設定貼子語言 Set language for posts :
中文
English
中英雙文 English & Chinese

30.09.2007 | 曼谷符碌(1) 週末市場

今日晨早搭早機去曼谷, 展開我為期九日嘅處女曼谷遊.. 因為第一次搭廉價航機AA, 所以都有啲擔心到時安危問題, 不過都係多餘啦, 因為乘客唔多唔駛爭爆頭搶位坐, 天氣良好安全抵達.. 時差一個小時, 所以到達曼谷就賺咗一個小時時間, 酒店check-in後稍為小休片刻, 泰國同事就帶我哋去個Chatuchak週末市場行吓喇.. 呢個市場果真唔係惹小, 大到如果你要每一攤位都行嘅話, 行三日三夜都行唔晒啊.. 因為得週末先開, 所以真係人潮洶涌..
呢個市場乜都有得賣, 服飾, 手工藝品, 傢俱用品, 寵物, 當然就少不了食物啦.. 最吸引我目光就係啲林林總總, 種類繁多嘅街頭小食喇, 樣樣都新鮮新奇, 好想每樣都試但係個胃負荷唔到.. 都有見到啲成個人面咁大嘅烤魷, 同埋鮮炸蟋蟀蝗蟲草蜢之類嘅嘢, 在下確係不敢恭維喇.. 不過泰國同事介紹嘅烤蕉, 面頭淋上啲類似caramel嘅嘢, 的確幾好味.. 跟住落嚟就去shopping, 走馬看花Siam Paragon, Siam Center, Siam Square, Siam Discovery, MBK.. 晚餐就食泰國餐, 冬陰公, 木瓜沙律例牌泰國嘢, 為曼谷第一日劃上一個完美句號..

29.09.2007 | 今日流程

[09:00] 晨早被小年SMS叫醒, 話要延遲約會半個小時, 仲好, 可以瞓耐啲
[09:20] 賤骨頭, 唔駛返工嘅日子總係想瞓耐啲都唔得..
[09:30] 落樓睇報紙, 睇完幾份副刊之後, 硬係揾唔到份主刊
[10:00] 無所事事, 又唔想食嘢又唔想瞓覺, 上返樓寫blog啦不如
[10:50] 出去街口的士站等小君接送一齊去小年屋企
[11:25] 抵達小年屋企, 食咗新鮮出爐客家菜板兩件, 就當係一日嘅早餐啦
[12:00] 抵達城中間嶄新商場The Gardens, 唔錯唔錯, 以後又多個新浦點喇
[13:00] 兩件菜板實在唔夠, 其實一路都肚餓架, 終於揾到間高尚茶餐廳午膳
[14:00] 繼續搏命shopping, 雖然兩手空空, 卻戥收穫甚豐嘅小年感到開心..
[17:00] 連行幾個鐘, 攰到趴地, 同小年小君分手, 我獨自繼續去gym操吓
[19:00] workout完畢繼續去買啲聽日飛曼谷需要嘅臨審嘢
[20:30] 因為回教徒開齋緣故, 被逼等到食肆人潮疏散後先有位坐低食飯
[21:30] 拖住疲累的身軀, 終於返到屋企喇, 即刻去沖個涼舒活吓筋絡..
[21:45] 聽朝晨早就要飛喇, 好煩惱地又要收拾行李喇
[22:30] 終於攪掂, 臨瞓前blog一blog先, 就係你睇緊嘅呢一篇喇
[11:05] 現時晚上11點05分, 寫完blog要上床瞓覺喇.. 祝我明日一路順風!!

28.09.2007 | 卡拉永遠OK

友人小年失驚冇神由上海返嚟, 前兩日忽然間MSN話佢人已在城中, 真係被佢突如其來嘅舉動嚇親.. 三秒鐘時間回過神後, 例排地安排今晚去唱K, 係啊, 佢每次返嚟都至少同佢去K場風雲涌現一次架喇.. 因為小弟禮拜日晨早要飛泰國曼谷, 所以就即興地今晚放工後, 約埋小君三人行轟炸K場, 哈哈!! 其實都幾中意呢段時間唱K架, 因為有免費浦飛食吖嘛, 雖則K場浦飛唔係話好食到吮手指, 不過都算係唔錯嘅情況之下, 最重要係唔駛諗爆頭要去邊度食嘢, 事關小弟對於食肆呢家嘢永遠一竅不通.. 通常一嚟到, 好攪笑, 唔係唱歌先, 而係哪哪臨去拎嘢食, 大概兩三round之後, 食飽個肚有啲力喇, 先至點歌開始唱K.. 今晚尚算可以短時間內開到聲唱歌, 不過略嫌時間唔夠, 得個三小時, 臨尾計好時間, 以古生首《勁歌金曲》帶出全完高潮, 唔夠喉.. 之後楊小姐以勁攪笑look出現銀幕提醒大家帶齊嘢走, 我哋三人仍然賴死唔走, 坐喺度睇電視, 大概20分鐘後, 部長入嚟摧場先至捨得離開.. 畀咗錢一於駛盡啦, 哈哈!!

27.09.2007 | 還看他朝PMP

噚日收到頂頭阿姐封email, 終於正正式式咁叫我好好安排時間去考個PMP返嚟.. 其實自己一路嚟都想考返個professional qualification, 當係提昇自我價值吖嘛, 因為得個Degree, 今時今日周街都係.. 難得公司又咁支持, 都當係個順水推舟, 雙贏局勢啦.. 成十年冇再讀書考試, 聽聞呢個PMP要上足35個小時堂, 跟住就要考個3小時嘅筆試, 十足十回到校園時.. 相隔咁耐, 臨老霎時間要咪書要考試, 實在係對自己嘅一大考驗, 因為唔知道仲會唔會有以前啲魄力, 以前考試前一晚可以通塞晒成本書入個腦袋度, 不過而架人老咗頭腦就唔係咁靈活架啦.. 最恐怖就係話個PMP試超難, 之前有個好叻好有經驗嘅經理級同事都肥咗佬, 都咪話唔嚇人啊.. 個certification仲話要至少3年PM經驗, 嘩!大佬, 我何來有呢個資格啊?? 有啲隱懮噃.. 不過點都好, 反正都已經決定要考佢返嚟, 就唔可以縮沙啦, 而家唔考仲要等到幾時啊?? 好, 一於畀返自己200%信心壯膽, 要相信自己有能力做得到!! 前途一片光明還看他朝, 支持我嘅朋友, 畀啲鼓勵嘅掌聲吖~~ 哈哈..

