30.04.2008 | 一個名銜

PMP考試順利過關之後, 噚日終於都收到有關機構所寄過嚟嘅證書喇.. 寄過嚟嘅係一個folder, 裡邊有封恭喜信啦, 證書啦, 一張CD(入邊好多守則)啦, 同買一個好搞笑嘅PMP別針(嘩, 真係搵鬼戴住佢咩?? 唔駛週圍話人知你係PMP噃).. 收到嘅時候其實都冇乜興奮, 唔知咧, 因為覺得自己係受之有愧, 都唔好意思週圍話人知我係個PMP囉.. 咪住先, 寫blog其實算唔算係高調宣傳啊咁?? 呵呵~~點都好, 話晒都為咗佢拼搏過, 而家可以喺個名後邊加返個名銜, 好似有啲威水呵?? 哈哈.. 不過而家煩惱嘅係點樣去maintain呢個title, 因為呢個title唔係贈你一世人架, 而係要參加一啲活動(係要畀好多錢嘅活動)去累積積分, 每三年要至少60分先可以繼續享用呢份榮譽架.. 唔簡單囉, 好似成世人要為咗呢個名銜而勞心勞力咁.. 而家就係覺得進退兩難囉, -_-''' 哈哈..

29.04.2008 | 我呢個blog..

有幾位朋友話我最近啲blog都寫得好emotional.. 喂喂喂, 咁話晒我都係血肉之軀, 有時梗係有啲情緒架啦, 咁有情緒就梗係抒發喺自己呢個小天地架啦, 好正常啫係嘛.. 年紀漸大, 經歷嘅嘢跟住累積, 這就是人生呀..

雖然冇刻意為呢個blog設立一個主題, 但係實際上會係同各位讀者分享我當時嘅感覺.. 無論開心或者唔開心, 無論平淡或者精彩, 我會好care free好天馬行空架囉.. 最近可能自己對事個心態唔同咗, 所以都冇話要刻意去抑制或隱瞞自己個情緒, 想表達啲咩嘢就既管痛快地寫.. 所以唔好surprise我會突然間轉態, 就當睇住一列過山車忽高忽低地穿梭, 好唔好??

最近發現自己呢個blog嘅點擊率高咗(當然係憑我自己個expectation啦咁), 我唔知來者何人, 如果你唔嫌浪費時間去睇我每日一post, 我好感激你嘅支持.. 不過更加感激不辭勞苦寫下留言嘅朋友們, 其實你哋畀咗好大鼓勵我喇已經.. 多謝晒, 多謝與我分享我嘅故事..

p/s: 其實我唔係成日都嘻皮笑臉, 我都可以好感性架, 哈哈..

28.04.2008 | 朋友, 你好..

記得個幾月前, 同一位朋友因為某些(唔清楚乜嘢)原因而變得疏遠.. 識佢其實唔係好耐, 不過之前我哋真係好friend, 感情很好架.. 之後就一直都覺得好唔開心, 曾經諗過算數啦, 可能人哋已經唔like我啦, 我都無謂強求啦.. 患得患失之際, 諗起同事JC都有同我傾訴同樣遭遇, 係放唔低友誼, 唔想失去一位好朋友吖嘛.. 頭先終於「痛定思痛」拎起電話打畀佢, 其實當時個心真係震緊架囉, 哈哈..

傾咗好耐都講咗好多嘢, 其實係因為我做咗啲好幼稚嘅嘢令到佢受唔落, 而我自己得罪人又唔知.. 加上我自己又係衰嘅, 成日神經質諗埋一邊, 令佢覺得我好自私兼有啲反感.. anyway, 其實呢位朋友都算好喇, 佢可以唔理我, 不過卻願意語氣心長咁同我分析佢嘅感受同睇法, 一輪道理之後, 我覺得自己真係錯晒囉, 個心當時覺得好內疚.. 之前有任何我唔啱嘅嘢, 我喺度講聲對唔住; 以後有任何我唔啱嘅嘢, 請即管坦然開聲..

覺得呢位朋友大人有大量唔去計較, 其實一路都係我以小人之心度君子之腹啫.. 從佢身上真係學識咗好多處世待人嘅嘢, 今日一談佢又再次令我醒悟喇.. 我開始更加珍惜同佢嘅呢份友誼, 畢竟朋友得來不易啊, 希望我嘅所作所為冇影響到呢份友誼啦..

朋友, 睇過呢篇post之後, 相信你應該感受到我嘅立場.. 我係真心希望友誼永固架, 唔奢望你發表任何意見, 不過希望你都有同樣諗法, 唔好等我一廂情願, 好嗎?? 勾個手指尾吖~~

27.04.2008 | 忽然空虛

噚日友人約咗我食lunch, 朝早起身後就等佢電話, 大概11:45接到佢來電話12:30喺市區某處等候.. 於是就一支箭咁去赴約, 一心興致勃勃去見呢位好耐冇見嘅朋友.. 不過點幾鐘就搞掂咗個飯局, 友人有其他節目無遐應酬我, 於是就散band喇.. 見到面傾唔到兩句眨吓眼就講拜拜, 其實覺得好冇癮囉.. 奈何??

