設定貼子語言 Set language for posts :
中文
English
中英雙文 English & Chinese

31.05.2008 | 又一日

今日冇乜特別嘢可以寫, 諗返起今日成日, 都真係冇乜特別事發生喎, 冇乜事發生都應該算係好事嘅咁又..
  • 瞓到十點幾, 跟住就喺屋企上吓網睇吓電視, 兩點半出門去gym(因為肚餓所以先甘願出門)
  • lunch食咗個下午茶套餐, 腸蛋公仔麵(四川口味湯底)搭杯凍青檸水
  • 今日比平時晏咗去gym, 發覺原來呢個時段冇咁多人, 都唔錯喎
  • 今日cardio踩單車, weight就做chest, 感覺好耐都冇做weights喇, 要加油
  • gym完去超市買下兩個星期嘅早餐, 咪即係我啲牛奶, 乳酪同埋muesli囉
  • 買完嘢大包細包拎上公司擺, 我每日返工早餐就係呢啲muesli parfait喇
  • 跟住都成八點半喇, 十五十六唔知食KFC定ayamas好, 最後決定後者因為應該冇咁肥
  • 食完嗱嗱聲返屋企, 返到差唔多成十點鐘, 沖涼睇報紙睇電視上網

禮拜六冇節目, 一個人在家中感到侷促.. 就咁, 這就是我的一日.. 喂, 寫完呢個entry, 又係一日喇..

30.05.2008 | 好一個漢堡包!!!

頭先晚餐淨係食咗啲青菜同買兩塊煎魚, 食完係覺得飽飽地架, 不過應該唔襟飽, 所以而家覺得有啲餓添.. 煞時間個腦淨係諗到一樣嘢, 就係漢堡包喇.. 唔係漢堡王, 更加唔係麥當當, 而係Carl's Jr以下呢幾個漢堡包, 係唔係連你見到都食指大動, goot一聲咁吞咗啖口水啊??

每次經過門面都畀佢啲漢堡包吸引, 好想好想行入去食, 不過一來怕肥, 二來最主要係因為貴囉(食一餐要廿幾蚊), 所以開張以嚟都係食過一次, 仲記得嗰唯一一次都係因為朋友堅持咋.. 食過一次, 絕對冇後悔(雖然有啲肉赤), 信我, 真係非常之好味架, 唔怪得我而家竟然會掛住佢啦.. 我有一股衝動, 就係可能聽日一嘢豁出去, 去食呢個我上次冇食到嘅Guacamole Bacon Cheeseburger(上排中間嗰隻)..

29.05.2008 | 航空大激戰

航空條約逐漸開放, 航線壟斷局勢式微之際, 各航空公司開始感到同行嘅競爭壓力.. 最近兩間航空公司實行嚟個削價大激戰, 一個係近幾年嚟平地一聲炮, 越嚟越受消費者歡迎嘅廉價航空公司AA; 而另一個就係老樹盤根, 歷史悠久嘅龍頭大哥MH.. 呢個月MH失驚無神咁搞咗個zero airfare促銷, 擺到明就係同AA對抗啦.. 而AA都唔係好恰, 即刻嚟個sub-zero airfare還擊, (sub-zero促銷即係話佢哋嘅零票價比起MH嘅零票價更平).. 所謂蝓蚌相爭, 漁人得利, 佢哋咁嚟鬥法, 得益嘅梗係消費者啦.. 所以前日在下先有幸於呢次千載難逢嘅機會之下, 網上訂購咗九月尾去暹粒(即係柬埔寨吳哥窟所在之地)嘅MH零票價機位, 呵呵, 好期待啊..

其實諗返起以前一坐飛機郁親就要幾千蚊嘅日子, 而家居然以零票價售賣, 可想而知當時個價錢係mark up得幾咁攞命!! 我哋都係精明嘅消費者, 當然係以平為先啦, 血汗錢嚟架嘛..

忽然醒起有個喺航空公司返工嘅朋友, 佢問點公司總係中意欺壓員工?? 我話係因為搞咗個zero fare益群眾, 所以咪內部欺壓啲員工囉.. 哈哈哈哈!! 講吓笑啫, 唔好當真[特此聲明不含任何針對或貶低之意..]

28.05.2008 | 文采

最近好似同blog結下了一段感情, 除咗自己每日都會抽時間update自己個blog之外, 亦都會去閱覽其他朋友(認識或者唔認識)嘅blog.. 攪到有人質疑點解我咁得閑日日都與blog為伍, 哈哈, 係架喇, 生活單調就係咁架啦..

發現每個人都有自己嘅寫作風格, 首先講返自己啦, 我應該係屬於口語化嘅一類.. 有人話我寫嘅嘢習慣用好多語助詞, 啦喇囉架喎噃咩嘅, 因為我係個腦袋同自己講緊乜嘢, 個手就打咩字出嚟, 好raw冇修飾.. 有冇發現我一路嚟都好persistent咁用廣東話嚟寫嘢啊?? 可能就係風格, 呵呵..

朋友嘅blog.. 語言方面有啲用英文, 有啲用中文, 有啲用廣東話, 有啲用荷蘭文.. 風格方面有認真, 有搞笑, 有感性, 有開心, 有多愁善感觀.. 有者精簡兩句, 有者長篇大說.. 當中不乏令我讚嘆連連嘅寫作文采, 尤其係可以用純文字好高超咁形容當時個情景/人物/感受, 真係估唔到朋友竟然咁有文藝修養噃, 實在係跌到成地眼鏡碎, 要豎起拇指喇.. [都係不便透露係邊位, 費事尷尬]

我記得十幾年前作文科先至會有文采呢回事, 依家我係肯定做唔到喇, 唯有欣賞人哋嘅文采啦..

