31.05.2007 | 回到現實

放咗足足十二日假, 今日終於都要返回工作崗位喇.. 今次出奇地冇嗰種唔想返去現實嘅感覺, 以往一向來放完假之後, 一定係好唔願意返工, 放假最後一刻返工前一日通常都會有種好想死嘅感覺.. 甚至試過有一次因為放完長假後, 實在太過唔想返工喇, 所以第二朝詐晒病咁去診所呃返張病假紙, 就咁唔駛返工, 暫且自欺欺人咁仲喺度放緊假.. 哈哈..

小君對於呢個現象有一個好獨特嘅見解, 我覺得都幾有道理架.. 點解會留戀於過咗去嘅假期而唔想回到現實呢? 因為你仲有啲事情或者願望未完成.. 如果對於過咗去嘅假期並無留戀反而急不及待想回到現實, 咁就代表假期並不愉快.. 咁樣並無留戀既無恐懼回到現實, 就表示個假期係好完美並無甚麼遺憾之事, 會好心甘情願咁回到工作崗位, 因為已經休息足夠充晒電喇.. 我諗我呢次就係此等心情, 十日京滬之旅的確好完美, 期待完美嘅延續..

29.05.2007 | 京滬遊... 之後

一個悠長嘅上海/北京旅程之後, 返回現實生活後第一件要做嘅事, 就係為上個禮拜五唔見咗銀包善後喇.. 因為今日都係繼續放假, 所以一定要喺今日搞掂晒身份證, 駕駛執照, 信用卡, 銀行提款卡報失同補領事宜..

雖然係唔駛返工, 但係都唔可以太晏起身, 因為要補領全部嘢確實係好嘥時間.. 所以九點半就出門, 第一件事直產公民登記局補領身份證.. 一入到去見到裡邊坐滿人喺度等候, 拎籌時候仲要輪70幾個先至到我, 平時啲公務員嘅辦事效率同工作態度都已經令我提心吊膽, 今日咁多人會唔會有機會輪到我架?? 突然醒起, 最近係學校假期, 所以特別多父母帶滿12歲嘅小朋友嚟出身份證..

等咗足足兩個小時, 終於輪到我喇, 結果兩個小時嘅等待只係為咗短短十分鐘嘅過程.. 有咗個臨時身分證, 求祈食咗個晏之後, 就即刻趕下一場飛奔兩間唔同銀行, 襯未閂門前去補領信用卡同提款卡.. OK啦, 都尚算順利, 一個小時之內搞掂..

之後就係最後一站陸路交通局, 又係另一個服務令我聞之喪膽嘅地方.. 去到首先迷失咗一陣到底應該要去邊一個部門, 不過好彩"一擊即中", 而且服務之效率同質數令我大跌眼鏡, 張表格爭啲未填晒就輪到我喇, 而且個counter都好有禮貌有求必應, 仲幫埋我renew個駕駛執照添噃.. 非常之好, 前後都唔到15分鐘就搞掂, 比我想象中好一千倍..

今日就係成日頻頻扑扑四週圍飛奔搞補領喇.. 所以話銀包唔見, 錢冇咗事小, 啲證件唔見就大件事喇, 因為善後的確好累人.. 所以從今以後, 我要學識將錢同證件分開放喇..

28.05.2007 | 京滬遊(X) 劃下完美的省略點...

今日結束上海北京之旅喇, 搭早上10:15機.. 由小年屋企搭地鐵四號線轉二號線去到龍陽站, 跟住搭磁懸浮鐵去浦東機場.. 剛好遇到一班內地旅行團都係搭磁浮, 相信應該係itinerary其中一個項目啦, 真係大殺風景, 哈哈.. 呢個磁浮果然係不同凡響, 最高速每小時431公里, 所以上車後8分鐘之內眨吓眼就到咗機場喇.. 而且憑當日機票單程只需RMB40, 我覺得OK啦尚畀得過..

今次架飛機又再延遲一個小時起飛, 已經係呢十日第三次經歷喇, 難道係中國搭飛機每次都要延遲起飛?? 正一超低能.. 點都好, 呢十日京滬之旅的確過得好開心好開心, 好多謝小君同行, 好多謝小慧同小年嘅熱情款待, 好多謝小明同Zoe嘅細心照顧, 好多謝同我哋一齊去食飯去玩嘅各位朋友.. 你們是最好的, 你們知道嗎??

通常啲人會話「為今次嘅旅程劃下完美嘅句點」, 但係我話應該係「劃下完美嘅省略點」至啱咯.. 因為句點代表結束, 省略點代表仲有延續吖嘛..

27.05.2007 | 京滬遊(IX) 與時間競賽

我哋喺杭州過咗一晚, 下晝四點鐘坐巴士返上海.. 因為噚晚過份盡興, 所以今朝大家可以準備活動都已經為時正午喇.. 去咗小慧極力推介嘅靈隱寺, 佢呢個寺廟好靚, 而且我嚟咗中國咁耐都未去過一間寺廟, 所以唔去會後悔.. 小慧話呢個寺廟好靈, 因為佢上次喺度亂講嘢, 所以搞到自己喺廁所扭襯腳, 跟住行咗十步路後就即刻暈低..

