31.12.2007 | 再見2007

嘩嘩嘩, 話都冇咁快, 今日已經係2007年最後一日喇!!

2007年, 雖然未至於話三十而立, 但係覺得都幾唔錯啦.. 牆上舊日曆撕淨最後一張, 365日內其實覺得自己過得頗充實啦, 事業上可以話係有頗大嘅進展, 由年頭開始忙碌, 奔波於星馬港三地, 到年中決定由香港回歸大馬, 跟住數個月嘅非人日夜趕工, 到最後工作範圍有另一個起步, 覺得好慶幸嘅係新嘅一年唔會原地踏步..

覺得呢個應該係最大嘅得益, 至於失去嘅, 其實仔細諗吓, 好似唔覺有喎, 哈哈!! 生活都過得唔錯, 家人同事朋友客戶等人際關係亦都保持得很好, 其實可以話冇乜懮慮啦..自問唔係過份要求自己積極進取嗰類人, 但求安安定定, 健健康康, 開開心心就好喇..

2008年, 稍微為自己定下一個人生目標, 可能就係期望自立更生嘅一年, 祝自己祝各位嚟緊新嘅一年all the best!!

30.12.2007 | 禮物交換

交換禮物經已係公司一路以嚟嘅聖誕例牌活動, 每個同時都會去買返份聖誕禮物, 但係就唔會知道到時邊一位會抽中自己準備份禮物.. 每次都要懶神秘咁唔畀得人知, 所以一準備好份禮物, 就要神不知鬼不覺地嗱嗱聲擺落棵聖誕樹下.. 終於等齊晒全部11份禮物, 於前日聖誕聚餐之前舉行禮物交換.. 好簡單, 同事MY為每份禮物整個冧把, 然之後每個人輪流抽個冧把, 跟住以冧把換禮物, 最後猜吓睇自己份禮物究竟係邊個買架..
抽禮物之前先同棵聖誕樹影返幅大合照(可惜就唔到兩個仲放假嘅同事).. 之後各人懷著興奮嘅心情抽禮物.. 我就有幸抽到MY買嘅一對鑰匙扣, 好別緻架, 應該係不鏽鋼做成嘅一對King & Queen造型鑰匙扣, 直頭啱晒我一向高尚簡約嘅品味啦, 不過咁靚唔捨得用, 哈哈.. 多謝晒, 我好中意..

29.12.2007 | 北京分公司10週年誌慶

今日係北京分公司成立10週年誌慶, 大老闆之前吩咐過我哋拍輯short video畀北京同事, 當係祝賀佢哋, video內容不外齊集所有同事一齊大聲恭賀, 另外再加上逐個自我介紹.. 因為同北京分公司基本上都係冇乜交流, 所以收到柯打嘅時候, 都真係拗爆頭.. 原本打算拎住部DV係咁逐個拍, 最後嚟個大串燒咁啲例牌嘢.. 結果前日臨拍前, 同事SG突然靈機一觸, 話唔駛咁麻煩驚動各位同事, 不如是但抽幾幅相, 串成一個video算喇.. 結果個重任就落喺我身上啦..

於是就用Windows Movie Maker, 好業余咁樣係咁呢度加一嘢嗰度加一嘢咁.. 因為在下係第一次搞咁嘅嘢, 所以覺得非常新鮮非常好玩, 整吓整吓靈感就越嚟越多, 結果搞咗差唔多成日, 個所謂恭賀short video終於出爐喇.. 其他國家分公司不禁O大嘴為之讚嘆, 唔係驚訝我哋可以整個video, 而係讚嘆我哋有咁嘅一個新鮮祝賀idea.. 同事post上youtube任觀賞, 閣下認為呢輯業余製作video如何咧??

28.12.2007 | 年終聚餐

今日公司搞咗個年終聚餐, 就喺城中一間行高檔japanese buffet嘅餐廳.. 其實已經策劃多個月, 同事MY多個月前就已經聽聞呢間餐廳好唔錯, 所以大力推薦, 亦都得到眾人讚同.. 一早喺兩個月前就book頂位, 所以今日去到, 個booking list第一個就係佢個名喇, 好得..

餐廳裝璜算係唔錯, 多種食物分門別類各設唔同counter.. 所以唔會成咋人逼埋一個地方爭嘢食, 加上座位編排以食counter為中心, 所以唔會話由餐廳頭行到餐廳尾先見到食.. 總括嚟講, 地方闊落, 食物counter同座位編排都好就腳.. 食物方面, 算係好多新奇嘢, 唔同於一般buffet咁, 佢係貴精唔貴多.. 種類繁多而且多樣化, 而且可見落足材料, 用料頗新鮮而且比一般食肆矜貴, 難怪收費都係高人一等.. 個人最欣賞各類新鮮刺身, DIY沙煲肥牛同買賣相極之趣緻嘅龜苓糕喇..
除咗MY同我之外, 其他同事都係第一次嚟, 見到可以喺咁樣嘅環境食buffet, 一眼見唔晒全部食, 轉個彎有係另外一個食物counter, 每個都顯得相當之興奮.. 咁話明係公司聚餐, 大家卸下繁重工作壓力, 齊齊坐買一圍有講有笑, 都相當享受架.. 尤其平時稍微疏遠嘅DV, 今天竟然狀態大傻, 十分之搞笑, 成晚除咗食嘢之外就係不停拋笑彈..

今日呢個聚餐, 好開心好滿足, 開心於可以與每位同事共聚一餐, 滿足於食得飽到想嘔.. 各位同事, 祝大家新年快樂, 新年進步..

27.12.2007 | 犯罪狂想曲

友人歌樂兒話佢曾經幻想過自己去打劫銀行, 咁其實我有時候都會幻想自己作奸犯科嘅.. 不過都諗吓啫, 又唔係打算去做, 最緊要一點就係冇膽去做啦, 驚有報應吖嘛~~

打劫銀行: 唔係經典槍戰場面, 而家科技發達已經唔係講打講殺喇, 而係食腦.. 只需坐喺電腦前, 係咁意click吓隻老鼠, 就可以hack入銀行電腦系統, 中意過幾多數入自己戶口就過幾多.. 不過聰明人係唔會一次過整個巨款嚟顯露蹤跡嘅, 每次夠洗夠用, 就足以不留疑點, 可以瞞天過海啦..

隱身偷竊: 呢個最經常幻想架喇, 幻想自己識得隱身術, 可以喺夜晚潛入商場, 神不知鬼不覺咁盡情shopping, 毫無顧慮咁中意乜嘢就拎乜嘢.. 好購物狂嘅心態啊.. 只不過家陣認真一諗, 就算識得隱身術, 咁啲嘢點樣一齊拎走啊?? 應該幻想當自己隱身嘅時候, 任何接觸嘅嘢都可以將佢哋隱埋, 哈哈!!

隨心隨地: 仲有一個狂想, 其實同犯罪無關嘅.. 就係我心內諗住一個目的地, 瞇埋眼兩秒鐘, 擘大眼嗰一刻人就已經身處其地喇.. 好方便哦呵?? 尤其平日返工放工最管用, 可以瞓到最後一分鐘..

幻想得好興奮啊, 不過發夢未有咁早, 倒不如慳返啖氣暖吓個肚仲好.. 不過各位如果有咩類似嘅幻想故事, 在下都好有興趣知道架, 不如同大家一齊分享啦..

26.12.2007 | KFC卡路里指南

早幾日去銀行找卡數經過KFC, 適逢又係食晏時間, 結果受唔住誘惑決定行入去大快朵頤一番.. 其實本人都頗喜愛食KFC架, 曾經試過連續數星期每星期都食一次.. 嗰日去食, 侍應隨手遞上KFC營養指南畀每位顧客, 打開一睇, 裡邊詳細寫低每樣產品營養質料(卡路里, 脂肪, 蛋白質, 鹽份, 碳水化合物), 果然令我如夢初醒.. 點擊下圖可鏈接營養指南..
計算一吓平日一餐KFC(我通常柯打兩塊裝套餐)究竟攝取幾多卡路里:
+ 原味雞胸肉: 360kcal
+ 原味雞肋骨: 360kcal
+ 雞汁薯泥: 60kcal
+ 雜菜沙律: 150kcal
+ 牛油方包: 80kcal
+ 中裝百事可樂: 132kcal
唔計番茄辣椒醬, 一共1142kcal.. 都相當驚人嘅一個卡路里數目, 近乎一日所需總卡路里嘅一半喇.. KFC的確非常好味, 只不過calories watcher就應當小心行事喇, 哈哈..

25.12.2007 | 聖誕快樂

十二月, 城中各商場都開始裝璜一番以迎接聖誕來臨, 聖誕樹更係不可缺少嘅指定主角.. 在下四處shopping之際, 亦都順手將每一間商場嘅主要聖誕裝飾影低, 組成以下呢輯圖, 就喺今日晒冷擺落個blog度, 賀賀今日聖誕.. 聖誕節喇, 喺度祝個位朋友聖誕快樂, have yourself a merry little christmas..

24.12.2007 | 平安夜, 平靜夜

已經唔記得往年聖誕夜係點樣過喇, 如無記錯唔係懶係屋企就係去朋友屋企趴地.. 今年都係冇乜驚喜, 應友人慧沁邀請到佢豪宅燒嘢食.. 聖誕前夕公司特赦只需返半日工, 所以到食晏時間就可以鬆人喇.. 返到屋企後原本打算趁空檔時間去做gym, 因為上個星期吃喝睡樂完全冇郁動過.. 原先諗住先小休片刻先至出發, 結果天氣實在太好喇, 一瞓落去後差唔多時間赴約先捨得爬起身, 哈哈..

去到慧沁間豪宅, 已經坐滿晒客人喇, 大多數都係佢啲親戚, 朋友都係得幾個.. 不過見到好耐都冇見嘅朋友, 都真係好開心架, 見每個都一雙一對, 有啲仲帶埋仔仔囡囡一齊嚟, 真係「老來安慰」戥佢哋開心啦.. 一班朋友齊齊圍起燒嘢食, 燒完食, 食完又再燒, 有傾有講有笑.. 年紀大喇, 唔駛好似以前聖誕夜咁一定要狂呼倒數, 反而一班朋友坐埋燒嘢食傾吓偈, 更添聖誕應有嘅溫馨氣氛..
臨走前, 主人家好貼心咁為每位客人準備聖誕禮物, 雖然唔係咩貴重禮物, 但係最重要都係個心意啦.. 我抽到個好靚嘅瓷杯, 多謝晒啊慧沁..

23.12.2007 | 假期

悠長假期嚟到今天最後一日喇, 聽日就要返回工作崗位, 突然間諗起林詞神多年前為王天后寫嘅呢一首歌詞.. 話說王小姐當時為了愛人, 喺香港錄錄吓音竟然人間消失一個星期, 毅然返去北京日日倒痰盥, 為了愛情甘願放低自己顯赫地位, 結果假期結束返嚟就有喜喇..

咁在下當然就唔係王小姐啦, 只不過係借來林生寫嘅詞嚟表達自己現在心情啫, 好切合吖首歌詞..

鐘擺在這心裡晃動/每點每滴倒數/隨時預備旅程結束/早知沒醒不了的夢/美好歲月告終/原來就像假期結束/茫然靜待假期結束/彷彿趕上學鐘聲宣告一切又回復/光陰消耗盡/好景將會轉眼內停頓/現在盡量放任吧/現在盡量快樂吧/現在盡量紀念吧/始終都須要回家/燦爛假期結束/沒法讓節目延續/若假期永末結束也不會感到難得/心息吧/總算呼吸過一口空氣/哪可以一世一世嬉戲嬉戲嬉戲/收起了超重的行李/棲身於歸家的客機/倒數中一分一秒不忘記/這世界將會將會多美多美多美/比不上這個星期/無人能避免別離/當作是某段意外假期/當作是艱苦中的休憩/我愛上過你

22.12.2007 | 冬至

冬至名稱由來: 二十四節氣之一
冬至天文特色: 一年來晝最短, 夜最長嘅一日
冬至傳說:
好耐以前一個冬至, 閩南省一個城裡嚟咗三個衣衫襤褸嘅乞兒, 佢哋係對夫婦同埋個囡囡.. 天寒地凍嚴冬裡, 乞兒妻子終於因體力不支而一病不起.. 老乞兒為咗籌錢埋葬妻子, 唯有忍痛將囡囡賣畀有錢人家做奴婢.. 一想到要離開相依為命嘅爸爸，乞兒女傷心得暈咗過去, 老乞即刻向有錢人家要咗碗米湯, 跟住一口一口將囡囡灌醒.. 老乞兒過後又再要咗幾個糯米丸充飢.. 可惜父女兩人 互相推讓, 點都唔肯吃先.. 老乞兒就對住個囡囡話:「今日離別, 就好似呢粒糯米丸咁分成兩邊，我哋團圓嘅時候再食糯米丸好唔好?」.. 講完, 兩人含淚食完糯米丸, 就依依不捨地分手喇..

冬至相關習俗:
食特定食物--北方人食餃子, 餛飩, 紅豆粥; 南方人食湯丸..

21.12.2007 | 倦鳥歸返

噚晚ET帶咗我去一間懷舊餐廳, 個名叫做Roost.. 佢問我知唔知點解間餐廳叫做Roost? 梗係唔知啦.. 跟住佢就話Roost字面解做休憩之地, 間餐廳就係想客人入到去就好似返到屋企咁, 有種好溫暖好親切嘅感覺.. 入到去之後, 果然令我覺得有「倦鳥歸返」嘅感覺, 好舒服..
餐廳裡頭擺設好懷舊, 好cosy好homely好laid back嘅感覺, 裡頭每樣物品都係一班年輕店主所構思所配搭, 而且適逢聖誕佳節, 裡頭佈置更添溫暖感覺.. 食物方面都幾好味, 我要咗個泰式雞扒飯跟芒果smoothies, ET要咗個椰漿飯跟香蕉smoothies, 全部都好好食, 好滿意.. 最驚喜就係啲飲品竟然係用細路玩泥沙啲玩具桶盛起, 好得意啊, 果然係贏盡我歡心啊.. 除咗食嘢之外, 樓上仲有隔開間房售賣懷舊貨品(個收銀機真係好50年代嗰種), 一間一張凳嘅美髮室, 一個得一架電腦畀客人上網嘅角落..

多謝友人ET, 個人非常中意呢間餐廳, 個感覺就係好舒服, 下次一定再次光顧.. 大家如果有機會到新山一趟嘅話, 不妨去見識見識吓喇..

20.12.2007 | 豈有此理

因為放假緣故所以好耐都冇上網寫blog, 今日難得有機會喺星巴克嘆咖啡兼上網, 即克上嚟自己個blog度睇睇呢幾日有冇人留言.. 都有regular友人留言噃, 不過就多咗個怪人, 竟然韃在下[SK]個哚替我留言.. 嘩, 不得了, 我明明都未回覆任何留言架, 冇啦啦點會走出個[SK]留言架?? 而且仲學足我個style添, 真係豈有此理!! 開始仲諗住可能真係有個人係同我同樣名, 但係再仔細讀埋個留言, 發覺佢根本就係以我名義留言, 膽大包天啊!! 火上心頭嘅我就梗係嗱嗱聲彈返個留言鬧衰佢啦.. 真係覺得呢個人好無聊好冇禮貌好無品, 咁樣玩嘢法真係侵犯咗我嘅私隱噃!! 畀我check到係邊個粉腸做嘅好事, 佢就知死!! 所以從今以後, 在下決定用返blogger login id嚟留言, 大家認住我個註冊photo喇..