27.05.2008 | 仲記得佢哋嗎??

仲記唔記得佢哋啊?? 咪就係曾經風靡一時嘅老夫子, 大蕃薯同埋秦先生佢哋囉.. 仲有老趙同陳小姐, 呢兩個分屬大配角..

其實我係一個冇乜耐性睇長篇漫畫嘅人, 尤其啲一套幾十本嘅就肯定冇耐性去睇喇, 我一定睇唔夠幾頁就唔想繼續喇.. 唯獨是短篇漫畫, 尤其係四格六格漫畫, 因為消化得快, 唔駛點樣傷神, 所以我好樂意睇.. 王澤先生筆下經典漫畫《老夫子》, 就係在下孩提時期其中一個「飛佛」喇.. 雖然人物故事夠晒娘炳, 不過都睇得頗過癮架, 因為有時真係偶有佳作(可以笑到碌地), 短短四格就可以完全表達, 實在可見功力..
記得當時一本《老夫子》大概有50頁(係唔係啊??), 全黑白印喺報紙質地嘅紙上.. 記得過後開始有彩色老夫子喇, 跟住又開始有長篇老夫子喇, 跟住又開始有老夫子電影喇.. 不過始終我都係情牽黑白老夫子, 夠晒原汁原味, 夠晒懷舊..

26.05.2008 | 永遠是我的寶貝

第七屆美國偶像American Idol冠軍David Cook早幾日前誕生, 其實我唔係AI粉士, 不過早幾日偶然間聽到佢cover嘅呢首歌, 嘩嘩嘩, 即刻要用技驚四座嚟形容啊, 比賽當日就連平時踩人唔駛本嘅毒舌評判Simon Cowell都贊佢好.. 好中意佢呢個版本, 估唔到呢首原本充滿少女情懷嘅歌, 經佢從新arrange後竟然徹徹底底改頭換面, 原來呢首歌都可以演繹得咁man架喎!! 其實我一向嚟都中意唱歌沙沙地聲嘅人架(男男女女都係如是), 真係激賞佢, 好掂啊, 我依家個腦不時住浮現呢首歌添..

再聽吓原裝版本, 十幾年前仲係「天真無邪, 良家少女」嘅Mariah Carey, 唱得好sweet好少女情懷, 唱咗好多ad-libs, 都不知冧盡幾多情竇初開嘅小情侶啊, 哈哈..


[以上music streaming可能有啲慢, 請耐心等候好音樂, 呵呵~~ ]

25.05.2008 | 一星期七日

一個星期有七日.. 嗯, 雖然係人都知, 不過我唔係要講廢話當你係Richard, 只不過係個開場白啫.. 一星期有七天, 對每一日都有唔同嘅感覺或喜好..
  1. [星期一] 有九成機會我係至憎星期一架喇, 除非呢一日唔駕駛返工, 如果要返工, 尤其係晨早, 我會好唔想起身返工, 個人會好moody.. a monday blue tells it all..
  2. [星期二] 通常星期二就會回過神嚟, 好正常咁返工放工返屋企, 唔辛苦點得世間財吖??
  3. [星期三] 通常都冇乜感覺, 只係感覺到呢一日係mid of working week, 仍需努力撐多兩日, 鬼叫你窮啊頂硬上啦..
  4. [星期四] 通常星期四都會忽然間驚覺「嘩, 咁快又星期四喇??」, 會開始盼望星期五嘅來臨..
  5. [星期五] 通常星期五我個心情會比較輕鬆, 唔知點解, 可能真係好似人哋話齋咁「Thank God It's Friday」.. 尤其臨放工, 辛苦咗五日今日嚟個終結, 有種如釋重負嘅感覺..
  6. [星期六] 唔駛講, 至中意就係星期六啦, 唔駛返工可以好好休息, 暫且拋開工作煩惱.. 有時有節目嘅話就更加期待啦, 如果冇節目嘅話咪當充吓電囉..
  7. [星期日] 呢一日直到夜晚為止, 基本上都覺得係開心嘅.. 不過一到夜晚, 諗到聽日又要開始返足五日工, 就會覺得好悶, 有九成九時間係非常渴望星期一唔駛返工咯..

其實呢, 我覺得一個星期返四日工係最好架喇, 大家有冇同感啊?? 哇哈哈哈哈~~

24.05.2008 | 一個人的星期六

又係星期六, 今日瞓到成11點先起身, 好滿足啊, 好耐都冇試過瞓到咁晏喇, 哈哈.. 今日冇人約冇節目, 所以起身後就上網, 攪攪自己個blog.. 大概一點半覺得肚餓喇, 所以就出門食lunch, 跟住例牌去gym消磨時間.. gym完之後去附近商場行行, 大減價噃, 買咗條五折返工西褲, 算係有交代..

行到差唔多, 咁啱又係晚飯時間, 經過必勝客(Pizza Hut)見到有個套餐都唔錯, 平時一個人食嘢我好求其, 於是就入去試試.. 餐廳環境唔錯, 可能地點關係, 所以唔多人, 而且靠窗嘅都係雙人座, 揀咗靠窗位坐低可以睇吓街景.. 點咗個意粉套餐, 有忌廉雞湯, 芝士麵包, 汽水同埋意粉啦當然.. 份量算係少, 因為全部加埋服務費同銷售稅都只不過係RM8.90, 好平啊.. 但係全部清晒後又覺得啱啱飽(大食嘅人可能要兩份喇應該), 味道算係咁啦, 咁嘅價錢又有個唔錯環境, 可以再嚟架..食完之後精力充沛, 又去超級市場逛一輪, 其實我係一個好中意行超市嘅人嚟架, 唔知點解?? 買咗好多嘢啊我, 因為平吖嘛.. 其實唔可以話平, 應該係話比平時平, 可想而知平時個價錢係mark up到離晒譜.. 買咗咁多, 比平時慳咗成20蚊, 都OK喎(師奶仔心態, 有得慳就代表有成就).. 蘇打餅一大盒, 一升裝純果汁兩支, 曲奇兩包, 燕麥吧一盒, 全榛子黑朱古力兩排, 仲有一大包樂事原味薯片(食咗落肚, 冇影到).. 呢次仲唔有排食, 有排肥???
一個人嘅星期六, 就係咁過喇, 冇乜精彩事情發生, 平平淡淡嘅一日, 偶然間悶悶地都尚可接受嘅..