個寺廟範圍外邊有個公園, 裡頭有好多佛像石雕, 整得好靚好有靈性, 但係因為時間關係, 只能睇到週邊幾個.. 寺廟範圍有五六個廟依山而建, 每個都供奉唔同嘅神, 但係最令我印象深刻為之震撼嘅, 係個五百羅漢館, 每個羅漢銅像都栩栩如生, 但係我哋始終都搵唔到第五百個, 最後一個編號都好似淨係四百六十幾..

行完都兩點鐘, 於是匆匆忙忙咁喺臨走前食番餐飯, 目標就係噚晚有錢都食唔到嘅東坡肉.. 呢餐好匆忙咁喺二十分鐘內搞掂, 不愧為速戰速決, 所以未能真正享受盅東坡肉層肥肉入口即溶嘅感覺, 確係杭州一大遺憾也.. 食完之後, 即刻飛奔汽車東站, 坐長途巴士返上海.. 因為今個週末係雙休, 所以好多人去杭州.. 沿途個個都擔心趕不切, 不過好彩到達車站時間啱啱好, 隨即上車返上海喇..

其實杭州都真係唔錯架, 難怪小慧去過八次都唔覺得悶啦.. 我可以肯定, 今次同我哋一齊去, 個感覺會係最開心嘅一次, 係嗎??

26.05.2007 | 京滬遊(VIII) 今日去郊游

今日去郊游.. 突然間諗到郊游呢兩個字, 覺得好切合今日去杭州嘅心情.. 今次好開心, 因為係一大班人一齊去, 多得小慧面子夠廣.. 上邊右上角張相由左至右: Calvin, 阿年, Chloe, 曉慧, SK, Kenji, 惠茹, 仲有唔喺入邊嘅彩琴同Malcom(阿媽湊仔瞓覺所以留喺酒店).. 好耐冇影團體照喇, 呢幾張都影得好正..

話說今次係小慧第八次去杭州喇, 難得嘅係佢仍然不辭辛苦咁篇排行程兼且湊住我哋一眾人, 好感激啊.. 好耐都未試過咁多人一齊去「郊游」喇, 所以呢個杭州之旅一班人有講有笑咁的確好開心.. 而且我覺得杭州市本來就係一個唔錯嘅地方, 所以絕對好慶幸可以有機會嚟到..

今日行程: 日遊西湖, 畀人焜上車去咗所謂嘅杭州五大景點, 尋找小慧極力推介嘅柳浪聞鶯, 外婆家餐館食晚飯, 錢櫃唱K.. 最難忘就係餐飯, 因為聞名嘅東坡肉售罄, 所以我哋一口氣好豪咁點咗十幾樣餸, 碟碟好味而且賣單時每人淨係RMB50, 今餐令小君不停咁稱讚三日都要繼續稱讚.. 成日高潮就係飯後余興喇, 去咗酒店對面間錢櫃唱K.. 間K嘅裝簧簡直一絕, 氣派撇甩酒店九條街.. 雖然我哋放棄咗物盡其用酒店住宿嘅RMB250, 但係唱完K後每人RMB85的確畀得開心(係喇, 小君又再次見牙唔見眼)..

呢一日, 就喺一片喧嘩歡笑聲中結束喇.. 喧嘩歡笑聲係乜嘢?? 咪就係用盡RMB250的故事囉, 哈哈..

25.05.2007 | 京滬遊(VII) 哀悼銀包

噚晚返到嚟上海, 今日禮拜五小年同小慧都要返工, 所以就同小君協議自由活動.. 因為佢都嚟過上海玩所以prefer好休閒啲, 而我第一次嚟所以儘量要cover多啲地方.. 所以計劃去南京路, 沿路行去外灘, 再過黃浦江去浦東陸家嘴望望東方明珠塔, 同埋世紀大道嘅商業建築物, 最後再返去南京路shopping買嘢..

十點鐘一早出門, 地鐵四號線轉一號線去到人民廣場到達南京路步行街.. 沿路行大概15分鐘到達外灘, 但係是日天氣灰蒙, 隔岸難見浦東skyline, 於是就繼續過江去浦東.. 就喺要拎出個銀包梛錢搭地鐵時, 至發覺個銀包唔見咗, 嗰帶個拉鏈開咗一半, 死喇~~十成十係畀人偷咗啦, 現金, 身份證, 信用卡, 提款卡通通唔見晒.. 成世人都未唔見過銀包, 今次竟然喺一個異鄉唔見..