19.12.2007 | 悠悠閑閑古城遊

已經有N+68年冇去古城馬六甲喇, 事隔多年再次重游, 今次與友人ET同遊確實係好唔例牌.. 點解咁話呢?? 因為以往去親古城都必定會四週圍遊遍啲歷史古蹟嘅, 但係今次竟然出奇地悠閑, 除咗喺個地標(紅屋)前係咁意影咗兩幅相之外, 其餘時間都係行街食嘢, 當然就少不了當地遠近馳名嘅粒粒雞飯同埋沙爹醬火鍋(satay celup)啦, 仲有友人ET介紹(我聞所未聞嘅) 美味鳳梨餅..
其實都多得ET唔少, 因為佢真係冇介紹錯架, 啲嘢全部都好好食, 最緊要就係知訂唔駛四週圍摸門釘, 所以食得好順利好開心.. 最難忘就係沙爹醬火鍋嘅豬肉串喇, 真係超級好味, 正好同啲沙爹醬配合得天衣無縫, 一啖咬落去已經為之驚艷, 好食得感動流淚咁濟, 結果一碟豬肉串全部掃晒, 仲要再追加幾串添.. 之後ET舊同事熱情款待, 去咗間叫做Sunshine Bar嘅酒吧飲嘢, 個bar係對住個海嘅, 好正嘅環境, 加上當晚近處有煙火表演, 所以都飲得好enjoy架..

粒粒雞飯: 上過電視美食推薦節目, 6 Jalan Hang Jebat 和記
沙爹醬火鍋: Jalan Ong Kim Wee 一間雙聯店舖, 見最多人間就係喇..
鳳梨餅: Jonker Walk 雞場街, 店名LW, 即做即賣新鮮出爐..

18.12.2007 | 繼續悠閑

原本打算今日一早就過新加坡, 但係last minute決定唔去喇, 因為過去目的都不過係shopping啫, 算吧啦, 前世未shop過咩? 再加上臨聖誕嗰邊一定係逼爆人, 所以慎重考慮之後, 都係留返喺新山穩陣.. 難得有個長假, 其實都唔想太過勞碌, 以往假期都係hectic過平日返工, 今次的起心肝, 實行嚟個真真正正悠閑假期.. 友人ET都同樣諗法, 其實自己都唔好意思過份要求啦, 人哋肯收留我唔嫌我打攪兼「牙訂」都已經唔錯喇.. 所以今日繼續悠閑, 繼續食飽瞓瞓飽食, 繼續享受人生.. 吃喝睡樂, 暗地裡都不知增磅幾多, 之後真係要做啲嘢喇, 哈哈!!

17.12.2007 | 悠閑

十二月係請假黃金月,因為公共假期接二連三, 係咁意拎個兩三日假就可以享受成個星期假期.. 在下因為舊年積埋積埋太多年假, 所以趁唔係太多嘢做, 儘量清晒啲假.. 所以今日開始一連九日(包括前後週末), 嚟足個悠閑假期, 唔打算勞師動眾去游山玩水, 因為好多人都好似我咁放大假, 所以免得就免喇..

之前同友人ET喺MSN閑談, 佢知我冇乜計劃, 所以就熱情邀請.. 因為佢住喺新山, 去馬六甲去新加坡都同樣好方便, 所以就打鐵趁熱計劃同游.. 其實都計劃得好鬆動, 第一日懶洋洋, 都係喺新山游游蕩蕩, 食飽瞓瞓飽食, 好耐都未試過呢種咁「闊太」生活喇, 唔駛做真係好悠閑好享受.. 朋友, 喺度講聲多謝你收留同埋誠意陪同先.. 希望唔會帶畀你太多麻煩啦, 嘿嘿!!

16.12.2007 | 自己煮.. 板麵

嗱嗱嗱, 唔好驚訝我竟然懂得自己煮板麵啊, 睇埋落去先啦..

平日聯手負責煮飯嘅潮州佬同潮州嫂(i.e.我的雙親), 有時週末心血來潮都會整吓板麵架.. 首先會開麵粉搓麵糰, 跟住就煲兜清清地嘅銀魚仔雞肉湯, 最後準備其他配料--冬菇絲, 木耳絲, 肉碎, 酥炸銀魚仔, 菜心.. 一切完成之後, 都已經差唔多係在下瞓醒落樓搵brunch食嘅時候喇, 哈哈.. 不過唔係煮好一碗可以畀我擘大口即食喎, 想食就自己落手落腳煮返碗啦.. 因為所有材料已經準備妥當, 就係拎個褒仔盛啲湯, 落啲板麵等佢煮熟, 最後上碗加埋啲配料, 十分鐘搞掂呢餐美味板麵喇!!! 老實講, 都叫做係自己煮啦, 唔係咩??

其實我覺得咁樣都幾好喎, 中意幾時食就幾時去煮, 中意落幾多湯就落幾多, 中意淥幾多麵就淥幾多, 中意咩配料就落咩配料.. 完全好自我好free style嘅.. 而且佢哋忙完一朝, 我哋三餐就可以全部食板麵解決架喇.. 所以話, 一勞永逸吖嘛, 其實最聰明咪就係兩老囉, 果然薑係老嘅辣, 哈哈.. 不過我OK噃, 因為佢哋整得實在太好味喇~~

15.12.2007 | 食物瘦身法

網上發現呢個好有趣嘅報導, 關於十種明星最信賴嘅食物瘦身法.. 係唔係真有此事在下就唔知, 係唔係可以見效在下更加無可奉告(不過覺得攞名成份多過瘦身成份), 就係覺得有趣所以先喺度同大家分享啫, 女士們一定會睇得津津樂道, 蠢蠢欲動架喇..

1. [米粉瘦身法] 米粉係一種低卡食物, 可以增進腸胃消化, 預防同治療成人病
2. [包菜瘦身法] 包菜属於低熱量食品, 含有丰富的维生素和矿物质，并且属於高纖維食物
3. [蘋果瘦身法] 效果非常驚人, 但唔建議長期使用, 食用前後應多做啲運動, 事關蘋果含糖量高, 食後會覺渾身疲軟困頓
4. [葡萄瘦身法] 就係一成日除咗葡萄之外咩都唔食, 適合嘅人, 堅持落去會有理想成果
5. [西瓜瘦身法] 完全冇副作用, 而且仲可以增强排泄功能, 清除體内代謝物同埋金屬元素
6. [海帶海藻瘦身法] 食飯嘅時候, 可用海带或海藻将白飯包起嚟食, 肚餓嘅時候亦可将之當作零食
7. [乳酪瘦身法] 當零食一定會導致瘦身失敗，代替正餐適當地食用倒是會有所幫助
8. [粟米瘦身法] 體重開始下降嘅時候, 粟米對於啲中意零食嘅人好有幫助, 而且好適合A型血嘅人
9. [韓式料理瘦身法] 韓式料理不僅低肪, 有抗癌功效, 而且可以預防同治療好多種疾病
10. [低卡瘦身法] 仔细參考各種食物嘅卡路里含量, 儘避食高脂高热量食物, 都可以减去體内多餘脂肪架

欲看更詳細原文請按此鏈接.. 其實懶理佢瘦身唔瘦身啦, 就咁齋睇啲食物圖片, 已經覺得個肚有啲餓啦!!!

14.12.2007 | 話頭醒尾

前晚收到信用卡張月結單, 驚覺個結賬比預料中多, 仔細逐個項目睇真啲, 發現有個項目係向我索取年費.. 嘩, 攪咩啊?? 我用咗幾年不嬲都冇收開架, 點解今年無啦啦有個咁嘅收費啊?? 而且唔係小數目, 大喇喇160蚊喎, 你何等資格收我呢個價碼啊?? 唔好去搶??

於是噚日第一時間就打去銀行打算cancel咗張卡去.. 啲銀行好「蛇gwear」架, 你一話因為唔滿意 年費要cancel佢哋實幫你waive咗佢架喇.. 好多同事朋友都係咁話, 萬試萬靈, 所以我都不妨一試.. 結果我話畀個operator知: 「Hi Fatimah, 我見到月結單上邊有個收取年費咁嘅一個項目喎..」我都未講完, 結果佢(喂, 佢真係介紹自己叫做Fatimah架, 我唔係亂up架)就回應我話: 「係, 許生, 我會幫你跟進豁免年費呢件事, 下星期再畀個電話你通知你個消息啦」..

我當時都呆咗一陣, 唔通真係咁話頭醒尾?? 定係已經接收太多類似案件, 顧客打電話嚟投訴, 咭親條尾就知道佢想要咩喇?? 都好嘅, 等我慳返啖口水潤吓個喉嚨, 就靜坐等你捎來好消息啦..

13.12.2007 | 即食麵啟示: 喜惡分明

早幾日喺公司發現啲即食麵就快過期咁濟, 於是覺得仲有咁多不如唔好嘥啦, 所以lunch就拎咗包叮嚟食喇..可能太耐冇食嘅關係, 所以覺得特別好味.. 結果都唔知係唔係撞鬼, 竟然食上癮, 搞到連續幾日都係叮麵當lunch.. 我唔覺厭, 同事睇到都覺得恐怖啦.. 嗱嗱嗱, 就係佢喇, 大家都好熟悉嘅美極咖哩即食麵喇, 堪稱得上係家喻戶曉喇佢.. 雖然係好普通不過嘅即食麵, 但係竟然可以搞到我上晒癮.. 唔可以再沉淪落去喇, 淨返幾包, 同事們靠晒你哋努力喇!!
突然間有感而發.. 人就係咁樣喜惡分明架喇, 中意嘅永遠都唔會覺得悶, 唔中意嘅就連眼尾都唔望一眼.. 或者話已經有個潛意識喺度, 所以會對喜歡嘅嘢產生無法解釋嘅引力, 對討厭嘅嘢下一度抗拒令.. 就好似中意一個人嘅時候往往分唔清理由, 憎恨一個人嘅時候就唔駛同佢講任何理由.. 好啱吖, 一啲都冇錯, 哈哈!!

12.12.2007 | 福有攸歸

前晚一踏入屋企, 大家姐就即刻遞過呢張嘢畀我問我拎錢.. 嘩, 發生咩事?? 一開口就問我要錢.. 好震驚啊.. 睇清楚, 原來係某某神廟樂捐香油之類啲嘢.. 是但啦, 橫掂都唔係多錢, 而且仲係先斬後奏, 十蚊雞當做善事冇所謂啦.. 希望真係善有善報, 到時保祐我出入平安, 身體健康, 心想事成.. 哈哈, 講笑啦, 係咁意被屈十蚊雞就想得到神庇祐?? 咁每日敲經念佛, 樂善好施嘅人咪可以獲得金身護體?? 算吧啦, 都係平時多啲品神, 拜得神多自有神庇祐啦.. 係噃!! 前幾日真係喺觀音面前品神保祐小春面試成功, 結果當日即刻收到佢SMS話請佢喎, 真係靈驗啊!!
張收據都幾有誠意啦, 中意上邊寫住嗰兩行禪句啊.. 十方來十方去共成十方事, 萬人施萬人捨共結萬人願.. 樂善好施, 福有攸歸啊~~

11.12.2007 | 又添一員

公司最近搞交換聖誕禮物, 每人都要去買一樣聖誕禮物返去, 上星期六同朋友食晚飯時, 因為佢遲大到, 所以我就趁空檔爭取時間去物色禮物.. 結果不費吹灰之力, 踏破鐵鞋無覓處(嘩, 超勁啊我, 竟然可以用成語用到咁天花龍鳳), 好快就畀我買到喇.. 不過唔好誤會, 唔係下邊呢隻嘢.. 呢隻嘢係無意中發現嘅, 覺得佢嬲爆個樣好鬼得意, 所以送畀自己啫.. 其實我都有擺啲玩具仔喺張辦公檯架, 之前都有逐一介紹過啦, 今次再添丁, 為個collection添多一員.. 眼睛雪亮嘅朋友實係覺得佢好面善喇, 不過佢個名唔係你以為個B字頭噃, 佢就係叫做Happy Bird, 係喇, 就係咁簡單咁冇創意咁冇深度咁冇誠意.. 不過算啦, 中國大陸製造, 抄襲之嫌嘅味道爆晒燈.. 不過佢都真係好得意架噃, 個樣好nerd似晒我啫!!! 其實佢係個透明硬膠錢罌嚟, 擺喺張檯上, 至搶鏡都係佢啦.. 做做吓嘢, 突然間望到佢都真係會由心笑返出嚟架.. ang gerr gerr, 唔好嬲爆爆個樣啦, 等叔叔鍚返先.. 哈哈!!

10.12.2007 | 不過如是

噚晚同朋友去咗城中新開嘅卡拉OK, 喺間成中新開嘅高檔路線商場入便.. 講起呢個商場, 入駐嘅嘢全部都要「升價十倍」玩image, 當然呢個卡拉OK亦不例外.. 硬係加個Plus喺個原名後邊, 再嚟提高個消費價錢.. 以為咁樣就高級啲咁, 都係嘅, 起碼已經嚇走一眾講求實際物超所值嘅人先啦..

之前聽同事探聽話間嘢係以酒店經營方式嚟管理, 所以去之前其實都懷著頗大期望架.. 點不知入到去, 發覺個內部裝修都嘛嘛地啫, 同普通級數差唔多, 同錢櫃比起更加係屬於平民級啦.. 跟住就係啲房, 冇乜啦, 都不過如是, 但係無可否認個音響係幾唔錯嘅.. 輪到啲嘢食喇, 得個靚字囉, 選擇少而且又煮得馬馬虎虎咋噃, 我覺得另外一間啲嘢仲好食過佢十倍啦.. 再者得包一杯飲品, 成晚流流長, 想渴死人咩?? 接住囉嚟啲歌喇, 半新唔舊咁, 仲以為煉咗幾首新歌可以大展歌喉, 點知搵咗26世都搵唔到.. 再講個服務, 尚算OK啦, 可能冇乜人所以啲staff心情冇咁煩襙, 不過竟然請唔識講中文嘅人, OMG好彩我假假地都叫做識得講吓英文咋..

最後埋單鬆人, 每人加稅後盛惠66蚊.. 如果你問我, 下次冇乜必要嘅話, 我都唔會選擇去囉..

09.12.2007 | 完美靚聲

早幾日閑來無事瀏覽youtube嘅時候, 發現呢個clip.. 係啊, 有係林小姐佢啊, 悶親嘅話唔好意思.. 不過都係要繼續講落去, 關於佢啱啱完咗嘅音樂會.. 之前見到多個報導特別提到呢首歌, 係以acapella形式呈獻嘅, 首歌如無記錯應該係1991年面世作品, 十幾年後重新篇成呢個版本.. 林小姐先前預錄好和聲同影像, 音樂會當晚, 舞台背景投射幾個林小姐同本尊嚟個美聲大合唱.. 所以覺得影像中多個正在hah-haaah-hah, dum-de-dum, doo-roo-doot嘅佢, 要比遠睇的的色色嘅佢更加精彩, 哈哈..
感激林小姐fans上載呢個片段, 讓小弟有幸目睹所聞, 簡直就係百聞不如一見啦.. 如果可以身在現場親眼看親耳聽, 一定會聽出耳油, 陶醉其中嘅..