23.05.2008 | 我愛上了...

撞鬼, 做做吓嘢無端端好想食嘢添.. 依家滿腦子都係啲蛋糕, 曲奇, 餅乾, 麵包, 冬甩, 鬆餅, 班戟之類嘅嘢.. 啱啱先去pantry拎咗兩塊oreo頂癮, 但係依然難敵呢股突如其來殺你個措手不及嘅「慾望」.. 係啊, 了解我嘅人都知我係一個好中意食呢啲嘢架啦, 所以在下肥肥肥, 永遠係無法自救嘅死穴, 嘿嘿嘿~~
[assembled images taken from Google Images]

其實自己都好有興趣去學人整餅架(我不嬲都覺得自己有呢方面嘅天份同潛質囉, 哈哈), imagine自己於週末都喺屋企整個蛋糕, 跟住叫晒一班好朋友齊齊上嚟分享, 一邊食餅一邊打牙較, 其實好cosy好enjoy囉我認為.. 不過不過, 呢個於友共聚嘅溫馨情景一定要等我學識整先啦當然, 咁要我開始整餅, 就梗係要等我有返間屬於自己嘅屋企, 自己嘅小天地啦.. 嗯, 在下已經有股強勁熱誠, 現正努力喇, 大家祝福我, 有乜筍盤唔介意話我知喎..

22.05.2008 | 人間有情

中國四川512大地震, 其實我一直都唔想為呢件事情寫任何嘢, 因為實在係太悲痛.. 但係最近報章同電視嘅新聞報導, 總係離不開呢件事, 而且眼見好多人都好關心同支持四川省民重建家園, 覺得好感動..

之前聽聞如果喺自己個MSN名字前加返個彩虹, 即係加個(R), 咁MSN就會為四川災民捐獻一啲錢.. 不過只係限於中國用戶, 雖然如此我覺得no harm doing that, 當係響應呢個彩虹行動, 所以你有冇留意到我MSN其實都加咗個彩虹啊??

跟住就見有人發起為四川災民哀悼三天, 雖然我覺得我依家先提返起已經有啲遲, 但係總叫做有心.. 所以今日特別將自己呢個blog整成黑白色, 將所有色彩都退掉, 今日開始為期三日, 以響應呢個哀悼行動.. 如果閣下想話睇返original嘅彩色相片, 可以直接click入幅相度..

為四川大地震罹難者及家屬哀悼.. 天災不仁, 人間有情..

21.05.2008 | 由幾時開始??

唔記得由幾時開始, 我培養咗每日都寫blog嘅習慣, 唔係多, 一日都係慣性地一個post.. 有時靈感一到, 可以好流暢, 寫得猶如行雲流水.. 有時卻又一片空白, 諗極都諗唔到要寫啲乜好.. 不過發現而家可以寫得好長, 比起以前一般寫嘅篇幅應該有double囉至少..

唔記得由幾時開始, 我開始中意放好多相喺個blog度, 而且開始將自己副尊容公諸於世.. 開始寫blog嘅時候, 我係純粹一文字掛帥, 因為想簡單啲..不過後來發現放幾幅相上去, 一來個layout睇落會省鏡啲, 二來圖文並茂應該會精彩啲.. 而且已經唔介意自己個怪雞樣show畀全世界人睇, 呵呵~~

唔記得由幾時開始, 我每逢食親好嘢, 都會好自然咁拎部手機出嚟, 滿心期待咁準備為啲食物影靚相.. 每次都要朋友等我影晒相, 覺得滿足之後先可以起筷食嘢, 有時真係覺得唔好意思架.. 不過為咗個blog可以同大家分享美食, 我係在所不辭架.. 所以友人小年就係因為咁樣, 形容我個blog係個美食blog!! OMG.. 係咩??

唔記得由幾時開始, 我每日上網第一件事(其實係一得閑), 就係去自己個blog查吓睇有冇新留言.. 留言其實真係一種好大嘅鼓勵, 因為實實在在話我知有個知音人睇緊我個blog, 而且有感而發.. 每一個留言我都會好珍惜, 都會畀心機一一回覆囉.. 最近幸得幾位朋友赴湯蹈火鼎力支持, 真係要講聲多謝晒啊~~

20.05.2008 | 公干回憶錄

過去幾年, 都有機會出國公干一段時間.. 唯獨係今年已經年中喇, 都始終未踏出本土半步(偶然去吓新加坡嗰啲唔計), 突然間好懷念之前趁出國公干之余, 自己四週圍去遊覽嘅時光..

