28.02.2007 | 七里香(18+ 淫賤版)

嘩, 好鬼搞笑啊啲詞改得, 果然不失為個填詞天才.. 不過捉住周傑倫咬字不清嘅弱點嚟開呢個咁賤格嘅玩笑, 我覺得好無聊, 相信方文山會更加扯火啦.. 哈哈哈哈, 不過真係好抵死啊改得!!

27.02.2007 | 開工大吉

今日算係放完新年假期後第一日正式返工.. 真係忙到呀, 都唔記得原來自己喺返工前一刻係幾咁唔願意再要面對工作.. 霎時間幾樣嘢一齊嚟夾攻, 都唔知道可以顧得掂邊樣先好.. 依家仲突然醒起原來頭先都冇食到晏添, 放工返到嚟食咗晚飯, 又繼續努力搏殺.. 唉, 天啊, 點解啊??

唉, 算啦.. 第一日開工費事再提喇, 應該講返啲好意頭嘅嘢.. 今日開工就收到同事派嘅嚟利是數封, 唔錯喎, 加起嚟都可以食返三四餐晏仔.. 就當係開工利是, 預祝我一切順順利利, 大吉大利, 盆滿缽滿啦.. 哈哈哈哈!!

26.02.2007 | 早班機

其實好驚要搭早班機, 因為前一晚我通常都係會瞓得唔好.. 試過好多次都係咁, 唔知道點解?? 又唔係驚睡唔醒呀, 因為check左N次個鬧鐘已經較好.. 又唔係興奮呀, 因為又唔係第一次搭飛機.. 真係好唔明解到底搞乜鬼, 想好好瞓返個靚覺都唔得, 成晚輾轉難眠都真係好痛苦架.. 跟住咧, 以為成晚瞓得唔好, 喺飛機上可以瞌下補返啦.. 但係我永遠都係好難可以喺飛機度真真正正瞌著架, 最多都係瞌一陣醒一陣.. 所以凡係搭早班機果一日, 我都會好辛苦, 要到夜晚睡覺先至可以恢復正常..

25.02.2007 | 假期結束

話咁快, 一個星期嘅新年假期眨下眼就咁結束.. 喺我未能盡情享受呢個悠長假期之前, 個返工鐘聲竟然就咁殘忍, 提醒我假期已經結束, 明天就要繼續返工喇.. 好唔開心, 好唔捨得, 好唔願意他他條條咗咁耐之後又要重新面對工作上嘅忙碌同壓力.. 算吧啦, 始終都要面對, 要嚟嘅點避都避唔過.. 口係咁講, 但係點解個心硬係揦住揦住咁, 如果可以避開應該係要點樣避咧?? 唉, 既然係有咁嘅心態, 倒不如乜嘢都唔好諗, 用時間嚟適應吧啦.. (無奈無奈)

23.02.2007 | 失望

聽朋友講, 麥當勞新推出新年口味既紅豆新地, 好像去試試.. 於是今日就興致勃勃咁去到麥當勞, 唔理食左有幾肥既後果, 就咁嗌左份麥樂雞套餐, 諗住搭單要杯令我朝思暮想既紅豆新地.. 點不知個waitress 好無情咁話我知「紅豆賣晒喇, 得返朱古力, 士多啤梨同埋菠蘿咋」.. 煞時間, 晴天霹靂愣左一陣, 好像話唔要杯新地喇, 但係又唔知點解醒過神後好理所應當咁話「咁畀杯士多啤梨我啦」.. 鬼整咩?? 我其實係好像食紅豆新地架, 真係大失所望..

不過夜晚行超級市場時, 買左個紅豆冬甩黎食, 好好味, 算是補償剛才既失望啦..

22.02.2007 | 身體健康

新年拜年除左恭賀人地新年快樂之外, 我諗最重要就係一定要搭句「新年快樂」至得.. 點解?? 原因好簡單, 咪就係因為大家新年過得實在好唔健康囉.. 以我自己為例啦, 新年期間每日都食埋晒D高脂高糖高澱粉既野, 而且每日都係日夜顛倒, 白天睡覺夜晚龍精麼猛.. 真係好唔健康啊.. 話就話係新年一年一次, 放縱下自己又無妨, 但係自己都唔係十八廿二啦, 真係應該要適可而止喇.. 所以話家下年都過喇, 係時候收拾下新年種落黎既「禍根」, 需要勤勤力力經常去gym報到. 我已經攬住舊肥腩肉做人好耐喇!!