飯局之後, 就咁全日一支公渡過, 去gym, 然後去window shopping消磨時間, 然後獨自dinner, 然後歸家.. 好鬼孤獨囉覺得自己, 一個美好嘅禮拜六就咁樣獨自終結, 認真悲涼啊~~

今朝起身, 天氣十分之好, 不過一覺醒來, 屋企冇晒人, 成間屋靜嚶嚶咁.. 我唔係個會呆喺屋企成日嘅人, 因為喺屋企真係好悶, 我情願自己一個人在外溜遢..拎起電話, 發覺其實自己真係唔多朋友喎(而且朋友大多有自己節目, 咁就不便騷擾人啦), 於是又重複噚日獨自一人嘅「節目安排」.. 一個美好嘅週末就咁樣孤獨終結, 認真坎坷啊~~

其實一路以嚟我都習慣獨來獨往, 有時仲會好享受獨自在外溜遢, 但係唔知點解呢兩日竟然會覺得空虛起嚟?? 呢一突如其來嘅空虛感突襲, 真係殺個我措手不及.. 係唔係年紀大咗, 就驚寂寞呢? 定係因為某種莫名原因導致?? 呢一刻突然間諗起林小姐早年前嘅一首作品, 「我空虛, 我寂寞, 我凍~~」, 救命!!

26.04.2008 | 一頭霧水

Together with my colleagues today Fanggong Qudi show Shifan, a total of 11 people who are Fanggong-6:00 bell, the cinema to see mighty Link Ganqu 7:00 of the market .. really into greenhouses were LA, I remember that more than 10 years ago of the SIN When students money will be Han Duoren Xianzhi together, the two qualifying Pa drying cinemas, are really in Haonai Mao tried La,. He ~ ~ play ( "The Street King") Wuxi my cup of tea, so no speakers La, on a dinner theater speakers Diwan..

係唔係睇到你一頭霧水啊?? 之前有個朋友話唔識中文, 所以睇唔明我個blog寫啲咩, 咁我就建議佢用Google Translate 嚟翻譯.. 結果自己走去玩吓呢個翻譯工具, 是但copy & paste我其中一個post, 得出嚟嘅結果簡直係超低能囉!! 如果任何人睇得明以上嗰篇譯文嘅話, 我係會服得佢五體投地囉.. 其實唔關個翻譯事, 因為我係用廣東話當正統中文翻譯成英文吖嘛, 梗係譯出事啦實情.. 覺得幾好玩囉, 再下一城譯多段文字.. 誓要你拗爆個頭啊, 哈哈!!

Zo to a cinema near the inter-Vietnamese restaurant CôDô (meaning of the ancient capital), the new money should be opened (because auntie MY did not even visited) .. and a total of 11 people Story of the act, but fortunately Diwan drama has been Zo peak periods, so can Good to be a smooth ride into the low-called Ye .. Up to the fresh, Zhang Zuo several Taiwan-White, heart Shen: "uproar, a good save Bo, and even a logo printed buried buried save money," Mao few results Resistance there was a waiter hands of the Miss India Zha a live, on the White Link Bei printed off a few "rich" and "auspicious" good words .. I think in particular La, but Wuxi Vietnamese restaurant Mie »Why Link Chinese culture money »»

想知道原文究竟係講乜?? 請按此鏈接自有分曉..

25.04.2008 | 好耐未試過..

今日放工與同事一齊去睇戲食飯, 一共11人搭正6點鐘放工鬆人, 浩浩蕩蕩咁趕去戲院睇7點場.. 真係成大棚人囉, 我記得十幾年前仲係學生嘅時候先至會咁多人一齊活動, 今次霸晒戲院兩排位, 都真係好耐冇試過囉, 哈哈~~ 齣戲《The Street King》唔係我杯茶, 所以唔講喇, 就講睇完戲個晚餐啦..
去咗戲院附近間越南餐廳CôDô(意思係古都), 新開嘅應該(因為連auntie MY都未去過).. 又係一共11人總動員行事, 不過幸好睇完戲已經過咗peak時段, 所以可以好順利入去即可坐低叫嘢食.. 入到去, 張檯放咗幾張白紙, 心諗:「嘩, 都好慳噃, 連印埋個logo錢都慳埋」, 結果冇幾耐有個侍應小姐雙手各揸住一個印, 就咁喺幾張白紙上印落「富貴」同「吉祥」幾個字.. 好特別囉我覺得, 不過唔係越南餐廳咩? 點解咁中國文化嘅??

我哋一共11個人, 所以係叫咗成檯嘢食(點擊上圖放大睇清楚啦).. 我自己叫咗份炭燒牛肉片套餐, 跟餐湯+越式撈米+兩款越式點心+餐飲, 個份量好大囉, 食唔晒.. 其他同事有啲叫套餐, 有啲叫點心, 有啲叫牛肉湯河, 全部都覺得好唔錯.. 埋單一共RM260幾, 環境衛生, 服務都幾好.. 順便一提, 間餐廳原來係某某評選2007年最佳越南餐廳喎, 其實係可以再去架, 不過下次點套餐可以考慮同朋友share囉..