[2005 迪拜] 去迪拜嘅時候仲係替舊公司賣命, 好記得係因為同老細發爛咋(用劈炮威脅)先至有機會.. 斷斷續續一共去咗4次咁多, 每次都會逗留3個星期, 所以每次週末都會週圍去玩.. 印象最深刻嘅當然就係聞名于世嘅7星級酒店Burj Al-Arab啦, 真係巴閉到咧, 淨係得個係佢側邊影返幅相留念嘅機會囉.. 跟住就係個沙漠追蹤喇, 坐喺四輪驅動車入邊橫跨沙漠, 真係人生一大體驗噃.. hmm, 掛住嗰邊嘅烤肉同埋humus, 好好味..
[2006 印度] 一路嚟都好想去印度, 加入呢間公司大概6個月後, 就有呢個機會喇.. 記得當時有個training, 可以揀去香港或者印度, 結果我揀印度, 攪到成地眼鏡碎, 哈哈.. 5日嘅training之後, 我自己一人單槍匹馬extend多4日遊覽新德里, 阿格拉同埋齋蒲爾三個城市, 諗返起都覺得自己沙膽.. 呢次旅行真係畢生難忘, 因為印度生活同文化真係令人咋舌, 正如印度政府推廣該國旅遊業嘅口號Incredible !ndia咁, 好鬼貼切囉.. 最難忘當然係舉世聞名嘅七大奇觀之一嘅泰姬陵Taj Mahal啦, 真係唔係講笑架, 好靚好令人嘆為觀止嘅一座建築物.. 有機會去印度, 一定唔可以錯過, 錯過就表示呢個印度之旅唔完整喇!!
[2006-2007 香港] 緊貼印度之旅後, 就被公司派去香港分公司駐紮, 呢次一共逗留10個月咁耐.. 香港有乜其實都唔駛我多作介紹, 當然香港吃喝玩樂係一種享受, 不過令我更加難忘嘅當然係喺香港返工賣命嘅日子啦, 仲有一位好close嘅同事兼老友(佢今日喺門口跣親, 希望大人BB都平安啦).. 記得我當時真係完完全全融入咗香港嘅生活, 可以話已經愛上咗呢個城市, 而家仲會周不時掛住架.. 如果當初唔係決定回流大馬, 我諗我而家已經喺香港定居喇, 哈哈~~ anyway我冇後悔自己嘅決定, 能夠去到香港生活係一個好寶貴嘅人生經驗, 真係畀咗好多回憶我架..

19.05.2008 | 貼近大自然(二)

第二朝起身食完早餐之後, 就出發開始今次旅程嘅重點項目喇.. Chilling River and Waterfall, 呢個track好好玩架, 除咗要行山林小徑之外, 佢最吸引嘅地方就係要涉水喇, 因為條山溪委婉曲折, 所以整段track一共要越過溪流6次咁多(係唔係好興奮咧??), 係要準備濕身架喇.. 其實唔簡單架(尤其對我呢個amateur嚟講), 有部份徑段蕨類植物縱生所以非常之狹窄, 攪到我雙肉腿損晒添啊陰公.. 涉水過溪水深可以去到我條腰位, 而且溪底時沙時石, 水流都頗急, 所以要非常之小心, 一叉錯腳步, 就好危險架喇.. 順便一提, 一路上見到好多稀有植物, 例如豬籠草啦, 我咁大個仔真係第一次見咁多囉..
條徑終點去到一個瀑布, 都有成五六層樓高嘅, 不過唔係雨季所以氣勢一般.. 本來以為可以喺度享受時光, 不過因為公共假期關係, 比預料中多人, 所以都只係稍作逗留, 就沿路折返去原點喇.. 不過途中揀定一段溪流, 週圍比較寧靜, 放下行裝享受大自然水療按摩.. 呢條溪比起噚日條個水流急好多, 水療按摩之際因為唔小心仲爭啲被沖走添, 幸好大隻友人及時英雄救俊(哈哈), 在下先可以安然無恙, 阿彌陀佛..

兩日一夜新古毛之旅, 就係咁樣喇, 雖然未能夠夜訪熱水泉, 不過都覺得好開心好enjoy囉.. 齊揮開灰塵, 逃離鋼筋森林, 享受大自然近距離接觸.. 我覺得下次有機會, 我都會再去囉, 尤其呢個涉水track我非常中意.. 其實我覺得自己都幾中意呢類戶外活動嘅, 下次我想去camping(咁大個人未試過)喎, 我諗應該會好玩囉, anyone??

18.05.2008 | 貼近大自然(一)

趁住呢個long weekend同幾位朋友去咗一個叫做新古毛(Kuala Kubu Bharu)嘅地方.. 之前真係未聽過呢個地方, 係個小鎮仔, 不過因為呢度有個大水塘, 山溪同瀑布, 所以都吸引好多喜愛遠足行山涉水嘅朋友前來.. 我自認唔係一個戶外活動癡, 但係又唔會抗拒呢一類活動, 所以今次一早答應友人邀請, 實行過個特別啲嘅週末.. 今日早上出發, 大概一個小時到達, 食咗晏check-in酒店稍為小休片刻後, 就前往Kutu River.. 揸車去到某個村落, 跟住就需要步行上山, 沿路都係樹林, 大概行咗20分鐘就抵達中游, 於是就落水玩喇.. 因為山溪中有好多石頭, 所以瞓喺石縫之間, 畀水流沖打, 就猶如天然水流按摩咁, 真係超過癮.. 啲山水好冰凍架, 太陽高掛, 成個身體浸喺水內, 嗰種涼沁沁嘅感覺, 真係好舒服囉.. 人在溪水中, 遙望四週係山林一片, 仰望天空係一片片白雲, 好貼近大自然..

逗留大概一小時之後, 就揸車上去某座上頂, 俯瞰水塘.. 個水塘都幾大架, 唔知我屋企啲水係唔係呢度嚟嘅呢?? 不過當時天色唔好, 個水塘睇得唔係好清楚.. 之後返酒店休息, 跟住食晚餐, 跟住一心打算夜遊呢度嘅一個熱水泉.. 夜遊熱水泉係友人一早高調計劃非做不可嘅活動, 不過晴天霹靂啊, 去到嘅時候, 先發覺個熱水泉因為某些建築工程進行中而(暫且??) 關閉咗, 連個入口都已經封埋!! 好失望囉..