21.02.2007 | 大年初四

輕鬆快樂既時間真係過得特別快既啵.. 眨下眼嗟, 就已經係年初四喎.. 通常D人話年初四過後就要停止一切新年慶祝活動, 要恢復平常既生活.. 但係我仲放緊假啵?? 唔緊要啦, 等我開左部laptop, 開下D工作上既文件, 象征式地睇兩行當係開工啦.. 既然係咁, 就不如趁新年順便許返個新年願望啦.. 希望事事順利, 萬事如意, 一帆風順, 百尺竿頭, 陞官發財, 貴人高照, 出入平安, 身體健康, 生活愉快, 身壯力健, 龍馬精神, 萬事勝意, 世界和平.. 總之係好意頭既, 我統統都要.. 一年得呢一次新年願望, 唔算貪啦..

20.02.2007 | 大年初三

新年期間無非都係見下親朋好友, 拜年逗利是啦.. 今年覺得逗到D利是好似多過以前咁啵.. 扣除D例排親戚長輩畀既利是之後, 多出黎果D其實係D同學仔朋友畀架喎.. 以前齊齊去朋友家拜年, 最多都係逗下世伯伯母D利是嗟.. 依家唔同喇, 見親D結左婚既朋友, 第一句話就係要呃封利是過黎先, 尤其係新婚燕爾果D就實唔可以走雞啦, 因為第一次派利是係要派兩封架嘛.. 成日都畀人話「逗埋今年唔好再逗喇」, 扯,免費錢我確係一點都唔介意一收再收啊.. 哈哈!!

19.02.2007 | 大年初二

大年初二, 初左唔駛齋戒一個早上之外, 仍然係過得同大年初一冇乜分別, 仍然都係好極之「年年有餘」咁, 毫無要求咁就入到廚房揭開D褒褒鍋鍋, 繼續食返同樣既野..突然之間覺得呢個新年好似毫無「新」意咁.. 年菜積存要食舊野, 年卅晚買唔到新衫要著舊衫, 新春節日要見下舊朋友, 同朋友暢談講返D舊回憶, 同親戚逗利事又係舊銀碼.. 諗起都覺得好搞笑, 哈哈!! 望就望之後一切都係新氣象新景致, 好事喜事連連啦..

18.02.2007 | 大年初一

恭喜發財!! 今日係金豬年大年初一, 訓到日上三竿, 果然係可以拿正牌好似只豬咁大訓特訓啦.. 每年大年初一, 都係好例排咁需要齋戒一個早上.. 所以何必要咁早起床咧?? 哈哈.. 不過一訓醒, 點都唔會係大魚大肉當早餐咁敗家啦, 清清淡淡一碟愛心炒齋米粉我已經非常之滿足 (注: 其實我係非常中意食炒米粉, 開正我範啦).. 大年初一, 又係好例排咁係下午齋戒以後, 開始要馬拉松式咁儘量啃晒年卅晚食唔晒D年菜.. 每年如是, 雖然有D恐怖, 但係已經麻木喇, 唯一可以慶幸既想法就係--「年年有餘」呢四個字..

17.02.2007 | 年卅晚

今年年卅晚同以往有點唔同.. 我諗今年應該係三十年來, 第一次年卅晚落雨.. 場雨落得唔係一瞬間, 唔係雨毛仔, 而係一早就斷斷續續咁不停落大雨.. 停雨既時候, 望望個鐘, 竟然已經下午4點鐘喇.. 之前工作忙碌得抽唔出時間買新衫, 本以為今日放假可以興致勃勃想出街買D新衫作新年前最後衝刺啦.. 點不知場雨又會落咁耐, 搞到我出唔到街, 新年冇新衫著係何等殘忍啊..

16.02.2007 | 咁快又要過年喇??

唔經唔覺, 今日已經係年廿九喇喎.. 咁快又要過年喇?? 好似都仲未感染到D新年氣氛, 話咁快就要收拾心情去過年喇.. 以往都係等待新年既來臨, 今年反而因為太多野要做, 黎唔切要準備心情迎接新年既來臨.. 不過話是話, 街上除左已經亮起新年燈飾之外, 其實都感覺唔到濃厚既新年氣息.. 再加上個天氣又有點不尋常的暖暖地, 更加會唔覺意咁就唔記得原來就快過年啦.. hmmm,怕且我都要轉張新春wallpaper黎提一提醒自己至得喇..