不過好彩, passport同埋電話都仲喺, 而且我有一大部份錢係另外收喺安全地方, 所以都不至於死晒.. 哪哪臨打電話去cancel晒所有card, 然後去派出所報案拎番份report.. 一切搞掂妥當, 唔見都唔見咗啦, 都冇乜嘢可以做架喇.. 所以就一於馬照跑舞照跳, 繼續我一早plan好嘅行程.. 其實覺得我自己當時都頗瀟灑, 仲有心情去玩, 而且仲shopping買咗三件靚T恤一件型爆迷彩短褲, 好開心, 哈哈..

夜晚去咗間叫做保羅酒吧嘅餐廳食嘢, 叫咗八樣餸兩樣冷盤, 又再一次令小君畀錢畀得見牙唔見眼..

24.05.2007 | 京滬遊(VI) 好彩有呢一日

原本以為用三日就可以cover晒北京所有應該去嘅景點, 第二日一場長壽雨令我哋嘥咗日衝刺時間, 好彩最後都係計劃逗留四日, 如果唔係就去唔到頤和園同王府井喇..

初時都覺得頤和園又係同故宮類似嘅地方一個, 但係呢個錯覺好快就喺入到去昆明湖範圍後, 而被打消喇.. 因為頤和園感覺上比故宮大, 而且山明水秀, 湖光山色加上柳樹成蔭, 畀人一個好休閒嘅感覺.. 尤其長廊橫梁上啲畫, 每一個都係獨一無二, 的確令我睇得津津樂道.. 難怪頤和園係目前世界上建筑規模最大, 保存得最完整, 文化價值最高嘅一座皇家園林博物館..

頤和園之後, 飛返上海之前, 仲有兩個小時時間, 於是就去王府井步行街行吓.. 呢條街同上海南京路相似, 但係就覺得南京路好一百倍喇.. 再加上條街有一大段路正在進行維修工作, 導致沙塵滾滾嘈音響耳, 查實都唔enjoy..

傍晚六點搭九飛返上海, 但係好乞人憎地飛機又延遲一個小時起飛..

23.05.2007 | 京滬遊(V) 我係一名好漢

經過噚日一個慘痛經歷之後, 今日終於天公作美, 我同小君終於一嘗好漢滋味喇.. 同樣晨早七點半出門, 食咗早餐之後就去天安門東南面個旅遊集散中心, 坐巴士去八達嶺長城.. 嚟到北京, 點可以唔去長城啊?? 正所謂不到長城非好漢吖嘛..

能夠踏上長城, 心情確實係好驕傲架, 而且我哋一路行一路擺姿態影靚相, 終於都登上長城最高點嘅好漢坡.. 個感覺真係同去其他景點好唔同, 因為你會因為長城嘅偉大而感到自豪, 古人係點樣可以建起呢座長城?? 真係要為佢哋拍爛手掌.. 不過我覺得嗰時候我同小君擺姿態影靚相嘅心情, 係大於對於長城仰慕嘅心情, 哈哈.. 其實好簡單一句, 為咗證明我哋曾經到此一遊..

長城之後, 夜晚就同小明Zoe一班朋友去大董食飯.. 當然就少不了出晒名嘅北京烤鴨啦.. 呢間嘢確實巴閉, 七點後不設訂位, 所以有個好大嘅廳畀客人等位, 可以透過玻璃睇到廚房烤鴨經過, 而且仲可以任挪嘢飲添噃(衰到連wine都有添架).. 難怪佢咁巴閉都仲有咁多人幫襯, 啲嘢真係整得好靚好好食, 尤其個烤鴨更是令我為之驚艷.. 呢一餐我好滿意, 今日我係食得好滿足嘅好漢一名..

22.05.2007 | 京滬遊(IV) 天公祂不作美

有冇發覺呢篇京滬之旅冇相睇啊?? 原因好簡單, 因為今日北京落咗成日嘅雨, 我啲好有幸咁第一次去北京就遇著北京兩年嚟最潮濕嘅一天..

原本今日plan好要去長城, 所以七點鐘晨咁早就起身喇.. 點知嚟到地鐵站, 即刻落咗場雨.. 之前小明話我哋知北京係好少落雨嘅, 就算係落雨最多都係落十分鐘就停架喇.. 所以我同小君就傻罡罡咁喺度等雨停, 等吓等吓不經不覺都成個鐘喇, 於是就放棄去長城, 睇吓個地圖附近有乜地方去.. 咦, 就喺個地鐵站後邊咪有間中國國家博物館囉.. 於是就諗住近, 可以稍為淋啲雨快步行過去啦, 點知其實中國地大物博, 所謂地鐵站後邊其實都頗長一段距離.. 淋濕個身以為到啦, 點知至發覺個博物館要暫時關閉到2010年.. @#$*%?~/+&^..

最後終於死心, 不如返屋企瞓覺算數吧啦.. 今日嘅結論就係, 北京落咗成日雨, 邊度都唔駛去..

21.05.2007 | 京滬遊(III) 一日緊湊

噚晚漏夜由上海飛過嚟北京, 加上飛機延遲一個小時起飛, 所以到北京嘅時候已經凌晨零時卅分喇.. 喺度多謝小明不辭辛苦, 三更半夜都兩脥插刀咁去機場接我哋..