26.09.2007 | 益高亞太資訊科技

益高亞太資訊科技, 由七朵金花同埋三劍俠組成(見下圖), 唔駛多介紹, 全部都係省鏡靚人.. 上個禮拜五難得濟濟一堂, 精神可嘉地約埋著同一件制服(其實係公司新鮮出爐熱辣辣件大肚腩有身孕設計嘅company tee), 終於讓小弟有機會為每人影返幅個人寫真.. 呢輯個人寫真, 實屬本人某個計劃嘅第一部份, 第二部份就要勞煩各位精選一張自己認為最搞笑最薯頭最娘炳最老土最醜怪最騎呢嘅一幅舊照, 實行將兩幅相啪埋一齊嚟個before and after大比拼..
下一個timesharing主題, 就係要各位帶啲舊相返公司畀大家睇, 越唔似而家個樣就越好, 等大家可以笑返餐懵嘅.. hmmm, 頭先話自己精選一張出嚟, 倒不如就由大家揀張公認最最最最最XXX架啦.. 好玩{^@^}

25.09.2007 | 中秋佳節慶團圓

又係一年一度八月十五喇, 月亮圓又圓, 中秋慶團圓.. 其實對於中秋節都冇咩特別感覺, 淨係記得點燈籠食月餅, 況且已經N年都未提過等燈籠啦, 距離懶有文化搞月光會嘅學生時代都十幾年啦, 月餅嘅話最多偶然食一兩細塊, 因為覺得佢就係得個甜膩, 在下其實唔係好欣賞.. 今年公司搞個中秋活動, 有燈籠裝飾又有成咋月餅任食, 算係呢N年來近距離見過最多燈籠, 食過最多月餅嘅一年.. 雖然對於呢個節日冇咩特別感覺, 都會記得係邊月邊日嘅, 放工返到屋企, 呢一日實會有頗豐富嘅晚餐, 算係做節咁話啦, 一定走唔甩大魚大肉架喇..

中秋係華人傳統裡一個重大節日, 但係隨著社會成長繁榮, 覺得其重要性已經漸漸被淡忘, 在下應該就係其中一個喇, 十分之唔好意思.. 不過最近慶幸地發現某些商場都有舉辦啲大型中秋活動嘅.. 一連串文娛表演, 月餅製作示範, 歌星表演坐鎮, 雖然個主旨係要向友族同胞或者外國遊客宣傳呢個傳統節日, 但係都不失係個保留傳統嘅舉動嚟吖, 值得拍手鼓掌架.. 係度不忘祝賀各位中秋快樂, 男嘅就壯如吳剛, 女嘅就美如嫦娥啦~~

24.09.2007 | 冇得上網啊~~

今朝返到公司start咗部電腦, 諗住上網收email同MSN, 點知竟然上唔到網.. 經同事打電話畀個service provider後, 證實係個server down咗, 要等到中午過後先至可以恢復上網.. 食完晏過後, 再一次打電話過去, 話又再delay到下晝四點鐘.. 好喇, 四點幾鐘喇, 各位同事都萬分期待咁嘗試上網, 點知都仲係唔得.. 同事第三次打電話過去, 今次得到嘅答覆就係今日之內都唔會攪得掂喎!! 都唔明白究竟發生咩事咁大鑊, 攪咁耐都攪唔掂, 仲要整整一成日都down.. 冇得上網, 真係慘絕人寰啊.. 頂!! 真係有啲火..

好似未試過成日返工都冇得上網, 真係好唔方便, 因為平時做做吓嘢, 若果遇到需要clarify嘅嘢, 習慣會用最廉價快捷嘅方法--MSN或者email同事問清楚, 今日唯有靠電話聯繫, 基本上雖則不至於斷絕聯繫, 不過收送文件就變成一大問題.. 好彩公司唔係100%靠個互聯網揾食, 如果唔係一成日down咗個internet service, 實行損失慘重啦.. 唔知同個service provider份約有冇提到如果service down咗, 就要扣啲錢畀返我哋咧?? 我覺得好公道吖, 因為你一down咗就引起顧客好多不便, 如果唔損失都增加operational cost啦..

23.09.2007 | 子夜即食麵

夜闌人靜半夜點幾鐘, 本應係大覺瞓嘅時候.. 不過今晚有點失常, 躂落床但係又輾轉難眠, 可能晚餐食嗰碗麵未能夠支撐胃酸嘅狂勢攻擊, 所以忽然間好想食啲嘢.. 於事就入廚房揾嘢食喇, 不過大失所望一眼見晒冇乜嘢可以食, 三更半夜又費鬼時落街啦, 跟住打開個櫥櫃, 就係呢一包咖哩即食麵, 發晒光咁獨佔我青睬.. 別無他念嘅情況之下, 迅速開爐褒水落麵煮熟(手法十分利落), 其間靈機一觸, 打開雪櫃拎起粒蛋, 待麵煮得八分熟時埋個蛋花咖哩湯, 問你死未?? 當然唔駛講, 呢碗子夜蛋花咖哩公仔麵梗係好味到爆燈啦, 由開始拎出呢包面到最後成碗麵連湯bottoms up, 都只不過用咗區區十數分鐘, 可想而知我今晚係何等地瘋狂, 畀著平時就算餓我都會忍住唔食宵夜架..