15.02.2007 | 樂也融融

今晚同班同事去打邊爐, 應該算係農曆新年前既「收工酬勞宴」呱.. 公司現在規模唔大, 細細地少過10人, 而且大家年齡相近, 所以相處起來都好融洽架.. 平時各有各忙, 今晚大家一圍檯坐埋一齊食野, 又講又笑又食又飲, 都幾開心架.. 所以食左好多野..

其實我覺得我會比較prefer係D細公司做野, 因為每個人既relationship bond會係比較close, 同事都係比較open.. 唔似D大集團大公司咁, 一入到去就好似要即刻跌入深海咁, 拼命咁往上游以求生存.. 尤其每每聽到朋友講D大公司辦公室政治, 搞到職場如戰場, 每隔都要時時刻刻保住自己, 真係幾恐怖架..

14.02.2007 | 情人節

情人節?? 一個對我黎講好陌生既節日.. 好坎坷地我從來都未有慶祝過情人節啵.. 除左為小春係情人節慶祝生日之外, 呢個節日都不過如是嗟.. 哈哈, 可能各位覺得我係吃不到葡萄話葡萄酸.. 或者係啦, 但係我又覺得無啦啦點解會有個人得閑冇事做, 走去發起呢個情人節啊?? 就係有個情人節, 畀D花店啊餐廳啊一次過回本.. 唉, 其實就好似母親節父親節一樣, 如果係互相愛惜既話, 其實每一日可以係情人節母親節父親節啦, 何必零零碎碎擇個吉日硬係要叫天下人有個借口可以盲目咁大事慶祝咧?? 難道平時佢唔係你情人唔係你母親唔係你父親咩??

p/s: 小春, 係度順便恭祝你生日快樂, 心想事成, 事事順利, 身體健康..

13.02.2007 | 忙忙忙

忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙
忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙
忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙
忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙
忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙
忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙
忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙
忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙
忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙
忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙
忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙
忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙忙
忙忙忙忙忙忙忙忙忙忙忙忙忙忙忙忙忙忙忙忙忙忙忙忙

得閑既話估下上邊究竟有幾個忙字.. 估中冇獎, 但係可想而知我有幾忙..

12.02.2007 | 麥當勞新地

唔知點解, 突然間覺得麥當勞新地好好味啵, 好味到連續兩日食完一杯仲想食第二杯.. 其實都非常之抵食, 咪就係六蚊一杯之嘛.. 雖然同其他雪糕專賣店比較起來, 佢未必係用料十足, 可以話係平民級數.. 但係如果唔計較等級, 我覺得雪糕柔軟, 淋上香滑朱古力醬, 再撒羹脆扑扑花生米落去, 基本上都已經係誠意十足啦.. 其實我都食得好enjoy架, 久唔久食杯冇所謂, 之不過就要嚴格抑制, 因為杯新地實在係好肥呀.. 突然諗到個非常貼切既形容詞--sinfully delicious-- 哈哈..

10.02.2007 | 收放自如??

今日帶小徽去左長洲一日遊, 揀左兩條家徑嚟行, 都差不多行晒我平時一個星期嘅路.. 人年紀大咗, 突然間要擒高擒低確實都有點吃力.. 但係兩條友仔就好似越行越興奮, 其實真確黎講唔係因為行, 而係因為行下兩步就影下幾張相先係, 哈哈.. 加加埋埋兩友仔竟然可以影做成200張相, 其實都係托digital camera鴻福嗟, 唔駛驚浪費菲林呀嘛, 影得唔靚咪到時唔要囉.. 睇返D相竟然發現個人明顯地越影越瘦啵, 唔通係因為行得多個人即可清減左?? 再繼續睇返D相, 又發覺食完晚餐之後個人又好似同犯早上一樣咁.. 好笑啊, 難道真係可以係咁短既時間內咁明顯地肥瘦自如?? 哈哈..

09.02.2007 | 熱血青年..

都話左youtube 真係對我個blog貢獻良多啦.. 搵到呢個呼籲公眾慷慨捐血既廣告, 覺得好有創意, 個background配樂好貼切.. 睇完覺得好得意啊個肥妹仔.. 不過就有D誇張啦, 哈哈..

