30.01.2008 | 官人x代娘

今晚同幾個好耐冇見嘅朋友一齊去食飯, 一棚六個人(1位官人攜帶5位代娘) 去咗呢個位於Pavilion叫做「代官山」嘅餐廳, 係間中式fusion餐廳, 發跡於台北, 跟住進駐上海北京同吉隆坡.. 友人見報章上刊登七五折優惠卷, 剪低後提議去試試..

內部裝璜不過不失, 餐牌就頗見心思(可能係一般台式餐廳嘅作風), 食物選擇唔多但係每樣都有靚相參考, 食物分門別類而且啲餸名唔玩刁轉, 所以點菜過程好順利.. 上菜時, 啲餸同餐牌上啲相絲毫唔覺有咩出入, 講到呢樣嘢喇喎, 我一定會加印象分..
點咗(上邊組圖順序左至右上直下) 黃金薯泥, 椒鹽花枝, 綠茶飲品, 梅子蜂蜜醋飲, 培根高麗菜, 黃金滑豆腐, 廚師蘑菇, 蘆筍百合, 松子辣雞, 竹網香魚, 獅子頭, 抹茶雪糕紅豆刨冰.. 黃金薯泥非常好食個人好中意, 培根高麗菜清甜爽口幾唔錯, 不過獅子頭肉質好鞋, 竹網香魚肉質好綿, 唔多中意, 其他就覺得還好.. 原本點咗焗田螺同埋奶油菠菜, 不過個部長先後隔咗成5分鐘過先至行過嚟話賣晒, 呢度扣分..

食吓傾吓, 開開心心咁都坐咗兩個幾小時, 埋單總共約230蚊, 遞上優惠卷折得嚟約180蚊, 都幾平.. 環境舒適, 食物衛生, 味道幾好, 服務好唔錯, 有啲偏向fine dining嘅嘗試, 可以抱著一般期望去試一試..