31.03.2007 | 終於 X 依然

之前對自己承諾過(定係應該話要求過), 要喺呢個三月份裡邊, 每日都要blog.. 今日係3月31日, 我終於都做得到喇, 冇花冇假真係每日一blog, 睇返三月個list真係有31個post架.. 真係有啲難以致信我竟然可以咁有恆心同毅力, 雖然唔係話乜嘢艱巨任務, 但係點都算係一個成就呀.. 呢家嘢我實現對自己設下嘅目標, 但係又唔見我為自己定下勁減15磅嘅目標而努力喎, 真激氣.. 呢呢呢, 家吓仲居然一路寫一路食緊薯片, 你話抵唔抵死呀?? 其實問題出在哪裡咧?? 我諗應該係還未踏出堅決嘅第一步, 「萬事起頭難」「一日復一日」依然係咁成為遲遲未見行動嘅藉口.. 唉, SK何時醒覺啊??

寫完後, 我依然仲係喺度食緊薯片, 一片一片好鬼滋味, 哈哈哈哈..

30.03.2007 | 十三小時

覺得今日時間特別長.. 可能係太早返工嘅關係, 因為今朝有個web meeting要遷就唔同地區嘅時差, 所以要晨早8點鐘就開始.. 咁無啦啦需要早一個鐘返工, 於是未夠7am就要起身喇.. 真係好痛苦, 好耐好耐都未使過要咁早起身.. 朦朦朧朧咁過咗最難挨嘅8-9am呢段時間, 個meeting完畢後就正式做嘢.. 係咁就一路做啊做, 連食晏都係叮熱個lunch box一路食一路趕起份文件.. 搞掂一單後, 又再趕起另一份文件.. 做完果陣望望個鐘, 都已經係夜晚近9點喇, 原來我已經返咗十三小時工.. 扣除上廁所開會聽電話食嘢傾吓偈嘅時間, 我諗都應該有10個小時以上係好專心咁做嘢嘅.. 唔錯呀, 都幾productive啊, 之不過仍然都係有好多嘢繼續要待我完成, 真命苦.. 如果我畀老細如果睇到呢段嘢嘅話, 我覺得佢應該會開心嘅, 哈哈..

29.03.2007 | my immortal

噚晚悶悶地, 於是就搵返啲舊CD嚟聽.. 可能係夜闌人靜(係喇, 係夜闌人靜, 唔知點解喺醒起呢四個字之前, 腦海裡一路以為係夜靜人深--哈哈)嘅關係, 所以覺得呢首歌特別好聽.. 唱得好感動, 好有感染力.. 之前都好中意呢首歌架, 隔咗咁耐再聽返依然係好正..

【evanescence - my immortal】i'm so tired of being here / suppressed by all my childish fears / and if you have to leave / i wish that you would just leave / cause your presence still lingers here / and it won't leave me alone / these wounds won't seem to heal / this pain is just too real / there's just too much that time cannot erase / when you cried i'd wipe away all of your tears / when you screamed i'd fight away all of your fears / and i held your hand through all of these years / but you still have all of me / you used to captivate me by your resonating life / now i'm bound by the life you've left behind / your face it haunts my once pleasant dreams / your voice it chased away all the sanity in me / i've tried so hard to tell myself that you're gone / but though you're still with me / i've been alone all along...

28.03.2007 | password-protected blog??

平時唔覺我個blog會有好多人睇, 因為來來去去啲comment都不過係得小年大發慈悲施捨於我啫(哈哈, 講得是乎有啲灰, 點都好多謝佢一路支持).. 之不過有時候都會見到一啲朋友失驚無神懟埋過嚟嘅comment, 至發覺佢哋平時都有casually捧吓場嘅, 但係就不留任何蛛絲馬跡咁解啫.. 甚至有日我老細竟然同我講, 佢都有靜雞雞睇我個blog噃.. 我諗其實就咁一傳十,十傳百, 傳傳吓都應該會有好多人睇啩?? 咁豈不是要處處小心行事, 唔可以喺度透露太多以免泄漏天機?? 不過又係嘅, 既然寫得blog就預咗要畀人睇啦, 唔通要畀個password先至可以睇咩?? 咦, 話是話, password-protected blog?? 又幾好嘅一個提議噃, 可以控制邊個睇得, 邊個唔睇得.. 有冇人得閒研究下啊??