講起咖哩即食麵, 就諗起身在英國嘅一位朋友, 因為親戚探訪怕食唔慣鬼佬嘢, 所以晨早講明要帶埋成箱即食麵過英國, 嚇得朋友哪哪聲飛奔唐人街入貨嚟制止親戚呢個爆笑舉動, 因為朋友話係唔畀帶蛋製品入英國架嘛.. 結果親戚仲係大冒險帶咗15包(未至於一箱)過去, 仲係第二朝就已經開封變成早餐添.. 哈哈!! 好搞笑啊~~

22.09.2007 | 雜記

  • 買咗部新手機已經一個星期, 但係驚覺個call log竟然得兩個名, inbox只有寥寥數個sms咋.. 難道我冇聯絡得上嘅朋友, 定係我唔受歡迎咧?? 真係無盡希虛啊~~
  • 最近好多朋友仔見我好成功咁維持寫blog嘅習慣, 終於都跨出蠢蠢欲動嘅心理障礙, 開返個屬於自己嘅天地喇.. 好現象嚟嘅, 可以同親朋好友分享自己嘅生活點滴吖嘛..
  • 突然間對於"don't waste your time on those who don't even care to share you a second"呢句至理名言身受同感, 好有慧根嘅一句說話..
  • 今日喺gym離奇地遇到位朋友, 當初畀錢請佢做教練, 後來大家啱key做咗好朋友.. 事隔年幾冇見, 我而家嘅狀態恐怕只會令佢擘大雙眼哀嘆三聲..
  • 無聊時會慣性慣性地去超級市場食品部"遊離", 跟住就一定唔會空手而貴, 手上實有幾包口垃圾戰利品, 今日竟然可以戰勝饞嘴, 兩袖清風步出間超市..
  • 最近個hiphop導師好似轉咗風格咁, 啲step突然間慢晒落嚟, 就咁令我發覺原來跳慢拍子係難過跳快拍子, 因為快拍子可以食咗某些半拍而無人察覺, 掩人耳目吖嘛..

21.09.2007 | 柴娃娃賀中秋

今日公司七朵金花三劍客, 約好齊齊著公司件新鮮出爐熱辣辣logo tee返工, 實行好似工廠員工咁穿著制服.. 我諗今次過後應該就下不為例喇, 因為件衫嘅cutting真係好有問題, 男嘅著到似大肚腩, 女嘅著到似有身孕.. 不過大家齊齊著, 團結精神可見一斑之外, 最重要就係各位可嘉嘅勇氣喇.. 連出去食晏都成為眾人焦點, 熟食攤老闆可以毫不猶豫地斷定我哋實係坐埋一檯嘅, 哈哈..
其實大家著成咁, 咪就係因為個中秋time sharing囉, 策劃人要求大家一定要著, 到時可以整起個勢, 影大合照時更顯團結吖嘛.. 多謝兩位策劃人細心鋪排呢個柴娃娃賀中秋活動, 大家食月餅食得好開胃, 不過有個榴槤口味, 超難頂.. 大家玩猜燈謎玩得好過癮, 結果ST同SG以大比數成積勝出, 各獲精美獎品乙份.. 大家借啲意為禮拜日生日嘅美雪同事預祝生日預祝得好開心, 原本諗住畀個驚喜佢, 但係最後風聲走漏.. 最終佢都冇假意地扮吓驚喜嚟滿足我哋(~_~")有啲失望噃..

覺得平時大家都顧住做自己啲嘢, 間office係靜到連支針跌落地下都聽得到架, 確實係有啲恐怖.. 偶然間搞埋呢啲time sharing session, 工作環境先至冇咁侷促吖嘛.. 睇吓第二排右一同埋第四排左一兩張大合照, 係唔係個個靚人都咁開心咧?? 仲有第四排右一, office掛滿晒七彩燈籠, 別致裝飾搞搞個中秋氣氛.. 大家暫且擱開公事,難得可以輕輕鬆鬆聚埋一齊, 盡情享受呢段時間, 感情都應該增進唔少啦..

20.09.2007 | 世風日下

頭先返到屋企, 家姐就叫我以後小心返屋企.. 無啦啦點解咁語氣深長啊?? 因為睇報紙驚見第二頭條, 有單匪徒持刀硬闖民居, 洗劫及非禮屋內四個單身女人.. 睇吓間屋即時覺得熟口熟面, 再繼續詳細閱讀篇報導, 不得了, 案發現場正是我哋屋企隔離街!!! 據報導案發時間大概傍晚7點鐘, 四個回教徒住客正準備開齋之時, 屋內突然間遭三名刀匪闖入, 搶走兩部手提電腦、四部手機同RM280現金.. 搶完色心起, 仲順手非禮佢哋, 更猖狂嘅係得逞後, 竟然將其中一名少女擄上轎車逃走.. 我當時唔係屋企唔知道發生咩事, 不過奇怪點解連屋企人都唔覺有事發生?? 更荒謬就係報導竟然唔提起隔離鄰舍噃.. 難道真係案件發生得太過掩人耳目?? 定係各家自掃門前雪啊??

覺得呢個社會越係文明, 啲道德就越係淪落, 尤其我住嘅呢一區, 治安腐敗到零點, 經常發生搶劫案, 而且仲曾經發生過名案添.. 命案曾經引起關注, 風平浪靜一剎那過後, 啲罪案咪又係好似雨後春筍咁接踵發生?? 突然間都覺得好冇安全感啊..

詳細報導見 http://www.sinchew.com.my/content.phtml?sec=1&artid=200709201440

19.09.2007 | 目瞪口呆

MTV台上個星期舉行2007年度頒獎典禮上, 請嚟昔日人氣小甜甜做開幕表演嘉賓.. 在下為表中庸唔打算詳細評論, 開頭句"it's britney, bitch!"頗有major comeback收復失地之勢, 令人有所期待, 首歌(聽講都係佢自己寫嘅)都幾OK啦, 不過就係少咗以前佢啲霸氣.. 繼續欣賞, 見到佢現場一身咁嘅look即刻跌晒watt, 加上還要扭擺腰肢大拋性感(不過只令人覺得笨拙), 難怪睇到啲觀眾目瞪口呆啦.. P.Diddy擘大眼, Rihanna彎腰大笑, 最經典就係50 cents個呆晒樣嘅表情..
以前個性感小野貓去咗邊啊?? 頗真戥佢擔心要收復失地嘅大計.. 唉呀, 好似忍唔住評論得太多嘢喇呵?? 唔好意思.. 不過其實個performance都幾entertaining嘅..

