設定貼子語言 Set language for posts :
中文
English
中英雙文 English & Chinese

06.01.2008 | 三千年後...

商業電台上個月於年度頒獎典禮前舉行咗個《叱吒又一個十年回歸音樂會》, 請嚟六位現時得令爭獎爭得頭破血流嘅歌手(陳迅, 古巨, 許安, 容祖, 楊嬅, 何詩)夾埋前輩林Diva一齊演唱.. 結果個show竟然係林Diva以同一句話開場同埋尾, 就係呢句「再見, 唔好怪我第一句就同你講再見..」, 句嘢其實就係出自陳輝陽《十二金釵眾生花》音樂劇裡頭嘅一首歌, 由李香琴獨白featuring關淑儀嘅呢首《三千年後》..

剛開始聽呢首歌嘅時候, 第一個感覺就係覺得好怪雞, 唔知點樣嘅.. 不過再聽多幾次, 反而覺得好有feel, 老戲骨琴姐聲音演出再加上關小姐獨特嘅聲線吟唱, 慢慢咁覺得首歌其實都幾正喎, 而家個腦仲不時浮現出首歌嘅旋律添.. 難怪佢之前喺2007年度CASH流行歌曲頒獎典禮上奪得最佳另類音樂獎啦.. 大家嚟聽聽呢首crossover得好有feel嘅歌啦~~


再見/唔好怪我第一句就同你講再見/因為我真係專情來同你道別架/你唔講嘢/淨係聽我講嘢/嗰陣時個世界好安靜/冇而家咁嘈/襯得我特別吱喳/特別開心/我記得同你去睇日落/你會響我耳仔邊講嘢/你講得好細聲/其實我一啲都聽唔清楚/不過我好鍾意聽你咁樣同我講嘢/以後再冇人咁樣同我講嘢/因為你話畀我知/你要走喇/忽然間/經過咗好多年/我冇再睇過日落/趁熄滅前/還可一見/蠟成了灰/沾污了我的臉/眾生蔓延淚海被填/浪漫擱淺/舊歡不變/我記得/你同我去過嘅每一個地方/嗰啲地方/通通留喺我心裡面/我唔會講我老喇/我只係會講我喺度太耐/時間耐咗/難免知道人總會慢慢咁將過去淡忘/又會睇住啲嘢/無聲無息咁樣消失/我點解要走/我先兩日唔知諗緊乜嘢/無端端走咗去睇日落/個日落就同我記得陪住你睇嗰個樣一樣/不過就算我點樣裝出若無其事/我都冇辦法唔承認我失去嘅嘢實在太多喇/趁熄滅前/還可一見蠟成了灰/沾污了我的臉/眾生蔓延/淚海被填/浪漫擱淺/舊歡不變/我要走喇/如果你記得返我係邊個/我知道你一定會好唔捨得我/仲會好掛住我架/再見

5 comments:

  1. 佢把聲好SEXY,非常适合featuring.

    ReplyDelete
  2. 你話邊個把聲sexy話?? 琴姐定關小姐??

    ReplyDelete
  3. 關小姐 of course !

    ReplyDelete
  4. 好聽呀﹐關小姐係得嘅。。我會永遠支持你架。。

    ReplyDelete
  5. 我覺得關小姐有時唱歌會過咗火, 不過呢次同琴姐crossover就出奇地好..

    ReplyDelete