就咁, 呢個就係新古毛之旅第一日, 帶著可惜嘅心情返酒店瞓覺~~

17.05.2008 | 又食飯又睇戲

隔離呢幅相, 硬係將碗拉麵同張電影poster湊埋一齊, 感覺怪怪地, 但係個message就係想話畀你知, 在下今日又同朋友去食飯睇戲囉..

事關下星期一係公共假期, 所以好多外州朋友都趁呢個long weekend過嚟KL玩.. 所以今日就約咗佢哋一齊食飯睇戲, 係架喇, 又食飯又睇戲啊, 吉隆坡真係冇乜可以做架喇, 哈哈..

其中一位朋友話想食壽司, 所以就去元氣迴轉壽司晚餐.. 叫咗份雞扒拉麵, 仲食埋幾件壽司, 麻麻地, 不過對呢間壽司店都冇乜要求, 我嘅目的其實好簡單, 是但醫飽五臟六腑準備睇戲係啦..

齣戲前日熱辣上映, 之前睇trailer都已經mark定非睇不可, 今日用咗好長時間先喺網站成功預定戲飛, 因為實在係太受歡迎喇.. 結果開頭成20分鐘悶到我真係瞓著, 隔離友人仲誇, 簡直就係索性瞇埋眼瞌吓添.. 不過之後劇情開始緊張, 開始有打斗場面, 千軍萬馬加上適量CG, 都幾OK囉.. 戲中比較吸引我嘅就係啲人性化嘅動物, 好得意喎, 尤其隻老鼠仔.. 總括嚟講未算得係精彩之作, 不過如果你有睇第一集, 咁就應該去睇第二集喇, 得得地架..

睇完戲, 朋友們依然精力十足, 興致勃勃話直落clubbing.. 我雖然有啲攰, 都心郁郁想join架, 但係諗到聽日約咗其他朋友去行山, 結果都係決定返屋企早啲休息好喇.. hmmm, 突然間覺得自己好健康噃--唔落club反而早瞓去行山, 哈哈~~

16.05.2008 | OMG!!!

OMG, 真係天下奇聞啊.. 各位女士, 如果你唔知呢兩幅相係咩, 話你知, 就係男廁入邊嘅尿兜, 係畀男人企住小便嘅.. 頭先上廁所諗住方便, 點知入到去, 見廁所全部尿兜--係, 係全部】--都塞晒, 嘩, 真係該猥咯, 攪咩啊?? 就竟係邊位偉大嘅男人攪到全部尿兜都塞晒架?? 真係不得不送個服字過佢..
其實尿兜阻塞同買廁所阻塞係一樣咁恐怖架(雖然話尿兜is for liquid only唔會有其他懸浮物體).. 各位食飽晒都消化晒喇呵?? 咁我繼續形容.. 成兜嘢「黃噙噙」咁積埋喺度, 你都唔好話唔反胃.. 尤其最入邊嗰隻, 個自動沖洗喉不停係咁流水出嚟, 遲啲實瀉晒出嚟啦陰公!! 咪喇, 一陣都係去第層廁所為妙喇, 費事我當場反胃嘔晒隔夜餸出嚟啊~~

15.05.2008 | 瞓覺論

呢幾日都與同事ST一齊奔波勞碌, 晨咁早就去到個客度報到, 成日就喺嗰度畀客戶training.. 其實我都係連續三日咋囉, 真係難為佢連續一個星期都要咁命苦.. 頭先同佢傾偈嘅時候, 得到以下幾個同感/結論..
  • 完成三日training, 其實最艱苦嘅任務就係要晨早起身囉, 其他嘢真係難唔倒我哋..
  • 呢幾日, 其實無論早瞓或夜瞓, 都唔關事.. 我哋覺得攰係因為每朝都要晨早起身..
  • 平時返工, 永遠唔捨得起身.. 唔駛返工嘅日子, 反而會自動自覺好早好早起身..
  • 返工嘅時候往往覺得好眼瞓, 好辛苦先捱得到放工, 返到屋企後反而變得龍精虎猛..
  • 呢幾日去客戶度, 雖然短短十數分鐘車程, 但係都好把握喺火車內趁機瞌吓嘅時間..

14.05.2008 | 我身上那香水味

唔記得自己係幾時開始有用香水嘅習慣, 粗略估計應該係十幾年前啦.. 當時啱啱升上學院, 就用自己儲埋嘅零用錢去買咗支Tommy Hilfiger, 係我生平中第一支自己買嘅香水.. 跟住之後就有啲自己買, 有啲朋友送.. 印象中用過以下呢幾個牌子嘅香水, 其實應該唔止咁多, 應該仲有啲記唔起嘅遺珠..
我揀香水最緊要係個味道陽光+清新, 太濃太濁太甜太粉我一律唔會中意.. 以上幾款香水大多數都係僅此一次, 因為市面上實在係太多牌子, 層出不窮.. 除非係我真係超中意嘅我先會再下一城, 當中Dior Higher(第二行第一隻), cK Truth(第一行第二隻)同埋Polo Blue(第一行第四隻)我係用超過一次喇.. 仲有, 通常我都會買細支裝, 因為我習慣換香水, 唔想一大支綁死成年, 咁樣好悶, 哈哈!!