24.04.2008 | 飛天遁地

今朝喺公司堆scrap paper之中, 無意中發現某位同事print咗出嚟嘅呢幅地圖.. 我一睇, 即刻覺得好有趣.. 點解?? 大家睇清楚喇, 係唔係覺得啲路好似絲帶纏身咁左穿右轉啊?? 其實係千真萬確, 幅地圖係畫得好準確架, 諗返起呢個area, 啲路真係好似飛天遁地咁曲折離奇.. 如果閣下唔熟悉嘅話, 一定會畀呢幾條路嚇親, 唔知道要上定落, 要左定右--所以話有時揸車都好有壓力架..

如果話我哋嘅陸路設施完善, 倒不如話係因為之前策劃不當, 為咗舒緩交通問題, 所以就唯有向四週360°空間發展.. 呢度銜接另外一條路, 跟住大轉一個270°大彎再返回原點, 沿路一共需要過3個收費站.. 看似先進, 其實咪就係create problems to solve problems?? 前工程部長於呢方面嘅貢獻, 的確係名留青史, 我諗冇人會反對囉..

我仍然覺得呢幅地圖真係畫得好經典囉陰公~~ 服得個劊畫人五體投地咯, 哈哈!!!

23.04.2008 | 生存, 生活, 生命

今日冇乜事情發生, 所以真係冇乜嘢可以寫.. 日常生活其實都係千篇一律, 瞓醒擘大眼--返工--放工--返屋企--又瞓覺, 咁就係一日喇.. 有時真係覺得好枯燥乏味, 之不過又咪係咁樣過日子過咗咁多年??

見友人早前於佢個blog度寫咗個關於「生存」, 「生活」同「生命」呢三樣息息相關嘅探討, 覺得好有趣.. 何謂 「生存」, 「生活」,「生命」?? 其實因人而異, 每個人都有其獨特見解, 但係一般上嚟講, 就係對人生目標嘅一種理念上嘅晉昇.. 由最基本嘅生存開始, 得到生存之道就會進而追求生活燦爛, 然後再進而追求心靈上對於自己生命嘅意義.. 中文可能比較難理解, 因為三個詞差別唔大.. 如果用英文我會解做to stay alive, to have a life, to live a life, 咁樣應該會比較容易明白..

其實係頗帶禪意嘅一個課題, 我覺得自己而家係處於穩定生存, 從而追求自己一片色彩生活嘅階段.. 感覺上好抽象, 但係確實如此.. 咁你又處於邊一個階段呢??

22.04.2008 | 咸豐年前..

故事繼續於噚晚搏晒老命去砌個project schedule之時..

突然間有位舊同事(正確嚟講應該係20年都冇乜兩句嘅舊同事)打畀我.. 當佢報上名來之時, 好彩我都仲記得佢.. 果然好social得, 兩句寒暄之後先至開門見山, 竟然問我一件咸豐年前嘅事.. 嘩, 大佬, 我離開舊公司都成兩年幾啦, 而且佢問我個project, 我喺未走之前都已經交交帶帶全部handover畀其他同事啦.. 計起嚟都係三年前嘅事喇噃, 佢突如其來咁問我幾條好technical嘅問題點樣solve, 喂, 真係鬼記得咩我?? 不過我當然唔係咁冷血無情, 話晒當時個project都係我帶開嘅(而且仲因為咁有幸去咗杜拜4次體驗生活), 所以都將我所記得嘅全部告知, 最後加返句「祝你好運」結尾囉, 哈哈..

醒起其實兩三個星期之前, 杜拜客戶的確有打過長途電話畀我噃, 不過我當時表明立場, 叫佢搵返舊公司同事啫.. 誓估唔到舊同事會如此「念舊」再搵返我啫.. 個結案陳辭就係, 我覺得頗搞笑囉其實..

21.04.2008 | 噩夢的開始

今日臨放工前, 無啦啦接到柯打要趕起個project schedule, 係好short notice嗰隻囉.. 唔想去解釋為乜嘢要咁趕, 總之就係人在江湖身不由己啦.. 結果成晚就埋頭苦幹, 就係為咗砌呢個schedule出嚟等聽日present畀個客.. 成461個task水蛇春咁長, 真係砌到我頭都赤眼都花.. 好耐都冇跟大project喇, 砌好呢個project schedule之後, 表示噩夢即將開始喇.. 頭先真係開始感覺到一股無形嘅壓力, 有啲驚未來呢幾個月(直到年底)要好辛苦囉.. 阿彌陀佛啊真係~~其實頭先唔知點解, 一度搞到自己好脆弱咁, 可能霎時間未能適應突如其來嘅壓迫感, 忽然間好想大大聲嗌出嚟, 又好想打個電話畀位好朋友發泄.. 不過最終因為某些原因, 都抑制自己冇做到, 其實可能真係一時衝動啫, 而且都未開始啲咩噃.. 話畀自己知, 唔好畀自己太大壓力, 工作同生活需要一個平衡點.. 無論聽日係點樣, 都仍然要坦然面對架啦.. you gotta stay tough, SK!!