08.12.2007 | 再見悲哀

最近腦海裡頭時不時浮現呢首歌, 自自然然有會哼埋出嚟, 唔知道點解?? anyway歌者唱得固然之好, 首詞就更加精彩喇, 好有意思嘅一首歌, 鼓勵大家忘記悲傷, 重新豁達面對生命.. 好正面嘅訊息, 係而家流行曲難得一見嘅題材.. Eric Kwok兩年前面市作品, 林夕嘅詞, 畀歌者林小姐要求改咗八次後嘅最終版本..

再見悲哀 因我不再計較任何結果 甚麼都可以坦蕩 未在乎誰是錯 我兩眼合上失去甚麼 是與非也掠過 別固執到問一切為何 再見傷感 因我不易被淚流留住我 甚麼的境界都愛自自然地渡過 去到最尾就如與物忘我 回復身心最初 面對心鏡內一片平和 這麼最好不過 除了心 只有心 可以解心鎖 煩惱多因我要得多 微似沙 輕似煙 怎會有風波 有就像跌入了恆河 情路太彎 過就過 當是個經過 感動的愛當做一次切磋 沿途上遇上甚麼都欣賞過 投入時便快樂一起過 傻也好 癡也好 因你記得多 忘記的比你記的多 懷念最好 我便會繼續愛惜我 花瓣飄過 你再不顧結果 人存活在世就似沙粒飛過 誰又曾為了誰褒貶過 全是一種經過

07.12.2007 | 一仙

早前報章上睇到篇報導, 係關於一仙嘅價值已經隨著經濟發展而降低.. 好多人其實都已經唔將一仙放在眼內喇, 返屋企搵吓櫃桶底啊, 床下底啊, 同埋每個角落, 好有可能可以搵到被你遺棄多時嘅一仙輔幣.. 去超市買嘢, 好多時候都冇一仙一仙輔幣找畀你, 如果有得找, 更有啲人索性將全數投入慈善箱裡邊..

可想而知一仙嘅價值已經係微不足道架喇, 而家百物增值, 要生產一仙輔幣, 其實個本錢仲高過面值, 好唔抵噃.. 所以國家就擬定明年開始停止生產一仙輔幣, 咁樣如果消費價錢有幾仙幾仙零頭點算咧?? 咪就傚法某些國家, 以四舍五入方法解決, 所有收銀機又要專登program入呢個方法.. 所以消費者同商家有得有失, 當係個取舍囉..

其實駛唔駛攪得咁複雜啊?? 物品標價round-up to the nearest tens咪得囉, 對於嗰啲另加5%政府稅嘅物品服務, 不如就直頭加埋5%再round-up, 最後收個after taxed價錢咪得囉.. 駛唔駛又乜四舍五入, 又嘥幾百萬upgrade晒啲收銀機啊?? 唉, 真係吖, 救命啊.. 變通啲啦, 好唔好??

06.12.2007 | 晴天x陰天x雨天

上個禮拜六開始, 天氣可以話係風和日麗, 真係艷陽高掛藍天, 和風吹送陣陣清涼嗰種.. 最中意就係呢一種天氣, 覺得成個人都好精神好朝氣勃勃咁嘅.. 不過噚日下晝竟然落咗場雨, 一早其實都仲係風和日麗嘅, 大概下晝四點鐘天就開始陰暗, 跟住就落雨喇.. 香港天文臺鐘愛用嘅「天有不測風雲」, 正好適用於此處, 哈哈.. 問我究竟中唔中意雨天, 其實就要睇當時嘅情況同所在.. 如果喺戶外嘅話, 當然就係對雨天恨之入骨啦, 扯起火嚟對住個天破口大罵都得架(不過又未試過, 驚畀雷劈啊).. 如果正打算出外活動, 又咁啱落雨嘅話, 會好失望囉, 因為真係好掃興架嘛.. 但係如果喺戶內嘅話, 當然落唔落雨其實都冇乜關係, 心情好嘅話, 坐喺窗前細嘆咖啡望向街外雨景, 都算係一種享受.. 炎熱嘅下晝, 如果無所事事, 落一場雨正好就係瞓返個醒神晏覺嘅時候喇.. 中意太陽, 係唔係同夏天出世有關係呢??

p/s: 坐喺辦公室望見窗外正在落緊大雨, 今早一起身就已經陰天, 到達公司就開始落雨到而家喇..

05.12.2007 | 一箭穿心

回應友人「蠄蠼」早前send過嚟嘅email attachment, 再承接佢喺自己個blog度貼上嘅呢個video, 我覺得有必要將佢表揚於世, 同大家分享.. 因為我覺得實在係太精彩喇拍得, 留意-0:45至-0:40一段, 簡直就係精湛得令人心寒啦~~

大家睇過後有何感想? 是否身受同感啊? 在下個人覺得簡直就係一針見血啦, 職場就好似戰場咁樣, 封封電郵都暗藏冷箭, 隨時可以殺人於一箭穿心之下.. 唔知由幾時開始, 原本用作聯繫工具嘅電郵, 今時今日竟然變成職場上嘅黑白證據, 仲係合乎法律嘅有利證據.. 所以發送電郵真係要好小心架, 尤其係一啲代表公司利益立場嘅電郵, 就更加要打醒十二分精神.. 最後當然要好似個video clip話齋咁, 一定唔少得要Cc再加Bcc成村人啦, 而且Cc嗰咋人最好身份地位越係顯赫就越好..

打滾職場多年, 在下當然收過唔少類似電郵(無論To, Cc或Bcc都好), 所以都學識去擋煞, 學識懂去適當放箭.. 電郵已經變成一種暗藏式武器, 如何靠一封電郵去保障自己(同埋自己人), 而今正是一大學問也, 講得好聽呢種學問叫做business communications knowledge, 講得難聽就叫做[.....], 不妨提議一下咧??

04.12.2007 | 真係咁難理解??

有啲朋友成日都話我寫啲嘢好難明, 因為我唔係用純正中文而係用廣東話嚟寫.. 所以都complain話某啲地方重複咁睇429次, 唔服輸再狠狠嚟多嘢, 始終都係睇唔明.. 雖則如此, 都好感激大家厚愛, 花咁多眼力同腦汁去figure out我要表達啲乜嘢.. 所以我每次都回覆話, 我寫個時候係用廣東話同緊自己講嘢, 咁自自然然地就係寫咗篇廣東post出嚟啦, 好正常喎.. 其實唔駛成篇都明透透架, 求其get到個meaning咪得囉..

終於今日友人ET替我平反, 佢話初時真係覺得好難明, 但係當佢轉用(佢自稱半咸唔淡嘅)廣東話嚟睇嘅時候, 發覺的確好得多, 比原先用正統普通話嚟睇要順暢200倍以上.. 實在感激終於有人領悟到呢個巧妙喇.. 佢過後仲搭單問我一個問題, 如果有人喺佢個blog度提到自己嘅話, 會唔會覺得特別(受寵若驚地)興奮呢?? 嗱嗱嗱, 為咗答謝你對小弟個blog捧場, 今日特別喺度提及, 你感覺如何啊?? 記得回應噃, 哈哈..

03.12.2007 | 臘月晒臘味

友人歌樂頤話最近春風習習, 雖然唔明佢嘅「春風」係指乜, 但係上週末兩日真係陣陣強風, 加上烈日高照, 難到真係臘月關係?? 臘月晒臘味, 烈日加上臘風, 正是這個傳統啊.. 見咁好太陽, 於是就唔好錯失良機, 出去晒晒太陽.. 一向來都唔中意自己白雪雪, 唔知覺得點嘅, 所以一有機會一定會去晒黑自己.. 覺得自己黑啲嘅話, 睇落人都冇咁肥囉..
噚日就喺間藥房見到呢兩支嘢, 堪稱係雙劍和壁, 天下無敵.. 係架喇, 全世界都係用呢個牌子架喇, 冇乜揀擇架喇.. 一個係SPF4 tanning lotion, 我晒太陽必備之物, 用咗佢多年的確係品質保證.. 另一個係after sun lotion, 好似係新產品, 唔係發現新大陸, 不過畀佢標明嘅preserve and enhance sun tan吸引住, 所以毫無猶疑地買落喇.. 等我下次有機會再晒嘅時候, 一定會用佢, 睇吓佢係唔係咁「靈鏡」.. 到時有機會, 大家就嚟評論吓呢個臘月晒出嚟嘅「臘味」嘅「色水」啦, 哇哈哈哈哈!!

02.12.2007 | 電動火車上的忍功...

今日下晝gym完就搭電動火車返屋企, 其實好唔中意搭電動火車, 因為對佢實在有太多不滿之處喇, 但係又冇辦法一定要搭佢, 所以唯有儘量平息自己嘅處處不滿, 安心乘搭.. 唔知個管理係點樣執行, 列車班次唔頻密兼且從未準時過, 可以隨時一個廣播就取消班次, 加上乘客永遠係人山人海(因為班次唔頻密, 所以就積埋積埋全城人咁濟), 上落列車永遠係你推我攘, 所以我一向對於電動火車嘅印象就係如此不屑..

今日如常咁嘅情況, 都已經習已為常, 但係再離譜嘅事都會發生, 就係班列車冷氣竟然壞咗!!! 嘩, 列車到站車門一開, 即刻感受到裡頭一股熱氣逼埋出嚟, 其實我好唔願意入去, 但係趕時間又唔知道下一班列車幾時先到, 所以唯有死忍啦.. 結果喺格車廂內, 仲慘過焗桑那, 而且車廂內逼爆乘客, 你知啦, 一熱起嚟, 啲人嘅「體味」就無所遁形架喇, 爭在幸好未有人放屁咋, 哈哈~~ 所以可想而知當時個情況係幾咁惡頂, 就算唔焗死都畀啲「體味」焗暈啦.. 不過不幸中的大幸, 好彩我都係搭一個站啫, 強施深厚忍功片刻, 列車一到站即刻飛奔出去, 頓覺這個世界原來如此美妙..

01.12.2007 | 十二月, 年尾近喇...!!!

嘩嘩嘩, 話咁快又到12月又近年尾喇, 真係唔寫個日期都唔覺.. 呢個月特別多人請假, 一年落嚟啲年假積埋積埋一次過清晒去旅行, 呢個係一個多年不變嘅trend, 尤其聖誕嗰個禮拜就更加係請假高峰期.. 不過我一向作風就係避免同眾人一起放假, 驚去親邊都人逼人, 玩吓手仲會週圍遇到熟人添.. 所以可以選擇嘅話, 最好就係人放假我返工, 人返工就放假, 避開人潮, 哈哈..

講返近年尾啦, 查實一年流流長, 有冇諗過自己究竟做過啲咩好事咩壞事咧?? 嘻嘻.. 突然間轉態, 好似滿懷感觸咁, 其實唔係嘅, 至少我覺得呢一年嚟都過得幾充實架.. 尤其係事業方面, 覺得都有些少突破, 正往另一個階段前進, 好事嚟嘅.. errmm, 都係費事講咁多喇, 要總結一年內得失嘅話, 而家未係時候, 係都係留返明年先啦.. 我而家急需要做嘅嘢就係plan吓幾時請假, 事關小弟尚有好多年假一定要今年內清晒架..

30.11.2007 | 健康咗定退化咗??

最近真係確定自己唔再可以好似以前咁食得辣嘢喇.. 以前可以毫無知覺咁辣椒起辣椒落, 而家反而一啲辣(友人定義嘅程度)就攪到我舌頭發燙.. 輕則得個嘴有事, 重則攪親個肚, 需要上廁所舒緩舒緩.. 噚日就係承蒙父親大人厚愛, 食咗佢下廚落足料嘅「馬拉風光」, 第一啖落口即刻覺得辣辣地, 但係最後都啃晒成碟餸(因為我係最後一個食飯, 所以列必會儘量清盤).. 結果過咗冇耐, 個肚即刻開始有唔舒服喇, 跟住就開始赤赤痛, 最後當然爆石收場啦..

友人小春話我食得清淡健康, 所以個腸胃先會對刺激性食物敏感.. 我就覺得唔係喇, 我頂多都係早餐食得比一般人健康啫, 不至于呢個地步係嘛?? 照我話一定係人老咗, 所以個腸胃都跟住退化, 十分可悲啊.. 其實有樣嘢係萬試萬靈嘅, 就係KFC個香辣脆皮炸雞喇, 我食咗就一定會瀨嘢架.. 所以話, 唔關食物衛生唔衛生事, 唔關腸胃過份健康事, 而係腸胃開始退化, 受唔住太大刺激啊.. 哈哈, 真係陰公咯..

29.11.2007 | 兩齣戲

禮拜一同禮拜二請咗兩日假唔駛返工, 平日多數人返工嘅日子, 難得去邊都唔駛同人逼, 所以真係好正feel.. 好耐都冇睇過戲喇, 難得放假, 於是就一連兩日睇咗兩齣戲, 兩齣都係超離現實嘅故事, 覺得都幾好睇噃, 真係好耐都未試過咁滿足喇..

《Stardust》	之前唔記得睇邊齣戲時候睇到個預告片段, 就已經好想去睇喇.. 故事就係話個男主角為咗討好唔愛佢嘅心上人而去尋星, 結果揾到個星(即係女主角)後兩人就身經歷險, 處處躲避女巫設陷陷害, 最終一一化險為夷, 兩人日久生情, 陰差陽錯之下仲成為皇帝皇后, 從此過住幸福快樂嘅生活.. 雖然唔識兩男女個主角, 但係兩個老戲骨Michelle Pfeiffer(飾演惡毒女巫)同Robert De Niro(飾演camp-camp地飛天船長)嘅演出真係爐火純青得叫人拍爛手掌..
《Beowulf》	聽友人話好睇所以就去睇.. 故事就係話大英雄Beowulf成功毀滅妖怪, 結果被封為國王, 但係誓估唔到當年殺害妖怪後, 被妖怪親母迷惑(由性感女神Angelina Jolie演繹呢個裸體角色真係當之無愧), 18年後誕下孽種返嚟報仇, 一輪激戰後最終英雄妖怪同歸于盡, 不過陰險妖怪親母繼續行其奸道(電影為續集鋪路嘅慣性例牌手法).. 覺得呢齣戲好神奇, 我始終分唔出邊啲係真人邊啲係3D膾畫, 果然係真時亦假假亦真, 功力深厚啊..

28.11.2007 | 漢堡經

我自問唔係一個漢堡包擁躉, 亦都唔係一個漢堡包食家, 但係偶然間都會被賣相好嘅漢堡包所吸引住嘅.. 剛才等朋友嘅時候, 見到間「久休復出」嘅連鎖快餐店啲漢堡包特別吸引, 於是就認唔住手.. 喂喂喂, 係影抵咋, 唔係買嚟食啊.. 友人龍兄呢位超級漢堡包擁躉一定知道我講緊邊一間..講到漢堡包, 最重要就梗係個賣相要吸引人啦.. 除此之外, 我就覺得以下呢幾點如果做得到, 我會好中意佢囉..