我下一個目標應該會係Bvlgari Aqua(第四行第二隻)囉, 多謝友人ET介紹, 我頗中意噃(不過講真, 啲所謂嘅Aqua version, 好難整得唔好囉).. 話是話, 我下個月就生日喇, 睇吓有冇邊幾位朋友樂意畀呢個驚喜我咧?? 呵呵呵~~

13.05.2008 | 勁攰

今日覺得好眼瞓好攰.. 噚晚瞓得唔好, 整晚輾轉難眠, 今朝又晨咁早起身, 走去冇雷公咁遠見客.. 成日就喺個客度, 都仲好, 未至於咁攰.. 但係下晝離開嘅時候, 漸漸地對眼毫不受控制咁要瞌埋, 上咗火車搵到個位子坐, 即刻瞓著直到終站.. 嘩, 真係好耐好耐都未試過咁樣, 落車後同事見到我副尊容都忍唔住話我個樣好殘囉.. 真係失禮晒, 就係唔知點解, 好想瞓覺.. 不得不認老人家唔襟捱, 一晚瞓得唔好第二日就搞成咁嘅地步.. 安排咗一連三日需要晨早去報到, 仲有兩日要咁樣, 好陰公啊..

我依家真係好眼瞓, 但係都希望每日抽點時間寫blog (好似已經commit咗自己畀個blog咁, 哈哈), 寫完我要去好好地瞓番個靚覺喇, 早抖各位朋友..

12.05.2008 | 大唔透

工作檯面上有呢幾位朋友仔陪伴住我.. 有時做嘢做到悶悶地, 就會睇吓佢哋, 跟住個人都會輕鬆啲.. 三十幾歲大男人竟然會中意埋呢啲得意嘢, 天慌夜談係嘛你覺得?? 唔係嘅, 可以保留一點點童心, 有啲大唔透, 我覺得幾好吖.. 所以可以話: a boyish man i am, 嘿嘿嘿..哪怕你已經唔記得佢哋係乜水喇, 喺度同各位逐一介紹我啲朋友仔:
[1] Taz: 唔好見佢成日擘大口展露利牙, 凶神惡殺個樣, 其實佢好可愛架!!
[2] Rubber Duckie: 永遠笑口舐舐, 好開心好enjoy嘅樣.. 係唔係好精靈呢??
[3] 米奇老鼠: 唔駛多介紹啦.. 難道你冇童真??
[4] 唐老鴨: 永遠一副傻更更嘅樣, 尤其呢個角度呢個眼神, 似係同你哀求啲咩咁, 好得意囉..
[5] Elmo: 芝麻街主角之一, 每日都會用呢隻杯食早餐飲嘢架..
[6] 呢個真係唔知乜名堂喇.. 有啲似戇豆先生隻熊仔, 不過其實係街坊版熊仔鎖匙圈一隻..

11.05.2008 | 音樂.. 饗宴

噚晚同朋友飯局, 意外地發現某某電台喺間商場舉辦10週年戶外直播.. 見到全台DJ盛裝打扮共鑲勝舉, 男嘅西裝女嘅晚裝咁, 我覺得同整個環境氣氛有啲唔係好match囉, anyway人哋為隆重其事就值得鼓勵嘅.. 咁啱我哋間餐廳就喺正個舞台側邊, 於是好就腳咁坐低一邊食嘢一邊睇show.. 其實都唔係一覽無遺嘅, 事關視線永遠畀啲棟篤企喺度唔郁嘅工作人員, 攝記, 實Q們遮擋, 不過勉強可以睇晒整個show嘅..食物方面, 其實叫咗幾味好普通嘅嘢食, 因為間餐廳真係都冇乜特別嘢揀(睇到餐牌先知係新加坡菜囉, 上咗車!!), 味道都係一般, 所以都冇乜好comments.. 加上當時就梗係專注睇show啦, OK啦, 聽到DJ熟悉把聲, 終於都畀我見晒該電台DJ廬山真面目咁囉.. DJ之外, 就梗有歌手做表演嘉賓啦, 全部都係local新人, 所以uncle真係唔識佢哋..

整晚意外驚喜其實係個壓軸嘉賓, 竟然請到由台灣遠道而來嘅吳克群(都幾好樣喎)坐鎮, 嘩嘩嘩, 呢位歌手我識佢喎.. 本來悶悶地嘅show煞時變得興奮囉, 壓軸嘉賓當然唔少嘢, 唱咗四首歌, 其中一首仲係今周電台流行榜冠軍歌添.. 哈哈, 呢個形式嘅合作, 可謂互利互惠囉我覺得..

噚晚個飯局就係咁喇, 食得好一般普通, 不過尚好有個意外電台戶外show睇, 其實咁大個人都係第一次正式睇晒一場類似活動囉, 算係意外收穫啦..

10.05.2008 | 擾人清夢

最近如果時運低嘅話, 大概清晨六點鐘嘅時候就會畀某個「狂躁」聲音嘈醒.. 唔知幾時開始屋企附近無啦啦棟咗件清真寺出嚟, 結果依據回教教規, 每日五次勢必要高調mark盡個loudspeaker播放經文誦讀.. 其實喺呢個「宗教自由」嘅回教國家都30年啦, 我唔係唔知呢種高調播放經文游戲喎, 其實可以話係習以為常..只不過呢個主持真係好唔掂囉, 同其他比較起嚟, 我覺得係「狂躁」多過一切囉, 唔知點講, 總之就係聽後覺得好心煩..

我其實唔係針對宗教課題, 我都接受宗教自由, 呢個播放經文誦讀係其宗教活動, 我都會尊敬because you have the absolute and lawful rights to do so.. 但係今次我係對人囉, 可唔可以請過個主持嚟誦讀經文啊, 大慈大悲啦真係?? 相信喺個「互相尊重」嘅社會內, 佢都唔想日日擾人清夢架??