27.03.2007 | 一個月後, 話之你呀..

已經決定不聞不問, 已經決定唔再執著, 已經決定接受事實, 可以做出面嘅嘢都已經做晒喇.. 等我以為一切都醒醒定定, 可以令我心平氣和嘅時候, 果晚竟然一個自私嘅舉動令我大動肝火, 果一刻真係行行咁踩親我條尾.. 我知你想點, 知你點解咁做, 但係都唔駛做成咁係嘛?? 好X過份喎.. 自從上一次發泄完之後, 就已經學習忍耐, 採取隻眼開隻眼閉嘅態度, 冇謂為咗咁而勞氣, 而且我勞氣又點啫?? 冇人知噃.. 其實都幾乎係冇眼睇, 儘量保持距離劃清界線架勒.. 老實講我都算忍得耐喇, 由始至終都未開過戰, 最多都係搞成依家咁我還我啫, 我還我但係就冇你還你噃.. 激鬼心啊!! 不過都係忍多一個月度啫, 到時候真係話之你呀, 噓..

26.03.2007 | 屎氣逼人

今日小年send咗幅相畀我, 係佢喺婺源影低小慧由公廁「逃出生天」嘅情景.. 初時仲未知道發生咩事之前, 就諗極都諗唔通點解冇啦啦會影埋小慧喺間爛臭公廁旁.. 就覺得小慧好似落荒而逃咁, 相內只見佢用件褸遮住塊面, 一邊褲腳還半吊腳踝上, 狀態極之狼狽.. 於是就問小年究竟發生咩事啦.. 原來佢哋一大半朋友一齊去婺源同橫店玩, 咁人有三急當然就係搵間廁所方便下啦.. 點知因為間廁所「遍地黃金,屎氣逼人」, 所以搞到小慧需要屏息作戰兼用最短時間解決.. 咁幅相捕捉到嘅情景, 就係小慧完事之後, 匆忙逃跑為爭取一口新鮮空氣以求保命嘅情景.. 勁搞笑!! 其實齋咁講咧, 都可以imagine當時係幾咁狼狽, 但係你知幅相不便在此公開(唔係實畀人殺死啊), 如果唔係, 圖文並茂就更加歷歷在目啦..

25.03.2007 | 型.cool

無意中喺youtube度搵到呢個video, 覺得佢好型好cool.. 因為可以一氣呵成咁將啲我平日返工會做嘅嘢好連貫咁串埋一齊, 用typing嚟帶出佢要表達嘅message, 再加上用Deus嘅《There's Nothing Impossible》做個背景音樂(好啱feel), 果然睇得好開心.. 最中意埋尾果一句"We need to rethink ourselves.", 似乎好禪嘅一句嘢..

24.03.2007 | 犯賤

今日星期六唔駛返工, 本來就可以瞓晏啲, 但係今朝都係晨早8點鐘就瞓醒咗.. 雖然噚晚成兩點鐘至瞓, 理應今朝唔會早過10點鐘瞓醒啦, 但係偏偏就事與願違.. 平時返工需要8點鐘起身, 點樣都覺得唔願意起身好想瞓多陣, 依家唔駛返工就偏偏犯晒賤咁瞓唔落去, 正一勞碌命.. 咁早起身, 又唔知做啲咩好, 約咗朋友又有排等, 真係覺得好無奈.. 平時會覺得太晏起身好似浪費咗成個朝早, 跟住好多嘢都做唔到.. 但係今次竟然覺得一個咁美好嘅早上唔瞓番個好覺, 確實係虛度光陰.. 超矛盾, 勁搞笑, 哈哈..