1. 漢堡包一定要新鮮出爐, 熱辣辣軟綿綿..
2. 漢堡肉要夠厚身, 咬落去啖啖肉好滋味.. 漢堡肉無論煎或烤都好, 僅僅熟唔好過火, 肉汁一定要鎖得住, 乾爭爭點食得落啊??
3. 佐料不外乎生菜番茄洋蔥, 就梗係要求新鮮兼清甜爽口啦..
4. 如果有芝士, 就要半溶咁賴喺舊漢堡肉上邊, 好誘惑.. 如果有bacon, 就要煎得脆卜卜可以增加口感..
5. 至憎用原汁原味mayonaisse做dressing, 好鬼是但兼冇誠意..

最後一個非必定嘅條件, 如果個漢堡包係好innovative嘅product, 我都一定會去試囉.. 正如上圖中間嗰個guacamole bacon cheeseburger咁, 我見到都覺好食喎!!

27.11.2007 | 好玩好食又好睇

友人「飛びたい豚」最近瘋狂地大灑金錢購買Kidrobot Dunny公仔, 其實我都好中意, 不過就冇咁多閒錢買囉.. 一隻公仔玩吓幾十美金(係啊係啊, 係US Dollar啊, 冇眼花啊), 而且一買就停唔到手, 一定好想收齊晒成套架啦.. 如果你唔明呢種心態, 回想當年麥當勞吉蒂貓公仔轟動全城嘅熱潮就知道喇, 不過呢個Dunny就要高級多二十倍咁啦..

今日無意中喺個超市發現呢個M&M figure, 覺得都幾得意喎.. 我冇友人咁捨得揮霍, 所以呢個叫價七蚊嘅大眾化公仔, 我尚買得起.. 至少當我猶疑咗27次, 兼喺個架前來來去去行過49次之後, 雖然唔知究竟買佢嚟有乜用, 但係卒之都係忍唔住手, 被佢個得意樣控制咗我嘅理性.. 其實除咗得個樣睇之外, 佢入邊係裝滿「只溶在口, 不溶在手」嘅朱古力架.. 個頭頂睇落似竹蜻蜓嘅嘢, 其實係畀你轉下睇是日運程噃..
睇佢眼仔碌碌, 係唔係好得意啊?? 阿Q精神: 有得睇有得食有得玩, 真係好鬼抵!!

26.11.2007 | 9 0 1 5 8

突然間諗返起以前中學嗰陣, 每個學生都有個學生編號, 簡稱學號.. 前兩個數字代表入學年份, 後三個月數字就係個人編號喇.. 個人編號係依照呢個方法編排嘅: 班次, 女先男後, 最後跟姓名筆劃序.. 多得我超強記憶力, 除咗記得自己個學號之外, 我仲記得某些好朋友嘅學號添架, 連佢哋都可能未必記得, 問你怕未?? 90003, 90007, 90010, 90016, 90021, 90038, 90044, 90067, 90152, 90156, 90429, 90464, 90467, 90568.. 唔係求其up個冧把出嚟架, 真係我啲朋友嚟架!!

各位觀眾, 我係90158啊, 你係咩學號啊??

25.11.2007 | 冷知識

根據統計, 世界上有80%嘅普通人係唔知道以下事實嘅:

• 蝦嘅心臟其實喺佢個頭部
• 豬豬永遠冇辦法睇到天空
• 貓嘅尿液係夜光架
• 你係永遠都唔可能用你條脷舔到你嘅手踭
• 打噴嚏如果過於用力, 係會導致胸腔破裂架
• 打火機其實比火柴更早發明出來
• 心臟可以產生把血液噴出三十尺高嘅壓力

睇完呢啲冷知識之後, 係唔係獲益良多呢?? 不如睇埋最後一個更加勁爆嘅冷知識啦.. 根據統計, 有95%嘅「低B友」仲未睇完就已經嘗試用自己條脷去舔自己個手踭喇!!! 嗱嗱嗱, 老老實實唔好講大話喇, 你有冇啫??? 哈哈哈..

24.11.2007 | 畢業喇~~~

話咁快, 五日嘅PMP課程就咁huerr 一聲結束, 當然可以話係順利「畢業」啦.. 上堂, notes, 課本, 考試, 證書呢啲嘢好耐都未接觸過, 今次就齊齊整整咁一次過擁有晒喇..

上咗四日半堂, 最後半日就係個即席考試, 模擬考題測試究竟學識幾多, 兩小時內要完成200個選擇題(真正考試係四小時200題, 模擬考試專登縮短時間增加難度).. 唔以為選擇題好易啊, 其實啲題目好tricky, 答案選擇全部都好接近, 而且因為思維已經被平時做嘢所執行嘅模式所干涉, 所以往往會好潛意識地忽略咗PMP應該要嘅最基本答案, 所以真係有難度架.. 加上即席考試, 冇機會咪書梗係考記憶考天才啦, 200條題目做到眼都花埋, 到時四小時真係好消耗體力架其實..

雖然做嘅時候信心十足, 時間啱啱好夠200題全答, 但係最後結果就係【FAIL】熱辣辣呈獻眼前!!! 嘩, 好demotivated啊.. 71%合格我只得65%, 仲爭咁啲.. 難怪之前有兩個經理級同事都係肥佬收場啦, 最驚恐嘅事就係--個導師爆料話佢自己其實都考咗足足四次先pass, 即刻暈低!!!

anyway而家需要做嘅嘢唔係檢討, 而係嗱嗱聲上網登記成為PMI會員, 跟住就係申請考試.. 考試都要申請架, 等我之前仲以為可以趁記憶猶新即刻去考, 原來係要過兩關先知道有冇資格.. 首先需要上網填表, 得到回覆後就需要遞交文件, 再得到回覆後先可以安排時間去考試.. 前前後後都要兩三個月時間.. 所以話行動要快, 唔可以蹉跎歲月喇, 因為得一年時間去考/補考, 一旦錯過就要從新上堂一切由頭再嚟過架喇.. 畢業?? 咪就係表示要行更長遠嘅路囉, 醒醒定定啊, SK!!!

23.11.2007 | 小小測驗

又係禮拜五喇, 返咗成個禮拜工, 係唔係筋疲力盡, 需要休息喇?? 未有耐週末, 不如就玩吓簡單心理測驗, 輕鬆一下啦~~
********************************************************************************
1. 你手上有一隻生蛋同一隻熟蛋, 你會將佢哋(一齊或分別)放喺邊呢??
[A] 樹上 [B] 水中 [C] 泥土裡 [D] 口袋裡

2. 請伸出你對手, 揀出你最中意嘅一隻手指(不分左右)
[A] 拇指 [B] 食指 [C] 中指 [D] 無名指 [E] 尾指

3. 請用你嘅直覺排出以下你最喜愛物品嘅次序(最喜愛排先)
[A] 山 [B] 海 [C] 花 [D] 火車

4. 假設今日係你生日, 你會揀以下邊一位嘉賓坐喺你身邊?
[A] 運動家 [B] 作家 [C] 睇掌專家 [D] 流行歌手 [E] 班主任

想知答案?? 請點擊此鏈接啦..

********************************************************************************
[Source from http://brain0043.myweb.hinet.net/heart/002.htm and http://www.xlcy.net/gx23.htm]

22.11.2007 | PM九大元素

上咗咁多日PMP堂, 唔多唔少都學到啲嘢架.. 成個課程就係圍繞住九大PM元素-- scope, time, cost, quality, resources, communications, risk, procurement同埋連貫以上元素嘅integration [可以一氣呵成將全部元素list down, 值得鼓勵!!].. 其實一路以嚟做PM已經有兼顧以上元素, 都係跟前輩或者從經驗中學習, 係冇個課程講得咁理論性(theoretical)同埋結構化(structural)啫, 所以上堂時都唔難relate到平時所做啲嘢..

始終係現實世界, 好難每個理論每個公式都跟足晒.. 但係今日所學關於cost management呢範, 我就獲益匪淺喇.. 因為一路以嚟個project一旦commit咗個價碼, 就一定唔會有加架喇, 我哋呢行做PM方針就係為趕起個deadline可以用盡各種方法, 因而產生見唔到嘅cost, 所以實際上賺幾多或者蝕幾多都唔明確.. 從呢個topic學識好多formula, 可以計算或者預測一個project嘅實質盈虧... 對於好technical嘅我, 呢啲比較錢銀方面嘅measurement, 真係塞晒錢入我袋啊..

期待學識更多有用知識, 期待可以學以致用, 期待可以漂亮考取個PMP..

21.11.2007 | 上堂喇!!!

早前終於都的起心肝報讀咗個PMP Course, 呢個禮拜全天候fulltime上堂.. 講咗(N+1)年咁耐, 卒之都踏出第一步.. 個course係去一間學院度上嘅, 之前仲以為需要同啲小朋友爭課室上堂[跟住就遭受小朋友白眼, 眼超超嘴藐藐話uncle喺度想點啊??], 去到時先知道間學院其實特別為在職人士另開一整層樓, 隔開啲小朋友嘅, 所以呢個executive training center環境真係唔錯架, tea time仲免費茶點供應噃..

第一隱懮之後, 當初都有擔心過個course會好悶, 而且畢業都要成十年, 突然間要讀返書, 驚煞時間適應唔到.. 不過都係杞人懮天啦, 個導師其實好有經驗, 好intuitive & thought provoking嘅教學方法, 一啲都唔覺得沉悶[雖然有時會稍為乞眼瞓].. 最重要係學到嘢, 希望到時certification exam嘅時候或者職場上真係可以大派用場啦..

除咗學到新知識之外, 最大收穫應該就係個心情喇.. 因為有覺自己好似重返校園咁, 著牛仔褲T恤波鞋, 孭住個sporty look運動袋去上堂, 好似後生咗幾年咁.. 最殺食就係個袋裡頭裝嘅竟然係上堂notes同埋筆盒, 手上拎住本textbook.. 嘩!! 個感覺真係好學生囉.. 在下已經失去呢仲感覺好耐好耐, 呢幾日突然搵返, 真係好正feel架!! 哈哈..

20.11.2007 | 簡單, 就是滿足

小徽上個週末失驚無神咁由新加坡返嚟, 禮拜日晨咁早打畀我約我去食晏, 話小春喺MSN度猛叫佢去食陳記蝦麵, 攪到佢都把持唔住要去食.. 陳記蝦麵係小春至愛, 其實佢哋兩位擁躉唔喺我都唔會諗到專登去食, 所以嗰日難得有伴我就梗係一口答應啦!! 去到食晏時間, 幾乎坐滿人, 點咗例牌排骨蝦麵同埋杯冰凍青檸涼粉飲品.. 未落手大快人朵頤之前, 特登用手機影低, 稍後send畀小春等佢妒嫉一下, 哈哈..仍然保持水準, 啲湯都仍然鮮甜, 唔好睇佢紅紅咁以為好辣啊, 其實只不過係啲蝦油嚟架咋, 我仲另外加咗羹辣椒落去添.. 配料係中蝦同排骨, 都係新鮮啦, 仲有爽脆芽菜仔同粉一齊食, 好滋味架.. 杯青檸涼粉我都好中意, 甜甜地又帶點青檸dashing微酸, 個搭配好正!! 總括嚟講, 呢餐雖然簡簡單單, 但係就食得好滿足, 小徽仲有添多碗嘅衝動添!! 不過好彩最後都可以臨崖勒馬..

[注: 呢間陳記蝦麵就喺文良港中華小學對面嘅一間店舖, 冇乜人知嘅全女班老字號, 可以一試..]

19.11.2007 | not incomplete...

一連十場憶蓮Live07音樂會昨晚正式於九龍灣Starhall閉幕.. 口碑好壞參半嘅呢十場show, 雖然在下未能親身體驗, 但係身為歌迷嘅我, 都會留意關於呢次音樂會嘅新聞動向嘅.. 講講呢次音樂會, 個rundown九成選曲為冷不勝防啲冷門sidetrack, 音樂會著重音樂性, 絕冇一般港式演唱會嘅商業模式, 有嘅就係林小姐+樂隊+和音, 簡約舞台+燈光視覺效果, 兩套低調歌衫兼且冇encore.. 目的只係要你細心聽佢唱歌, 正如投射於舞台上嘅文字訊息"i feed on music what do you feed on??"咁樣..

[image from http://www.oursandylam.com]

要讚揚林小姐今次大膽創舉, 將演唱會歸還原本應有嘅本質, 強調嘅係音色而唔係包裝.. 一個大玩包裝嘅演唱會, 其實連一個初出道嘅雞仔歌手都可以勝任有餘.. 但係一個真正講求音色嘅演唱會, 恐怕都冇乜人可以做得到.. 有個觀眾睇完之後話:「係佢咋, 畀著第個咁樣搞演唱會, 我實一凳車埋過去!!」可見林小姐今時今日去到呢個位置, 當眾歌手仲喺度為頒獎禮可以分到幾舊豬肉而明爭暗斗之際, 佢已經實現一個Diva應該做嘅嘢喇..

音樂會用咗呢首歌做結尾, 為紀念已故林振強先生所以未有譜上歌詞嘅95年作品《Incomplete》.. 好唔一般嘅收場歌, 哼完之後音樂會圓滿結束, come as you are, be who you are, this is not incomplete.. 熱切期待音樂會DVD嘅出版, 誓必收藏!!

18.11.2007 | 有趣試食

噚日同位朋友喺個商場行吓傾吓, 撞鬼行咗入個超市.. 既然入咗嚟, 於是就話不如去買啲嘢嚟飲啦.. 結果去到飲品部, 各品牌爭相擺出小檔攤搞免費試飲, 由於係週末關係, 試飲檔攤比平時多, 我哋見有小便宜貪, 無謂嘥啦, 於是就逐個去試.. 試得唔好味嘅, 兩人評論一番後不屑嗤之以弊, 試得好味嘅, 借意行開遠啲, 厚住塊面再到返去試多次.. 諗返起都覺形象盡毀啊~~

其實都仲有好多人好似我哋咁架, 最明顯可以看清楚消費者貪小便宜嘅心裡, 就係一個日式麵包試食攤喇.. 事關啲麵包任人試食之前, 要用啲時間烘熱.. 結果烘麵包嗰段時間可以話係門可羅雀, 但係烘完新鮮出爐嗰一刻, 即刻變成門庭若市, 試食客熙攘攤前.. 真係好大對比, 證明呢招宣傳係洗得噃!! 但係成18蚊買件麵包, 似乎冇乜人捨得噃, 所以分分鐘仲要倒貼埋畀啲試食客添..

唔好話我哋攪攪陣, 其實我哋試多啲個promoter咪可以早收工囉, 佢應該多謝我哋都嚟唔切啦, 啱唔啱先?? 所以我哋一片苦心嘅獎勵就係, 整咗好多嘢落肚.. 試食嘅時候每樣sample都係細細份, 所以唔覺飽肚.. 但係試晒全部離開超市嗰一刻, 即刻覺得個肚有啲漲漲地添[好滿足, 哈哈!!].. 平時真係邊鬼有咁嘅閑情吖, 噚日就唔知癡咗邊條筋先會搵啲咁嘅嘢嚟攪啫, 其實覺得都幾有趣幾好玩架..