20.04.2008 | 宜家餐廳

唔好怪我又去食嘢, 因為唔係我話啦, 有時週末真係好無聊, 唔知道做咩好.. 噚日衰衰哋都叫做有齣戲睇, 今日就冇節目, 如常去gym操一操, 過後就殺咗個朋友邀請, 同佢去宜家(Ikea)行行.. 呢個我生活咗成30年嘅地方, 難道真係咁悶?? 其實言談間友人都有同感, 不過我其實都冇乜所謂, 橫掂有人接送而且自己都好耐冇去過..今日都唔係too bad嘅查實, 因為畀我發現新大陸, 就係原來呢間宜家入邊竟然有間我完全唔知道存在嘅餐廳(canteen式餐廳).. 其實應該係話uncle我孤陋寡聞, 因為友人確實係regular噃, 而且canteen真係人山人海喎.. 啲嘢真係唔錯囉, 食得好滋味, sweedish meatball簡直係本土豬肉丸嘅好兄弟, 隻雞肶個汁唔錯啦(見到有啲好似rosemary嘅嘢).. 最中意就係甜品, 唔知道咩名堂, 但係好鬼好食囉, 一啖食落口即溶嘅感覺真係非常之幸福(食到有朱古力, 芝士, 蛋糕, 餅干碎, honeycomb碎), 不過勁肥囉.. 到而家都仲好掛住舊甜品添, 美味しね~~

19.04.2008 | 功夫之王

唔好怪我又去睇戲, 因為發覺週末除咗去行街睇戲食飯之外, 一時三刻真係諗唔到煞時間可以做啲乜嘢.. 原本以為今日就係悶悶地咁過架喇, 點知同朋友MSN傾傾吓, 得知呢齣《功夫之王》剛剛上映, 所以好即興咁話不如一齊去睇囉.. 話口未完, 聰明的我覺得應該會有好多人睇呢齣戲, 所以即刻上網訂飛, 果然係hot selling囉.. 其實都係沖住成龍同李連傑兩位武打巨星首次合作, 希望睇吓佢哋究竟可以擦出咩火花..
果然不出所料, 好typical嘅成龍x荷里活電影囉, 我唔想多作解釋, 大家睇過後應該都會心有同感.. 故事係個鬼佬寫嘅, 以《西遊記》孫悟空作藍本所創作出嚟嘅故事, 其實都幾impressive嘅(作為一齣拍畀外國人睇嘅電影).. 戲中古代人講英文, 覺得超騎哩囉.. 再加上幾位主角十足背書嘅英文對白, 好生硬好唔自然, 覺得不如講返中文另配字幕啦(尤其成李兩人, 有時好難catch到佢哋講咩, 反而劉李兩位女角就一口流利美腔英文).. 講返武打場面, 其實都唔係想像中咁令人津津樂道囉, 可能個target依然係外國人, 所以CG比武打動作更加精彩囉.. 如果問我值唔值得睇?? 我覺得OK嘅, 不過唔好因為成龍碰著李連傑而期望過高囉, 當係another entertaining hollywood kungfu movie就好喇..

18.04.2008 | 有免費雞柳包食~~

呢幾日麥噹噹喺全國各地, 指定分店同買輕鐵站大鑼大鼓派送換取免費雞柳包固本, 高調宣傳佢哋引以為榮嘅雞柳包.. 一共有一百萬隻美味雞柳包咁多等住各位去試食.. 咁大手筆?? 其實以麥噹噹今時今日嘅地位, 再加上雞柳包又唔係咩新產品, 確實係唔需要搞啲咁嘅綽頭.. anyway, 對於一般如我嘅市井之民, 理得佢咩手法啦, 有免費雞柳包食喎, 咁益街坊兼造福人群, 又點會介意啊?? [更多詳情]
今朝就於返工途中, 喺輕鐵站垂手而得嚟兩張固本, 即刻行去對面間麥噹噹索取免費雞柳包貳隻.. 唔係講笑, 真係大排長龍嗰種囉, 我一見多人就頭暈架喇, 所以唔等喇返工算數.. 之不過十點幾嘅時候, 眼見兩張靚仔固本擺喺檯面, 心裡頭確實係好掛住兩隻包.. 於是把心一橫走去換取, 拎返公司當lunch.. 結果今日個lunch就係一口氣食咗兩隻[叮]雞柳包, 好滿足.. 真係要多謝麥噹噹賜我一個豐富午餐囉, 呵呵呵~~