23.03.2007 | 0-8對話

今日做做下嘢(難得禮拜五臨放工都可以好專心做嘢, 哈哈), 有個同事冇啦啦online MSN(真係冇啦啦online架, 因為之前諗住搵佢chat嘅時候佢都係一路offline嘅)send咗個message過嚟:

話說某日0喺街度撞到8, 咁8一開口就同0講:「一排唔見, 好似圓咗啲咁啵」.. 咁0畀8係咁窒一窒, 就梗係扯扯地啦, 於是就回應8話:「係啊, 但係至少我唔似有啲人咁, 明明係肥都要挾硬綁條皮帶縮緊條肥腰.. 做咩啊? 諗住咁就可以好似1咁瘦啊??」.. 8畀0噴到一臉屁, 於是就頭嗒嗒走咗喇..

超低能啊, 咁都畀佢用到啲數目字嚟編個笑話..

22.03.2007 | 真係勞氣

話說芒果先生呢個星期會嚟香港逗留數日, 所以芒果太太就托我幫佢喺SaSa買啲嘢, 跟住就交畀芒果先生, 由佢帶返去英國畀自己.. 咁個老友叫到梗係冇理由托手踭呀, 於是噚晚就專程走去銅鑼灣, 諗住work out完幫佢買啦.. work out完出嚟都係10pm左右啫, 點不知間SaSa竟然收咗喎.. 覺得好奇怪點解今日咁早收, 於是就行過兩條街諗住去另外間分店買啦, 點知又係收咗.. 當時有啲興興地, 所以再過多兩條街睇下.. 終於, 呢間分店最係服務週到, 喺道閘度貼上通告話:「We are closing earlier today for our Annual Dinner」.. 嘩, 唔係咁啱吓嘛?? 依家咩日子啊?? 冇啦啦搞咩annual dinner啊?? 我即刻呆咗一陣, 覺得好似畀人狠狠咁兜頭淋桶水咁, 認真勞氣..

21.03.2007 | 繼續,又係食..

本以為連續兩日暴飲暴食之後, 今日可以收心養性食少啲, 食得簡單清淡啲啦.. 點知lunch time都係畀老細擝去飲茶, 又係食埋一大堆嘢.. 不過今日就唔係叫咗好多嘢, 對於七個人尚好啦僅僅夠.. 但係今日我卻覺得我竟然食得比前日果餐多, 尤其食咗個叉燒包同埋半籠馬拉糕.. 返到去office之後一坐低對住個mon, 就即刻覺得昏昏欲睡, 熒幕上啲字好似喺度發晒咁越嚟越矇.. 飯氣攻心啊, 搞到要去一趟廁所「清減」下, 先至令到個人重新振作起嚟, 哈哈哈哈.. 唔係講笑, 有入必有出的而且確係個事實..

20.03.2007 | 暴飲暴食

呢兩日因為公司有兩個重要客人來港到訪, 所以老細下令公司上下同仁同佢哋一齊食飯.. 噚日lunch飲茶, 今晚就dinner.. 感覺上好一浪接一浪咁未停過食嘢, 一諗起就覺得飽, 因為連續兩日食咗實在太多嘢.. 噚日茶樓飲茶冇啦啦叫咗成檯點心, 頭先就喺Fat Angelo點咗成檯沙律意粉烤肉pizza等等, 跟住埋尾重要嚟客嘅甜品, 咁一路食嘅時候又不停咁飲嘢(今晚dinner飲啲lemonade勁正, 再加上又係免費添, 所以喪飲不停).. 呢啲就係叫做暴飲暴食, 暴飲暴食之後, 覺得褲頭緊咗, 我諗應該要考慮下絕飲絕食三日至得..

