31.01.2008 | 生日蛋糕

噚晚一班朋友為友人小娜預祝生日, 事先就同小春夾定要送上驚喜生日蛋糕, 等個壽星婆可以許願吹蠟燭.. 原本見個餐牌上有數款蛋糕, 而且就係我哋理想中嘅一人份size, 不過落柯打時個侍應話一早買晒, 非常失望.. 於是得佢提點, 可以去出便間蛋糕店買入嚟, 佢仲好可愛咁話: 「呢, 咪就係隔間店之嘛」.. 哪哪臨同小春過去睇吓, 結果真係有間蛋糕店, 入去仲見到好多款一人份size蛋糕, 於是一口氣要咗三個, chocolate mud, mango dome同埋honey peach praline..
其實我中意咁樣買幾款蛋糕架, 一嚟蛋糕係唔會食得落太多(因為人老喇, 又驚肥喎), 每次買大蛋糕, 到最後必定淨低一半以上, 呢個迫嗰個迫都冇人肯食多件.. 二嚟唔駛獨孤一味, 拎住支羹就咁撩嚟食, 可以每樣口味都試啲咁.. 覺得今次買三個蛋糕仔, 每個都插支小蠟燭, 好的色咁, 而且一字排開要壽星婆無敵掌門人咁吹蠟燭, 的確好開心.. 哪哪哪, 大家讀過呢個post之後, 就好銘記於心我生日中意咩款蛋糕喇, 呵呵呵!!

30.01.2008 | 官人x代娘

今晚同幾個好耐冇見嘅朋友一齊去食飯, 一棚六個人(1位官人攜帶5位代娘) 去咗呢個位於Pavilion叫做「代官山」嘅餐廳, 係間中式fusion餐廳, 發跡於台北, 跟住進駐上海北京同吉隆坡.. 友人見報章上刊登七五折優惠卷, 剪低後提議去試試..

內部裝璜不過不失, 餐牌就頗見心思(可能係一般台式餐廳嘅作風), 食物選擇唔多但係每樣都有靚相參考, 食物分門別類而且啲餸名唔玩刁轉, 所以點菜過程好順利.. 上菜時, 啲餸同餐牌上啲相絲毫唔覺有咩出入, 講到呢樣嘢喇喎, 我一定會加印象分..
點咗(上邊組圖順序左至右上直下) 黃金薯泥, 椒鹽花枝, 綠茶飲品, 梅子蜂蜜醋飲, 培根高麗菜, 黃金滑豆腐, 廚師蘑菇, 蘆筍百合, 松子辣雞, 竹網香魚, 獅子頭, 抹茶雪糕紅豆刨冰.. 黃金薯泥非常好食個人好中意, 培根高麗菜清甜爽口幾唔錯, 不過獅子頭肉質好鞋, 竹網香魚肉質好綿, 唔多中意, 其他就覺得還好.. 原本點咗焗田螺同埋奶油菠菜, 不過個部長先後隔咗成5分鐘過先至行過嚟話賣晒, 呢度扣分..

食吓傾吓, 開開心心咁都坐咗兩個幾小時, 埋單總共約230蚊, 遞上優惠卷折得嚟約180蚊, 都幾平.. 環境舒適, 食物衛生, 味道幾好, 服務好唔錯, 有啲偏向fine dining嘅嘗試, 可以抱著一般期望去試一試..

29.01.2008 | 效率:激進版

今朝唔知點解冇啦啦同兩位同事講起肉乾, 講講吓不知不覺間我拎噚日朋友托我買嘅肉乾出嚟同大家研究.. 忽然間發覺原來有張sticker癡喺個包裝上, 仔細一睇, 個expiry date竟然係2月6號, 新年前啊!! 死喇, 到時帶過去畀朋友, 話佢知新年前一定要攪掂呢幾包嘢, 咪實畀佢鏟死?? 於是即刻喺袋度搵到電話, 火速打過去問究竟可以頂幾耐.. 個事頭婆答話10日度, 咁豈不是過年前?? 好彩佢都頗好人仕, 叫我今日之內拎晒全部去換返啲真空包裝嘅, 咁就可以頂一個月捱到元宵都冇問題啦.. 聽到佢咁講之後, 真係要鍚晒事頭婆啊~~

於是趁食晏時間(係啊又係食晏時間啊), 以九秒九速度飛奔過去間店, 同個伙計講要換, 二話不說即刻拎返相同數量嘅真空包裝版過我, at no extra charge.. 前後都唔駕駛幾分鐘我就滿懷安心咁步出間肉乾店喇.. 返到公司都應該只係半個小時之後, 同事見到我, 個個O大個嘴, 果然離奇地迅速囉.. 原本仲諗住同位朋友一人啃一半嘅, 而家唔駛啦, 佢可以安心收貨, 我可以開心同佢收返錢喇喂.. 呢兩日買肉乾, 真係睇得出我嘅效率啊, 哈哈..

28.01.2008 | 效率

呢個週末有位新加坡同事請飲, 再加上有幾位友人一早講好去新加坡會合, 本來因為近過年所以費事喺非常時期出阜, 但最終都係難擋誠意拳拳嘅同事及友人, 決定豁達赴約.. 在下早知新年期間離城車票極需提早購買, 但係因為某些原因, 遲至今朝先500%肯定需要自己搭長途巴士南下, 所以今日食晏時間, 第一時間撲去買車飛..