18.09.2007 | 世界真細小

最近發覺呢個世界真細小, 兩個星期內連續撞到幾個好耐都冇聯絡嘅朋友, 奇就奇在都係喺差唔多時間, 同一個地方撞到, 而且個範圍唔超過50咪.. 先後撞到兩個中學同學, 跟住兩個舊同事(其實係兩夫妻), 跟住啱啱就撞到個小學同學.. 不過唔好意思, 我每次都係急急腳咁行路, 從來唔會去注意週圍啲人, 所以每次都係朋友迎面而來, 嗌住我個名我先至察覺.. 其實唔係我咋唔識你哋架, 真係因為我見唔到咋, 大家都知道我眼細架啦~~ 好似啱啱撞到個小學同學, 畀佢突如其來咁嗌住, 當時太突然真係嚇咗一跳, 用咗兩秒鐘先至回過神, 攪到朋友鬼死咁尷尬仲同我say sorry添, 真係唔好意思.. 所以下次如果喺街度撞到我, 記得大聲嗌住我啊, 因為有九成九機會我係見你唔到架(可能時運超高啦, 哈哈哈哈!!), 千其唔好以為我高竇唔睬人噃.. 香港office個老細都識得形容我係小旋風, 因為行路一支箭咁唔注意身邊啲人, 可想而知啦.. 所以陳X詩同事, 你話我高竇唔睬人係唔啱架噃, 知道嗎?? 扯得太遠, 講返啲好耐都冇見嘅朋友, 好高興撞到你哋啊, 得閑保持聯絡啦~~

17.09.2007 | 愛上我的blog

最近又開始對自己個blog愛不釋手喇, 每日除咗會抽時間寫嘢之外, 就會諗吓點樣幫佢扮得靚仔啲.. 應該發覺最近我個blog多咗好多嘢, 又counter又時間又播歌, 應該不至於係畫蛇添足啩?? 唔知啊, 最近就係中意攪啲嘅嘢, 時不時轉吓顏色(雖則有人投訴唔好用黑底白字), 時不時播返啲唔同嘅歌, 起碼都應該會新鮮啲啦.. 唔知你係唔係熄咗個music player唔聽, 但係我仍然會經常update架, 但未必係大hit歌曲, 而係一啲自己曾經好嘅歌, 覺得如果有知音人就最好喇, 嘿嘿.. 其實都覺得呢個blogger越嚟越好玩, 可以任由你加你中意啲嘢入你個blog度, 實在係personalised至極啦.. 突然間喺度諗, 既然乜嘢都擺得上去, 咁都有可能擺埋啲spyware同埋virus上去架噃?? 唉呀, 死喇, blogger應該會識得分好同壞啩?? anyway, 如果你擔心睇我個blog會瀨嘢, 咁你又放千萬個心, 一嚟我唔識整埋啲spyware或virus, 就算識都唔會咁黑心, 驚報應啊.. 我始終都係愛我自己個blog嘅, 哈哈.. 聽聞之前有個咩最受歡迎同最佳blog選舉, 雖然質疑佢個權威性同可靠性, 但係如果有個咁嘅銜頭都應該唔錯吖, 可以賺錢架, 哈哈..

16.09.2007 | 靚仔駕到..

部舊手機仲喺我身邊嘅時候, 其實就已經畀呢部靚仔所吸引住喇.. 所以今次都唔駛點樣去煩究竟要買邊一款手機, 因為心裡已經有個preference喇.. 噚晚拎咗個新SIM Card之後就順便喺個商場打聽價錢, 跟住就返屋企上網睇睇個手機啲review.. 結果啲review都一面倒的好, 個價錢又喺我預算之內, 而且仲平過部舊嘅添.. 於事就扑錘, 一於係你喇靚仔!!
今日下晝提定現金去買部靚仔, 覺得自己從未有過咁闊卓咁豪爽, 雖然都有行混晒啲電話鋪比較價錢, 但係揀啱咗至低價嗰間, 就好似大陸闊太去尖沙咀買LV咁--唔該畀呢款我睇睇吖, 唔錯噃, 就要呢款, 幫我包起佢啦唔該, 我畀現金.. 個sales都好開心可以做我生意--送埋個screen protector同埋download埋啲靚歌畀你啦.. 一個大家都鬼咁開心嘅交易, 就喺區區15分鐘內完美結束喇, 佢笑住收銀我笑住離開..

中意部靚仔係因為佢13mm超薄, 平時放入褲袋都唔會顯眼.. 個外觀設計簡單得嚟又不失高貴(簡直係minimum and clean典範啦).. 仲有個屏幕解析度去到1600萬鬼咁sharp啦啲圖像.. 大家認為點啊?? 今晚有排玩喇部新手機, 其實有新gadget嘅心情真係好開心架噃, 連畀人扒咗部舊手機啲火都好似熄鬼晒咁濟, 哈哈..

15.09.2007 | 又嚟一鑊!!!

繼四個月前喺上海畀人扒咗銀包之後, 今日好不幸地喺火車上畀人扒咗部手提電話.. 接二連三嘅失竊事件, 我開始懷疑我是否衣著太過光鮮招搖, 以至招惹扒手向我落手.. 扒手真係扒手, 手法高明到我一啲都唔察覺, 仲以為部手機安然無恙咁喺個褲袋入便.. 越諗就越係扯火, 恨不得將啲衰人捉去打靶不得善終!! 真係黑仔喇, 其實我都set咗個開機密碼, 鬼唔望個衰人連開機都開唔到啊..

當發覺唔見手機後, 好彩路經公司, 所以即刻上公司上網揾揾要打咩電話去個電話公司報失.. 講起個automated assistant就火都嚟埋, 首先國語按1字英語按2字, 跟住後付按1字預付按2字, 跟住輸入電話號碼, 跟住普遍疑問按1字... 大佬, 我打嚟報失要block咗張SIM card架嘛, 十萬火急之下, 你個automated assistant竟然仲係度長話連篇, 我等咗三分幾鐘先至輪到個報失嘅option, 喪低B!! 應該第一個option就係報失吖嘛..