19.03.2007 | Dreamgirls OST

印象中從未買過電影原聲大碟, 但係噚晚就買咗呢個Dreamgirls OST.. 齣電影其實係兩個星期前喺飛機上睇嘅, 幾中意睇咁嘅類型啲戲喇, 當時又好驚喜咁免費upgrade我去商務倉, 咁自不然就覺得更好睇啦.. 唔講電影啦, 其實個storyline都係好普通, 因為成名而反目, 後來因為諒解而重聚果種囉.. 我覺得最正就係聽戲入邊啲歌, 尤其是第二女主角Effie (Jeniffer Hudson飾演, 2007奧斯卡最佳女配角得主)咧, 我覺得佢嘅光芒完全蓋過女主角Deena (Beyoncé Knowles飾演).. 果一首深感被出賣嘅《And I'm Telling You I'm Not Going》, 唱得佢歇斯底裡, 簡直就係聽出耳油, 令我聯想起Whitney Houston嘅《I Have Nothing》.. 睇電影果陣唔覺得點, 可能因為有電影情節搭配所以覺得理所當然, 但係齋聽個OST就真係聽得出佢嘅激情澎湃, 尤其最後一句簡直係震撼人心.. 好啊!! 呢個OST極力推薦, 值得擁有..

【後註】張原聲大碟分普通版同豪華版.. 普通版一碟過收錄20首歌, 豪華版36首歌分兩隻碟.. 因為淨係貴多幾蚊, 所以選擇買豪華版, 但係後來個人覺得普通版會聽得過癮啲, 因為可以一氣呵成咁由頭聽到落尾, 唔似得豪華版咁中途需要換碟.. 除非你部player有個自動換碟功能啦..

18.03.2007 | 週末懶洋洋

好享受週末帶畀我嘅兩日思緒寧靜.. 可以暫時忘記工作, 可以唔駛咁早起床, 可以輕輕鬆鬆畀心靈休個假.. 其實我嘅週末唔需要係節目豐富多姿多彩, 我覺得最重要係可以好relax好enjoy咁享受時間, 可以一切都放慢晒, 唔駛急架.. 最好就係懶賴賴咁做啲自己中意做嘅嘢, 要識得享受, 這就是生活..

讀過報章上一篇文章, 有樣嘢叫做「假期結束綜合症 」(唔係好記得正確字眼, 差唔多係咁嘅意思).. 就係假期過得太過盡情, 未有時間同心理準備迎接第二日需要返回工作崗位嘅事實, 而導致心神懮慮.. 個作者話就算enjoy得幾盡情, 都至少需要留返前一晚來平復兼且收拾心情, 為假期劃上一個完美句點, 做好準備迎接工作猶如排山倒海嘅來臨.. 凡事都會有個結束, 有另外一樣事情嘅開始嚟延續生活..

17.03.2007 | 一些生活瑣碎事跡

• 噚晚去超級市場買咗包麵包, 個保存期竟然係到18-03-2009! 我冇睇錯, 係佢標錯嗟, 不過包嘢唔駛等到2009年都食晒啦.. 我希望真係佢標錯, 如果可以保存咁耐, 豈不是係用咗成公斤嘅防腐劑?? 哈哈..
• 突然間好中意食呢個hazelnut朱古力, 甚至乎可以稱得上係上癮果種.. 不過係dark chocolate, 同埋啲hazelnut就係要全粒嘅.. 我覺得其實係中意等朱古力慢慢溶晒, 再食啲hazelnut咬落去爽脆嘅感覺.. 好滿足..
• 大半年前喺廟街買咗個好平但係好型, 全白色立方形嘅檯鐘.. 突然間見唔到個電子顯示, 而且唔知點解啲電池冇端端滲咗啲水出嚟? 勁搞笑.. 以為換過啲電池冇事啦, 點不知竟然無補於事.. 令我深深領略到一分錢一分貨呢個道理..
• 我打完呢個post, 個流行歌曲試聽網站都仲喺度load緊.. 駛唔駛用咁耐啊?? 超低能..

16.03.2007 | 兩性用字解話

女性用字解話
係 = 唔係
唔係 = 係
或者 = 冇可能
不如你話事啦 = 你要就晒我
對唔住 = 你會感到抱歉
可以嘗試 = 你夠膽就試下
是但你啦 = 後果自負

男性用字解話
我好肚餓 = 我好肚餓
我好眼瞓 = 我好眼瞓
件衫好靚 = 妳身材好玲瓏浮凸
好悶啊 = 不如我地上床
得閒出來啦 = 我想同妳上床
好掛住妳 = 我想同妳再上床
對鞋都唔襯條裙 = 我係基嘅啵

15.03.2007 | 超低能, 勁搞笑

哎呀, 真係超低能勁搞笑啊.. 一定要喺度同大家分享呢個林海峰是但噏踎低噴飯棟篤笑.. 要注意聽佢特登學啲妹妹仔扮可愛教主嘅懶音.. 嘩, 笑到碌地啊, 一定要睇啊!!