17.11.2007 | 可口, 又可樂

買咗部新手提電話之後, 發現用佢嚟影相多過用佢唔係用嚟講電話發收短訊.. 最近無聊得濟嘅時候, 就中意行超市中意左影影右影影, 求其有靈感就會對住啲貨品猛咁影, 之後返屋企post晒上個blog度, 再加幾行字又係一篇喇.. 小朋友話我乜都可以寫餐矇, 連早餐兒歌呢啲side track嘢都可以寫得津津樂道.. 係啊, 就好似小慧話齋, 我個blog係冇乜特別主題嘅, 自己諗到乜就寫乜--或者我個主題就係「隨見而寫, 隨心而述」啩..
今次個焦點就係可口可樂喇, 平時都冇乜點飲, 先頭喺個超市發現原來佢係最受歡迎嘅汽水, 因為單一超市中最多貨源就係佢, 唔係比數量, 而係比種類.. 世界各地唔同版本, 唔同包裝, 唔同口味嘅可樂都可以買得到(見到中國, 日本, 韓國, 法國, 英國, 阿拉伯版).. 雖然對收藏家嚟講只不過係小意思, 但係對我嚟講, 真係令我打開眼界啊.. 咁多款個味道究竟會唔會依照各國而有所偏差呢?? 可口就唔咁包, 但係琳琅滿目咁就的確係視覺可樂喇..

16.11.2007 | 求: 除茶漬妙法

一路以來都聽聞飲茶可以幫助消脂減肥, 所以最近就買咗盒普洱茶包嚟飲.. 姑且勿論佢究竟係唔係真嘅可以幫助消脂減肥, 單係飯後嘆返杯香濃熱茶, 就已經係間開心事, 而且竟然覺得杯普洱要比平時去茶樓啲好飲.. 不過飲得開心之余, 發覺啲茶漬原來係好難去除, 講緊係我隻白底茶杯, 每次飲完茶就一定攪到個杯內層黃噤噤, 洗極都洗唔甩.. 個茶杯原本係好靚架, 印咗芝麻街個Elmo同埋Big Bird, 我好中意架.. 但係只從用佢嚟飲茶之後, 啲茶漬慢慢累積, 就變成「敗絮其中」嘅茶杯一個, 真係激心.. 尤其要飲清水嘅時候, 見到個杯內咁污糟, 都真係唔開胃..

喺度尋找去除茶漬最有效嘅方法, 各位善心人士有何奇妙法寶, 不妨借此機會公諸於世, 我相信世上好多人都好似我咁被餐具器皿上嘅頑固茶漬所困擾架.. 能夠出點綿力施益人群, 功德無量啊~~

15.11.2007 | 一路走過..

噚日個timesharing活動, 就係逼各位同事返屋企搵返以前啲玉照, 跟住逐一逐一show畀眾多同事一齊睇.. 覺得呢個活動都幾得意喎, 可以睇到各位同事由細到大一路長大嘅樣.. 有啲就冇乜變, 有啲就好大變化, 不過好彩個個都係越變越好睇, 哈哈!!

我自己都搵混全間屋, compile咗以下呢幾輯相, 由3歲到而家30歲細細回味, 當然能夠放膽將自己以前慘不忍睹嘅相公諸於世, 我的確勇氣可嘉.. 不過諗到可以同朋友們分享, 有可以笑爆佢哋啲嘴, 其實都算係件開心事嚟嘅.. 以下五個time stage嘅相, 大家先坐穩準備喇(點擊可以放大圖像)~~

【孩提時代】80年代, 由一個天真活潑嘅小朋友, 到一個叱吒運動場, 兼且能夠喺舞台上對住愈千人表演相聲嘅小學生..【成長時代】90年代初到90年代中期, 人生中最多回憶就係呢段6年中學生涯喇, 有喊有笑有跌到有成長, 同CY/FN/KH嘅友誼不經意地由此堅固起嚟..【少年時代】90年代末到千禧初期, 大學時期加上初出社會工作嘅熱血少年一名.. 當中有慘不忍睹, 一世人至娘爆長髮同埋至超肥身形, 真係令而家嘅我百般費解當時何以能夠容忍自己咁嘅樣??? (同事一睇, 第一個反應就係好想柄我!!)
【衝刺時代】千禧初期到而家, 一個為事業而奮鬥嘅有為青年, 嚴格嚟講7年來做過兩份工, 而家係第二份, 一路嚟都學咗唔少嘢同埋人生經驗, 係好寶貴嘅另一個成長時段..【現在】暫時唔定義佢係我一生中咩時代, 因為覺得應該係等將來回首過去嘅時候先可以定義到.. 呢幾張相熟口熟面, 朝見口晚見面, 睇落係唔係親切好多呢?? :-)

14.11.2007 | Missed Call

今日無啦啦有個人連續打咗好多通電話過我, 第一次因為開緊會, 所以一個missed call.. 因為唔知道係邊位, 所以冇覆返電話, 如果有重要事應該會再打過嚟嘅.. 過後風平浪靜, 於是放工後就去健身院workout, 所以冇帶手提喺身, 搞掂之後察覺又係佢嘅miss call, 今次離晒譜有7個咁多.. 最後一通終於有留言, 不過條粉腸留言又唔出聲, 粉腸你乜水啊你?? 有事揾我又唔出聲, 整個短訊都得啦係嘛?? 真係激鬼氣.. 費鬼事睬佢, 我就入去桑拿後沖涼, 搞掂之後又係佢, 今次係4個, 我頂!!! 終於忍不住, 我覆返點話畀佢.. 結果個dialling tone竟然係首印度歌, 我心知不妙, 果然接聽點話嘅係個陌生嘅聲音, 於是就問佢係邊位,揾得我咁急究竟咩事.. 結果晴天霹靂, 佢竟然話係打錯!!! $#@~&;*%{+\>-!~= 嘩, 老炳, 你係真唔係啊?? 打十幾次都仲打錯?? 運桔架你?? 對眼斗雞架你?? 無啦啦嘥埋阿叔時間同埋電話錢, 都唔緊要, 諗其條粉腸答我話打錯, 就真係好想死啊..

p/s: 有冇人知道miss call中文叫做咩啊??

13.11.2007 | 希望尚在人間

在下有個稱兄道弟嘅好朋友, 係從事健身教練行列嘅, 以前都係拜佢為師架.. 但係兩年前因為轉會嘅關係, 未能夠喺佢督促之下workout, 所以人就逐漸變得鬆散, 亦都因此搞成而家呢個田地.. 最近佢毅然地放棄如日方中嘅事業, 出外闖出自己一片天地, 而家學人玩freelance..

喺擔心呢位好朋友嘅前途之余, 其實對我嚟講係有百益而無一害嘅噃, 點解?? 因為佢已經打算入(我呢間)會, 到時我哋老友鬼鬼又可以「再續前緣」一齊workout啦.. 啱啱先同佢MSN嚟, 基本上佢都仍然愛錫我呢位大佬嘅, 所以打蛇隨棍上, 已經事先屈咗佢要做我免費教練架喇, 冇拒絕即係應承啦, 哈哈!! 唔貪心, 每個星期抽一日兩個鐘頭時間啫, 已經好感激喇.. 千祈唔好介意我(同以前比較)已經百倍退步, 千祈唔好介意我需要由最基本從新開始啊..

呢一刻, 就喺我呢個沮喪嘅時候(其實有幾沮喪吖? 又唔係舞照跳嘢照食?), 突然覺得希望尚在人間.. 多謝晒啊細佬!! 嘿嘿..

12.11.2007 | 每日例牌早餐

返工嘅每個早上, 早餐都係喺公司輕便解決, 好慣性地就係(1)果汁(2)鮮奶(3)乳酪拌(4)Muesli, (3)+(4)就係在下嘅Muesli Parfait喇, 失敬失敬.. 就係咁簡單就係咁寡, 未熟悉我嘅人會非常好奇我日日如是地食啲咁嘅早餐.. 唔怕話你知道, 其實數下日子我都持續咁樣成五年喇.. 應該算係我至今最持久嘅生活習慣.. 好耐好耐以前食抄米粉, 食椰漿飯, 食麵包茶點, 一早已經變咗我早餐嘅歷史喇..
習慣咗反而變成生活一部份, 唔駛每朝一起身就煩惱要食啲咩, 每隔兩三個星期, 就去超市補倉, 一嘢揼晒入個雪櫃攪掂, 十分快捷方便.. 其實我每朝食我啲營養早餐, 同大家每日食粥粉面飯, 尚且唔係一個慣性?? 就好似有個同事每朝都係食麥當當咁, 所以唔好再問我點解食唔悶喇.. 其實我反而覺得自從食開Muesli Parfait之後, 個腸胃的確健康啲架, 極可能係啲益菌同埋纖維嘅關係.. 唔好話食得咁清可以瘦身(見人見智啫, 我唔覺可以瘦身噃, 都係一樣咁肥), 其實一日之計在於晨, 早餐質素無論食多食少都好重要, 最重要係食得健康..

11.11.2007 | 兒歌金曲

不得不佩服自己嘅超強記憶力, 竟然記得以下呢幾首一年班嘅兒歌, 而且仲可以琅琅上口唱晒全曲.. 你又記唔記得啊??

《太陽公公》
太陽公公起得早 他怕寶寶睡遲了 爬上窗口瞧一瞧 發現寶寶不見了 原來寶寶在院子裡 一二三四做早操 太陽公公瞇瞇笑 稱讚他是一個好寶寶

《小貓咪》
小貓咪呀小貓咪 你這壞東西 捉小雞呀玩金魚 還弄壞東西 我要我要罰罰你 你這壞東西 不給你吃魚呀 餓你壞東西

《小蜜蜂》
嗡嗡嗡 小蜜蜂 飛到西呀飛到東 東邊花兒白呀 西邊花兒紅 四處採花蜜 一天忙作工 誰家孩子讀書不用功 不如這些小蜜蜂 噢 小蜜蜂

《泥娃娃》(呢首, 呢首非要特別獻給我嘅好朋友小徽不可...)
泥娃娃 泥娃娃 一個泥娃娃 也有那眼鏡 也有那鼻子 嘴巴不說話 他是個假娃娃 不是個真娃娃 他沒有親愛的爸爸 也沒有媽媽 泥娃娃 泥娃娃 一個泥娃娃 我做他爸爸 我做他媽媽 永遠愛著他

10.11.2007 | 老人與小孩

最近認識一位「小朋友」, 其實唔係真正幾歲小朋友, 係自己(被逼)認老所以先至稱呼佢做小朋友啫.. 咁點解(被逼)要認老? 繼續讀落去就自有分曉..

話說同呢個朋友傾傾吓偈, 發現原來大家都係同一間中學嘅, 結果互問對方當時嘅學生編號, 我得到嘅回應就係佢不經意嘅一句「嘩! 你個學號咁前嘅??」[注: 學號頭兩個號碼代表入學年份, 話個冧把前咪就係話我老囉..] 不過算啦, 我接受到呢個打擊, 因為畢業都超過十年啦.. 兩人話題就轉而圍繞中學喇, 由嘗試記返起校歌點樣唱, 到細數每位出位老師嘅出位代表作, 到中學生涯點點事跡, 雞啄唔斷.. 可能出自同樣背景, 所以講得真係好投契, 係毫無「代溝」的投契.. 講吓講吓, 講到邊一年畢業, 佢又一句應應躂過嚟:「嚇! 你好早畢業喎, 嗰陣我都未上中學..」個心即刻被呢個第二打擊, 由十八樓直跌地面..

其實計返年齡, 都大佢七年咁多.. 所以話, 真係唔到你唔認老..

09.11.2007 | 唉呀, 乜咁啊??

公司廁所係同其他同一層嘅租戶共用嘅, 近排發現下晝五點幾鐘打後, 啲抹手紙好多時候都用晒.. 我習慣每次事後都會洗手順便洗埋塊面, 冇理由要用乾手機烘乾塊面架, 所以一定要用到抹手紙印乾塊面(有啲唔環保, 但係今日唔講呢個topic).. 直到近兩日先發現, 其中某一個廁格內一定有成疊未用過嘅抹手紙, 好靚仔咁擺喺個廁紙桶上.. 成日都要人入廁格搵佢啲剩餘抹手紙嚟用, 真係激鬼氣.. 該煨囉, 邊鬼個仁兄有柔軟廁紙唔用, 中意抽成疊抹手紙拎入廁格用啊?? 啲抹手紙又硬又粗, 點掹啫?? 真係百思不得其解..

突然又另我諗其一個笑話.. 話說有日友人邀請女友上門, 嘆咗兩杯茶之後, 女友就想要上廁所啦.. 結果發現全屋廁紙都用晒, 咁女仔之家上廁所一定要用到廁紙吖嘛.. 搞笑嘅友人竟然「靈機一觸」, 入廚房拎卷kitchen roll過女友用.. 女友梗係O大個嘴嫌棄啦, 但係友人竟然話粗粗地用住先喎.. 嘩, 大佬, kitchen roll咩質地你唔係唔知係嘛?? 點樣粗粗地用住先啊?? 唉呀, 真係笑爆嘴啊!! 唔識叫女友稍等數分鐘, 自己落街買咩?? 真係一啲都唔憐香惜玉啊, 哈哈哈哈..

08.11.2007 | தீபாவளி வாழ்த்துக்கள்

今日係一年一度印度新年, 俗稱屠妖節(Deepavali)或排燈節(Diwali).. 因為冇印度朋友, 所以未能感受到呢個節日嘅實在意義, 淨係好開心可以放一日假.. 其實都略略知道呢個節日嘅有來嘅, 都有名你叫屠妖節啦, 梗係同斬妖除魔有關啦.. 上網揾到以下質料..
印度新年喺印度曆中一年最黑暗嘅一日所舉辦，通常會落喺每年10月底至11月底之間, 即印度曆嘅第7個月, 傳說為慶祝魔王那拉卡蘇拉被神主克利斯懲殺.. 話說當時天神與大地女神唯一個仔那拉卡蘇拉被賦予神嘅力量與武器, 但係佢卻濫用權勢興建城堡, 以極度殘忍嘅手段欺壓人民, 並由於佢個人畏懼光明留戀黑暗, 甚至禁止民眾晚上點燈.. 結果另一位天神向神主克利斯納申訴, 喺一場激烈嘅戰鬥之下, 魔王納拉可蘇拉被女神莎雅巴瑪所殺, 聞訊嘅人民接鼓舞歡呼大肆慶祝, 並燃起油燈將整個城市點亮, 慶祝一個光明重生嘅時刻, 故被稱為「屠妖節」..

喺呢個印度教徒視為最盛大嘅節日, 印度教徒會用各式各樣燈火裝飾間屋, 象徵光明戰勝黑暗, 邪不勝正及智慧.. 大部分印度教徒家庭會以油沐浴祈禱, 代表潔淨舊年嘅晦氣, 迎接嶄新一年嘅好運頭.. 按照習俗, 佢哋會換上新衫, 點著油燈同家人共享早餐, 並將家中裝飾得鮮艷亮麗, 表示光明戰勝黑暗..

喺度恭祝各界人士屠妖節快樂, தீபாவளி வாழ்த்துக்கள், deepavali valthukal!!

07.11.2007 | 這麼近, 那麼遠

平時搭輕鐵返工都儘量避過繁忙時間, 今日因為需要準時到公司attend一個webminar, 所以逼不得已要早啲出門.. 結果就撞正最繁忙時段, 一到站即見人潮洶湧, 往市區方向月台擠滿晒人, 啲人由左邊月台排到右邊月台, 根本就係企滿晒成個車站.. 好不容易先至畀我揾到個罅攝埋去排隊候車, 結果等咗4架列車超過15分鐘之後, 終於都有幸逼到上車, 幸好揾到個有利位置, 不至于同其他人身靠身面貼面..