經過小明噚晚為我哋詳細講解, 今朝晨早起身, 已經好清楚今日嘅行程.. 食完早餐後, 搭地鐵去天安門廣場, 擺兩擺鋪士影返幾幅相見證自己曾經踏足此地.. 正如小年所講, 天安門廣場已經變成一個遊京人士必到嘅景點, 又有幾多人仲記得背後歷史嘅點滴咧?

毛主席幅相之下, 就係進入故宮紫禁城嘅正門喇.. 嚟到北京, 故宮梗係不可錯過啦, 現在我要入宮喇.. 一入宮門, 果然為之一振, 好宏偉好莊嚴嘅宮殿群.. 因為劇集《金枝慾孽》嘅關係, 對於裡頭嘅宮殿總算稍有所聞, 亦都因為咁所由以對於故宮不至於太陌生.. 可惜太和殿同埋神武門正在進行維修, 確為一點美中不足..

由神武門行出紫禁城南邊, 過條馬路就係景山公園.. 公園裡頭有五個亭建喺一座山上嘅, 最高點中間個亭可以俯瞰整個紫禁城.. 可能因為小明噚晚對於佢嘅描述而有過高期望, 所以當企喺個亭一望, 都不過如是睇唔出整個紫禁城嘅宏偉同莊嚴, 再加上維修中嘅兩個宮殿, 就更加大殺風景啦..

原本plan好今日行程就喺景山公園結束, 點知同小君兩人行完天安門/故宮/景山公園都不過係下晝兩點幾.. 所以就好即興咁諗到去天壇, 於是就盲盅盅咁搵到架巴士搭去天壇喇.. 覺得天壇都幾靚, 尤其係個祈年殿, 更加係比故宮裡頭好多宮殿來得吸引.. 天子用嚟祭天嘅地方, 梗係有番咁上下啦我諗.. 有點遺憾就係我部相機冇晒電, 如果唔係應該會喺度影多幾廿幅相..

今日行程仲未結束.. 夜晚小明同Zoe就帶我哋去什殺海還食晚餐, 然後就感受吓北京夜生活.. 呢個地方有好多酒吧, 規模比蘭桂坊大好多, 每日幫襯一間一個月都幫襯唔晒.. 而且每間都係用live band架.. 其實喺度飲嘢嘅feel應該係好唔錯, 因為冇咗蘭桂坊嘅喧嘩.. 臨走前仲品嘗過地道冰糖葫蘆, 幾好味, 而且仲嘗試本地人隨街吐山楂核嗰種「豪邁的快感」

一日時間可以cover咁多景點, 相信旅行團都做唔到.. 證明到乜嘢呢?? 我哋仲後生, 哈哈..

20.05.2007 | 京滬遊(II) 食得滋味, 畀得開心

經過噚日一連串吃喝玩樂之後, 今日繼續喺上海享受人生.. 一早就去新天地翡翠飲茶, 除咗遇到元彪哥哥之外, 其實最享受就係間餐廳嘅點心同埋成間餐廳嘅裝簧氣氛, 令人有種置身極之奢侈環境嘅感覺, 但係賣單每人只要RMB70, 都幾抵食..

之後就喺新天地呢個露天咖啡店聚集嘅地方感染一下上海嘅外國feel.. 然後就轉戰Kathryn熱心嚮導嘅孫中山故居同宋齡故居, 覺得幾唔錯都好多嘢睇.. 最後去上海最繁忙嘅shopping街南京路步行街.. 我同小君一到步, 就即刻畀條街嘅繁華同人潮搞到雀躍萬分, 隨即大擺鋪士影相留念.. 小慧即刻批定我哋兩個係如假包換嘅時代人..

今日臨飛北京前最後一個驚喜, 就係餐晚飯喇.. 晚餐去咗小肥羊打邊爐, 叫咗成抬嘅嘢, 食完再添叫, 肥美刷羊肉片的確令我無儘回味.. 結果賣單時每人RMB30唔搞笑, 小君開心到爭啲笑到喺地下碌兩個圈, 如果喺香港食呢餐至少都要百靈蚊啦..

19.05.2007 | 京滬遊(I) 一見如故

終於, 終於都可以去到上海喇.. 今朝五點鐘就起身喇, 沖完個涼稍為執執個行李就出發去機場喇.. 由吉隆坡飛上海需要差唔多五個小時, 都唔係太耐, 上機睇吓電視食吓飛機餐, 眨吓眼就到喇..

到達上海浦東國際機場, 熱心嘅小年帶埋(好想嘗試坐磁浮懸鐵嘅)小慧千里迢迢咁嚟到機場接我同小君機.. 一見到面, 當然就係被恥笑我呢個史上最醜髮型啦.. 不過大家咁熟, 都冇話咩嘅, 笑過咪算囉.. 兩個好耐冇見嘅朋友, 平時都唔需要點樣聯絡, 但係一見面就可以即刻感覺好靠近咁, 四個字可以形容當時嘅情況--一見如故..