17.04.2008 | 飛叻氏

呢兩日晨咁早就要起身返工, 因為要準時9點開始training.. 遠道請嚟新加坡同事充當instructor, 因為時間遷就唔嚟, 所以被迫三日課程用兩日時間完成.. 噚日朝9晚9, 今日朝9晚7, 認真係緊湊, 好虛脫.. 呢兩日嘅密集式training, 係要學識「飛叻氏」Flex呢家嘢, 因為嚟緊一個大project好大機會會用得著.. 其實成個「飛叻氏」就係用嚟編寫一啲以Macromedia Flash(現已被Adobe收購)為藍本嘅Rich Internet Application(簡稱RIA).. 咁乜嘢為之RIA咧又?? 簡單嚟講, 就係而家所有網絡趨勢, 講求visual experience同埋user interaction and convenience, 可以做到一般HTML所做唔到嘅嘢囉.. 舉個例啦, facebook就係一個好好嘅RIA例子喇..雖然兩日課程勁緊湊, 不過覺得好有趣噃.. 用個tool好容易咁就可以整出個好正嘅網頁, 而且最開心嘅就係見到好多精彩嘅animation/transition囉.. 以前一向來都係編寫啲好死板嘅嘢, 今次覺得新鮮多啦, 至少編寫結果係可以畀到某些程度上嘅視覺享受囉.. 而家科技不斷創新, update吓自己與時並進係件好事嚟嘅.. 呢門學問, 我中意, 呵呵~~

16.04.2008 | 潑水節

泰國潑水節(Songkran) 聞名於世, 今朝某位泰國朋友send咗個link畀我, 叫我去睇吓當時嘅盛況.. 可能係佢朋友個blog啦, post咗成大堆嘅相, 真係可以感受到當時極度情緒高漲嘅情景囉.. 見唔見人頭洶湧啊?? 好墟冚囉我覺得.. 你諗吓喇, 一行出街就見週圍有人互相潑水, 唔理識你唔識你, 一於潑咗先講.. 泰國人天生友善熱情, 言談舉止以外, 潑水節就可見一斑..友人上星期都誠意邀請我去曼谷一睹盛事, 之不過臨時臨急都好難話去就去吖嘛.. 其實潑水節聽就聽得多, 泰國都去過兩次(兩次都係因為公務, 呵呵!!), 我係好想去體驗一吓架.. 可能明年啦, 答應過佢, 如果到時真係去嘅話, 一定會狠狠地潑三桶水去佢身上, 以示獻上我真摯嘅祝福啊, 哈哈~~

15.04.2008 | 如廁陋習

忽然間諗起呢個topic, 可能有人會直罵我核突, 不過我從來就唔逼忌呢家嘢噃, 而且仲會越講就越興奮.. hmmm, 我諗我可能有啲變態囉, 哈哈.. 其實都唔係咩核突嘢, 而係聽聞身邊啲人喺如廁時有某種習慣啫..

• 睇書, 睇雜誌, 睇報紙.. 呢啲都好普通不過啦..
• 隨身帶住部手機, 如廁時閑來無事, 不如玩吓game啦..
• 猛咁煲煙.. 聽講上上下下皆解脫, 快樂似神仙也.. -_-'''
• 絞盡腦汁去諗辦法解決工作上之難題.. 我以前間公司個team leader, 永遠就係去親廁所返嚟, 就有個解答畀你架喇, 哈哈!! 好efficient囉..
• 開大個洗手盤水頭.. 點解?? 我一位好友嘅經典陋習: 因為如廁時所發出「霹靂啪喇」嘅聲令佢覺得超尷尬, 所以喺未做事之前, 扭大個水頭, 等水流聲掩蓋尷尬巨響.. 呵呵呵!!

不過阿媽教落, 如廁就要好似食飯咁樣, 要專心一致, 千其唔應該分心做其他嘢, 咁先係健康吖嘛.. 哈哈~~

14.04.2008 | 新血來朝

上幾個星期忙於請人, 見完一個又一個, 今日終於有兩位新同事返工報到.. 好似都有一排冇新同事喇, 今日終於有兩滴「新血來朝」, 下個月仲會有另外一位新同事返工.. 頭先成班同事一齊去食晏歡迎新同事, 一共12位坐滿一張大檯, 好耐都未試過咁多人噃.. 真係人多好辦事, 忽然間覺得好興奮囉, 因為公司啲空位就快可以填滿晒喇..

見到新同事, 諗返起自己八/九年前啱啱踏足社會嘅時候, 真係好青澀, 一股熱誠滿腔, 初出茅廬嘅熱血青年.. 不過可以講嘅係, 而家心態唔一樣喇, 唔會好似以前咁樣搏晒老命, 覺得工作同生活應該需要一個平衡點.. 工作只不過係生命中嘅一部份, 工作之余尚有好多嘢等緊我哋去爭取, 唔好因為工作而忽略了其他嘢囉.. [致各位新人: 雖然話係咁話, 不過現實啲, 工作仍然係重要, 而且仲要做得妥妥當當噃, 咁先有個理由去爭取其他嘢吖嘛, 哈哈..]