其實係冇理由會攪到成個站都企滿人嘅, 覺得係當初興建呢個輕鐵運輸系統嘅問題, 一味華而不實嘅計劃完全毫無遠見.. 當初是咁意有個輕鐵就引以為榮, 係威係勢咁, 得嗰兩格車廂仔真係夠載幾多個乘客啊大佬?? 而且運行咗成十年, 啲乘客真係有增無減, 究竟係當初完全冇預料到, 定係一句毫無遠見咧?? 我覺得係後者成份多啲, 因為類似問題真係可以由好多地方見到, 硬係唔會從失敗中吸取經驗.. 結果就盡嘥無畏嘅人力物力去極力補救, 就好似膏藥布貼傷口咁, 攪到東一躂西一躂交錯重迭, 鬼咁難睇.. 結果啲錢邊度嚟?? 咪又係冇緣享受固打恩惠嘅納稅人繼續額外貼錢?? 唉, 此等資質此等作風此等政策, 怕且2020宏願就係這麼近那麼遠喇...

06.11.2007 | 好得意啊你~~

同事愛子都唔知去邊度揾埋晒啲咁得意嘅馬騮仔, 平時MSN時候就見佢用上一系列嘅馬騮仔icon, 一個icon足以代表一整句話, 見到都開心啊.. 於是就暗示話我中意啦, 結果佢都好醒目話頭醒尾, 轉頭即刻用email一次過send晒過我, 真係無言感激啊.. 其實都send咗畀我一段時間喇, 只不過小弟未有時間逐一add入個MSN咋.. 頭先卒之都係咁意add咗個, 陸續有嚟~~ 見到都真係好像搣佢塊面豬登啊..
好想知到究竟係邊位仁兄咁得人中意, create埋晒呢一系列馬騮仔, 鬼咁得意而且最重要就係鬼咁生動, 一眼睇落去就知道佢要表達啲乜.. 我好中意啊!! 兄台, 希望你繼續加油, 創作多啲類似MSN icon造福人群~~ 係喇話是話, 有冇人知道呢隻馬騮仔叫咩名堂啊??

05.11.2007 | 舊鞋x新鞋

今日去食晏途中, 驚恐地發現對皮鞋穿咗個大窿, 大到連半個腳趾尾都露晒出嚟, 認真失禮死人.. 一向都習慣身光頸靚嘅我(唔係自我誇獎, 而係多次慘遭扒手毒手嘅領悟), 今日竟然老貓燒鬚, 徹徹底底咁形象盡毀啊!!! 更羞家嘅事就係, 臨時需要去見客做presentation, 嘩, 呢吓真係要想盡辦法遮醜至得.. 幸好一啲都唔係顯眼, 裡頭都係著住對黑色襪, 如果唔專登去睇係唔會察覺嘅..

見完個客, 其實都諗住應該可以再頂多幾日, 不如禮拜四放假先去買返對啦, 因為實在唔好意思著住對殘舊穿窿鞋去買吖嘛, 嚇親啲sales都過意不去架, 哈哈.. 但係越行個窿就越扯越大, 冇辦法, 實在冇辦法再接受喇, 唯有where爛塊面去買啦.. 之不過上天都對我不薄, 喺我勁需要新鞋嘅時候, 竟然有減價兼且極速揾到合心水兼且有size(換著平時一定唔會咁好彩).. 結果擾擾攘攘比較幾個款式之後, 扑鎚成交, 好豪氣咁即刻揼咗對舊鞋換上新鞋, 闊步昂行咁行出個商場, 個感覺其實好上等人架..

舊鞋都著咗兩三年啦, 都係時候入土為安喇, 未來呢兩三年, 都要輪到對新鞋為我效命喇啩??

04.11.2007 | 人生

你靜坐窗前, 輕輕拎起個茶杯細細品嘗一啖香濃紅茶, 至發覺原來杯茶未落糖.. 又懶得再起身去廚房拎啲糖出嚟, 於是就強忍紅茶苦澀味道, 硬係啃晒成杯茶落肚.. 直到個杯見底喇, 先發覺原來啲糖完全未溶解地沉咗喺個杯底.. 人生, 就好似呢一杯紅茶咁, 好多時候我哋未會珍惜身邊嘅人或事物, 當發現嘅時候, 又唔積極挽救, 到頭來只有後悔莫及.. 所以珍惜眼前, 幸福好可能就比你想像中靠近..

you sit by the window, lift the tea cup and take a fresh sip, only to realise that somebody has forgotten to put sugar.. too lazy to go for it, you struggle through that suglarless cup, till you discover there are undisolved sugar crystals at the bottom of the cup.. that's how life is, most of the time we do not make an effort to value what is with and around us.. so look around and maybe sweetness you are looking for is closer than you think...

[後記: 嘩, 不得了, 我個blog第一次寫英文喎!!]

03.11.2007 | (我想要) 紋身

紋身呢個玩意, 其實都開始變得普遍, 而且現時啲人都唔會再戴住有色眼鏡嚟看待別人身上嘅紋身, 至少我係其中一個會去欣賞人哋身上紋身嘅人.. 唔知幾時開始察覺自己認為紋身其實係一種fashion, 所以平時見到紋身, 都會望多兩眼.. 咁當然個人都要生得正派啦, 如果個人賊眉賊眼咁整個紋身喺身, 都唔方係好人啦, 呢種人就最好行開佢50步以包安全.. 言歸正傳, 見到啲型人紋身, 真係好羨慕, 即刻有種「我又要去整返個型型佢至得」嘅衝動, 但係又欲行還止.. 驚痛啦, 驚唔乾淨啦, 驚整出嚟效果唔好啦, 驚自己到時後悔啦.. 不過真係好想好想有返個噃, 當然唔係啲咩龍虎蛇豹之類圖形啦, 應該會揀圖騰之類紋喺背脊一帶啦, 上次喺峇厘島試過玩temporary嘅, 都幾中意喎.. 借問聲邊位朋友有相熟門路啊?? 有冇人支持我啊?? 畀啲意見好喎..

02.11.2007 | 老友記靚粥

已經幾乎忘記咗呢檔《老友記》靚粥喇.. 平日真係唔會去開嗰頭, 如果唔係今日唔覺意經過, 我諗都唔會有咁嘅機緣可以再次品嘗呢檔曾經令我一度瘋狂愛上嘅靚粥檔.. 想當年仲係讀緊college時候, 因為需要喺附近轉巴士, 所以晚餐時不時都踎喺度食碗靚粥攪掂..發現檔嘢比以前少咗好多食客, 換著以前一定需要等位, 就因為咁反而覺得啲伙記變得友善得多, 而且今日竟然係個老闆親自幫我落單, 於是開始質疑係唔係水準大跌watt?? 一場嚟到, 就點咗我嘅例牌豬雜粥跟多碟白切雞胸肉.. 水準仍然保持, 粥依然係幼滑, 配料依然係新鮮, 尤其勁中意佢啲酥炸豬腸, 脆噗噗咁真係好味.. 不過白切雞胸就略嫌有啲鞋, 比起以前嘅嫩滑要差幾條街.. 一碗粥加一碟雞, 承惠七蚊雞, 都唔平(好似起咗價添).. anyway總括嚟講尚算滿意, 因為街邊檔, 所以食到身水身汗, 好有feel啊..

01.11.2007 | 你揀邊樣啊??

今日行超級市場時, 突然間激發一股傻勁, 就係將林林總總嘅零食用手機逐一影低.. 本地出品入晒鏡, 入口貨品一律拒於門外.. 影吓影吓發覺真係好多, 求其每個牌子抽一個口味嚟影, 都好似影個唔停, 如果要逐一口味完全試晒, 一日一包況且兩個月內可以試晒嘅.. 見到咁多零食, 開始懷疑我哋普遍上肥胖嘅原因, 會唔會係因為太多呢啲高脂+高糖+高油+高卡嘅零食垂手可得咧??
以上零食組圖內有魚片, 薯片, 粟米片, 蝦條, 仲有好多好多淨係識個牌子但係形容唔出係咩嘅零食.. 記得以前仲係學生時候, 會儲埋儲埋零用錢, 好豪咁一嘢買起幾包, 但係就唔可以光明正大, 因為阿爸阿媽會鬧丫嘛, 哈哈.. 唔好以為大個咗就對呢堆零食冇晒興趣啊, 其實阿敏儀姐周不時都會補倉, 啲同事們都不知食得幾咁滋味添架.. 以上組圖咁多款, 你會揀邊樣啊??

31.10.2007 | 哈囉喂

今日10月31日哈囉喂, 又係普通一日冇乜新意, 原本就打算去gym感受啲氣氛, 不過臨時有嘢做放唔低, 所以錯過了.. 算啦, 呢度都冇人慶祝萬聖節, 冇啲哈囉喂feel, 就是但喺度擺幾張相應吓景算喇~~
祝大家哈囉喂Happy Halloween萬聖節快樂!!

30.10.2007 | 好嘢~~有新碟聽..

多謝香港同事JC同AW, 臨去曼谷前頻頻撲撲幫我搵衫褲又去元朗旺角買CD, 真係感激不盡.. 收到以下呢幾舊CD, 好高興啊, 因為又有新碟聽喇, 有排唔駛驚冇歌廳啦.. 其實好多朋友都唔明點解我會中意買CD, 因為網路上大可以放肆下載.. 冇得解, 雖然都偶而有上網d***load歌曲, 但係仍然會有買CD嘅習慣, 而且每次買咗新碟都會愛不釋手左睇右睇幾十輪.. 不過又唔係有殺錯冇放過嘅, 始終而家啲碟越賣越貴吖嘛, 計落都係條數, 所以係要選擇性地購買, 認為值得買先至買..

為大家介紹吓以上幾舊碟, 由左至右依序:

• 陳奕迅《Listen To Eason Chan》雙CD: 上幾篇有重點介紹過呢張碟, 而家正式擁有本物, 布T型CD套好得意, 碟面用復刻設計梗加抵死.. CD2係全專輯remix版本, 可見誠意..
• 梁漢文《Collection》雙CD+DVD: 通常一般歌手我都淨係會買精選專輯, 幾年嚟大熱作品一網打盡, 況且精選通常都係超抵價錢賣大包, 所以話精選=精明消費之選..
• 陳慧嫻《環球巨星本色系列》再三回味八九十年代舊作品, 除咗覺得歌手當時唱工(同而家比)可以去得更好, 其實當時啲歌都相當能引起共鳴..
• 鄭秀文《Show Mi Live》雙DVD: 一路以嚟鄭小姐演唱會都好注重視覺效果同享受, 一首復出之作《Mi》經已令我驚艷, 所以今次收復失地之作又豈能錯過??

29.10.2007 | 繼續曼谷(4) 還我本色

最後一日, 早上checkout食完早餐之後, 距離上機時間尚余數小時空檔, 冇乜可以做, 於是就梗係同成班同事(係啊, 又係一棚人啊) 齊齊去shopping啦.. 嚟到Siam廣場就開始分組各行各, 我就同GC, MY同NG一齊行central world, siam paragon同MBK.. 因為啱啱由曼谷training返嚟不久, 所以就由我領軍帶領三位初哥大戰商場, 誓估唔到竟然叫我領教佢哋嘅血拼本色, GC同MY竟然第一間鋪就有斬獲, 跟住NG都不甘示弱.. 最後竟然係我呢個老雀空手行出個商場, 簡直離晒譜..
見佢哋一楸二冷笑口噬噬咁, 原本心情平復嘅我即刻被激起嗰份隱藏已久嘅購買慾, 於是一口氣喺siam paragon連續買咗三件, 好好醜醜都不至於得返個兩梳蕉啦.. 最後四人闊步昂行於呢個購物區, 仲惹起某些人羨煞目光添, 哈哈.. 滿載而歸之余, 當然就少不了同啲戰利品影影相留留念啦.. 不過遺憾的是, 時間唔係好夠, 匆匆忙忙咁又要趕去機場喇.. 未完架, 去到機場梗係又唔錯過免稅商品啦, 結果買咗一罐潤膚霜同買一支護眼素, 嘿嘿..

呢次曼谷company trip, 就以血拼本色劃上一個完美句號喇~~

28.10.2007 | 繼續曼谷(3) 勞勞碌碌

呢個桂河營地對住條河同埋幾座山, 山崖上有條鐵路, 而且又瞓喺水上, 堪稱係山明水秀啦.. 其實今次喺個貼近大自然嘅地方搞個company trip, 都算係一種體驗啦, 我覺得幾得意幾OK架, 不過唯一唔滿意就係要5個大男人逼埋一間擺得兩張Queen Size床褥嘅房間, 所以噚晚就真係瞓得唔好喇.. 不過算啦, 都係一晚啫, 知道要organize呢個trip都唔易, 唯有將就啲啦..
今日嘅重點就係teambuilding activities喇, 朝早食完早餐就開始一系列游戲.. 有拉布袋啦, 筷子夾乒乓波啦, 夾雞蛋啦, 河邊跋水啦, 掟水球啦, 都幾好玩嘅.. 結果公佈成績, 我隊竟然拎第一喎, 哈哈, 搞笑, 但係點解冇獎品嘅??

之後就食lunch喇, 跟住就搭火車(係啊, 又係架殘舊火車啊)返曼谷.. 五小時車程路途遙遠, 唯有與同事喺車廂內玩玩扑克牌消磨時間.. 幾經波折, 終於傍晚1830抵達曼谷.. 因為時間有限, 所以就揼低行李畀其他返酒店嘅同事, 我哋同香港同事即刻一支箭飛去shopping.. shop到唔夠喉, 又趕下一組泰式massage, 享受massage過後, 又再趕下一組唐人街食魚翅.. 成棚人浩浩蕩蕩咁, 嚇親街邊啲曼谷市民, 真係唔好意思喇, 哈哈!! 途中見有人賣炸草蜢, 青蛙, 蟋蟀, 蝗虫.. 有個神勇同事買咗嚟試, 都唔記得訪問佢食後感添..

叮叮噹噹咗成日, 返到酒店都差唔多係凌晨兩點鐘, 沖完涼敷完面膜(要多謝香港陳同事醒目幫我帶幾包即用面膜)即刻蹋落床勁瞓到第二朝.. 總括嚟講, 今日三個字可以形容--好鬼攰~~

27.07.2007 | 繼續曼谷(2) 桂河營地

未能盡情享受間豪華酒店高枕暖被, 今日晨早0530就出發去火車總站乘搭0630開往Kanchanaburi嘅火車喇.. 要咁早起身真係好痛苦嘅一回事, 況且今日係星期六.. 呢一程路, 可謂係舟車勞頓喇, 第一: 架火車真係好殘舊, 第二: 個目的地好遙遠, 第三: 沿路停停續續大小各站, 所以大部份時間都係喺度覺覺豬..
沿路停咗好多站, 但係最重要都係個桂河死亡鐵路橋(Death Railway and Bridge on River Kwai), 呢個聞名於世嘅歷史古蹟, 相信都唔駛我點介紹.. 見到呢座桂河橋真面目, 同平時照片上個樣一模一樣, 心內有種說不出嘅特別感覺.. 跟住就係個鐵路終站, 係個瀑布公園, 之不過有點失望, 個瀑布都冇乜特別, 而且人又多, 所以唯有喺呢度唯一一間餐廳食晏打發2.5小時停留時間.. 個餐廳雖然係"up up dup dup"咁, 不過啲嘢都幾好味噃, 尤其係上圖串燒豬肉同炭燒魚蓉, 好好食..