不過算啦, 見服務都幾唔錯, 我過後飛奔去個分行領取新SIM card, 服務快捷而且竟然不收取我一分一毫喎, 實在令我喜出望外啊.. 不過就頭痛究竟要買邊一部新手機喇, 無啦啦要破財真係唔抵.. 算啦, 當係畀自己一個理由換部新手機啦.. 部又殘又舊, 又花晒又甩晒漆嘅手機當係施捨畀個可惡小偷啦, blerrr!!!

14.09.2007 | 勇敢的叔伯姨嬸

唔知幾時開始公司多咗部收音機(敏儀姑娘是否屬於你架??), 最近一路開住, 成個工作環境都有啲生氣啦, 不至於淨係聽到keyboard聲.. 最近個電臺有個唔知乜節目, 叫啲阿伯阿嬸call-in唱歌, 唔係話中意唱乜就唱乜, 而係兩個DJ指定嘅現代流行曲.. 係咁嘅, DJ首先會播幾秒鐘現代流行曲畀啲阿伯阿嬸聽, 跟住就要佢哋唱返首歌.. 聽落都唔係咩新鮮綽頭嘢, 唱歌啫, 有幾難啊?? 因為要做嘢吖嘛, 所以唔會留心去跟晒成個節目嘅.. 但係有好多次都會無端端畀部收音機傳嚟嘅歌聲distract, 唔係因為繞樑歌聲, 而係因為聽到爆笑歌聲.. 一個笑起, 跟住其他同事就跟住反應.. imagine啲阿伯阿嬸唱流行曲, 五音不全把聲又極盡滄桑, 捉唔到個旋律又記唔起歌詞, 就係咁考佢哋不知萎縮N年啲音樂細胞, 實在娛樂性豐富囉.. 今日聽到好幾個都係唱梁靜茹首《我喜歡》, 首歌好cute架嘛, 你叫個uncle點樣唱得有說服力啊?? 不過話是話, 都真係要俯身佩服阿伯阿嬸嘅勇氣, 精神可嘉啊!! 我諗我連打去電臺講嘢都冇膽啦, 更何況要我唱可愛教主輩份啲歌??

13.09.2007 | 齋戒月

萬眾期待嘅回教齋戒月終於都拉開序幕喇今日, 都係同事提醒先至醒起.. 唔知係心理作用定係事實咧, 一路上都覺得比平時少咗啲人, 冷清咗好多咁.. 就連朝早返工同下晝放工, 輕鐵都冇平時咁逼, 真係少咗好多人.. 可能真係齋戒月嘅關係啩, 啲回教徒天未光就要起身食飽個肚, 食飽尚早冇理由返去瞓覺架, 咪索性返工, 可能咁就shift早個繁忙時間??? 估吓啫.. 不過放工嗰段時間就真係有影響喇, 因為佢哋通常唔會趕住歸家, 會拖住飽受飢餓摧殘嘅身軀, 是但揾間餐廳, 買定食物後就一嘢坐低等開齋.. 所以放工時間一定係通暢無阻嘅, 但係如果你諗住出去食晚飯嘅話, 最好識得精明選擇.. 點解?? 因為如果揀啱係佢哋間嘢, 人多不特止, 最尷尬就係人人都坐喺度等開齋嘅時候, 你偏偏就喺度飛禽大咬, 四面楚歌的確out晒feel囉, 所以最好就去間有得食豬肉嘅地方食飯喇.. 齋戒月, 最開心就係啲臨時馬拉檔攤, 沿路成列真係好鬼虛撼, 而且賣啲各種各類嘅傳統糕點食品又平又好味..

12.09.2007 | 九一二

見到阿敏儀姑娘寫咗篇關於九一一嘅blog, 即刻令我想起一件事, 唔係九一一但係同九一一有關嘅.. 話說六年前九一一翌日, 即係九一二, 當時我仲喺以前間公司打工, 公司就喺國油雙峰塔23樓.. 當日朝早, 我到達公司開咗部電腦, 邊享受早餐邊上網收看最新九一一報導之時, 突然間聽到廣播話要兩棟樓全部人即刻疏散.. 初時都不以為意, 但係連續廣播數分鐘之後, 各位同事先至你眼望我眼, 慢條斯理咁準備疏散.. 大佬, 晨早流流揾啲咁嘅嘢嚟攪啊?? 結果大家三五成群, 大搖大擺, 有講有笑咁由23樓一路行樓梯行到底樓.. 後來四處打聽消息, 原來因為九一一嘅關係, 呢兩棟全球最高大廈(當時台北101未興建好), 亦都好應景咁有個bomb scare..

當全體tenants(兩棟樓加埋商場)都集合於大廈前空地嗰陣, 個個人都好似散完步咁, 真係一啲驚恐都冇.. 大家喺企企吓見無所事事, 有者甚至約埋成棚人行過去幾條街處嘆早茶添.. 其實當時我哋一班同事都行咗去隔離幾條街間麥當當坐咗陣啦.. 大概兩個小時後收到風話係流料之後, 所有人又若無其事咁搭返lift上去繼續返工囉, 有啲人仲好可惜點解咁快又要繼續返工添, 哈哈..

唉, 呢啲就係馬來西亞人嘅態度喇, 可能個個人都習慣生活在天下太平之下, 所以如果真係有咁嘅事發生, 都真係大吉利是囉.. 九一二, 初咗係哥哥冥壽之外(今朝睇報紙知嘅), 我最記得就係呢一日喇..

11.09.2007 | 瞬間不留痕跡

經常出入廚房中意整番幾味嘅你, 可能覺得要搣薯仔皮同剝蛋殼係件頗惱人嘅事情, 除非真係巧手纖纖啦, 否則往往喺剝皮嘅時候好順手就剝埋成忽肉出嚟, 想原只上座的確不甚雅觀嘅.. 不如學下人哋用少少科學頭腦, 就可以輕而易舉咁搣薯仔皮同剝蛋殼啦..

