設定貼子語言 Set language for posts :
中文
English
中英雙文 English & Chinese

17.08.2007 | 毛骨聳然

噚晚無意中睇到個台灣清談節目, 唔記得叫咩名喇, 主持人亦都唔識, 但係個節目就請嚟幾個從事冷門職業嘅嘉賓, 講咗啲關於往生嘅話題.. 嘉賓有個喪禮禮儀師, 有個係拾骨嘅, 有個係壽板店老闆, 其他兩個唔記得係咩行業, 但係就同呢門嘢有關啦.. 佢哋講啲聞所未聞嘅嘢真係令我大開眼界, 對於一啲長輩定下要遵守嘅禁忌都有解答, 真係上咗好寶貴嘅一堂.. 其中個禮儀師講咗個令人毛骨聳然嘅實例, 係咁話嘅:

話說農曆七月有個人諗住去佛廟拜拜, 點知坐咗部的士突然間半途死火, 撻極都撻唔著, 當時地點正好喺間殯儀館正門, 於是司機覺得唔老利就寧願唔收錢都唔繼續載喇, 個人覺得反正唔收錢而且間廟就喺附近, 所以當然樂得落車自己行路去啦.. 點知佢一落車閂埋門, 部的士好離奇咁即刻撻著可以開動喎..

正喺的士開走, 個人打算向前行嘅時候.. 有架黑車正送緊副空棺去某治喪處, 紅燈轉綠燈準備開車時, 點知就咁啱唔知點解副棺突然由後邊滑落嚟.. 個人見此於是就即刻跑埋去幫手擋一擋, 司機落車後仲幫手司機講副棺推返入車尾擺好.. 個人覺得今日無啦啦發生咁嘅嘢, 突然心裡一寒, 記得自己師父曾經講過呢種「空棺煞」係可以用棺木屑嚟化解嘅, 於是就同司機大佬要啲嚟擋煞.. 但係霎時間邊有棺木屑啊?? 於是司機就喺副空棺唔顯眼處就地取材, 刨咗忽木片畀個人當係棺木屑畀佢擋煞喇..

懸異故事就由呢一舊就地刨出嚟嘅棺木片開始喇...

一切過後相安無事直至半夜, 個人瞓瞓吓突然覺得自己好似畀人由後邊熊抱得有咁緊得咁緊, 呼吸非常困難, 而且又覺得週身好似畀好多嘢喺度拉扯咁.. 心感不妙就決定去間佛廟鎮驚, 去到佛廟後, 突然間啲燈全部一盞盞息埋!! 個人見咁猛, 於是就決定去搵師父打救..

喺駕駛途中, 突然間又再覺得自己好似畀人由後邊熊抱得有咁緊得咁緊, 呼吸非常困難, 而且又覺得週身好似畀好多嘢喺度拉扯咁.. 個駕駛盤完全唔受控制, 自己又不由自主地係咁踩油.. 朦朦朧朧中個人好似聽到後邊有警車追隨, 但係已經有點神志不清喇, 最後架車撞落個石墩上.. 因為高速撞落去, 個衝擊力大得將佢拋出車外..

如果你仲係喺度睇緊嘅話, 你一定會以為個人實係凶多吉少啦.. 但係唔係噃!! 不如繼續講啦..

個人被拋出車外後, 朦朦朧朧中聽到警察問佢有冇事, 駛唔駛送佢去醫院.. 個人即刻相當清醒話畀警察知佢撞鬼, 想警察幫手叫部車載佢去搵師父.. 個警察竟然唔開張罰款單畀佢, 仲哦咗聲截咗部的士車佢去搵師父..

如果你仲係喺度睇緊嘅話, 你一定有疑問點解警察唔抄牌唔罰款, 反而好順攤咁哦一聲就放人?? 個嘉賓解釋話其實個警察晨早喺後邊追隨嘅時候, 就已經親眼睇見一切事情嘅發生, 所以咪就係咁囉..

最後個人終於搵到佢師父, 將事情經過一五一十咁全盤話畀師父知.. 結果師父解釋話, 個人要棺木屑擋煞係啱, 但係就唔應該要啲已經有主人嘅嘛.. 而且空棺最容易招惹啲未能妥善安葬嘅遊魂, 所以啲遊魂見個人帶住塊棺木片, 就當佢係新朋友對佢又攬又錫啦.. 其實就出於一片友善而唔係想奪命, 所以個人被拋出車外都一啲都冇事..

如果你係可以全篇睇晒嘅話, 好多謝你嘅耐性, 因為呢篇嘢實在好長, 勁破記錄地長.. 其實噚晚個嘉賓真係講得七情上面, 我空聽時都已經打晒冷震, 我相信當時現場觀眾一定係覺得好寒.. anyway, 睇完就當係個故事算啦, 唔好記實喇, 百唔禁忌啊~~
Rate this post:

4 comments:

  1. I finished the whole page but i couldnt get the exact feel about it. I have difficulties in reading Cantonese wording. So i have a request here. Can you please 口述一番the whole incident when we get to meet up? Anyway, thank you in advance first : )

    ReplyDelete
  2. well.. first of all, thanks for the patience to finish reading this post.. i know it's not easy, hehe!!

    certainly my writing skill is a crap!! but sure if it's words from mouth, it would be really creepy (i hope)..

    ReplyDelete
  3. 天啊!always hate horror stories!

    ReplyDelete
  4. haha, it's not horror but i think it's interesting to know.. that talk show is indeed quite nice to watch.. well, let me tell you more when we meet up later, hahahaha!!

    ReplyDelete