一輪車程之後, 下晝1500最後終於到達我哋目的地--桂河營地, 聽聞呢個桂河上嘅島仔, 以前係囚禁犯人嘅地方, 啲犯人都係全部捉去建條死亡鐵路嘅.. 我哋今晚就係住紮喺呢個已改為度假村嘅地方喇, 仲係住喺水上簡陋板屋兼輪流使用公廁, (同噚晚比較)直頭係夠晒簡朴生活嘅體驗啦..

26.10.2007 | 繼續曼谷(1) 一大棚人

約三個星期前曼谷一遊之後, 今日又再一次故地重游喇.. 雖然係短時間內去返同一個地方, 但係個心情係唔同嘅, 上次係因為公事而去, 今次係company trip所以個心情係開心啲嘅.. 好耐好耐都冇成棚人一齊去旅行喇, 今次除咗KL同事之外, 仲會同埋新加坡同事, 香港同事, 部份北京上海同事一齊喺曼谷會合, 大概有40人所以真係好大棚架..
今日仍需返半日工, 跟住全公司同事一齊搭下晝機飛曼谷, 一齊checkin一齊等行李, 睇吓我哋成車行李, 你話幾咁虛撼.. 我哋係最遲到步嘅, 所以其他同事都已經喺度等梗我哋架喇.. 平時同某啲同事都係MSN或email聯繫, 今次終於可以一見廬山真面目, 幸會幸會.. 見到啲好耐唔見嘅新加坡同埋香港同事, 就更加倍感親切, 個感覺真係好開心..

不過最開心最意外就係間酒店喇, 其實係間公寓式酒店, 大老細為咗攪關係所以用心良苦編排唔同office同事同住一間單位, 我有幸被編排入住五人單位, (經香港陳同事證實之後)應該係全酒店最大間最豪華單位.. 客廳, 飯廳+廚房, 三房+各自浴室, 大概有兩千呎咁大, 真係成世仔都未住過咁正酒店啊..

今日, 覺得自己好幸福~~

25.10.2007 | 秋去秋又來..

最近下晝六點幾就開始天黑喇, 每次窗口望出去, 睇到天色已暗仲以為時候已經唔早, 望望個鐘都只不過係六點幾未走得住.. 而家十月臨尾, 秋天喇, 難怪個天咁早就轉黑啦.. 雖然馬來西亞係熱帶國家, 一年四季皆是夏, 但係衰衰地都叫做喺赤道以北, 秋冬日短夜長, 多多少少都會受到影響嘅, 係唔明顯嘅啫..

其實個人唔中意咁快天黑, 因為放工時感覺好似由晨早做到天黑咁(好命苦), 話晒都博殺咗成日, 離開office已經係天色昏暗, 個心情自然地跟住沉著, 個感覺係--好攰.. 我覺得自己係個夏天嘅人, 我出生於夏天, 中意夏天, 中意太陽討厭落雨.. 覺得秋天係個沉悶嘅季節, 夏天係個好開心活潑嘅季節.. 點都好, 呢度日日都係夏天氣候啦, 講咁多秋冬同埋春夏嘅對比把鬼咩?? 懶係四季分明咁, 哈哈..

24.10.2007 | 下次動作要快喇..

噚晚gym完搭輕鐵返屋企, 唔覺意入咗格最多人嘅車廂.. 其實都冇乜唔妥, 都係好似平時咁如常逼夾, 都已經習已為慣.. 不過就遇見個好搞笑嘅情況, 我真係笑出聲嚟架..

我格車廂點解咁多人, 咪就係因為有班親朋戚友, 成棚人一齊大概成8人有大有小, 佔據左右兩邊座位.. 兩個站後, 我諗佢哋應該係到站, 其中一個大嬸大呼小叫咁提醒每個人落車, 咩嬤嬤啊, 大姨媽啊, 二姑奶啊, 三叔公啊, 一個不留.. 一個個咁跟住起身落車, 成棚人好大陣仗, 驚動全車廂乘客左閃右避.. 結果一個個好順利咁落咗車, 唯獨個「指揮大嬸」大搖大擺咁準備落車與親朋戚友重聚嘅時候, 車門即刻關上, 佢唯有眼金金地呆咗一陣, 只可以一碌木咁企返喺度等下一站..

我見佢哋成棚人之前個虛撼氣勢, 同埋「指揮大嬸」當時個落魄樣咧, 真係爭個天共地, 即刻由心裡笑咗出嚟, 好彩冇畀佢聽到啫.. 哎, 我心諗: 你下次唔駛咁勞師動眾喎, 你啲親朋戚友有手有腳, 你驚佢哋唔識落車咩?? 又或者真係要逐個吩咐落車嘅話, 不如就喺前一站召集齊人企喺門前準備啦.. 好似有啲幸災樂禍啊呵?? but pardon me, i really can't help it..

23.10.2007 | 唔覺意, 又再唔覺意

禮拜日gym完之後, 唔覺意咁行咗去隔離間Pavilion.. 原本都係諗住打發時間, 但係又唔覺意咁不受控制(一開咗個頭就收唔到手), 竟然買咗啲嘢添.. 不過有兩件心頭好冇size所以唯有喺試身室影相留念, 好傻啊.. 塊鏡照得人瘦, 所以唔覺意咁影兩影咋, 唔好話我自戀啊唔該.. 話是話, 入邊啲試身室又幾class架, 夠晒寬倘之余又好大體咁擺張designer chair喺度, 即刻加五分啦..
唔知點解呢度啲嘢好似升晒級咁, 有幾間店本來就係cheap cheap地嘅, 但係嚟到呢度反而學人玩高檔, 覺到好搞笑, 腦內即時浮現《FM701》陳淑蘭句名言"低級唔好扮高級, cheap人high嘢唔掂得", 哈哈.. 不過當係題外話啦, 在下幫襯兩間店, 服務好唔錯(真係有啲受寵若驚架), 而且包裝又比一般(同一牌子其他地方連鎖)高格調, 平日都係畀劣質膠袋(我會即刻擺埋落自己個孭袋), 呢度竟然畀印刷精美紙袋, 拎起周街行都零舍醒神唔怕失禮..

網上有篇報導, 話佢in line with 紐約第五大道, 東京銀座, 意大利米蘭.. 係唔係真架?? 雖則個experience都幾好, 但係似乎有啲兜頭笠個大高帽, 車大炮成份多啲噃..

22.10.2007 | 聽吓佢唱歌

專輯名稱 : Listen To Eason Chan 歌手: 陳奕迅 出版日期 : 2007年10月18日 語言 : 粵語 出品商 : 新藝寶

開始聽呢張碟嘅時候, 真係有啲驚喜噃, 因為全體以舞曲為主題, 一首接一首聽得在下熱血沸騰.. 不得不稱讚陳生係個唱得之人(定還是已經係個公認嘅statement喇??), 而且此碟水準甚高, 覺得好似冇乜曲風可以難佢.. 聽陳生唱快歌(當然我要鄭重聲明忘記佢啲舞蹈表演)其實係好enjoy, 好容易帶你投入歌曲個世界內, 比起郭舞王嘅公式化, 黎老闆嘅力不從心, 劉影帝嘅格格不入, 張歌神嘅過份自信, 李鄰居嘅刻意賣弄, 陳生的確一啲都唔突兀容易消化好多.. 其實由早前首《打得火熱》就非常之欣賞喇, 今次狠狠嚟一張舞曲專輯, 簡直就係令我拍爛手掌啦.. 陳生你真係得嘅!!

不過在下對於呢張碟都稍有微言, 就係首《Crying In The Party》明明係慢歌, 雖則都幾好聽, 但係覺得同專輯其他歌唔夾, 可能考量市場需求整番首陳生至強慢歌求個穩陣, 尚可接受.. 不過最大敗筆就係無啦啦bonus track 首同劉影帝合唱嘅《兄弟》, OMG完全唔掂簡直就係畫蛇添足, 唔駛諗可以即刻飛咗去唔駛聽.. 聽吓陳奕迅, 推薦《閃》《演唱會》(係唔係即將來臨個演唱會主題曲啊??)同埋《時代巨輪》.. 陳生果然冇令我失望..

21.10.2007 | 你係邊一類型??

記得我曾經有個好健康嘅睡眠習慣, 平日應該係10:30左右就上床瞓覺, 第二朝5:30起身去gym完先至返工.. 不過都係咸豐年前嘅事, 好佩服以前嘅自己啊, 而家已經做唔到如此健康喇.. 睡眠時間已經改為12:30左右至第二朝8:15, 唔好意思, 好似瞓得仲多添.. 聽講人年紀大咗就自然無需要瞓咁多, 但係對於我嚟講呢條道理係唔work噃, 我仍然需要充足睡眠(八九小時走唔甩), 所以平時都會賴床, 係就係每當假日就可以(好返賤地)好早起身.. 我有兩位超怪朋友, 一位可以9:00就瞓覺第二日4:00起身, 持續維持如此生活習慣多年.. 另外一位就係無論幾早或幾夜瞓都好, 第二朝一定唔會遲過7:00起身.. 我覺得我相反, 無論幾早或幾夜瞓都好, 第二朝一定唔會早過10:00起身, 哈哈..

不如嚟個調查啦, 你係以下邊一類型架??
A. 早睡早起
B. 遲睡遲起
C. 早睡遲起
D. 遲睡早起

20.10.2007 | 全城熱爆冬甩神話

好奇心作祟之下, 噚日見完個客之後就行去Pavilion間J.Co冬甩店買冬甩.. 以為週日返工時間應該冇人派對, 但係我太低估啲人喇, 嚟到O大個嘴條龍竟然同週末不相仲伯.. 同事話一場嚟度就算啦, 而且我真係好想見識吓佢賣啲冬甩究竟有何魔力?? 結果一排就排咗40分鐘, 終於輪到我買返一打返去孝敬同事們.. 啲冬甩都整得幾好, 賣相唔錯都可以話吸引人, 價錢都唔貴, 但係唔知道味道如何, 環顧週圍人群不減, 我諗應該唔會差到邊嘅..
要個店員是但幫我執每款一件總共一打, 原本諗住每位同事一人揀一件, 誰不知有個聰明人提議不如每件都切幾份, 咁大家咪可以每款都嘗吓囉.. 係邊位啊其實?? 果然頭腦清醒, 冇畀美食當前沖昏頭腦.. 結果全體同事齊聚我個位, 大家一齊分享我排好耐隊先買到嘅冬甩, 大快朵頤下各自評賞, 結果一致通過original glazy係最好味, tiramisu cream係至流.. 總括嚟講, 不過不失, 但係我覺得我下次唔會特登排隊買囉, 拗爆頭都唔明點解啲人會咁瘋狂??? 呢個全城熱爆冬甩神話, 可能畀我過高期望, 都不過如是啫..

19.10.2007 | 夭心夭肺

好耐都冇做presales喇, 近日難得重出江湖, 去個大企業機構度做product presentation.. 由曼谷training返嚟就開始作準備, 仲消咗一日replacement leave添, 因為始終呢個product對我哋嚟講都好新好陌生, 所以成個星期都揼晒成副心機落去.. 結果波折重重, 最後都係唔成事, 唯有噚日下晝last minute改變策略, 今日決定demo個舊version..

今朝10點終於喺個客度準備demo喇, 點知啲人超唔守時, 一個一個咁姍姍來遲, 好唔尊重.. 嘩, 你大機構大晒咩?? 結果一個等一個, 我個勁慢virtual machine已經load好N年都仲要係度等.. 好喇, 10:30終於等齊晒人喇, 最後出現嗰個就係今日位【主角】(喺度暱稱CIO).. 我準備要開始個presentation喇.. 點知個CIO喋喋不休咁猛咁喺度講嘢, 開始我哋都好有禮貌回應(話晒佢係間機構大粒嘢, 畀返啲面), 但係越講就越踩線, 句句都窒住晒, 有佢講就冇人講.. 結果一圍人足足齋坐喺度聽佢講咗兩個鐘, 由開始落雨講到雨都停埋.. 句句都窒頭窒勢, 夭心夭肺, 踩完呢樣又踩第二樣, 笑裡藏刀講啲嘢好rude好offensive.. 就連自己個啲staff都唔放過, 難怪佢啲staff個個都默不作聲啦, 我諗十成十係已經免疫咗喇..

結果今日連個成啖心機準備嘅demo佢都唔要睇.. 嘩, 大叔, 咁你叫我哋上嚟把鬼咩?? 仲要嘥時間安排下一次.. 我哋係vendor身份去見你, 係就係想做你生意, 但係你都好應該尊重吓人啦, 唔係話你大晒噃.. 我哋係唔想where爛塊面收場先咕一聲吞落肚咋, 如果真係坐耐啲, 撩起我把火時, 我真係會句句同你頂撞落去架, 話裡有骨呢家嘢我都在行.. 遇到呢種人真係唯有自嘆時運低啊!! 頂!@#$%<>^&*()_+"?~..

18.10.2007 | 美味冬甩

友人cloke近日發現我個blog, 留言話J.Co啲冬甩fabulicious好好味, 不過就比唔上krispy kreme喇.. 我讚同佢嘅講法啊, 真係superblicious咁好味道, 不過食嘅時候就唔好諗究竟有幾多卡路裡, 食完之後就唔好介意攝取幾多卡路裡.. 因為人一世物一世, 美食當前偶然間忘我片刻係理所應當嘅, 唔好feel guilty, 嘿嘿.. 幫襯過中環伊利近街同時代廣場間(懷恨未試晒全部款), 吉隆坡就揾唔到, 有啲掛住佢.. 聽日會去Pavilion附近見個客做presentation, 過後一於去買返幾件J.Co冬甩試吓至得, 返工時間應該唔駛排長龍啩??
一件件靚仔冬甩一字排開, 見到都開心啊.. 最近趁萬聖節推出南瓜造型冬甩, 勁想食啊.. 朋友, tell me what's your flava??

17.10.2007 | 灑脫

發現友人啲blog, 有者可以滔滔不絕長篇大論, 有者可以精簡一句話完結.. 各人有各人嘅個人作風, 但係習慣寫咁上下篇幅嘅我, 好羨慕一句話就係一篇blog嗰種瀟灑作風, 係友人不善於用文字表達, 定係如斯灑脫, 就不得而知喇.. 今日就等我廢話少說, 唔拖泥帶水喇, 我諗睇嘅人都會覺得好開心, 因為不消兩分鐘就可以消化我今日一blog喇, 而寫嘅人更加開心, 因為不消五分鐘就為個blog添一成員喇, 哈哈... 第401篇post, 一於就由簡短開始..

16.10.2007 | 又嚟喇!!

記得2002嗰年去香港探小春, 咁啱又係憶蓮開演唱會, 所以有幸可以去紅館觀賞.. 發現憶蓮開唱都開得頗密, 2002 Live, 2004 港樂, 2005夜色無邊, 今年11月又嚟一單喇!! 不過今次唔係紅館, 而係九龍灣新場地Starhall, 據聞呢個場地只容納3000人, 同紅館比起嚟實屬蚊脾場地.. 亦都因為咁, 今次演唱會唔sell舞台設計煙花效果, 而係sell歌手同觀眾近距離嘅接觸, sell絕靚音色同聲響, sell真實音樂觸覺..