快速搣薯仔皮, 用咗熱膨脹冷收縮嘅原理, 的確駛得!! 不過我想問, 點解唔批咗啲皮先嚟煮稔佢呢?? 不過又係嘅, 好似佢咁剝一剝, 的確係快過預先批皮嘅..


呢個新穎剝蛋殼方法, 實在IQ 200分人士先至會諗得到, 在下諗極都諗唔明究竟係咩原理呢?? 不過短短10秒鐘就可以快速簡易剝番個白學學靚蛋, 直頭要我O大個嘴啦, 下次一於傚法無誤..

10.09.2007 | 食晏新浦點

今日有新同事返工, 咁我哋循例都會全體同仁一齊去食個晏, 歡迎新同事加入呢個大家庭嘅.. 難得平時幫襯開間餐館冇開門, 所以就試下第二間.. 經過上一次同大老細飯局, 決意嘗試新餐館(食興化菜)嘅寶貴經驗後, 今次都帶點戰戰兢兢嘅心情去嘗試架.. 其實今日試呢間, 都唔算係新開架喇, 因為前幾個月為咗個project夜夜OT, 差唔多晚晚都係叫佢外賣, 心諗應該都唔會差到去邊啩?? 以前都係撥個輪就有嘢送上公司, 今次都係第一次登門造訪, 未到12:30pm都已經滿晒人, 不過好彩仲有最後一圍空檯, 唔駛等八個人哪哪臨埋位坐埋先.. 睇過餐牌過後, 其實都好系統化, 樣樣餸都寫明價錢, 而且個價錢都頗公道.. 因為第一次, 所以經過一輪擾嚷之後, 點咗六樣餸, 跟住就耐心等待希望唔好失望.. 可能人多關係, 都等咗成20分鐘, 結果率先上座係個葡汁雞, 一口咬落去之後, 即刻斷定下次可以帶大老細嚟呢度食飯喇.. 其餘啲餸都跟住陸陸續續排隊上座, 都煮得幾好味, 相較起平時食嗰間都真係有過之而無不及, 賣單時飯餸茶水合共RM90, 價錢都算公道.. 呢間嘢叫做中環餐廳, 終於都有個食晏新浦點喇, 我哋會再嚟幫襯架..

09.09.2007 | 靈氣迫人

唔知道仲係唔係農曆七月, 但係就永遠都好記得呢齣1984年嘅鬼戲, 記得睇呢齣戲嘅時候係小學二年班, 真係畀個羅麗莎(麥潔文飾演)嚇到吖.. 最記得就係羅麗莎件血紅色歌衫, 突然間會自己由個衣櫃緩緩飛出嚟, 上咗女主角葉倩文身嘅佢, 著上呢件歌衫, 低聲泣唱主題曲.. 一開頭就用個氣聲嚟唱, 已經足夠令人毛骨聳然.. 記得當時睇得越驚就越想睇, 第二日仲同成班同學係都高談闊論呢齣戲, 的確係好恐怖.. 唔係視覺上嘅恐怖, 因為成齣戲係冇啲七孔流血嘅鏡頭, 佢恐怖之處就係所營造出嚟嗰種嚇人氣氛.. 麥潔文所唱嘅主題曲, 特意用上氣聲, 簡直就係完全帶出個恐怖氣氛..
噚晚無意中喺某個blog度見到個版主介紹麥潔文啲歌, 重點推介靈氣迫人呢齣電影嘅主題曲《夜夜痴纏》.. 但係覺得如果齋聽首歌, 都只不過係流行曲一首, 冇咗齣電影個畫面襯托, 其實呢首歌一啲都唔恐怖啫.. 應該係個篇曲唔同, 以下呢個篇曲係用吉它節奏帶點輕快, 電影裡邊好似係將個節奏放慢而且係清唱嘅..

電影靈氣迫人主題曲: 麥潔文《夜夜痴纏》, 不妨click click一聽, 留意開頭成分鐘嘅ooooh~~ 電影裡真係唱得好恐怖架..

08.09.2007 | 坡記飯局

上一回提到個training certification前一晚, 同兩個新加坡靚女同事飯局.. 去咗間叫做Tao's(中文係陶)嘅餐廳, 應該係食fusion food嘅因為個餐牌係簡單得令人開心, 一版英文一版中文攪掂, 唔駛花多眼亂十五十六楂唔到主意.. 呢間餐廳最特別地方就係佢得一個8-course meal, 個個人都係嗌呢個set架喇, 唔同嘅就係其中幾個course可以任你由四五樣選擇上揀最合你口味嘅dish..
由welcome drink開始計起到甜品, 足足八樣嘢排住隊等你慢慢品嘗, 雖然每樣份量唔多, 但係食到最後都真係飽到趴喺度.. 呢八樣嘢依序係(*者為必定course):
  1. *芒果sorbet, 唔覺有芒果味
  2. *火腿雜菌芝士gratin配熱辣辣新鮮出爐軟綿綿麵包, 全場至掂就係佢哋喇
  3. 雞肉田園沙律, 冇乜驚喜
  4. *烤日本袖珍菇(淋燒汁), 幾好味, 同事唔食菌類, 所以食埋佢份
  5. 魚翅瓜藥材湯, 唔係魚翅+瓜, 真係有種瓜類叫做魚翅瓜, 好鮮甜, 選擇中湯因為清淡啲
  6. 陶氏焗牛扒, 唔係煎嘅, 裡脊肉焗得軟肕度恰好, 肉汁冇流失
  7. 秘製朱古力慕絲蛋糕, 賣相精緻, 唔會太甜, 唔錯
  8. 柚子茶, 飲返杯可以降低個飽肚感
由於當時冇帶相機影低啲嘢, 所以以上圖片並唔係在下所食嘅, 只係間餐廳網站上所提供嘅圖片啫(哈哈!!).. 個飯局都幾唔錯, 同兩位同事有講有笑, 而且啲嘢整得又靚又好味, 可以逼近fine dining架喇.. 呢個心滿意足8-course meal, 每人盛惠坡紙28.80, 都幾抵食喎.. 其實係個同事作東, 所以喺度要多謝佢呢餐dinner先..