09.05.2008 | 人潮洶湧

頭先收到友人WS電郵, 北京奧運聖火傳遞噚日去到深圳, 電郵附件見到以下呢幾幅相.. 嘩, 係誇張多人囉, 啲人唔駛返工咩?? 睇情況, 好似仲誇張過黃金週囉真係.. 我可以想象當時個情景, 聖火就見唔到喇, 反而會因為人潮逼硤而成肚火囉.. 我喺度諗, 完事之後啲人點樣疏散啊?? 安全返到屋企駛唔駛夜晚啊??
單係一個深圳就如此萬人空巷, 到時8月8日奧運開幕典禮, 如果全中國13億人口都嚟齊晒觀禮, 再加上全世界各地遊客, 會唔會逼爆北京架?? 到時每個人情緒高漲, 你推我攘, 好有足夠力量推冧個場搞出人命噃!! 唔係講笑, 我真係相信眾人有咁嘅力量架..

07.05.2008 | 關太廚房

各位朋友, 唔好意思, 今日又要寫美食喇, 哈哈.. 咁民以食為天, 有好嘢就同大家分享架啦, 係嘛?? 其實都冇乜特別, 頭先同朋友食晚飯, 突然間好想食關太廚房(Madam Kwan's)嘅Nasi Bojari.. 結果我未開口, 友人就提議去嗰度食, 嘩, 真係心有靈犀, 唔駛諗啦, 一於殺佢啦就..

平時嚟到都一定需要等位, 不過今日好彩唔駛等就有位, 入到去間已經九成滿喇.. 坐咗落嚟, 餐牌都唔駛睇已經知道自己要食乜喇.. 落咗柯打, 食物離奇地火速送上, 可能係鎮店之寶嘅關係啩?? 份嘢其實都頗大份, 三色飯, 酥炸雞肶(好大隻), 牛肉rendang, sambal洋蔥蝦, 半個水煮蛋青瓜番茄伴碟, 好豐富啊..

相信呢間Madam Kwan's嘅呢味Nasi Bojari, 各位都應該食過喇, 冇乜特別亦無需我多作介紹, 不過好耐都冇幫襯過之後, 仍然係保持水準, 食得好開心好滿足囉我..

06.05.2008 | 嚟出番身汗啦~~

公司對面最近新開咗間gym, 咁新開張就梗係大派free day trial invitation啦.. 我哋上個星期book咗全體同事一共13人今日放工一起去free day trial, 其實當係又一次嘅get together囉, 全部人報名參加今日嘅body combat class.. 於是六點鐘準時放工, 即刻嗱嗱聲飛奔過去對面..

各位同事應該都係第一次參加呢個class, 因為我哋真係跟個導師跟到好吃力, 而且好多時候係企定定睇住個導師唔知道要做咩好.. 好搞笑囉, 哈哈!! 我其實好耐都冇上過combat class喇, 所以今日有啲生疏, 加上個music真係好麻麻地, 未能盡興囉.. anyway, 確實係出咗一身汗, 覺得有郁動到[因為uncle覺得週身酸痛啊陰公], 算係唔錯嘅..

class完畢之後, 就把握機會成間gym嘅器材都試勻佢, 唔錯囉我覺得, 都幾齊全而且至煞食係新吖嘛.. 仲有仲有, 呢間gym有wall climbing係其他地方搵唔到架, 型啊.. 不過都有啲唔係幾中意嘅: 空調唔好, 成個gym好悶熱.. 全間gym搵唔到一個鐘睇時間.. 爛巴閉用啲會轉色燈, 我覺得有啲無謂.. 浴室間隔同門全係毛玻璃好透視, 駛唔駛咁香艷啊?? 不過基本上, 呢間gym係唔錯嘅, 而且我都係free day trial, 就唔好諸多挑剔啦, 唔駛錢你仲想點啫??

05.05.2008 | 那首歌

忽然間記返起那首歌.. 十幾年前每個星期都會五千人大合唱一次嘅一首歌, 當時覺得冇人appreciate佢, 因為要唱得起呢首歌, 唔係人人都有嗰種功力架.. 記得某年音樂堂考唱校歌, 結果好多同學因此而肥咗音樂呢科, 我記得當時我運數好, 僅僅合格, 真係中學史上一個污點囉..

我們是 馬來西亞的好兒女
我們是 馬來西亞的好兒女
團聚在 馬來半島的最當中
禮義廉恥 是我們做人的傳統
嚴肅活潑 是我們學習的作風
世界文明 正待我們 迎頭趕上
歷史使命 正待我們 分起擔當
為了祖國 為了人民
認定目標 向前向前 進
雄心似火 壯志如虹
雄心似火 壯志如虹 看
中華兒女 吐萬~~ 丈~~ 光~~ 茫~~

嗱嗱嗱.. 仲記唔記得點唱啊?? 就係最後一句, 一路升key一路拉長, 好多人都係拉牛上樹, 有更甚者簡直就係破晒喉嚨走晒音, 有自知之明嘅人就會索性唔唱.. 雖然每次唱到最後都會聽到好多怪聲, 但係大家都係見怪不怪, 因為如果笑人就只不過係五十步笑百步咋囉.. 好一首高難度校歌~~

04.05.2008 | 一日兩餐.. [麵]

有位JB朋友過咗嚟KL玩, 今日趁佢臨走前食餐晏小聚一會, 求其喺Pavilion個foodcourt度搵啲嘢食.. 見到某位朋友話好唔錯嘅Mee Jawa, 個餐牌賣相都幾吸引, 於是就唔諗咁多要咗一份.. 結果有期望就有失望, 好鬼麻麻地囉.. 尤其個芡汁就真係好差, 好似湯水咁, 真係非常之唔好喎(以前友人帶我喺JB食嘅好佢幾倍囉).. 而且又賣得超貴, 一兜咁嘅嘢要RM8.30真係食水好深, 下次真係咪鬼幫襯..