一路上不知幾咁擔心買唔到車飛, 個心一直囉囉攣, 不過好彩得上天眷顧, 冇乜阻濟之下順利購得理想時間車票, 頓時放下心頭大石.. 過後心情輕鬆, 仲幫友人順便買埋馳名中外嘅肉乾帶過去畀佢過肥年.. 買完肉乾見沿路上有檔燒臘睇落好正, 於是就就地解決午餐, 叉燒白切雞食得好滋味.. 最後仲有啲時間, 順手揀埋幾粒蘋果買返公司.. 結果剛剛好一個小時之後返到公司, 覺得自己似乎好有效率咁, 短短一個小時食飯時間, 竟然可以去做咁多嘢而且仲係一揪二楞咁返嚟.. 嘩, 勁啊~~

27.01.2008 | 過年買新衫

過年買新衫辦年貨好似係華人必定習俗, 所以農曆新年即將來臨, 各商場都必定會嚟個貨物大減價, 食住呢個勢嚟刺激銷售大賺一筆.. 呢個週末同一位友人大戰商場, 一路上都遇到朋友同事, 可見呢個習俗已經係深入民心.. 雖然話係大戰商場, 但係好多時候都係空手而歸, 見到商場內每一個男女老幼都可以一揪二楞滿載而歸咁, 除咗羨慕佢哋之外, 其實係更加好奇點解人哋可以買到心水嘢但係自己買唔到?? 我覺得自己同友人有以下呢幾個「弱點」, 所以先造成購物經常落空..

1. 見到人多就一定走而避之, 因為代表啲衫好多人買, 到時週街撞衫機會好大
2. 顧客排晒大隊等試身等畀錢, 唔耐煩中途離隊放棄
3. 勁hit而且又價錢大眾化嘅牌子, 可以過濾或者擺喺lowest priority後備位置
4. 大減價貨物多數都過晒時, 睇啱嘅又通常係新貨冇折, 覺得大減價期間買冇折貨品好似好折墮
5. 行兩行冇收穫好失望, 再畀週圍滿載而歸嘅人雙重打擊, 變得更加心灰意冷
6. 最頭痛問題: 見到啱晒心水嘅, 結果一著上身, 個剪裁攪到週身肉滕滕, 大受刺激之下憤而離開

不過今日都算有啲成績, 某個名牌牌子折完再折, 我哋都樂得奉獻真銀, 結果兩人都成功地買到一人一袋衫, 總算有收穫..

26.01.2008 | 天氣這麼熱

最近天氣真係頗熱, 白天太陽勁猛烈, 夜晚瞓覺開大風扇都仲會汗流浹背.. 應該係就快過年嘅關係, 因為印象中過年前後嘅天氣都係會好乾燥酷熱, 可以晒出靚靚臘味吖嘛.. 最近各大商場順應農曆新年來臨, 齊齊嚟個大減價酬賓應節, 於是一間商場趕去另一間商場時, 原本享受開得橫橫聲嘅冷氣, 一出到門口即刻忍受唔住酷熱天氣同猛烈太陽, 猶如唔見得光咁.. 我記得我應該唔係咁怕曬嘅人嚟架噃, 唔通真係人老咗, 好似啲阿伯阿嬋咁曬得耐就見暈?? 白天大熱, 到夜晚啲熱氣都仲未消散, 唔想開冷氣因為會令空氣更乾燥, 喉嚨會好唔舒服, 所以開大風扇免不了, 但係仍然都會覺得熱噃.. 白天怕曬, 夜晚又怕熱, 真係好可悲..

25.01.2008 | 年~~又過年...

每一年當麥當當推出捲土重來嘅發財漢堡包(Prosperity Burger)之時, 就表示農曆新年就快到喇.. 其實個人非常好奇點解一年到尾咁多節日佢都唔推出任何應節產品, 就係唯獨農曆新年就一定唔會miss咗個發財漢堡包同埋個旋風薯條(Twister Fries).. 先嚟個牛肉漢堡餅, 跟住就壓軸推出雞肉漢堡餅, 套餐跟個旋風薯條, 再嚟個每年搞搞新意思嘅飲品或甜品, 今年係發財綠茶同埋紅豆新地..
可能係我哋華人中意講求意頭, 所以發財套餐出擊, 必能贏取眾多顧客捧場.. 在下早幾日食過, 不過就唔係貪好意頭, 而係想有唔同口味(唔駛次次都巨無霸, 麥香雞啦)啫.. 不過發現今年個雞肉漢堡包有啲唔同, 將青椒轉做洋蔥而且黑椒汁好似比以前辣上五倍, 所以覺得麻麻地啱我口味.. 食過發財漢堡包, 就祝你恭喜發大財喇!!!

24.01.2008 | 500的聯想

500呢個數目字, 令你聯想到啲乜嘢咧??
我第一個聯想到嘅係500蚊
我第二個聯想到嘅係台灣搖滾鼻祖歌手「個北」
我第三個聯想到嘅係500毫升細支裝礦泉水

突然間好有成就感, 好開心, 覺得自己好叻, 寫blog可以沖破500大關, 計計吓都用咗成兩年時間去累積.. 下一個目標係750.. 加油!!

500提醒你知.. 您正在閱讀本部落格嘅第500發貼..

23.01.2008 | 一擲千金??

友人之前send咗個游戲過嚟, 都幾有趣架, 就係曾經熱爆全城嘅Deal or No Deal一擲千金喇.. 唔知邊位仁兄咁犀利可以將個game show電子化擺入excel入邊, 直頭就係正式游戲節目嘅玩法, 雖然就冇晒主持同啲持喼美女, 但係都真係頗好玩, 個緊張程度絕對唔輸蝕真人show架..