08.02.2007 | www.youtube.com

都唔記得係幾時認識www.youtube.com呢個網站喇.. 淨係知道佢當我諗唔到要係個blog度寫D乜野記時候, 一個可以提供我題材既來源.. 係咁意去個網站, 打兩個字搜索, 就有成列video任你揀你睇, 的確係快捷方便.. 其實最開心就係搜搜下, 往往都會搵到驚喜啵.. 尤其一D你以前好想好想要睇到既video, 因為搵極都搵唔到而且又隔左一段時間而逐漸淡忘左佢, 點不知就係一個唔覺之下, 活脫脫咁呈現你眼前.. 果種失而復得既驚喜真係好正feel架.. 所以好多謝D有心人士慷慨分享D正野啊, 個網站創史人就更加應記一功啦..

07.02.2007 | 無啦啦拖咗落水

今日收到同事封email, 無端端將我擺左上臺.. 無啦啦拉埋我落水, 好officially咁將我介紹畀個客話我會handle個project.. 嘩, 好突然啊.. 當初以為同另外一位同事共同進退, 拍住上一齊handle架嘛.. 點知就係因為果一次佢有D事未能夠去同個客開會, 所以就變咗我一支公, 所以就搞到現在嘅田地.. 手頭上都有兩單「傑遢遢」嘅project搞到我暈陀陀啦, 再加埋呢個超級煩嘅, 我諗都要多個三頭六臂每天48小時先至足夠我用啊.. 唉!! 唯有嘆句人在江湖, 搵食艱難啊..

05.02.2007 | 喪食

今日硬係覺得個肚漲漲地個肚好大, 因為昨日實在是食左太多太多野.. 諗返起都有點質疑自己點可以食左咁多野架?? 好恐怖啊..
· 10:00am – 腸仔包 + 核桃面包
· 11:30am – KFC 早餐(通粉, 雙腸, 鬆餅, 奶茶)
· 14:00pm – 提子汁 + 薯片
· 15:45pm – 麥當勞咖喱豬扒包套餐 + 士多啤梨新地
· 19:30pm – 雞粥, 燒乳鴿, 椒鹽瀨尿蝦, 蒜香豆苗
· 20:15pm – 芒果士多啤梨西米露 + 炸雪糕
· 21:15pm – 花生芝麻糊
· 10:30pm – 焗西餅兩件
其實我到依家都係覺得飽飽地咁, 有D飽到想嘔既感覺.. 唉, 減肥計劃又終告失敗..

03.02.2007 | 搞笑泰國廣告

間中都會收到一D朋友mail過黎既泰國廣告, 覺得D泰國廣告都幾有創意啵, 而且D泰文聽落又幾舒服.. 呢個電子付款廣告雖然有D核突, 但係真係好搞笑好creative架.. 尤其個男主角最後「忍無可忍」既表情, 簡直就係演得入木三分啦..

02.02.2007 | 溫室效應

今日放工踏出公司大廈, 個天竟然仲未黑, 真係有點唔慣.. 再加上個天氣又好似唔係咁凍, 唔知冬天係唔係靜悄悄咁過左去咧?? 睇天文臺天氣預告, 下星期天氣頗暖.. 昨晚睇電視, 咁岩有報導話因為人類既發展高度破壞自然生態, 引致現狀既溫室效應, 導致全球氣溫上昇.. 2100年後, 預計全球氣溫普遍上昇攝氏1.5至4度, 海平面上昇5.9毫米.. 又聽個同事話, 未來一世紀, 香港將會變成熱帶地區.. 嘩, 如果香港變成熱帶, 咁沙漠係唔係變成地獄??

巴黎鐵塔, 羅馬競技場等歐洲名勝係同一時間一齊熄燈片刻, 以提醒全球人類關注節省能源, 但係就算依家要補救都已經太遲啦..

01.02.2007 | 雜菜炒野菌

最近愛上了食D菌類呀菇類呀.. 冬菇袖珍菇金針菇磨菇草菇大頭菇, 乜菇都好啦.. 是但兩種全部一齊落埋個鍋度同D蔬菜一齊炒, 跟住唧D瑤柱蠔油調味, 埋尾再落兩滴麻油就咁一碟野出黎.. 真係簡單又好味, 完完全全岩晒我呢D懶人啊.. 成碟雜菜野菌自己落手落腳整, 應該都算係健康兼且營養豐富..