14.03.2007 | 叫我..花輪同學

最近有個朋友畀咗個綽號我, 就係「花輪同學」喇.. 初時都唔知道係乜嚟, 原來佢係因為覺得我髮型梳得似呢個卡通片《櫻桃小丸子》裡邊嘅一個角色.. 當時真係對呢個角色一無所知, 過後係上網搵到關於佢嘅質料.. 其實睇睇下, 覺得都有點似, 跟住反而自己覺得花輪同學呢個綽號又幾順耳幾好聽啵, 哈哈.. 其實我唔介意你咁叫我架, 反而覺得好親切添..

維基百科: 【花輪和彥】巿立入江小學三年四組學生, 與小丸子同為小動物值日生, 清水市有錢家庭中的闊少爺, 父母都在國外工作.. 追求高尚的生活, 放假時常坐飛機周遊列國, 極受同儕羨慕; 對朋友很大方, 也愛打扮, 常招待班上各人到家中豪宅庭園參觀; 常撥弄自己的頭髮, 雖然有時會有點自大, 不過心地善良.. 還會操英同法語, 口頭禪是「hi! baby」, 句子中會挾有英文.. 夢想成為印度王子, 有很多美女相伴..

13.03.2007 | [SK/0617] 一周年

嘩! 話咁快, 我呢個blog今日已經一歲大喇.. 恭喜恭喜, 終於畀我等到呢一日, 認真可喜可賀.. 咁值得高興嘅事, 等我用返紅色字體嚟賀一賀佢先..

一年前, 因為身邊幾個朋友都有玩下blog呢個玩意, 我由最初不感興趣, 到最後蠢蠢欲動開始嘗試.. 由當初嘅熱誠, 到中期嘅懶散, 再到最近嘅狀態回勇.. 其實每一個post每一個字都係我情感同思路嘅心血嚟, 就好似寫緊一本日記咁, 但係呢本日記確係公諸於朋友, 大家一齊分享嘅.. hmm, 其實係邊個人發明寫blog呢樣東西咧? 好叻啊佢..

12.03.2007 | 鐵鐵鐵鐵鐵..鐵達尼

呢個廣告好啊.. 單係呢一個point就完全sell到部DVD player啦.. 泰國廣告界真係奇才輩出啊.. 一個講嘢戟得夠晒實在, 另外一個表情疑惑得好搞笑.. 如果畀著我遇到呢個情況, 我實在會不知所措..

11.03.2007 | 娜姐, 你好嘢

最近發覺娜姐佢好似無處不在咁.. 周街都係佢H&M服裝品牌嘅廣告, 同埋啲影視唱片鋪清一色熱播佢巡迴演出嘅DVD, gym內有時都會播佢巡迴演唱張CD.. 其實對於好似佢一個咁傳奇嘅女人, 真係不得不豎起隻拇指, 對呢個47歲嘅女人講聲:「娜姐, 你好嘢」.. 近半百嘅佢, keep得好唔在講.. 見佢喺舞台上嘅魅力, 果一種自信, 果一種征服全場觀眾嘅魄力.. 憑心果句, 唔單只係風韻尤存, 其實係真係好掂.. 我之前從來都對佢冇乜好感, 但係近排確實係對佢嘅實力(做戲例外)另眼相看.. 買咗佢The Confessions Tour巡迴演唱張CD+DVD, 確實好有視覺同埋聽覺上嘅享受..

10.03.2007 | 巧合, 還是慣性?