頭先得閑冇乜嘢做, 又再開返個excel出嚟玩, 今次真係幾刺激, 因為我一路拒絕莊稼嘅offer, 到最後一秒都堅持玩落去, 結果真係畀我抽中咗個一百萬喼(哪哪哪, 有圖為證架).. 即刻好興奮咁「嘩」一聲.. 不過係當游戲咁玩啫, 又唔係真嘅, 如果真係可以畀我中到一百萬就好咯.. 算吧啦, 自己知自己事, 在下一路以來都係冇橫財運行架喇, 人生短短幾十年, 咪當係發吓夢畀自己開心啲囉..

22.01.2008 | 唔應該係咁...

每年大寶森節(即係印度教徒有神靈附身, 可以毫無痛楚咁任鋼枝穿身體嘅Thaipusam節)前夕, 我都有個恐懼, 就係搭輕鐵返屋企嗰一刻.. 因為我屋企靠近大寶森節印度教徒朝聖聖地, 所以每年都一定係全城印度教徒傾巢而出去朝聖, 而輕鐵就順勢變成主要交通工具喇..

仍然好記得每次車廂都擠滿印度人, 我一人被四面八方印度同胞所包抄, 一眼望過去全部咁上下嘅黑髮濃眉勁粗二撇雞look, 如雷貫耳嘅係一種勁卷脷先可以講得到嘅陌生語言, 呼吸嘅係陣陣椰花油混合茉莉花嘅騎哩味道.. 我每次都同友人話我當時係印度洋中嘅一個孤島breathing indians in the train.. 個情景你可以想像到嘅話, 係超搞笑囉..

不過好奇怪, 今年竟然完完全全徹徹底底咁冇呢個情況發生, 真係嗤嗤稱奇啊!! 今年大寶森節列為吉隆坡假期, 前夕搭輕鐵返屋企又竟然同平日無異.. 真係唔應該咁架噃...

21.01.2008 | 額外假期

今朝買早餐嘅時候, 個檔主問我禮拜三係唔係假期.. 禮拜三係印族興都教徒嘅大寶森節, 一向來都唔係全國性公共假期, 係得幾個州先有假放啫, 所以我好肯定地回答佢「吉隆坡返工嘅冇假放架」.. 但係佢又好懶好奇咁話「今日報章頭條話係喎!!」.. 我頂, 既然你連頭條新聞都睇咗, 仲嚟問我把鬼啊?? 不過其實都好多謝佢話我知, 於是就懷著半信半疑嘅心情返工喇.. 返到去即刻收到同事MY嘅電郵, 好officially咁話明禮拜三係公共假期.. 嘩嘩嘩!! 好興奮啊, 於是又即刻大聲嗌過對面位問MY係唔係堅料啊?? 佢叫我自己睇報紙, 親眼一睇之後, 「首相昨晚宣佈, 大寶森節2008年起將被列為吉隆坡假期」, 半信半疑嘅心情即刻變成心花怒放, 雖然係middle of the week, 不過額外假期好過冇啦, 可以唔駛返工趁機抖抖..

印族同胞苦等十年嚟嘅上訴, 守得雲開今日終於得值喇, 唔知係唔係上個月黑風洞示威事件所帶嚟嘅其中一個成果咧?? 點都好啦, 拉伯呢個順水推舟嘅決定, 的確係普天同樂啦.. 其實華人社團都要求過中秋節列為公共假期架, 唔知命運如何咧?? 多元種族國家, 係應該多啲假放架啦係咪??

20.01.2008 | 卡+用戶名稱+密碼

友人小年講得好啱啊, 而家啲人真係擁有好多不同種類嘅卡.. 其實我話現代人有三多, 就係卡多, 用戶名稱多, 密碼多..

• 卡多: 信用卡, 提款卡, 保健卡, 身份證, 會員卡, 泊車位月票卡, 一觸通卡, 折扣卡, access卡..
• 用戶名稱多: 公司網絡登入, 各種application登入, 電郵戶口, 網誌戶口, 網上相簿戶口, 網上理財戶口, 網上購物戶口, 網上會員戶口登入..
• 密碼多: 以上多種卡同埋用戶名稱, 都必定有個配對嘅密碼..

其實真係太多喇, 有時真係會唔記得自己個用戶名稱同埋個密碼架.. 以前係咁立亂create, 攪到而家七國鬼咁亂.. 而家開始學精喇, 但凡有咩新嘅用戶名稱同埋個密碼, 一定要用返平時用開嗰幾個, 費事到時自己亂啊.. 其實最好一個用戶名稱一個密碼走天涯啦, 但係因為各戶口有唔同security policy, 所以又好難可以顧全嘅, 唯有靠自己個腦可以裝多啲啦..