當然, 呢種諗法係好個人嘅.. 我係覺得人喺唔同階段係追求唔同嘅目標, 冇話錯或對嘅.. 只要對得住自己, 係望大家都可以順順利利達到理想目標啦~~

13.04.2008 | 史柏力魔怪書

終於喺呢齣戲仲未落畫之前, 成功咁睇咗一了心願.. 上映已經一個月, 因為種種天不合時+地不利+人不和嘅原因未能夠去捧場, 到最近發現得一間院線特定時間仲有上映, 所以事不宜遲, 嗱嗱臨行動喇.. 之前睇到trailer都覺得唔錯, 所以好耐之前都已經好想去睇架喇, 今日睇完之後果然冇令我失望.. 其實我自己都幾中意睇呢一種屬於魔幻類型嘅電影, 雖然呢一齣冇乜大場面, 亦都冇乜嚇你一餐嘅一幕, 但係勝在一氣呵成冇冷場, 覺得頗精彩囉.. 定係我太耐冇去睇戲啊?? anyway, 嚟緊暑假好似有兩三部同樣類型嘅電影, 好期待, 我覺得應該會捧場.. 哈哈..故事大綱: 孿生兄弟Jared和Simon隨母親和姊姊Mallory遷入一間荒廢多時的古老大屋, 當晚即發生連串怪事, 把三姊弟嚇破膽.. 後來Jared無意中發現一本神秘的魔怪書, 當中記載無數令人匪夷所思的魔怪檔案, 令佢大開眼界.. 魔怪書卻惹來大魔怪Mulgarath的垂涎, 希望藉著得到書中的奧秘, 統治魔幻世界!! Mulgarath對三人軟硬兼施--恫嚇, 綁架, 利誘等無所不用其極.. Mulgarath的大軍步步逼近, 在月夜之下, 連保護魔怪書的最後防線(防護結界)也被侵破.. 佢哋三姊弟孤立無援, 為救自己, 同時也為保護魔幻世界的存亡, 三人只好和露出獠牙利爪的魔獸軍團, 在淒冷無人的晚上展開殊死一戰..

12.04.2008 | 台灣小食

頭先同友人去咗間叫做《台灣小食》嘅台灣小食連鎖店食飯.. 如果平時我自己經過呢間嘢, 我唔會有好感入去, 因為覺得個店名實在太冇誠意太過求其囉, 哈哈.. 今日就叫做有人作伴, 見餐牌上啲食物都唔錯, 就姑且入去試一試啦..
我哋叫咗砂煲紅燒牛肉河粉, 鹽酥雞飯, 窩貼, 而我自己杯嘢飲就要咗冰凍怡神嘅酸梅沙冰喇.. 整體上嚟講算係OK啦, 冇乜特別又唔會係難吃嗰隻囉.. 冇乜特別嘅comments要畀喎, 當係簡簡單單普普通通咁嘅一餐囉.. 如要嫌棄就係窩貼做得唔好.. 不過咧, 杯酸梅沙冰卻又頗得我歡心噃, 用足料而且誠意拳拳一大杯, 一啖一啖飲落口確係refreshing噃.. 埋單一共48蚊, 好似有啲貴.. 其實餐牌上仲有好多凍飲, 花多眼亂我好鬼想去試勻晒佢, 下次可以考慮淨係去坐低飲嘢, 呵呵呵~~

11.04.2008 | 馬式廣東話

記得同某位香港朋友傾過偈, 佢話羨慕我哋馬來西亞人識得講多種語言, 好叻.. 而我就話, 我哋的確係識得講多種語言, 不過就係冇樣精.. 因為有太多語言嘅環境之下, 就變成各種語言互相influence, 開口可能係好impressive, 不過講耐咗就開始發現有令人聽唔明嘅地方.. 用廣東話舉個例, 以下用詞係友人覺得好搞笑嘅(其實仲有好多, 一時醒唔起)..

落大水	落大雨
沙媽幾多戾	總共幾多錢
書館	學校
罩弓蕉	炸香蕉
千猜	是但
愛冇?	要唔要?
水草	飲管
馬打僚	警察局
啦啦	蜆
巴殺	街市
嗲冰	凍奶茶

10.04.2008 | Google名字搜索

頭先無無聊聊咁, 喺google個search bar入邊打咗自己個名, 跟住一click個search button, 即刻搜索到137個結果(個名要用" "包住, 咁搜索出嚟先算準確).. 嘩, 原來我個名係如此普通不過架?? 等我仲以為好獨一無二添, 哈哈..

好奇心驅使之下, 我差唔多每個link都click落去睇睇, 真係好想知道究竟係邊位仁兄與我同名.. 冇花冇假噃, 當中真係有幾個同我完全冇關係嘅人, 都幾有趣囉.. 而其中小部份確實係與本人有關嘅(譬如friendster啦, blogger啦, 友人blog鏈接啦)..

各位與我同名同姓而又素未謀面嘅朋友, 能夠同名同姓確實係一種緣, 喺度同大家打個招呼先..