踏足上海第一日, 熱情嘅小慧就篇排一連串吃喝玩樂節目.. 城隍廟頤園食小籠包同埋街頭小食, 夜遊外灘觀賞黃浦兩岸景色, 浦東新吉士晚餐, 最後以唱K結束是日節目, 實在係盡興而歸, 返到小年屋企業, 即刻累得趴喺張床度唔想郁喇..

16.05.2007 | 史上最醜髮型

一路以來都係每隔三四個禮拜就要剪吓頭髮, 所以今日趁臨飛上海之前去探吓個髮型師.. 放工以後就即刻飛奔返屋企放低啲嘢, 跟住就去個salon剪頭髮.. 本以為剪個靚仔頭開開心心去上海啦, 點知個髮型師無啦啦建議我剪個型爆發行, 喺好短好短嗰種.. 初時都有點猶疑, 但係佢話我個頭可以剪呢個髮型, 而且剪咗塊面睇起嚟會長啲.. 嘩, 就呢一句塊面睇起嚟會長啲, 我就話好啦即管試吓啦.. 結果剃刀殊一聲落去, 冇得回頭喇.. 我呢個史上史上最醜髮型就此誕生喇, 結果塊面睇起嚟一啲都冇長到, 反而大咗圓咗一個碼, 足足一個飯碟咁大.. 好傷心好激心啊!! 返到屋企, 未入門就已經畀屋企笑到面黃.. 唉, 親愛的多年髮型師朋友, 你今日真係好介紹喇.. 我未來幾個月要點樣見人啊??

14.05.2007 | 燙衫之王

頭先同幾個同事一齊食晏, 傾到其中一個同事最近請咗個印佣幫手佢打理家務兼凑女.. 咁另外一個同事就話, 印佣至叻就係燙衫, 好似每個都受過專業燙衫訓練咁.. 我就覺得好搞笑喇, 佢哋過嚟之前係一定會需要受過訓練, 但係個訓練應該係要好全面嘅嘛, 我就覺得會特別著重於燙衫呢一方面噃.. 點都好, 聽佢話佢個一見生褓人就喊嘅囡囡對個印佣好冇驚怕, 都戥佢先鬆口氣..

講起燙衫, 其實都不得不讚吓自己.. 我其實係由F4開始就自己燙校服喇, 跟住以後自己啲衫都係自己落手落腳燙架.. 十幾年累積落嚟嘅經驗, 依家件件返工恤衫都畀我燙到直一直, 對於我嚟講簡直就係毫無難度啦.. 雖然堪稱得上係屋企嘅燙衫之王, 但係並唔代表我唔抗拒燙衫噃.. 其實我有個習慣就係一次過會燙好一個禮拜要著嘅衫, 一勞永逸費事每朝起身都要趕住燙衫, 我呈願禮拜天花多點時間, 咁每朝都可以瞓多兩個字啦.. 所以至怕禮拜日要燙衫, 因為成個鐘對住啲衫同燙斗係超熱架, 每次都係大汗滴細汗周身濕透, 勁搞笑.. 喺度話個tips你知, 想燙衫唔覺熱就最好喺朝早瞓醒後燙喇, 因為朝早個體溫經過一覺之後係會稍微降低架..

後記: 記住, 一個識得幫自己燙直件衫嘅男人, 會係個好男人.. 哈哈!!

13.05.2007 | 為善最樂

呢個廣告係挪威Unicef在各大超級市場冷藏部嘅公益廣告.. 個廣告擺喺個冷藏櫃, 果然為之震撼.. 我從報章上睇到關於呢個廣告嘅文章, 的確深受同感..

可以清楚睇見Unicef勸告公眾關注喀什米爾接近一萬個因為嚴寒冬天而面臨生命危險嘅兒童.. 我相信每一個原先想買盒冷藏pizza畀啲子女享用嘅父母, 一睇到呢個廣告嘅時候, 都應該會心情為之一沉, 將原本用嚟買pizza嘅錢轉做善款捐畀世界一端不幸的小朋友..

天下父母心, 喺你慶幸自己嘅子女可以喺個健康幸福環境之下成長嘅同時, 眼見其他人嘅子女卻需要與大自然禍害抗爭, 希望可以盡幾多能力嘅就盡幾多能力.. 做善事最緊要講個心意, 我覺得就算係好微少嘅貢獻, 都可以發揮佢嘅效益力量.. 可以幫到人嘅話, 我覺得要幫, 尤其是係對於呢啲社會未來主人翁..