19.01.2008 | 失魂

今日喺家樂福買咗啲嘢, 於是趁轉車之便, 就上公司擺低.. 公司道玻璃門係需要用access card啲啲個security lock嘅, 入到去好順手咁將張card一嘢揼喺檯面.. 結果擺完嘢鬆人, 去到車站需要月票之時, 先察覺原來我啲月票, gym會員證, 一觸通卡原來同公司張access card全部一齊漏咗喺公司.. 頂!! 咁點啊?? 今日冇返工, 公司入邊又冇人, 我又冇咗張access card, 係入唔到去架噃.. 真係大懵兼失魂喇, 一定係因為噚晚畀個朋友激親, 攪到我成日心情欠佳.. 死啦, 如果要等到禮拜一返工先可以拎返, 冇月票就需要另外洗錢搭車, 冇gym會員卡聽日就冇得去gym上跳舞class, 慘絕人寰啊.. 頭腦清醒過後, 突然間醒起同事HL咪就係住我附近之嘛, 所以頭先啱啱同佢借咗佢張卡, 聽朝去gym前順便剷上公司拎返晒所有卡先.. 事成, 冰告(bingo)!!

18.01.2008 | 樂也融融燒烤會

前日全體同事好即興咁決定今晚去MY新居搞燒烤, 今次應該係全體同事第一次一齊燒嘢食, 所以萬分期待.. 結果攪到MY煞時間陷於高度戒備之中, 週圍問大家關於食物方面意見.. 不過佢係得喎, 短短時間就可以將個燒烤會計劃得嗒嗒掂.. 今日下晝, 全體同事(除咗又係佢!!)就準時收工, 分兩批移師MY間共管式公寓, 在下那批去到, 萬分感激GC經已起好個爐隨時可以開始燒嘢食喇!!
都係燒埋啲例牌嘢啦(雞翼, 腸仔, 粟米, 雞丸, 番薯, bacon, 羊扒, 菌類蔬菜), 加埋MY私人報效米粉咖哩雞, 我哋同事間女將佔近七成, 所以儘量準備少啲嘢, 不過到最後都係碟碟有餘.. [MY: 係喇係喇, 都係你預算準確喇, 唔好再一味啫住我啦..] 燒吓燒吓, 好似燒好啲嘢堆喺檯面越積越多, 真係請都冇人願意再食添.. 好彩時候都唔早, 唔係嘅話玩游戲輸咗罰食嘢都真係慘絕人寰啊嚇, 哈哈.. 收拾之後上MY新居飯後果, 散band之前, 大家嚟個大合照, 又係一次樂也融融同樂聚會喇.. MY, 今次任務, 成功!!

17.01.2008 | 信用卡積分禮物

用咗咁多年信用卡, 儲咗咁多積分, 今次都係第一次兌換禮物.. 平時都係懶得做呢啲瑣碎嘢, 不過啲積分就expired, 所以迫不得己兌換啲嘢返嚟.. 左揀右揀, 中意嘅又唔夠分, 夠分嘅又唔中意, 而且仲要加埋僅僅夠用埋啲expiring積分, 其實都好傷腦筋..
limited choices情況之下, 結果揀咗50毫升香水一支仲有積分淨, 求其搭多個黑色皮革cardholder.. 三個星期前上網redeem, 放完假後都冇咗件事, 結果嗰日病完返工, 見到兩袋速遞先醒起.. 食咗我三萬幾積分, 算係咁啦呵??

16.01.2008 | 星巴克Planner

早前喪飲星巴克冰鎮檸檬綠茶hand shaken iced lemon zen tea, [唔好奇怪點解飲星巴克唔飲咖啡而係飲茶, 因為我唔係太喜歡咖啡, 查實星巴克原名Starbucks Coffee & Tea, 所以都唔好忽略咗茶啊].. 就係為咗儲積分換取呢個精美限量版Starbucks 2008 Planner, 喺短短個幾月內飲咗十幾杯嘢同埋一份三文治, 對於一個唔係擁躉嘅我, 算係做出件罕見事情.. 計返條數, 一杯嘢起碼十蚊, 咁我換取呢個Planner應該都大洗百幾大元?? 好傻哦呵??
噚日換取期間最後一日, 咁啱又請咗病假, 所以托同事幫手去換取.. 今朝返工見佢擺喺我張檯, 好期待咁拆開嚟睇吓, 揭揭內頁, 真係好印刷得好精美囉, 總算冇remind我其實係用咗好多血汗錢嚟換佢返嚟.. 我諗本嘢都係擺喺度留念多架喇, 一來我都唔用planner, 二來咁鬼精美點樣捨得畫花佢吖?? 唉, 出年情願換取啲咖啡杯呢啲實用嘢好過喇..

15.01.2008 | 持續: 肚屙腹瀉

果真係08年第一單時運低事件, 上個禮拜六開始肚屙腹瀉, 竟然持續到今日, 足足四日咁多!! 噚日下晝進入高峰, 可能係朝早慣性地飲牛奶食乳酪, 所以攪到個腹瀉變本加厲, 差唔多每隔一小時就上廁所一次, 而且噚日下晝又book咗時間每個小時同每個同事做performance review, 所以當時出出入入會議室同廁所, 時間都真係非常緊張(好攪笑啊!!)..

今朝終於頂唔順去睇醫生, 話佢知已經持續第四日, 佢都嚇親吓.. 於是叫佢開劑勁啲嘅藥畀我, 跟住拎咗日病假好好地咁留喺屋子休息.. 不過覺得啲藥都係麻麻地咋喎, 仍然都係一有食親嘢就需要上廁所, 不過情況當然比噚日好好多啦.. 希望聽日完完全全康復啦, 持續屙咁耐都驚啦.. 醫生話未來幾日都需要戒口, 乳製品, 油膩嘢, 辛辣嘢一律唔食得.. 咦, 要戒口, 真係好可憐噃.. 不過往好方面諗, 可唔可以幫助到我減肥咧?? 嘿嘿~~

14.01.2008 | 點樣砌圖?