睇返一路以來所寫啲blog, 突然間發現一個好巧合嘅現象.. 就係我啲post有九成以上都係寫成七行字嘅篇幅, 好鬼邪啊.. 哈哈, 唔信嘅話, 真係可以數一數, 絕無半點虛假, 都咪話我呃你添喎.. 覺得好似啲古人寫七言詩咁, 有字數限制, 而我就好似限定七行字就要講晒我要講嘅嘢咁.. 喂, 如果連呢一個post都係可以七行字搞掂嘅話, 咁我諗都真係唔可以話係純屬巧合, 而係叫做自成一派嘅慣性潛意識喇.. 唔, 不如又嚟多個小心願咧? 就係以後啲post都係要七行字嘅.. well, 呢個應該唔叫心願, 而係叫挑戰, 哈哈..

09.03.2007 | 一個小心願

對於呢個blog, 能夠keep住經常update佢其實對我嚟講唔係件簡單嘅事.. 只不過由當初貪玩學人玩blog之後, 雖然頻頻擔心自己會係三分鐘熱度, 但係數數下日子, 再多幾日竟然都一年喇.. 真係一種好奇妙嘅感覺, 當然大家嘅支持就係我維持嘅推動力啦, comments無任歡迎.. 所以突然間有個小心願, 就係希望呢個三月(係啊,係個週年月啊)我可以毫無間斷咁每一日都會有個post.. 只要有時間, 只要有靈感, 只要有恆心, 只要有推動力, 我一定做得到, 一定可以有我呢個blog前所未有嘅記錄.. 哈哈!!

08.03.2007 | 工作為乜嘢?

我成日都喺都諗.. 每日返工放工係為咗乜嘢? 因為工作忙碌而令到自己失去寶貴嘅個人時間係為咗乜嘢? 因為工作壓力而令到自己寢食不安係為咗乜嘢? 為咗生活, 為咗賺錢, 為咗名利, 為咗將來, 為咗過時間, 為咗搵食, 為咗充實自己, 為咗證實自己能力, 為咗喺呢個社會生存, 為咗出人頭地.. 好多好多原因, 因人而異.. 其實為咗咩都好, 我覺得現時呢一刻我最需要嘅係一股可以令我永遠都咁享受工作嘅力量, 因為只有享受一樣嘢嘅時候, 先至可以真真正正覺得從中獲益, 如果唔係話, 跟本就好難撇開因為成見而產生嘅個種煩厭感..

07.03.2007 | 相比之下...

今日搭飛機去吉隆坡, 被抽中回答航空公司份問卷調查.. 真係好巧合, 因為上兩個星期由吉隆坡返嚟香港都係被抽中, 只不過上次係馬來西亞航空, 今日係國泰航空.. 可能係我飛得多嘅關係啦.. 講開又講, 原先都唔覺唔妥, 但係填完今日份問卷後就覺得前者好冇誠意, 冇啲lucky draw之類啲嘢都唔緊要啦, 畀份調查問卷過人竟然連支筆都冇, 仲要我開口同第個空姐借, 見我用完支筆仲即刻哪哪聲收埋支筆去.. 唉, 何必咧? 果然, 凡事只要一經比較, 即刻高低立見..

06.03.2007 | 尷尬

今日有位同事突然間MSN我, 佢話今日係另外兩個同事同一日生日, 就咁睇其實都冇咩特別啦.. 之不過, 點解佢會知道咧? 咪就係因為其中一位突然間行埋去, 借啲意同佢傾偈, 對話大概係咁:
「喂, 今日係邊個生日喎, 有冇諗住點同佢慶祝啊?」
「哦? 係咩? 咁你有冇咩提議咁啊?」
「我唔知啊.. 因為今日都係我生日呀嘛..」
「...」(冷汗直飆)
嘩, 笑爆我嘅嘴喇!! 佢問我點, 因為佢都呆咗一陣唔知點算.. 都真係有啲尷尬, 咁不如我即刻好有誠意咁好戥佢高興咁MSN佢祝佢生日快樂啦, 唔止咁喎, 仲要摟埋其他同事一齊action.. 雖然係有啲擺到明, 但係都叫做有人有啲表示呀..