與友人道別後, 就自己去gym跟住shopping(呢啲咪就係一支公可以做到嘅嘢囉, 寂寞, 哈哈!!).. 做完gym之後鬼咁肚餓, 忽然間流晒口水想食咖喱麵, 於是就醒起KLCC頂樓個foodcourt, 以前喺KLCC做嘢都不時會幫襯架.. 覺得佢好香濃好惹味, 啱晒我口味, 一碗落肚, 即刻覺得滿足感十分.. 一碗RM5.80同街邊比係貴啲啲, 不過同頭先嗰餐晏比, 我係畀得一萬個心甘情願囉..

03.05.2008 | 唱K+行街+睇戲+食飯

今日係友人狄波拉生日, 多謝友人「飛びたい豚」熱心安排, 於是又可以同一班頗耐冇見嘅同學仔小聚一番.. 冇乜特別精心炮製嘅節目, 都係例牌唱K+行街+睇戲+食飯, 三十幾歲人無謂再搞咁多花臣囉, 哈哈.. 喺度祝狄波拉生日快樂先..

[唱K] 去咗Neway K Lunch, 友人去到拎房時先驚覺原來K Lunch時段得嗰兩個鐘, 忽然晴天霹靂.. 加上我未能準時赴約, 結果去到時得返45分鐘又要食嘢又要唱歌, 都幾係嘢~~

[行街] 唱完K(唱完?? 我查實都未開聲囉)離睇戲仲有啲時間, 救去行吓街啦.. 第四次試著我之前好想買件褲, 今次友人都覺得好睇, 不過最後覺得都幾貴, 所以最終都係買唔成.. 結果大家去食冬甩, 今日竟然離奇地唔見誇張人龍, 所以先有幸食到..

[睇戲] 又要喺度多謝友人「飛びたい豚」一聲喇, 今日佢大發慈悲請睇戲, 真係感激不盡!! 係睇《Iron Man》, 都幾得喎齣戲.. 雖然有某些情節係誇咗啲, 不過始終係漫畫改編, 所以覺得無傷大雅, 我好enjoy噃.. 係喇, 提醒大家如果去睇嘅話, 唔好一出字幕就急急腳走人噃, 出晒字之後(係好長好長個list囉其實)仲有一分鐘戲為續集伏筆架..

[食飯] 睇完戲差唔多係晚餐時間, 行勻成個商場, 最終大家扑錘「籠的傳人」.. 叫咗小籠包, 乾煸四季豆, 上海熏魚, 擔擔麵, 失傳鎮江骨(哪哪哪, 話明失傳, 咁呢兜嘢點嚟架??), 東坡肉炒飯.. 都幾好食啦, 而且服務唔錯, 我哋食完後齋坐個幾鐘繼續傾偈, 侍應都不厭其煩不停為我哋添茶.. 最後發現出邊成棚人喺度等位, 我哋先埋單走人..

02.05.2008 | 雜記三則

雜記(一)
呢幾日又唔係烈日當空吖, 但係就硬係覺得好悶熱囉.. 尤其公司入邊, 真係完全feel唔到冷氣, 搞到我要擺部私人風扇係側邊降溫.. 前日投訴管理處, 派人上嚟整過後, 忽然凍到入心入肺, 但係一個公共假期返嚟之後, 點解又係咁熱嘅??

雜記(二)
頭先去剪頭髮, 個hairstylist大大話話我都幫襯佢五六年喇, 可以話係御用囉.. 點知佢剛才驚奇發現我頭髮無端端變攣底喎!! 嚇?? 玩嘢咩?? 我頭髮天生不嬲都係直架, 點會無端端變攣架?? 冇可能, 梗係佢搞錯定啦.. 不過啱啱有隻烏蠅盲縱縱咁飛入我頭髮入邊, trap咗係入邊係咁嗡嗡叫, 莫非我頭髮今日真係有問題??

雜記(三)
今日返工真係好鬼唔productive, 加上個頭無啦啦赤赤地痛, 個人又懶懶地攰攰地冇乜心機, 公司又靜嚶嚶咁(嘩, 發覺我都好多藉口囉, 唔好意思).. 所以今日真係concentrate唔到, 成日都只不過打咗幾份document瑟畀個客, 喺度等收工.. 唔通係因為噚日一輪清閑過後, 聽日又係週末嘅關係??

01.05.2008 | 閑情一日

好耐都冇公共假期喇, 對上一次應該係個半月前.. 今日五一勞動節難得可以放假, 其實之前已經好期望架喇, 不過係星期四半天吊, 聽日仲要返一日工, 跟住又週末喇.. 其實冇乜plan嘅話咧, 我覺得中間忽然放一日假都OK嘅, 小休一日再繼續衝刺吖嘛.. 反而假期太長又冇乜plan嘅話, 我覺得嘥咗嗰日假期囉..

今日算係閑情一日咁囉, 冇咩精彩事情發生, 但係又不至於悶到發毛啦..
[10:00] 瞓醒.. 梳洗後就上吓網, MSN同朋友傾偈
[11:30] 家姐買咗「辣死你媽」返嚟, 個portion 好大囉, 食到好滿足 :p
[12:30] 食玩brunch睇吓電視之後, 上樓又再繼續上網MSN
[13:45] 唔好再虛度光陰喇, 決定去gym出一身汗
[14:30] 因為假期關係, gym冇乜人, 所以可以盡情workout
[16:30] 做完gym, 行去隔離商場, 再三去試睇之前好想買嘅兩件褲, 最後都係冇買..
[17:30] 約咗幾個朋友飲茶(應該仲算係下午茶囉)..
[19:30] 傾咗頗耐(因為有朋友嘅朋友再朋友join in), 終於可以去食晚飯喇..
[21:00] 飯局完畢, 啲嘢食大家都唔係好滿意, 但係enjoy傾偈囉..
[21:45] 返到屋企, 沖完涼再睇一陣電視, 跟住上網寫blog
[23:50] 寫完今日嘅post, publish上blog.. 等待就寢