好多寫blog嘅朋友都走嚟問我, 點樣可以好似我啲blog咁將啲相片排到靚靚.. 因為佢哋千試萬試永遠都係個blogger自己同佢哋排成一條直線落嚟.. 我就係唔中意咁樣, 因為佔太大篇幅, 又懶得自己動手去edit佢個HTML, 所以就自己先攪掂啲相, 再一次過post晒上去.. 其實好簡單嘅, 唔駛用到Photoshop呢啲高檔嘢, 就係靠個Word同埋Paint就可以做成我啲blog咁嘅效果架喇.. 喺度同大家分享心得啦..

• 將所有要擺上去啲相一嘢copy入個Word度
• 跟住隨你心意resize and rearrange啲相
• 完成之後Print Screen, 跟住Ctrl+V(即係Paste咁解) 落個Paint度
• 用Paint入邊個Cutting Tool 將啲相剪出嚟
• 將剪出嚟啲相save成jpg檔案, 最後簡單容易地post上blogger
• 再繼續寫啲嘢, 一個圖文並茂嘅blog就大公告成喇~~

13.01.2008 | 愛心朱古力

最近靠裙帶關係認識咗一位朋友, 閑談間知道佢係喺間朱古力廠入邊做嘢嘅, 不過唔係生產部, 而係R&D部門, 好有趣, 連朱古力都可以做R&D?? 結果佢略略介紹佢份工作, 其實同其他行業R&D差唔多, 就係負責研究啲朱古力口味.. 於是我就多口問聲佢咪成日試食朱古力食到怕?? 咁佢話其實唔係齋食嘅, 都有負責整朱古力sample架.. 嘩!! 真係點中我好奇之穴, 佢識得整朱古力架噃!! 我開玩笑咁話, 咁搵日要試吓佢手勢喇, 結果佢話冇問題, 噚日見面仲真係送咗帶親手整嘅朱古力過我.. 好感動啊~~
佢真係好有心, 整好多款朱古力而且仲包裝得好精緻, 最感動就係仲用冰袋包得好好, 用個靚帶裝住送畀我.. 打開一睇, 粒粒朱古力都整得好靚, 有多種口味, 試完一粒就想試第二粒.. 嗰種入口即溶嘅感覺好幸福, 真係感激不盡啊, 多謝晒你啊, 朋友~~

12.01.2008 | 肚屙腹瀉

噚晚同朋友出去飲嘢都唔知食錯咗啲乜嘢, 半夜瞓瞓吓覺突然覺得個肚唔舒服, 於是就去廁所, 結果成晚斷斷續續一共去咗五次, 冇覺好瞓.. 結果經過成晚大清腸胃又冇覺好瞓之後, 成個人變得軟賴賴咁冇晒精力.. 因為腹瀉攪到腸胃唔functioning, 冇辦法吸收營養, 而且屙晒啲嘢出嚟, 覺得個肚空空咁, 想食啲嘢但係又冇胃口.. 個肚好唔容易靜止落嚟, 但係食咗嘢之後就又再嚟屙過喇.. 真係好慘啊!! 冇辦法之下, 唯有啪兩粒止屙丸落肚, 雖然見效, 但係個感覺係非常之唔好架, 因為即刻變做便秘, 個肚覺得陰陰痛但係就屙唔出, 憋住憋住咁, 好辛苦.. 真係病從口入, 下次有乜病痛嘅話, 都唔好high中肚屙腹瀉喇真係..

11.01.2008 | Super三部曲

多年前喺大馬參加歌唱比賽出道成為一碟歌手, 曾經被批評醜樣而被拒絕於唱片公司門外, 沉寂咗好耐好耐後由台灣重新出發, 而家總算打出自己一片天下.. 以前年幼未聽過佢呢個一碟歌手唱歌, 兩年前一首《Superwoman》大展歌唱實力, 平地一聲砲咁攻陷全球華語樂壇.. 從此對佢留下深刻印象, 張張專輯都令人拍案叫絕, 由Superwoman到Superman到最近剛發行嘅最新大碟Super Sunshine, 好亮麗地打出Super三部曲嘅強勢.. 心血來潮, 逐一未大家介紹佢呢三張專輯吧啦, 佢就係曹格..

	2006初《格格Blue》曲目: Super Woman / 世界唯一的你 / 姑娘 / 情人節快樂 / Fall In Love / 燭光晚餐 / 數到五答應我 / 沉默玩具 / 刮目相看 / 笑我笨 一貫迎合台灣市場嘅作風, 動人情歌掛帥, 主打歌《Superwoman》翻唱自同名經典英文歌, 唱出風格唱出佢歌唱事業上嘅一片春天.. 值得一提嘅係重新灌錄1999年主打舊作《笑我笨》, 當初滄海遺珠終於重見天日..
	2006終《Superman》曲目: Superman / 兩隻戀人 / Girlfriend / 背叛 / 你是我的寶貝 / 3-7-20-1 / 保護你 / 愛到底 / 我的甜蜜蜜 / 天使忌妒的生活 乘勝追擊嘅第二張大碟, 開始撇開上張大碟模式, 變做較為個性化.. 最欣賞《背叛》呢首抒情歌, 佢唱得好有feel, 其實我喺星光幫楊生唱紅呢首歌之前就已經中意架喇, 英雄所見略同.. 跟住仲有《愛到底》, 呢首funky歌佢唱得好放, 聽得出有一定功力, 豎起拇指贊好..
	2008初《Super Sunshine》曲目: Super Sunshine / 起床歌 / 無辜 / 妹妹要快樂 / 吹吹風 / 奈斯男孩 / 單數 / 愛到最後一秒也不委屈 / 愛愛 / 愛的弧度 / 你的歌 基本上覺得同上一張風格接近, 應該係順住個勢嘅緣故.. 喜愛《無辜》同《單數》兩首同之前《背叛》相近, 改編自之前攻陷香港嘅廣東單曲《愛到最後一秒也不委屈》.. 碟內最驚喜嘅係《愛的弧度》呢首歌, 原來佢唱起jazz味道歌曲都幾好喎, 可能係之前多次現場演譯一人唱晒男女兩聲嘅經典懷舊作品《My Way》所累計落嚟嘅功力啩..

