10.09.2007 | 食晏新浦點

今日有新同事返工, 咁我哋循例都會全體同仁一齊去食個晏, 歡迎新同事加入呢個大家庭嘅.. 難得平時幫襯開間餐館冇開門, 所以就試下第二間.. 經過上一次同大老細飯局, 決意嘗試新餐館(食興化菜)嘅寶貴經驗後, 今次都帶點戰戰兢兢嘅心情去嘗試架.. 其實今日試呢間, 都唔算係新開架喇, 因為前幾個月為咗個project夜夜OT, 差唔多晚晚都係叫佢外賣, 心諗應該都唔會差到去邊啩?? 以前都係撥個輪就有嘢送上公司, 今次都係第一次登門造訪, 未到12:30pm都已經滿晒人, 不過好彩仲有最後一圍空檯, 唔駛等八個人哪哪臨埋位坐埋先.. 睇過餐牌過後, 其實都好系統化, 樣樣餸都寫明價錢, 而且個價錢都頗公道.. 因為第一次, 所以經過一輪擾嚷之後, 點咗六樣餸, 跟住就耐心等待希望唔好失望.. 可能人多關係, 都等咗成20分鐘, 結果率先上座係個葡汁雞, 一口咬落去之後, 即刻斷定下次可以帶大老細嚟呢度食飯喇.. 其餘啲餸都跟住陸陸續續排隊上座, 都煮得幾好味, 相較起平時食嗰間都真係有過之而無不及, 賣單時飯餸茶水合共RM90, 價錢都算公道.. 呢間嘢叫做中環餐廳, 終於都有個食晏新浦點喇, 我哋會再嚟幫襯架..