07.09.2007 | 順利過關

個training其實噚日就已經officially結束架喇, 第五日嘅今日其實係個certification session, 即係話有某啲同學想要成為呢個course嘅certified trainer, 第日可以名正言順咁教呢個course喇.. 其實都唔係好難, 因為只需要揀每個subject其中一個topic嚟做個stood up presentation, 自由發揮等個instructor certify就得喇.. 每個同學第一個topic有20分鐘, 第二個topic就得10分鐘..

原本以為係件濕碎嘢, 所以報咗名都唔當一回事, 打算到時打天才波喳.. 所以其實一早就約定同事噚晚去唱K, 但係同事就好在乎我其實需唔需要準備, 最後攪到自己都緊張埋, 於是噚晚就淨係dinner, 過後就返酒店準備準備.. 結果發現20分鐘加10分鐘講兩個topic真係唔容易, 所以最後就決定cut得幾多就幾多, 儘量抽出重要嘅point嚟講..

我覺得個certification其實都唔係咩咁大件事, 但係大部份同學都好似好緊張咁, 攪到成個session都緊張埋.. 好彩之前篇出場序嘅時候, 我自告奮勇要求第二個present, 覺得越早攪掂就越好啦, 費事夜長夢多, 哪哪臨present完就過海神仙吖嘛.. 結果好順利咁, 冇乜驚險順利過關.. 而且因為之前對於呢個application都算係食過吓夜粥, 所以個presentation就自自然然咁加咗啲課余之外嘅額外可靠訊息, 算係impress到個trainer同埋一眾audience啩, 哈哈.. 最後同個trainer面對面一對一review嘅時候, 佢就係得一句absolutely perfect 有贊冇彈, 攪到我有啲受寵若驚得不知所措.. anyway, 都係一件可喜可賀嘅事情嚟嘅, 總算冇白費前一晚嘅準備, 同埋各位同事對我嘅期望, 哈哈..

06.09.2007 | 電郵馬拉松

一連幾日喺新加坡training, 間training center同埋酒店都冇得上網.. 結果攪到噚晚welcome dinner之後, 忍唔住要去一趟starbucks免費上網喇.. 最主要就係要download公司啲電郵, 因為個mailbox size係有個limit架嘛, 再加上如果其中一位同事個mailbox爆咗嘅話, 就會搞到其他同事有可能收mail有阻濟.. 雖則唔明白個service provider點解咁低能, 但係為咗唔做千古罪人就唯有乖乖地將所有電郵由個server下載落嚟囉.. 買咗杯mango passion fruit frappucinno過後就霸返個靚位上網喇, 結果不得了, 短短幾日已經累積成百封電郵一共32MB(幾乎逼近33MB個limit), 用咗超過十分鐘下載, 但係我覺得需要我兩日時間先至可以慢慢睇完兼消化每一封email.. 我叫呢種動作做電郵馬拉松(email marathon), 其實係一種好傷神嘅任務嚟架, 不過都習慣咗呢種折磨嘅, 因為每次放完假返工就一定係要面對呢個馬拉松朋友架喇.. 已經唔記得由幾時開始, 電郵已經成為工作上一個極端重要嘅元素.. 喺度諗, 以前未有電郵呢樣嘢, 啲人多數都係用電話聯絡公事啦, 人放假就自然電話聯絡唔上, 放完假返工就自自然然唔需要褒電郵啦, 你話係唔係幾幸福呢?? 所以話科技帶來方便, 其實背後都間接地帶來不便.. 又所以話世事係唔會有完美亦都唔會有絕對嘅..

05.09.2007 | 食食食食食

呢次training除咗全天候training之外, 就係不停咁喺度食嘢喇.. 個organiser好體貼咁為我哋準備一日三餐, 10:30am食完一輪點心之後, 12:30pm就係lunch喇, 再過後3:30pm又送多禍下午茶.. 其實training得十幾個人但係就準備咗廿人份食物, 真係招待慇懃.. 所以成日training係唔駛離開間training center架, 好似已經係自供自給咁, 超搞笑.. 第一日見到咁多嘢食, 當然係覺得好開心啦, 第二日發覺啲嘢同噚日大同小異, 得個煮發唔一樣, 都食得尚好啦.. 第三日, 真嘅又係早茶兩種咸點心兩種甜糕點, lunch有飯+雞+魚+蔬菜+蝦+小點+甜品, 下午茶兩種咸點心兩種甜糕點.. 我覺得跟住兩日都會係咁嘅菜單, 唔會有驚喜架喇..

今晚特別啲, 只此一晚搞咗個welcome dinner.. 去咗個由一間教堂改建成嘅地方食嘢, 個環境都唔錯, 揀咗入便一間西班牙餐廳, 結果豪爽嘅organiser叫咗5 set 12款tapas, (係, 冇錯, 就係一共60碟!!), 啲食正確名稱唔記得, 計有 tomato bruscheta, seafood bruscheta, calamari, seafood paella, 香腸, 煎三文魚, spanish omlette, 香草蝦碌, 炸雞肉芝士球, 煙肉蘆筍, meatballs, cheesy mushroom.. 12款啖啖都係肉, 結果食到我哋每個人攤晒喺度.. 雖則, 都十分感謝organiser個誠意, 因為我哋可以慳返一大筆兼且唔驚餓親.. 呢次新加坡training之旅, 原本最想shopping最終未有時間達成, 反而就係食咗一大堆嘢落肚, 肥死冇藥醫啦~~