09.04.2008 | 生活隨想

呢幅砌咗咁多顏色嘅圖, 係我頭先用最原始最簡單嘅方法整出嚟嘅.. 用MS Word畫個table, 然後再逐個格加shading..彩色繽紛嘅格仔之中, 有一排係灰暗無色嘅, 而代表在下嘅SK0617字樣, 就只有填滿呢一行灰暗格仔, 而其他彩色格仔就留空喇.. 大家知唔知道我想表達啲咩啊?? 其實係忽然間覺得自己生活枯燥乏味, 灰暗格仔裡嘅SK0617代表困于苦悶中嘅自己, 渴望有日可以活得好似其他彩色格仔般繽紛燦爛+精彩絕論.. 公元2008年第100日, 這就是在下今日嘅生活隨想喇~~

08.04.2008 | 天下無不散之筵席

今日係同事「嬌拔」嘅last day.. 喺呢間公司做咗咁耐, 除咗眼見一個個新人陸續入嚟, 今日真係第一次experience有同事離開.. 其實之前都有幾單囉, 只不過我當時被派去外地工作啫.. 之不過都好來好往啦, 冇乜唔開心嘅事情發生, 話晒一場同事, 如果有更好嘅前途等住佢去行嘅話, 都應該祝福佢嘅.. 我哋預備咗張超級巨型farewell card畀佢, 裡頭每人貼張靚相等佢永遠記得我哋個嘜樣, 跟住每人寫返啲嘢等佢感動吓, 好靚架.. 放咗工, 全體同事落K唱歌輕鬆吓, 就當係個farewell party啦.. 天下無不散之筵席, 係度希望嬌拔佢前途似錦, 得閑返嚟探吓我哋呢班舊同事啦.. 再見~~

07.04.2008 | 營養成份

Nutritional Facts Information
(based on [SK/0617])
能量 .............................................................. 1,977kJ
超級飽和脂肪 .................................................. 50kg
蛋白質 ........................................................... 20kg
天馬行空創作力 ............................................... 265.38g
忍耐力+意志力 ................................................ 0.46cc
情感豐富指數 .................................................. 6,820ml
熱情引爆 ........................................................ 341°F
義無反顧愛朋友 .............................................. 109kCal
對事對人認真態度 ............................................ 1,308.2cc
冰雪聰明+話頭醒尾 .......................................... 4,829cm
執著x堅持 ....................................................... 39.67kg
自我保護 ......................................................... 241.7°
冷血酷情 ......................................................... 0.001μm
隨和可親 ......................................................... 288.64W
不可一世架子 ................................................... trace
自知之明÷自信心 .............................................. 2,046mph
心思細密 ......................................................... 283.97GB
敏感+神經質 .................................................... 58MHz

06.04.2008 | 睇咗兩齣戲

週末兩日連續睇咗兩齣戲, 因為實在係有段好耐時間冇去睇過戲喇, 對上一次應該係個幾兩個月前嘅事, 有啲久旱逢甘露嘅感覺, 哈哈.. 睇咗以下呢兩齣戲: Nim's Island同埋The Water Horse, 兩齣戲基本上都係同一策路線, 就係以小朋友為中心, 用上大量CG, 描述佢哋同大自然生物嘅一段故事.. 覺得OK啦, 因為係老少咸宜, 戲中冇奸到出汁嘅大壞蛋, 所以都睇得好開心囉..
《Nim's Island》根據Wendy Orr and Kerry Millard暢銷小說改編而成的傳奇冒險故事, 有一個小島叫「尼魔島」，在這裡住著一個愛幻想的小女孩，唯一陪伴她的是科學家父親和她最愛的小說，小女孩依據這本冒險小說建構自己的幻想世界，但撰寫這部冒險奇幻小說的作家卻是住在城市裡，對鄉村和機械以外一竅不通的城市人，某天奇妙的事情發生了，小女孩的父親失蹤了，小女孩找上了作家，他們是否能在神奇的尼魔島上找回父親呢？

《The Water Horse》係Walden Media繼《Narnia》後又一特效鉅獻，故事改編自全球知名的蘇格蘭尼斯湖傳奇，劇情描述一名寂寞的小男孩意外撿到一顆蛋，而蛋中卻孵出一隻前所未見的奇怪生物！在這個新朋友的帶領下小男孩展開了一連串奇幻刺激的冒險，然而，嚴肅的大人們卻認為這隻來路不明，長相特異又日益巨大的「怪物」會對人群造成威脅，而想盡辦法要處置這隻水中怪物…

05.04.2008 | Pastamania意粉狂

感覺上好似好耐都冇出過街囉, 今日終於唔駛暱埋屋企咪書, 可以同朋友去睇戲食飯.. 睇咗咩戲我唔講喇, 因為係是但揀一齣就時間嘅戲嚟睇嘅.. 咁睇完戲, 行勻晒成個shopping mall, 最後決定試吓呢間叫做PastaMania嘅意大利餐廳, 唔係你想象中嗰高級意大利餐廳, 只不過間專賣pasta同pizza嘅連鎖餐廳啫..
揀咗一個中型sesame coriander chicken pizza同埋一份vege mania linguine, 同朋友share share食.. 雖然未去到100%意大利風味, 但係味道卻係幾唔錯噃.. pasta可以自己揀要邊一種, 煮得尚好啦, 係我中意嗰個硬度, 配料係全部蔬菜係茄醬base, 食咗唔會漏.. pizza我就覺得整到幾好囉, sesame coriander chicken個味道好特別, 最重要係即叫即整, 保證新鮮滾熱辣.. 埋單連嘢飲一共RM40, 唔平亦唔貴囉, 可以考慮再去試吓餐牌上其他pasta同pizza..