05.03.2007 | 猜燈謎

見小年出咗題咁有水準嘅燈謎, 喺一個網站度睇到呢個, 覺得都好pro, 所以特別喺度轉載同大家分享下, 不妨猜猜謎底到底係乜嘢, 其實唔算難, 當你掌握到個巧妙之後, 真係會覺得佢好有趣.. 以下每一行各猜一個字, 四個字其實係有關係同埋有先後次序架.. 小小提示: 用拆字法..

百萬雄兵捲白旗
天下無人去征西
秦王殺了余元帥
罵完一陣把馬騎

04.03.2007 | 元宵節快樂

話咁快,今日已經係元宵節喇, 代表住農曆新年嘅結束.. 其實都冇唔捨得, 因為一早都已經投入工作啦, 放完假後, 農曆新年都只不過係平常嘅工作天.. 今晚喺時代廣場嘅元宵慶典, 去湊下熱鬧學人猜燈謎.. 嘩, 都唔係容易呀.. 掛住成百個燈謎, 我都只不過可以猜到不上五個.. 再加上猜中燈謎D糖果包獎品都已經被換取一空, 所以都係略略玩下嗟.. 其實唔代表好多人叻, 因為是但猜中三題就可以換取糖果包一份, 哈哈..

記得嘅有以下呢幾題, 猜唔猜到啊?
四張口的狗(猜一字)
九十九(猜一字)
只是近黃昏(猜一字)
十二點(猜一字)
兩只狗談天(猜一字)
十五個人(猜一字)

03.03.2007 | 禮拜六狂想曲

今日係禮拜六啊, 好中意禮拜六, 因為唔駛返工.. 都中意禮拜五晚嘅, 因為期待著禮拜六嘅來臨呀嘛.. 個人中意禮拜六多過禮拜日, 因為禮拜六係週末可以休息嘅開始, 反而禮拜日過後就係乞人憎嘅禮拜一.. 除非禮拜一係假期啦, 咁就變成二乞人憎啦.. 其實應該話假期後嘅第一個工作日永遠都係咁乞人憎.. 我諗個問題唔係禮拜幾嘅關係, 而係我自己個人嘅問題, 如果我係enjoy份工嘅話, 我諗我都會好期待嘅, 但係個真相就係我唔係一個熱愛工作的工作狂囉.. 唉, 你話如果可以唔駛做又有錢可以洗, 幾好啊!!

02.03.2007 | 不藥而癒??

放完假返去工作崗位, 依稀記得扁桃腺係有啲發炎嘅症狀, 要吞啖口水都覺得痛.. 但係卻又覺得係間歇性, 加上工作忙碌, 所以都唔得閒理佢住.. 據知扁桃腺炎會引致喉嚨痛發燒等, 過後幾日的確係覺得身體有啲興興哋, 但又因為schedule嘅關係不得不頂硬繼續上.. 喺毫無理會之下, 今日竟然覺得好似都好返晒咁, 唔覺有事啵.. 難道真係不藥而癒? 定或者病情其實會因為心理作用而變得更加嚴重咧? 唔去諗佢反而可以不知不覺間痊癒? 其實小病是福, 我有時都真介唔介意輕微生病嘅, 好矛盾, 哈哈..

01.03.2007 | 好滿意, 好滿足

唔, 最近都幾滿意自己對呢blog嘅貢獻, 簡直就係破晒記錄咁儘量每日一blog啦.. 上個月創咗自己嘅個人記錄, 一個月28日內有24個post啊, 真係難以想象.. 曾幾何時我成日都要煩惱應該喺個blog度寫啲乜嘢, 搞到朋友仲以為我從此都唔再掂個blog, 真係唔好意思.. 希望呢個勢可以永久持續啦, 因為當我睇返自己啲所謂「作品」之後, 其實都好有成就感架, 因為對於一個寫作白痴嘅我嚟講, 呢份的確係份苦差, 但慶幸的是我至今都仍然能夠繼續呢份堅持.. 話是話, 由開始到依家都有一年喇, 哈哈..