04.09.2007 | Hairspray

今日training過後, 去酒店附近一間24小時影院睇戲.. 今日係友人慷慨請客, 在此感激不盡(友人最近有中意請人睇戲嘅優良習慣, keep it up, 哈哈), 仲有睇戲前嘅晚餐, 多謝晒啊, 食得好開心好滋味好滿足啊.. 原本係想睇套Ratatouille, 不過因為另外一位朋友公司贈送該齣電影免費戲飛為員工福利, 所以就轉睇Hairspray喇..
對於呢齣係印像只係「懷舊歌舞電影一齣, John Travolta反串肥女人大出位」.. 電影開始就係一個毫不起眼嘅肥妹仔喺度唱歌拉開序幕喇, 原來佢就係本片女主角, 認真失覺晒.. 不過好中意齣戲個60年代背景同埋唱啲歌都好好聽.. 睇吓睇吓原來除咗John Travolta之外, 仲有幾多大牌明星噃, Michelle Pfeiffer, Queen Latifah, Christopher Walken, James Marsden等等, 可能就係驚起用太多年輕新人太risky, 所以就加入呢班前輩, 結果就係一句薑係老嘅辣.. 成齣戲當然就係John Travolta反串女主角(擁有54EEE超極驕人身材嘅)肥媽最出位啦, 粗枝大葉咁加上啲小動作, 其中一幕被美食所引誘嘅戲, 果然演得絲絲入扣, 全場觀眾爆笑.. 好輕鬆嘅一齣歌舞小品, 個個卡士都落晒力又唱又跳咁, 可以帶住愉快嘅心情入去睇, 睇完可以笑住行出嚟, 唔錯架..

03.09.2007 | 的士因怨

相隔五日之後, 又要去新加坡喇.. 今朝搭最早一班機, 所以真係好早就起身, 不幸加上不幸嘅係, 噚晚唔知撞乜鬼竟然瞓得唔好, 可能驚今朝瞓唔醒所以無法安然入睡.. 因為太早位有輕鐵關係, 所以噚日book定個的士司機車我去機場, 但係因為溝通上問題, 明明係book咗今朝5點鐘, 點知個司機唔得閑所以另外幫我安排佢一個司機朋友.. 今朝等極都唔見車影, 於事打畀個司機問點解仲為出現, 結果佢發晒啷嚟咁話: 「我未到?? 我噚日下晝就已經到啦, 打幾十次電話畀你都唔接.. 你打畀你個司機朋友喇, 半夜收120蚊你畀70蚊我點接啊?? 你哋都攪攪陣嘅..」我當時真係成面屁, 嘩, 大佬, 明明講咗係今朝5點喎, 你收錯風仲發晒我啷嚟咁算係點啊?? 係啊, 噚日下晝我喺gym workout緊, 梗係唔帶電話啦, 喂, 我過後都有打返過你啦, 係你自己講冇事噃.. 你唔可以怪我架, 反而你乜都唔講, 要我今朝戇居居喺度白等, 分明係想綫我啫.. 而且我一路以嚟都未提過價錢呢樣嘢喎, 真係定你!! 好彩, 都畀我隨街接到架的士, 順利到達市區預辦登機, 再轉機鐵去機場輕鬆上機.. 後來由同事口中得知機場管理其實都有安排的士接送服務, 下次我一定搵返信譽可靠嘅, 除咗係用名貴房車接送之外, 最重要係半夜不另收費..

02.09.2007 | 全城歡騰

國慶假期連接週末, 一連三日假期「樹」一聲就咁過咗喇, 好似都唔記得自己呢三日入便做過啲乜.. 淨係記得去親邊都係人潮, 本以為城中游子們都會乘機回鄉, 咁就應該會少咁啲人.. 但係事實並唔係我想像中咁噃, 反而好似全城人都傾巢而出, 市區各個商場食肆都係人.. 尤其城中最大兩間商場更是萬矢之的, 好不幸嘅在下其實就係其中一矢(~_~"').. 最恐怖就係搭電動火車嘅人群, 你推我攘爭先恐後逼入車廂, 完全見證「馬來西亞得」呢個全民景仰嘅口號, 難道就係要以此種行動歡度國慶佳節?? 勁搞笑.. 一向都怕人多嘅地方, 見到多人我就覺得冇晒興奮心情, 某啲人(聰明嘅讀者應該知道係邊類啦)好中意一家大細親朋戚友成棚人咁出動, 蓮步姍姍不特止, 仲中意三不五時成幅牆咁停喺路中間.. 嘩, 大佬, 條路你哋家族嘅咩?? 阻住人架嘛, 一啲都唔醒目, 而我一向都係快腳步吖嘛, 行行吓無啦啦畀成村人檔住去路, 都真係好鬼勞氣..

01.09.2007 | 血拼都城

自從數月前由香港回歸返馬之後, 已經好耐都未試過可以痛痛快快咁shopping兼且有所斬獲喇.. 齋window shopping數月後, 今日忽然間轉態, 好似眼角放低咗好多, 竟然可以喺個半鐘內狂掃以下八件貨品, 果然係難以置信地火速果斷, 出手狠毒.. 趁獨立50週年, 當係我為國家經濟發展盡一點綿力啦..
  1. 本地時尚S字頭品牌橫間Polo Tee, 買嚟可以禮拜五casual wear返工時著..
  2. 同一品牌斜紋黑色skinny tie入型入格, 一路以來都好想要一條, 好不幸嘅係, 佢居然比件衫仲貴..
  3. 五分鐘後無意中發現另一本地P字頭品牌嘅橫間Polo Tee, 著起嚟好睇過之前嗰件三十六倍, 仲要係平啲噃, 認真激鬼氣..
  4. 喺馬來西亞極為over-rated嘅E字頭品牌, 白底黑灰波點恤衫, 勁襯當時穿著嗰件牛仔褲.. 最主要係佢個收身剪裁, 穿起即刻睇落激瘦10磅..
  5. 香港某草民B字頭品牌(平時真係唔多會蘇佢架)同可口可樂crossover嘅tee, 幾得意喎.. 注意件tee後便個pat pat位係有個公仔圖案架噃..
  6. 年幾兩年前記得曾經有類似嘅橫間tee, 過晒時但極唔明個品牌竟然話係new arrival, 見著得唔錯就順便搭單買落..
  7. 英倫T字頭街頭品牌最近勁玩baseball tee, 呢件深藍底綠色橫幼紋算係簡單中見特別, 啱晒在下實際年齡嘅群眾..
  8. 同一品牌basic v-neck tee, 好中意個橘紅色(貪佢夠姣), 返到嚟竟然發覺並唔係自己一路以為嘅deep v, 有啲失望..