04.04.2008 | 那一刻

今日與同事講返起噚日考試嘅經歷, 仍然好記得從電腦屏幕上獲知自己pass咗考試嗰一刻.. 毫無期望兼且打定輸數嘅情況之下, 結果很意外地, 很出乎意料地得到一個開心結果.. 當時嘅心情, 我覺得有啲似以下呢幾位美麗嘅朋友, 嗰一刻嗰一種"i can't believe it"嘅感覺-- one moment in time~~

03.04.2008 | 喜訊一則

寫完呢個post, 發現自己實在係興奮得長篇大論, 所以特別返去開頭加插呢三行"摘要".. 其實係想話畀大家知: 我頭先已經PASS咗個PMP喇!! 願同所有關心我嘅朋友開心報個喜訊.. 多謝大家一路支持!!

**************************************************************

如果仲有興趣知道一切來龍去脈, 可以繼續睇落去, 無任歡迎架..

**************************************************************

呢一個半星期內地獄式地啃書, 今日卒之赴考場決定生死喇.. 早兩日做習題時候, 發現自己真係未ready, 所以完全冇晒信心, 今日真係抱住沉重而忐忑嘅心情去考試囉.. 登記手續完畢, 進入考場, 開始為時4小時嘅考試.. 嘩嘩嘩, 開始幾題我就已經唔確定喇, 駛唔駛咁難啊?? 今日個考試真係擊中我個死穴囉, 全部都係嗰啲"what is the best thing to do", "what should be done next", 我嘅強項(計算題, 定義題等)反而唔超過10%.. 真係越做個心就係越噗噗噗噗咁跳囉.. 個心已經覺得, 呢次一定肥硬啦..

四個小時完畢, 可以答晒全部問題, 但係未夠時間review之前marked for review嘅題目.. 彈咗有個"Times Up"嘅message box出嚟, click OK之後熒幕忽然間一片空白, 我即刻瞇埋眼唔咁睇.. 10秒鐘過後鼓起勇氣睜開眼, 一睇竟然係問卷調查, 我頂!! 做完問卷調查後, 熒幕再次一片空白, 我又再次瞇埋眼唔咁睇, 當時個心跳可以去到每分鐘200架真係.. 再一個10秒鐘之後, 深呼吸決定擘大眼接受殘酷嘅事實.. 熒幕上竟然出現"CONGRATULATIONS for passing the PMP exam..." 字樣喎!! 唔係啊嘛?? 再睇清楚啲, 我好意外囉, 我真係pass咗?? oh, i really can't believe it!!

真係毫無期望之下畀我考到, 當時係咁打電話畀朋友報喜, 其實個腦袋係空白一片囉, 除咗打電話唔知道要做乜好(可能4個小時後亦都好虛脫).. 真係架, 大概半個小時過後先會過神嚟, 我真係pass咗啊.. 當時先開始覺得好興奮囉, 呢幾日心機總算冇白費到, US$555都唔駛見財化水.. 好耐都冇呢種心情喇, 依稀記得當初考到車牌, 大學考到一等文憑, 搵到新工都會有呢種興奮心情囉, 需要少少時間去平伏嘅~~ 啊, 仲有之前答應一啲人嘅飯局, 讀完書考完試, 係時候適宜地慶祝一番咯, 呵呵呵!!

02.04.2008 | 冇信心

聽日考PMP, 噚日開始請假喺屋企咪書, 臨考試前兩日plan咗專攻做模擬考題.. 本來以為上個週末魔鬼式啃讀, cover晒所有topic應該就不成問題.. 但係原來唔係我想得咁理想嘅一回事噃!! 啲模擬考題唔係考你讀得幾多, 而係考你點樣會運用你所知嘅knowledge -- it's all about understanding and not memorisation (後者先係我強項吖嘛).. 考試著重好多situational case, 問你邊一個答案係最適合或者最正確.. 我都答錯晒, 因為覺得啲答案全部好接近, 而且模菱兩可, 而且一向嘅common sense practice未必係啱噃.. 而家覺得好徬徨好冇信心, 覺得自己其實仲未ready, ready去exam不過未ready可以一take過pass.. 一共200個multiple choice其中25題係唔計分嘅, 合格率係81%, 即係175個問題要答啱141題, 要求set得好鬼高囉覺得.. 唉, 都係打定輸數, 唔好期望咁多喇..係好肉赤個US$555考試費, 仲有從頭再嚟嗰種筋疲力盡囉講真..

01.04.2008 | 永遠懷念的..

哥哥逝世5週年, 相信好多人都唔會記得今日係愚人節.. 頭先見到報紙娛樂版, 話有個歌迷於youtube放咗個video紀念呢一日, 收集全球401位(留意呢個數目嘅意義)哥哥歌迷嘅感言同祝福, 覺得好有意思.. 於是就上youtube網站去search一search, 果然就見到以下呢個video喇..

一追再追, 追蹤一些生活最基本需要, 原來早不缺少, 有了你, 即使沈睡了, 也在笑..