12.05.2007 | 員工同樂日

今日係本公司所謂一個月一次嘅員工同樂日.. 公司為咗拉近個同事之間嘅關係同距離, 所以喺個budgeting上係有撥款入呢個員工同樂基金嘅.. 今個月同事plan咗去Bukit Tinggi呢個山莊, 我其實之前(正確嚟講應該係幾年前)都去過, 個地方都幾唔錯啦.. 下晝兩點鐘集合, 三架車一齊上山, 原本應該係個唔錯嘅outing, 但係咁啱得咁翹竟然落起雨嚟.. 成個禮拜都唔見落雨, 但係偏偏就喺今日落雨.. 冇辦法啦, 一場上山為咗唔掃興, 唯有擔遮囉.. 就咁整個同樂日因為場雨嘅關係, 未能盡興..

之後同個朋友提起呢件事, 佢話好羨慕我可以每個月都有呢啲活動, 因為佢就係一年先得嗰一次.. 我就話佢間大公司同我唔同, 我呢啲真係叫做outing, 而佢嗰啲正確嚟講應該只能叫做team building.. 雖然個objective都係要拉緊關係, 但係兩者其實好大差別.. team building需要分作活動, 要完成個一早決定好嘅任務, 最後present畀個organiser後仲要自我檢討.. 我覺得好公式化, 其實同返工一team人做嘢冇乜分別.. 反而我呢個outing就真係純粹大家出嚟聚吓, 一齊去吓一個地方輕鬆吓, 就係好似一班朋友去街咁簡單.. 我覺得反而個效果會好過啲team building囉, 不過始終呢個就係細公司同大機構嘅分別..

11.05.2007 | 不見天日

呢個星期簡直係不見天日.. 其實嚴格嚟講都唔喺非常之多嘢做, 但係每樣嘢都好嘥時間, 而且每日實在係有太多事情干擾, 好難專心做到嘢.. 齋係要整個report畀客就用咗幾日時間.. 因為要不停重複咁做同一個動作, 跟住就要用部手機個計時器record所用個時間, 最可憐就係因為要記錄時間, 所以不能夠分心做其他嘢, 因為要緊緊睇住個mon, 個動作做完就要眼明手快stop咗個計時器呀嘛.. 結果成個禮拜都冇出過去食晏, 食晏時間因為冇外來干擾所以儘量爭取時間, 而且每日都做到成九點鐘, 簡直就係日出夜歸.. 老實講, 係公司個時間都仲多過係屋企, 見同事仲多過見家人, 哈哈.. 講時覺得好笑, 但係認真諗吓, 其實咁樣嘅生活係好唔平衡, 好pathetic架.. 做咗咁多年嘢, 雖然未至於話身心疲類, 人雖然要工作嚟做精神寄託, 但係點都要一個平衡囉我覺得.. 不過至少相比我啲做audit嘅朋友, 算係幸福得多喇..

10.05.2007 | 我的銀包

剛剛打開銀包諗住數數裡頭淨底幾多錢.. 發現個銀包漲卜卜, 其實唔係銀紙多, 而係裡頭放咗一大堆卡.. 身份證, 車牌, 提款卡, 信用卡, 保健卡同埋成疊會員優惠卡, 加埋都超過十張多.. 放咁多張卡喺個銀包度, 其實都未必用得著, 但係又抱住以防萬一嘅心態, 帶咗唔用總好過要用嗰陣發覺留喺屋企啦.. 不過因為實在太多卡, 有時見到都眼冤, 所以出門前都會執執佢嘅, 有啲好確定係唔會用得著嘅就索性唔拎啦.. 因為如果個銀包太過漲, 放入個褲袋後, 實在是有點唔志在兼有啲啲不雅, 哈哈.. 所以我依家都係用緊長形銀包, 相比起普通折起嗰種就薄多啦, 而且通常個銀包我都一定係放入個包包, 因為覺得隨身帶住個銀包好似哽住哽住咁, 除非我係兩手空空就需要將個銀包放入褲袋啦..

09.05.2007 | 黃金受罪周

噚晚報紙上睇到一篇讀者寫關於中國五一黃金周嘅文章, 個標題就係黃金受罪周, 齋睇個標題就深深咁領會到佢想要寫啲咩喇.. 的確呢個黃金周係非常之「遠近馳名」, 全中國13億人口同一時間放假出外旅行, 首要地方就係各大城市.. 所以呢段時間最好就係避免到中國同香港玩喇, 因為一定會出現見人群唔見景觀嘅情況, 確確實實感受得點解有個成語叫做「人山人海」.. 點解叫做黃金受罪周?? 最主要原因就係因為人太多, 導致服務素質大大降低, 入場門票座地起價, 交通擁擠寸步難行.. 朋友send過長相畀我, 係影香港某個旅遊觀點喺五一嘅盛況, 結果幅相我只見人潮洶涌, 完全認唔出個地方係邊.. 試過舊年聖誕去海洋公園, 原本以為全部人都會去迪斯尼啦, 結果就係個個人都好似我咁諗法, 所以當日喺海洋公園見到我三個月都見唔晒嘅人, 可想而知五一係何等更加的人潮爆燈啦..