演唱會海報上個月已經拍攝, 才子林狗負責美術設計, 好一個反(憶蓮)傳統嘅中性褒呔造型.. 就好似演唱會想畀觀眾一個新鮮概念咁, 呢個造型好啊, 一身男裝顯得入型入格.. 海報上一句"come as you are, be who u are"亦都有型有款, 好中意..
香港陳同事曾經游說我飛過去睇, 一來可以睇演唱會, 二來可以探返啲同事朋友, 三來可以將我啲嘢一嘢搬晒返嚟, 認真一舉三得啊.. 雖然好想而且心都郁埋, 但係發覺廉價飛全部售罄, 而且機票都係一筆錢啦.. 況且朋友你到時都好似過澳門玩噃, 係嘛?? 都係等我諗諗先啦~~

15.10.2007 | Pavilion

今日gym完閑來冇事做, 就決定去隔離間新開商場Pavilion行行, 因為噚日第一次去都係走馬看花, 所以今日就一於地氈式行遍佢每一個角落..

1. 呢間Pavilion都幾大, 而且仲曠建緊另外一座(有健身院, 戲院, K場等).. 好似有七層, 店鋪都喺晒邊緣, 留返中間中空可以望晒到頂, 大門口入嚟視線全冇阻隔可以望到整個商場, 應該係風水布陣..
2. 商場裡頭好多剛登陸嘅嶄新牌子, 隨手影低以下幾個比較喜歡嘅, 其中有啲尚未開張, 唯有熱切期待.. 食肆方面有小春心頭好, Paul呢間1889年至今來自法國嘅麵包店..
3. 間商場其中一樣令我喜出望外嘅地方, 要算係呢個專為男士而設嘅美容專櫃喇.. 雖然得嗰四樣品牌產品, 但係感覺好pro.. 以後唔駛驚尷尬去女裝部櫃面, 忍受啲唔專業sales auntie嘅片面之詞喇, 哈哈!!
4. 噚日發現有間冬甩店超長龍, 就係呢間J.Co Donuts & Coffee喇.. 今日人龍比噚日仲要長, 好奇心驅使之下, 終於畀我查出箇中原因喇--原來就係因為RM33.40可以買兩打冬甩, 超抵買啦, 難怪咁多人排隊.. 無意中仲聽到有人話排咗成個鐘至買到..

14.10.2007 | 唱K睇戲行街食飯

今朝瞓醒一擘大眼, 就即刻準備出街, 因為約咗朋友11點唱K, 瞓醒時候都已經10點鐘.. 於是快手快腳梳洗裝身, 10:25快閃出門, 快到自己都不能相信.. 平時都至少摸個45分鐘先至甘願出門返工, 今日竟然可以喺25分鐘內搞掂.. 今日可算係節目豐富, 先唱歌K Lunch, 跟住就去睇《Bourne Ultimatum》, 跟住朋友去shopping我就趁機去gym操一操, 最後一齊食埋晚飯先至散水..

• K lunch 時段得兩個小時, 掛住食嘢又唱唔到歌, 唱到興起阿楊小姐又再次出現熒光幕, 真係唔夠喉.. 仲有碟XO醬海鮮炒飯, 好冇水準啊~~
• 《Bourne Ultimatum》我其實都冇睇上兩集, 中間有幾幕戲我不知覺地嗑著片刻, 不過後半部都幾action packed, 即刻抖擻起嚟.. 男主角好似銅皮鐵骨咁, 永遠都可以避過槍林彈雨, 點打都淨係輕微外傷..
• 去咗城中另一新開商場Pavilion, 唔錯唔錯.. 雖然內部裝璜麻麻, 但係勝在整體結構完善, 好好行.. 而且仲有好多品牌由呢度開始進軍大馬市場, 我諗我將來會經常嚟呢度奉獻我啲銀紙喇..
• 晚飯喺Pavilion解決, 因為未完全開晒, 加上假期嘅關係, 所以各食肆都擠滿人, 尤其一間冬甩店更是大排長龍, 真係令人費解.. 冇乜選擇之下我哋去咗食日本嘢, 尚算OK啦啲嘢.. 今日大家都豁晒出去, 主食後再叫甜品, 好鬼滿足嘅一餐啊~~

13.10.2007 | 佳節期間..

今日係回教徒齋戒咗成個月之後嘅開齋節, 呢兩日都列為公共假期.. 因為兩日都落喺週末, 所以禮拜一就係法定補返禮拜日, 加上公司補返禮拜六畀我哋, 所以在下喺呢個佳節期間總共有四天假期.. 冇乜特別興奮嘅感覺, 因為心裡掛住工作上一啲嘢, 真係犯賤!!! 但係流流長四日假期, 冇地方去的確好悶.. 但係另一方面, 呢啲佳節時份最好就係避免出遊喇, 因為旅費交通酒店機票通通座地起價.. 而且分分中去到第度, 人逼人唔緊要啊, 見到成棚熟悉嘅自己人, 仲以為留喺自己地方咁至弊傢伙吖嘛.. 呢啲咁嘅大日子, 城中游子全部都會趁假期返晒鄉下, 所以每逢長假期間, 就會發覺交通通順咗好多, 行商場shopping少咗一半人(但係都仍然好多人, 因為全城人無所事事蜂擁而至), 視線都好似突然豁然開朗好多咁, 哈哈.. anyway, 一於懶理啦都唔關我事, 咁難得有個連續四日假期, 梗係要好好咁休息充番啲電啦.. 「休息是為了行更遠的路」呢句嘢聽起嚟雖然有啲壓力性嘅恐怖, 但係又講得好啱噃..

12.10.2007 | 虛擬, 但感覺真實..

睇完朋友Shir小姐個blog, 提到呢個世界難道真係變得咁虛擬?? 點解咁講?? 因為最近喺個網絡內遇見好多N年冇見嘅朋友, 喺幾乎完全失去聯絡音訊全無嘅情況之下, 竟然可以通過blog同埋全球熱爆嘅facebook, 一個link住一個咁見到啲舊朋友, 真係連連驚喜猶如滔滔江水綿綿不絕啊.. 好記得一路嚟同朋友嘅聯絡轉變, 由當初每日返學見面, 到以後書信聯繫, 跟住就係電郵, 再到而家嘅IM同facebook, 好似越來越虛擬咁, 雖然見唔到但係卻可以好實實在在咁感覺朋友嘅存在..

今日就喺老朋友小春極力推慫之下, 加入咗facebook呢個大家庭, 果然喺呢個小小網站裡頭, 藏著好多同學仔舊朋友.. 在下好似鄉下佬入省城咁, 發現呢個網站有好多好多嘢玩, 除咗基本嘅photo sharing, send message之外, 原來仲有好多interactive玩意, 但係小弟今日喺度先謙虛承認尚未熟悉, 所以仲未識得玩住先.. 其實而家最希望就係加多啲朋友仔入個friend list, 因為個最終目標都係要「見返」啲朋友吖嘛..

11.10.2007 | 失敗

記得約莫半年前, 對自己定下激減15磅嘅目標, 當時講得口響響信心知足, 好似一定可以做得到咁.. 但係好傷心地, 發覺其實自己已經將呢個目標完完全全拋於腦後.. 如果唔係因為曼谷一轉之後, 驚覺自己真係肥得可怕, 我諗都唔會醒起呢個減磅目標.. 唉呀, 最可怕就係嚟緊兩個禮拜後, company trip又會在去曼谷一趟, 好懮慮啊.. 雖然都有某些朋友好中肯咁安慰話我OK, 但係埋尾巴卻加多句「瘦咗會好睇啲」「同以前比起嚟係多咗啲肉嘅」.. 而且最記得髮型屋老闆某日見到我, 劈開第一句就係「嘩, 咁肥咗嘅你??」, 怎麼叫我唔覺得自己肥吖?? 唔信嘅話睇返啲相, 照吓鏡, 唔好自己呃自己喇.. 所以喺度公開正式宣佈減肥任務失敗!! 曾經有啲成積, 但係好快又打回原型, 慶幸嘅是喺我未「更勝一籌」之前可以臨崖勒馬, 唔好一錯再錯以免造成千古恨喇.. 等真正休閒完畢之後, 就好應該再次定下20磅嘅目標喇, 哈哈.. 救命, 我接受唔到自己變成一個肉騰騰嘅大肥佬架..

10.10.2007 | 潛在的自戀狂???

上一回提到噚日去The Gardens遊花園, 第一次喺商場喪咗咁影相.. 其實影咗個商場入便啲嘢冇幾耐後, 突然間靈機一觸, 何不用部新手機玩玩自拍啊?? 於是就係咁影啊影, 初時都驚畀人見到, 所以就住就住靜雞雞咁影.. 過後竟然壯起個膽, 完全忽視旁人目光, 光明正大咁影, 而且動作都大啲笑容都燦爛啲.. 其實玩自拍真係唔係件容易嘅事, 第一要捉穩手機影到自己, 第二要計好個準確角度, 第三要儘量唔好影得自己太過核突(呢點最困難, 因為自己又唔係靚人一名).. 所以真係影咗幾十幅, 搞到手機幾乎冇晒點咁濟.. 但係每影三幅就有兩幅係慘不忍睹非delete不可嘅, 最後就淨低以下寥寥無幾過得自己嗰關, 可以見得吓人嘅呢幾張喇.. 手機影出嚟質地比較差, 矇矇地反而效果更加好噃, 所以話買咩12MP相機啦, 咪盞影晒自己啲衰嘢出嚟??
曼谷一個白鴿轉返嚟之後, 極之享受人生嘅代價就係身曠體胖.. 各位眼見我個大包面肥嘟嘟咁, 係唔係好可愛啊?? 哈哈!!

09.10.2007 | 遊花園

今日放自己假, 做完gym後去咗城中新開嘅商場The Gardens遊一遊呢個花園.. 可能係新開, 亦都可能係weekday嘅關係, 所以間商場基本上係好冷清嘅, 同隔離間Megamall嘅人群比較, 簡直就係蚊脾同牛脾.. 呢間商場行較高級路線, interior design都顯得講究, 店舖都係出租畀較有來頭嘅品牌.. 間商場其實未完全開晒, 應該仲有二成店舖係opening soon.. 好中意啲opening soon店舖外邊嘅牆紙(唔知叫乜, 總之就係新鋪即將開張癡喺臨時木板上嗰啲大型poster), 全部都係啲花草樹木攝影相, 好match個花園主題..
上一次嚟係走馬看花, 今次其實志在消磨時間, 喺裡便邊行邊影相, 剛開始影商場嘅設計, 跟住轉移視線影啲廣告牆紙.. 我諗我發夢都估唔到我竟然會喺間商場入便影相而唔係shopping, 因為我不嬲都有啲鄙視喺商場影相嘅人, 今次真係自打嘴巴, 搞笑..

08.10.2007 | 曼谷符碌(9) 後會有期

第九日, 寫呢篇blog嘅時候正在飛機上.. 因為乘搭下晝班機返吉隆坡, 所以基本上係冇乜時間進行大事活動.. 都係得個朝早出去(係又再去)Ratchaprasong.. 冇乜「任務」在身, 所以都係喺啲商場入邊消磨時間, window shopping同埋影影相咁啦.. 大概三點鐘就折返酒店, 起程去Suvarnabhumi機場喇.. 泰國呢個新機場好大好靚啊, 帶點futuristic嘅設計, 個architecture好似個時光同道咁, 型爆啊.. 個機場真係好大, 入邊啲duty free shop又超多, 所以如果太早check-in都唔駛怕無聊.. 睇吓價錢其實啲嘢都有啲貴, 窮等人家冇錢買, 所以就漫遊整個機場, 週圍玩自影, 哈哈.. 雖然係架N年老相機, 但係出嚟啲效果都唔錯架, 算係為我今次曼谷之旅作個完美嘅回憶總結啦..
[繼續寫於降落吉隆坡後] 抵達吉隆坡時候落緊大雨, 因為坐budget airline嘅關係, 所以個機場都係budget type.. 落機後需要行一段open air路先至去到個terminal, imagine六七十年代啲機場就係架喇.. 落雨喎, 所以每人需要擔遮行過呢段路, 成世人都係第一次遇著咁落魄嘅情形, 勁搞笑..

07.10.2007 | 曼谷符碌(8) 行街洗錢

好喇, 嚟咗咁耐, 玩又玩過食又食過喇, 都應該輪到另一高潮節目—shopping是也!! 發覺其實曼谷都真係好多好多商場, 而且集中於某些地區, 所以一站式嚟到Ratchaprasong區(BTS Siam或Chit Lom站)一日其實都唔夠時間行晒全部商場.. 呢度主要商場有聞名遐邇嘅高級Siam Paragon同Gaysorn, 中級Central World同Chit Lom Central, 普級MBK.. 在下用咗足足一日時間走馬看花式地總算概括呢幾見主要商場, 好攰!! 就睇外觀, Siam Paragon同埋佢出邊個噴水廣場, 好有氣派.. 論interior就非Central World莫屬喇, 好潮好時尚..
因為現金有限, 而且又唔想郁動到信用卡, 所以今次都係就住就住落手.. 主攻啲未見過或者喺吉隆坡揾唔到嘅牌子.. 啲嘢其實都唔係平, 為大家展示在下寥寥無幾嘅戰利品, 堅信下一次曼谷之旅應該會更上一層樓..

06.10.2007 | 曼谷符碌(7) 標準遊客

終於都完咗個training喇, 今日開始要正正式式咁暢遊曼谷.. 未嚟之前都已經略略咁research過要去邊度喇, 今日晨早起身, 向Chao Phrya河兩岸嘅曼谷發源地進發, 因為全部都集中喺呢個Rattanakosin島上.. 先由酒店撘地鐵由Petchaburi站到Silom站, 再行去BTS Sala Daeng站搭到Saphan Taksin站, 再行去個Sathorn渡輪站展開旅程喇.. 聽落好似好複雜要轉好多種交通工具, 不過起實曼谷嘅地鐵系統都幾唔錯架, 好方便一啲都唔覺麻煩..

第一站Wat Arun, 好泰國佛教色彩嘅一間寺廟, 中間個stupa塔係全廟焦點, 啲彫刻果然係鬼斧神工嘆為觀止.. 喺度影咗好多相, 但係呢間廟聽講應該傍晚日落時隔岸遙望嘅時候係靚..
第二站Wat Po, 與Wat Arun隔河對望, 裡邊有個金色大睡佛像.. 因為要趕下一站(下一站有開放時間限制), 而且覺得應該冇乜嘢睇, 所以就齋喺外邊影幾幅相算喇..
第三站 Wat Phra Kaew, 一句話講晒, 好靚好震撼!! 難怪係曼谷首要旅遊重點啦, 而且入場費要成250THB架, 不過入到去親眼見到眼前一切嘅非凡氣派, 就覺得值得囉.. 臨走仲依依不捨想影多幾幅相添架.. 前幾晚泰國同事帶我哋喺出邊影相, 仲話呢間廟出晒名, 果然名不虛傳..
第四站Royal Grand Palace, 與上一站毗鄰嘅舊皇宮, 聽講泰王而家唔係住喺呢度.. 可能係Wat Phra Kaew之後, 所以唔覺得點, 因為成個建築相較之下都顯得好普通, 但係依然影好多相..
一整天喺烈日當空之下嘅疲累之旅後, 返到酒店發現自己晒黑咗好多, 手腕上有個手錶印, 唔緊要, 最核突就係個身竟然晒出個t-shirt印, 真係好衰唔衰..