10.01.2008 | 十年幾番身

在下患上近視眼都已經20年喇, 多得孩提時候太過用功咪書.. 一路以嚟都換過唔少眼鏡, 但係對上一副應該都已經係10歲大喇.. 過去十年真係未換過眼鏡, 因為大多時候都係戴contact lens, 眼鏡就淨係夜晚喺屋企戴架咋.. 當時配嗰副眼鏡, 堪稱當時最流行款式, 仲係時尚E字頭品牌嘅銀絲邊橢圓形鏡框, 仲好記得當時洗咗我240大元.. 隨著歲月流逝, 就越嚟越唔咁立亂戴副眼鏡示人喇, 因為個款式已經out咗N年, 再嚟多年積埋啲污漬頑固難除, 最難頂就係戴咗成個薯頭look吖嘛..
上個星期終於的起心肝去配返副新眼鏡喇, 一來真係冇辦法再接副古董啦.. 左揀右揀試完再試, 終於決定要個藍黑色膠框.. 其實揀啱咗幾款, 名牌貨平價嘢都有, 不過最後詳細考慮到其實平時都必定係戴con甚少戴眼鏡,再者可能考慮去做激光矯視手術, 所以唔駛落咁重本啦.. 跟住順便驗賣眼啦, 好僥倖地, 十年以來個近視度數都係增加咗50度, 閃光眼都仍然保持之前單單右眼嘅50度, 都幾唔錯啦keep得.. 最後168大元賣單, 仲有下次光臨優惠固本添..

09.01.2008 | %^@?&]\>$#!

噚日一早起身就見到隻烏鴉, 就心知不妙一定有事發生.. 結果真係好嘅唔靈醜嘅靈, 準備教training嘅時候, 坐喺會議室張凳唔幾耐, 聽到啪啪兩聲, 十秒鐘過後, 張凳即刻畀我坐爛咗!! 天啊!! 睇吓下邊呢個連環圖, 原本一張好地地嘅凳, 竟然畀我坐爛!! 死啦, 唔通我真係肥成咁咩?? 該煨咯!!
其實前日坐上去嘅時候, 都已經不時聽到啪啪聲架喇, 但係不以為意, 以為係個轉軸少咗潤滑油所發出嘅聲音.. 點知噚日啪啪兩聲過後, 張凳個五叉星狀底部, 竟然斷咗, 結果成張凳失去支撐, 我成個人就梗係跟住跌低啦.. 不過好彩當時打緊字, 所以有個檯撐得住, 不至于跌到個四腳朝天.. 幸好在下都有返兩手功架, 馬步都扎得穩, 所以嗰一刻真係跌得好斯文, 穩如磐石啊.. 見慣大場面嘅我, 當然係處之泰然啦, 即刻托埋張爛凳去一二角, 繼續教training啦..

我喺度諗咧, 我冇理由會咁勁坐爛張凳架?? 梗係上星期大老細坐過, 坐到爛爛地, 所以推埋一邊, 而咁啱個training 我又順手拉埋嗰張凳嚟坐, 咁先爛嘅.. 哼, 一定係咁喇, 十成係喇..

08.01.2008 | 把我寵壞

我諗我已經被寵壞了.. 咪就係講緊我被輕快鐵寵壞了, 以至我到今時今日都仲仍然係個無車一族嘅public commuters.. 其實都有段古架, 第一個因素就係寒舍距離輕快鐵站只不過係短短150米距離, 行路都係得個三分鐘.. 第二個因素就係我咁耐以嚟每一份工, 每一間office都係有直通輕鐵(係唔駛轉線嗰種添架).. 第三個因素就係除咗工作以外, 通常所去嘅地方(例如gym啊, 商場啊)都可以輕鬆搭輕鐵, 電動火車或單軌火車到達.. 第四個因素就係在下人見人愛, 車見車載, 多謝各位曾經熱心載送嘅朋友們與同事們, 感激萬分..

其實講起要自己有架車, 真係唔簡單啊, 因為實在係要花好多錢.. 供車, 車險同路稅, 車油, 維修, 泊車費, 過路費, 一個唔覺意有張牛肉乾, 樣樣都係錢, 而且仲越嚟越貴添.. 所以話有車固然好方便, 如果唔需要駛咁多錢, 唔需要日日塞車, 唔需要隔幾年就要換架新車, 唔需要擔驚受怕路霸同搶車賊, 等等等等.. 所以有時覺得頗矛盾, 究竟自己需唔需要一架車, 定係可以安於現狀咧??

後記: 我個車牌仲係有效架.. 我諗我應該仲記得點樣駕駛, 泊車應該可以經過一輪努力之後入到個車位嘅..

