌晨四點就起身.. 平時都係依賴老婆叫醒, 但係冷戰咗成日, 又唔肯認輸開口叫老婆聽日叫醒佢, 所以就寫咗張字條「聽日4am記得叫醒我」擺係老婆當眼處, 就安心去瞓覺喇.. 結果第二朝, 老公醒來時驚覺已是九點鐘喇!! 佢好嬲老婆冇叫醒佢, 但係當踏落床想質問老婆時, 至發現床邊貼住張紙條「4am喇, 請起身」...

Case (2)
兩公婆因為一啲芝麻綠荳嘅事而嘈起上嚟, 就咁冷戰咗成日, 兩人坐喺車內不作一語.. 突然間見佢哋經過一個農場, 老公見到幾隻牛喺度食草, 於是調侃老婆話「睇吓你啲親戚喺度幾享受生活」.. 老婆於是冷冷咁回應「係呀, 全部都係我夫家親戚」..

07.06.2007 | 愛靚唔愛命

剛剛小沁forward咗條link過嚟, 係個非常之勁搞笑嘅新聞一則, 搞笑得連報紙都要刊登出嚟.. 故事發生喺新加坡, 關於一個愛靚唔愛命嘅男人.. 因為佢著咗條緊身褲返工, 所以覺得如果睇到條底褲罅會好難睇, 所以決定真空上陣.. 結果去完廁所, 搞到拉鏈夾親自己, 一聲奪命大嗌引起全公司上下男女同事注意.. 折騰一個小時後, 最終竟然勞煩冷靜嘅女上司, 狠狠地幫佢脫離苦海.. 結果女上司發現佢原來係冇著底褲, 當堂要洗眼, 跟住就係自己個blog度精精準準一字不漏咁詳說此事.. 之後呢個blog當然係熱爆啦, 個男人從此成為全公司上上下下嘅笑柄, 佢班較為熟落嘅同事仲話下次佢生日一定要送返打底褲畀佢做禮物.. 哈哈, 真係唔知應該取消佢或者同情佢, 因為呢個笑柄應該係一世人架喇..

欲知更多詳情, 請點擊閱讀此篇新聞報導...

05.06.2007 | 數字人生

今日係個特別日子, 因為個日期係05.06.07.. 突然間令我覺得我哋每個人都同數目字好有關係.. 出生日期, 身份證號碼, 電話號碼, 銀行戶口號碼, 信用卡號碼, 提款卡密碼.. 同好多好多號碼扯上關係.. 講返起呢啲號碼, 都只不過係一系列特定format嘅running numbers啫, 所以我覺得好有趣.. 是但由自己嘅電話號碼加一減一, 打呢個號碼隨時都可能會有個人接聽.. 個身份證前後一個number都係另外一個陌生人.. 個密碼極有可能係同成千上萬個人一樣.. 以前中學時候, 每個學生都有一個學生編號, 前兩個數字代表入學年份, 後三個數字就係個running number.. 仲記得我係90158, 所以當我遇見其他年份嘅xx158都會望多兩眼.. 所以話, 如果可以認識到你身份證號碼前後嘅人, 或者電話號碼前後嘅人.. 嗰種感覺應該係好奇妙, 因為我覺得係需要好有緣先至可以遇到呢個人架.. 但係又唔方便喺度公開我身份證同電話號碼, 如果唔係肯定好有機會呢個人會睇到我呢個blog, 跟住就聯上啦.. 我諗佢應該唔會係個大壞人, 哈哈!!

02.06.2007 | 毛骨聳然

某日同幾個朋友聚餐, 傾傾吓唔知點解傾到請印尼女佣呢個話題.. 於是其中一個朋友就講咗個好令人毛骨聳然嘅真人經歷, 當然唔係佢, 如無記錯好似係佢表姐..

話說呢個朋友嘅表姐請咗個印尼女佣, 初時都唔覺得有乜唔妥, 但係一個月後突然一日, 故事就發生喇.. 個女佣突然間坐喺張梳化上乜都唔做, 主人覺得奇怪啦, 平時都唔敢坐喺張梳化, 而且都會做緊家務架.. 所以擔心佢係唔係唔舒服, 就開聲問啦.. 點知個女佣好似變咗第二個人咁, 講嘢態度180度改變, 仲好似個老太婆咁.. 結果佢話自己係個女佣嘅嫲嫲, 因為唔中意啲子孫離鄉背井, 所以吩咐主人即刻遣送孫女返去..

個表姐嚇得即刻將個女佣鎖喺屋企, 帶個BB返去外家, 轉頭同埋老公帶埋個巫師返去驅邪.. 個上身女佣更恐怖得同主人要人血飲添, 話畀雞血都唔要啊.. 結果為咗息事寧「人」免得夜長夢多, 即刻去買張去印尼機票.. 不過最快都要三日後, 結果呢三日都唔敢返去啦, 就由得個女佣一個人係屋企.. 時間一到, 即刻送個女佣飛返去印尼喇..

平時聽人講印尼女佣嘅故事, 都不過係佢點樣喺啲食物「加料」畀主人飲食啫.. 今次呢個鬼上身故事, 都係第一次聽聞, 的確有點恐怖..

01.06.2007 | 六月

好快又到六月喇, 兩個半禮拜後, 就officially踏入三十歲大關喇, 叫做男人三十而立.. 其實都未有耐, 依家盡情享受廿幾歲嘅生活先啦.. 其實六月都幾多我識嘅人生日架, 兩個家姐同埋三個以前中學同學, 工作上就尚未遇到任何一個六月生日嘅同事(亦或者我唔知道?).. 一個家姐喺月頭, 令外一個喺月頭月尾, 我就喺月中.. 三個同學生日同我最接近, 一個係一個禮拜前, 一個係一個禮拜後, 一個係剛剛一日前.. 其實我都好想可以遇到一個同我同月同日出世嘅朋友, 咁我覺得應該會好有趣好好玩, 但係至今都尚未遇到.. 以前一個英文老師話, 17日出世嘅人, 其實就係輪迴最後一次, 不過佢就冇話呢個最後一次輪迴之後, 會係點? 好想知道..