08.05.2007 | 望天打卦

喺朋友個blog度睇到「望天打卦」呢四個字.. 其實我覺得我應該係明白佢係乜嘢意思, 但係篇篇當時就唔知點解將佢睇成「望, 天打卦」, 即係希望個天可以打卦咁解.. 就因為咁所以混淆自己, 唔明白乜嘢叫做打卦, 應該係話掛風球啩?? 於是就懶叻咁喺MSN度問個朋友, 「你噚日喺個blog度提到望天打卦噃, 咁最近個天有冇打過卦啊?」, 結果搞到佢都唔知我講乜.. 後來充實招來, 問佢乜嘢叫做打卦啦.. 哦, 原來唔係打卦而係望天打卦, 即係看天做人咁解.. 經佢一解, 即刻醒過嚟, 好像搵個窿嚟鄄啊.. 哈哈!! 呢個故事話我知, 有時淨係睇個表面已經係好足夠喇, 太過深入反而會令自己鑽牛角尖, 誤會咗其真正嘅意義..

後記: 搵個窿嚟鄄個鄄字應該係呢個喇, 因為有印象《最緊要正字》曾經講過係「鄄」唔係「捐」呀嘛..

07.05.2007 | 我係一個咁樣嘅人

今日朋友send咗個心理測驗過嚟, 因為係禮拜一晨早返到公司懶懶地, 咁儘管玩吓先至開始做嘢啦.. 係由回答一啲關於嗅覺喜好嘅問題, 而分析你究竟係一個乜嘢性格嘅人.. 結果發覺都幾準呀, 個分析都有提到幾個我覺得好啱嘅point.. 個測驗結果係咁話嘅:

你有個好強烈嘅自我意識, 往往好難被身邊啲人求祈三言兩語所動搖.. 你通常都會盡自己最大努力去達成目標, 所以喺別人眼中你係一個好熱誠滿載嘅人.. 你對於朋友有好果斷嘅選擇, 再加上你有時候獨來獨往嘅性格, 所以身邊啲人會覺得你係個幾神秘嘅人.. 雖然話神秘有時候係一種吸引力, 但係好多時候別人就覺得好難可以同你深入咁相處, 畢竟你有時候係太過保護自己嘅私隱, 甚至乎某些人會因此而覺得同你有種距離感.. 講到底, 其實你係一個好文雅柔和嘅人, 只有嗰啲同你好熟絡好投契嘅人先會感受到你真正嘅優點..

06.05.2007 | 周身酸痛

人老咗真係唔可以唔認老, 因為係咁意趁週末喺個gym 玩耐啲, 第二朝起身就即刻覺得周身酸痛.. 前幾日咪話重拾對hiphop嘅興趣, 咁呢兩日就連續踩咗兩堂hiphop class, 好似前世未跳過咁款.. 可能太耐冇跳, 依家又突然跟返, 所以跳舞時候啲大動作即刻運用晒全身每一寸肌肉.. 跳舞腳力梗係要啦, 加埋唔少轉身彎腰動作, 所以尤其係前大脾四頭肌, 小腿同埋條腰兩側就首當其衝喇.. 其實又唔至於痛得咁嚴重, 而係當上落樓梯, 或者擺某個特定鋪士嘅時候, 有啲隱隱酸痛啫.. 不過我認為都係未適應啫, 跳多幾次就唔會有事架啦.. 講到呢度, 醒起有句英文係好貼切好啱聽嘅, 就係no pain no gain喇.. 冇付出又點會有收穫啊??

05.05.2007 | 上海, 終於再一次...

三年前原本同朋友興致勃勃計劃去上海, 仲好頻扑咁四週圍搵邊間旅行社offer至平至抵嘅package, 好不容易搵到間落晒訂, 出埋機票出埋簽証.. 點不知臨去前一日, 老細竟然因為project趕工而反口, 點囈點講情願賠返錢畀我都唔肯放人.. 豈有此理, 抵我第二年炒佢魷魚劈炮唔撈呀, 哈哈..

轉咗呢份工之後, 其實小慧都咁啱過咗去上海做嘢, 一路來都口輕輕話去探佢.. 但係因為新工作梗係搏啲啦, 所以講吓講吓連佢都做完嘢返嚟, 我都未有機會實現承諾, 真係好抱歉.. 不過最近卻時有轉機, 佢又到番上海工作喇, 加上小年又咁啱transfer咗過去, 再加上小君又咁啱處於轉工休閒期, 再再加上一早同老細傾掂呢段時間會拎長假, 所以今次確實不能錯過呢個大好機會.. 今次誓言一定要去到!!

好耐都冇真正去旅行喇, 曾經對自己講過每年都儘量要去一個地方旅行, 但係對上一次竟然係三年前巴厘島之旅.. 2007年, 上海, 我來啦!! 其實今次去上海, 都計劃埋過去北京玩番幾日架, 真係好興奮啊!! 好期待兩個星期拜後喺上海同各位好朋友見面..

04.05.2007 | 天氣這麼熱..