07.01.2008 | 生鏽的機械

聖誕新年盡情放縱之後, 早幾日終於的起心肝去做gym喇.. 因為太耐冇郁動過, 所以煞時間又再次激烈狂操, 所以第二日即刻見效, 唔係見到效果, 而係周身肌肉酸痛啊, 陰公.. 尤其噚日去返成個月冇去過嘅hiphop堂之後, 即刻倍感酸痛, 彎腰嘅時候最痛苦, 真係好似老伯爺公咁, 郁啲就覺痛.. 不過自己知自己事情, 已經唔係第一次啦, 因為每次隔太耐冇運動, 一定會係咁樣架喇, 唯有忍耐數天啦.. 為生鏽機械添潤滑油過後, 機器尚且會戟戟吓先至順返啦, 更何況係我呢挺懶骨頭?? 哈哈.. 其實有時都好羨慕友人WS咁fit架, 成日聽佢話一家大細齊齊去跑馬拉松喎, 畀著我, 未跑夠5分鐘就已經攤死喺地下狂嗌辛苦啦.. 唔理得咁多, 周身酸痛都要繼續狂操架喇, 鬼叫你之前咁放縱吖嗱??

06.01.2008 | 三千年後...

商業電台上個月於年度頒獎典禮前舉行咗個《叱吒又一個十年回歸音樂會》, 請嚟六位現時得令爭獎爭得頭破血流嘅歌手(陳迅, 古巨, 許安, 容祖, 楊嬅, 何詩)夾埋前輩林Diva一齊演唱.. 結果個show竟然係林Diva以同一句話開場同埋尾, 就係呢句「再見, 唔好怪我第一句就同你講再見..」, 句嘢其實就係出自陳輝陽《十二金釵眾生花》音樂劇裡頭嘅一首歌, 由李香琴獨白featuring關淑儀嘅呢首《三千年後》..

剛開始聽呢首歌嘅時候, 第一個感覺就係覺得好怪雞, 唔知點樣嘅.. 不過再聽多幾次, 反而覺得好有feel, 老戲骨琴姐聲音演出再加上關小姐獨特嘅聲線吟唱, 慢慢咁覺得首歌其實都幾正喎, 而家個腦仲不時浮現出首歌嘅旋律添.. 難怪佢之前喺2007年度CASH流行歌曲頒獎典禮上奪得最佳另類音樂獎啦.. 大家嚟聽聽呢首crossover得好有feel嘅歌啦~~


再見/唔好怪我第一句就同你講再見/因為我真係專情來同你道別架/你唔講嘢/淨係聽我講嘢/嗰陣時個世界好安靜/冇而家咁嘈/襯得我特別吱喳/特別開心/我記得同你去睇日落/你會響我耳仔邊講嘢/你講得好細聲/其實我一啲都聽唔清楚/不過我好鍾意聽你咁樣同我講嘢/以後再冇人咁樣同我講嘢/因為你話畀我知/你要走喇/忽然間/經過咗好多年/我冇再睇過日落/趁熄滅前/還可一見/蠟成了灰/沾污了我的臉/眾生蔓延淚海被填/浪漫擱淺/舊歡不變/我記得/你同我去過嘅每一個地方/嗰啲地方/通通留喺我心裡面/我唔會講我老喇/我只係會講我喺度太耐/時間耐咗/難免知道人總會慢慢咁將過去淡忘/又會睇住啲嘢/無聲無息咁樣消失/我點解要走/我先兩日唔知諗緊乜嘢/無端端走咗去睇日落/個日落就同我記得陪住你睇嗰個樣一樣/不過就算我點樣裝出若無其事/我都冇辦法唔承認我失去嘅嘢實在太多喇/趁熄滅前/還可一見蠟成了灰/沾污了我的臉/眾生蔓延/淚海被填/浪漫擱淺/舊歡不變/我要走喇/如果你記得返我係邊個/我知道你一定會好唔捨得我/仲會好掛住我架/再見

05.01.2008 | 泰姬陵Taj Mahal

友人早前到印度公干, 豈能錯過到泰姬陵一遊嘅心理作祟之下, 佢洗咗佢250美元, 終於由新德裡去到阿格拉day trip.. 結果個私人導遊唔小心跌甩佢部相機, 而且只逗留短短一小時, 搞到佢淨係影咗不多於20幅相, 佢非常之唔滿意發晒爛咋咁.. 詳文請按此鏈接閱讀..

見佢個泰姬陵之旅咁坎坷, 而且影出嚟啲相又效果欠棒, 好似合成照片咁, 真係戥佢唔值.. 戥佢唔抵之余, 我又突然覺得自己年半前個泰姬陵之旅實在係比佢好200倍, 而且影出嚟啲相就更具真實感.. 我都係用同樣240美元, 不過係3D2N由新德裡去阿格拉再去齋浦爾(多佢一個地方), 泰姬陵就去兩次, 第一次係傍晚時分去後邊河畔遠望, 第二朝先正式畀錢入去參觀(門票45美元, 唔平架), 而且仲喺裡頭逗留兩個小時, 影相影到部相機冇晒電.. 臨走前仲依依不捨望多兩眼, 覺得佢真係有種懾人魅力吸引住我架..
之前一路梗梗於懷嗰240美元, 但係知道友人的故事後, 突然間覺得自己好僥幸好幸福, 因為印度一路都係我好想去嘅地方(嗰次因為公干嚟個順水推舟), 而且可以親眼目睹泰姬陵呢個七大奇觀之一, 個感覺真係好感動架.. 各位朋友, 如果有機會, 真係唔可以錯過..

後記: 我再再再去睇返友人影啲「佈景相」, 真係覺得我啲好好多.. 哈哈哈哈!!

04.01.2008 | 撞鬼

前日同兩個朋友一齊食晏, 食物送到時, 大家都知我見到美食, 就會好情不自禁地用部手機影返兩幅相, 諗住之後可以擺上blog同各位分享啦.. 見到碟三燒色澤鬼咁靚, 於是就左擺右擺, 前影後攝.. 喺極之興奮情況之下, 點知撞鬼咁, 部手機無啦啦"daang"一聲跌入碗燉湯度.. 於是立即拎起息電, 打開逐個零件拭擦, 擦到成部手機油臘臘咁, 心裡真係不是味道.. 都怪自己唔小心, 定係應該怪友人無啦啦點乜鬼燉湯咧?? [講吓笑啫, 哈哈]..

各位朋友, 就係呢兩個罪魁禍首喇!! 佢哋係燒臘先生同埋燉湯小姐..

結果手機開始sort-sort地, 先係息機後自動開啟, 跟住入去menu後自動彈出, 跟住收唔到線, 跟住個電池發熱.. 唔好嚇親, 話晒原廠手機唔係咁差嘅, 其實係一個問題好返之後輪到另一個問題啫.. 不過最頑固嘅就係噚日, 無啦啦自動sense到hands-free, 問題係根本冇鬥hands-free吖嘛.. 結果搞到部手機以為有hands-free, 搞到聽唔到電話.. 好鬼掹啊!! 噚晚返到屋企, 即刻搵返個hands-free出, 係咁隊出隊入十幾次, 終於都冇事喇.. 不過仲係warranty期間, 點解咁輕易就畀我整好啊?? 我情願佢繼續sort-sort地, 等我可以換部新機吖嘛..

03.01.2008 | 火燒眼眉

經過聖誕加新年呢個悠閑假期, 同埋一連串放任地盡情享受人生之後, 吃喝睡樂囤積喺身體內嘅脂肪有加冇減, 加上都有兩個幾星期冇去workout喇, 所以目前在下真係應證『心曠體胖』 呢句話.. 諗返起大約8個月前, 由香港回歸大馬嘅時候, 曾經為自己定下六個月瘦身15磅嘅大計, 但係眼見鏡子前此刻的自己, 真係萬分灰意.. 好地地點解會攪成咁樣啊?? 睇返自己過去幾個月所寫啲blog, 寫關於美食嘅其實都佔咗個頗大比數, 好驚人啊.. 由2007跨年飽到2008, 現在火燒眼眉之際, 所以真係需要「收身養性」乖乖地咁減肥喇!!

後記: 寫呢篇之前, lunch仲同埋成班同事跟大老細去食晏, 一圍12人嗌到成檯都係餸(仲爭啲要擺去隔離檯咁濟), 只可以話而家真係好飽.. 今晚無論如何, 一定要去gym激激workout一輪!!

02.01.2008 | 新年大餐

噚晚同朋友ET去食日本燒烤, 其實唔係日本餐廳, 而係間台灣人開嘅日本料理店, 但係都有板有眼, 環境食物服務都可以令在下滿意.. 餐牌上好多選擇, 不過最後點咗個二人套餐乜都有齊晒, 將個責任交返畀老闆.. 其實仲有樣嘢係令眾人眼金金嘅, 就係個頂級日本神戶牛柳, 每百克叫價RM80, 不過真係食唔起..上座時候, 侍應先將個燒烤爐同埋味增煲捧過嚟, 值得一提嘅就係都係用炭燒嘅.. 跟住上座嘅有蒜蓉毛荳, 韓國泡菜, 錫紙菌褒, 雞豬牛羊, 魚蝦鮮魷同埋蔬菜.. 好多樣嘢, 見到都胃口打開, 食指大動啦..
因為實在太多嘢食, 所以其實都食得好忙, 一時要睇住個燒烤爐上邊啲嘢, 一時又要睇住味增褒內啲嘢, 一時又要快手趁熱食埋煮好啲嘢.. 不過都真係食得好開心, 食得好滿足, 買單時每人RM45, 覺得唔會貴啦, 食到兩人飽到趴晒喺度.. 呢餐飯真可算得係2008新年大餐喇, 一個字, 「正」!!

01.01.2008 | Happy 2008

又係新嘅一年新嘅開始喇.. 喺度祝各位朋友事事順利, 身體健康, 出入平安, 生意興隆, 心想事成, 一帆風順, 金銀滿屋, 百尺竿頭, 更進一步, 步步高昇, 橫財就手, 盤滿缽滿, 事事亨通, 一本萬利, 學業進步, 青春美麗, 英俊瀟灑, 人見人愛, 車見車載, 勢如破竹, 珠聯璧合, 終成眷屬, 兒孫滿堂, 意氣風發, 一擲千金, 千嬌百媚, 高大威猛, 守得雲開, 大富大貴, 健康快樂, 悠閑自在, 福星高照, 招財進寶, 萬事勝利, 隨心所欲, 順心順意, 龍馬精神, 花開富貴, 大吉大利, 突飛猛進, 愛情得意, 甜甜蜜蜜, 事業猛進, 權霸天下, 如意吉祥, 添福添壽, 萬事順境, 夢想成真.. 二OO八, 新年快樂!!