最近天氣超熱, 突然想起張天王呢一首歌, 好切合我現在嘅心情..

拿起小剪刀 真想好好修理我的頭髮
我的爛頭髮 一直向前垂在我的臉
不管怎麼撥 還是總有一堆黏在臉上
額頭流着汗 隨着頭髮一直流到臉
天氣這麼熱 我哪里通通不想去
只想躲在家 看着我的電視吹冷氣

我的頭好痛 我躺下躺在我的床
樓上的爸媽 一直吵架不停一直吵
客廳的電話 没有人接還是一直響
還能怎麼辦 躺在床上的我一直想
天氣這麼熱 我哪里通通不想去
只想躲在家 看着我的電視吹冷氣

03.05.2007 | 工作休息/休息工作

呢個星期有兩日連埋一齊嘅公共假期,五一勞動節同埋五二衛塞節.. 所以個心情都比較輕鬆啲, 上個週末過後到禮拜一返工, 返嗰一日過後又放假, 兩日假期過後返多兩日工, 又係週末喇.. 所以都幾開心架, 因為好難可以撞到兩個節日連住一齊, 所以好多人都喺禮拜一請假, 咁就可以連續放五日假.. 其實如果遇到咁嘅情況, 我通常都會照常返工唔會特意請假.. 因為我好享受呢種返返吓工突然又有假放嘅感覺, 享受嗰種期待假期來臨嘅感覺, 而且當大多數人都請假嘅時候, 表示唔會有太多人騷擾, 咁自己就可以更加專心做嘢啦.. 尤其係假日前夕, 通常都係帶住輕鬆期望開心嘅心情去上班, 所以話我其實都幾中意禮拜五就係咁解, 因為放工後就係週末可以休息.. 又所以話, 如果選擇禮拜五或禮拜一放假, 我會選擇禮拜一, 因為禮拜一通常都係monday blue嘅, 倒不如唔返工仲好?? 咁都係各有所好啫, 可能有啲人覺得等唔切想禮拜五就早啲放假啦.. 最終個大前提就係, 有假放就大家都開心啦!!

02.05.2007 | 重拾hiphop興趣

今日喺小君嘅慫恿之下, 終於再次踏入個hip-hop class喇.. 之前因為有一段頗長時間冇去參加, 所以就慢慢地由疏離變成遺忘, 到後來有時明明知道有個class, 但係就已經冇乜興趣參加喇.. 可能因為太耐冇跳, 所以怕脫節, 怕唔夠體力去撐嗰一個鐘.. 今日就帶啲懷疑自己能否跟足成個set嘅心情, 個導師其實就係以前一齊去class嘅同學仔, 估唔到一排唔見, 佢竟然升級變成導師喇.. 其實佢以前一路都跳得非常之好喇, 簡直就係舞技超群(我哋呢「群」超生硬hiphop舞蹈機械人, 當時我從來唔敢企喺佢隔離)啦, 所以都唔覺得驚奇.. 今日跳吓跳吓, 竟然讓我重拾對呢個hip-hop class嘅興趣, 再加上現正努力減肥嘅緣故, 所以覺得跳完一個鐘嘅舞, 不經意地就可以身水身汗咁, 都應該係個好唔錯嘅cardio燒脂運動啦.. 比起自己好悶咁對住部cardio機械, 上跳舞class的確係有趣好多啦.. 雖然自己永遠都跳得唔好, 同個導師所教嘅相差好多, 但係最緊要自己enjoy啫.. 今日之後, 我會儘量逢hiphop class必到, 嘿嘿..

01.05.2007 | 勞工節大平反

今日勞工節, 喺報章上睇到一份關於全球42個國家法定工作時間嘅報告.. 好詳細列明42個受調查國家每週法定工作日數同埋時數, 結果頭三個工作時間最長嘅國家都係亞洲國家.. 排喺榜首嘅係台灣, 每週工作6全日合共48小時.. 而最幸福嘅係法國, 每週只需工作5日合共35小時.. 資料顯示亞洲人平均每週工作超過40小時, 較全球平均數字高出5小時.. 現時歐洲國家都正在逐漸減少工作日, 兼且縮短每日工作時間, 以換取可以自由運用嘅私人時間.. 反而亞洲國家就為咗增加收入而縮減休閒時間, 導致工作休閒比例失衡..

睇咗呢份報告之後, 真係深受同感, 因為覺得自己好似從未嘗試過臨放工五分鐘前開始收拾, 踏正六點鐘準時鬆人, 哈哈.. 其實覺得喺我哋工作環境之下, 準時鬆人會畀人覺得你其實冇乜嘢做, 所以明明係可以放工嘅時間, 啲同事都仲係無動于衷咁繼續做嘢.. 難道真係要拉長工作時間先至可以同個勤力劃上等號?? 呢啲難道就係我哋中國人一路一來保留嘅勤奮美德同埋拼搏精神?? 到咗今時今日呢個社會, 可能已經唔等駛喇..