設定貼子語言 Set language for posts :
中文
English
中英雙文 English & Chinese

30.04.2007 | 有其父母必有其子女

我覺得呢個廣告拍得好正, 個message好正面.. 剛開始睇會覺得好得意, 個小朋友竟然係度模仿父母.. 但係慢慢睇落去, 先發覺佢想要帶出個message其實係何等意義深遠..小朋友其實就好似一張純白紙張, 父母同成長環境係決定呢長白紙變成嘢模樣嘅因素..

29.04.2007 | 其差無比的服務

早幾日申請喺家裡安裝呢個S????myx寬頻, 今日收到個聽講係免費嘅modem速遞.. 滿心喜悅之下哪哪臨落手落腳, 諗住安裝好啲嘢, 第日就可以開開心心喺屋企上網啦.. 點知send咗一大堆嘢過嚟, 又冇一個明確嘅指示應該點樣setup.. 啲instructions東一忽西一忽咁, 搞咗頗耐先知道要做啲乜.. 以為照住做就實冇走雞啦, 點知試過再試, 一試就試個幾廿輪都係搞唔掂.. 於是就打去個helpdesk求救, 條友仔都真係未夠班, 點我做呢樣做嗰樣, 結果咪又係咁.. 到我打第三次求救嘅時候, 幸好係另一個人attend我, 由佢口中得知其實個account都未搞掂, 貴公司尚要三個工作天先至可以完成佢所謂嘅內部configurations同activation.. 嘩, 喺咁你不如早講啦, 唔駛嘥我成日成担心機都係徒勞無功啦.. 啲instructions話搞得掂就立即上網, 但係你內部就要用咁耐時間做嘢呢回事就隻字不提.. 都不知乜嘢服務, 真係其差無比..

28.04.2007 | 健康同快樂, 哪個重要??

話說從前有兩個錢罌, 一個係好傳統好樸實好悶嗰款, 另一個係好靚好得意好人間人愛嗰款.. 咁佢哋個主人要儲錢, 大多數都會揀個靚錢罌.. 咁一日過一日, 個靚錢罌就越嚟越嚟滿喇, 而個樸實錢罌永遠都係得番幾個輔幣.. 日子耐喇, 終於有一日個靚錢罌滿晒喇, 於是個主人就一嘢將佢扑爛, 講裡頭儲起啲錢拎晒出嚟.. 反觀個樸實錢罌因為用得耐, 之後竟然變成一個價值連城嘅古董一件..

其實呢個故事背後, 兩個錢罌都代表住兩種唔同嘅人.. 一個代表唔開心嘅健康人, 一個代表開心嘅病人.. 如果要你選擇其一, 你會覺得健康同埋快樂, 邊一個會係重要啲? 其實就唔會有個標準答案, 因為個故事最後個message係要勸告我哋, 忠於自己嘅決定, 只要覺得對得起自己就好喇, 雖然身邊嘅人可能唔會認同, 但係如果佢哋係愛你嘅話, 就一定會支持你啦..

27.04.2007 | 巧合, 機緣, 緣份??

有時都唔好話唔邪, 如果你同一個人有緣嘅話, 你哋一定會去到邊撞到邊, 喺同一日裡邊相遇幾次咁滯.. 話說呢幾日就畀我好巧合咁處處碰著呢一個人, 唔可以稱得上朋友, 因為就係我認得佢, 佢認得我, 見到面點吓頭笑吓嗰種關係.. 係喇, 應該係叫做「點頭之交」喇我諗.. 就係因為大家一啲都唔熟, 但係就唔知點解咁有緣, 好似掟完個彎之後又再撞到佢.. 開始都好有禮貌咁打吓招呼, 但係撞多幾次之後, 反而覺得有啲尷尬, 有啲好想扮見佢唔到, 但係最後都係覺得咁樣唔好, 好冇禮貌嘅嘛.. 其實都好想如果再遇到佢嘅話, 好友善咁講聲「哎呀, 乜又係你啊?」.. 因為我相信只要兩人有嘢句開頭嘅話, 就唔會咁邪, 無處不在咁去到邊撞到邊喇..

26.04.2007 | 尋找平衡

喺KL Office返工第三日果然係非同凡響, 點解咁講咧? 因為返咗多年嘅工, 真係第一次啲appointment同meeting係排到全日full晒嘅.. 話說今日一早九點鐘開始就開會啦面試啦, 到食晏可以休息一個小時, 然後就繼續開會啊面試啊直到放工時間.. 好唔明白, 點解喺KL竟然會係忙過喺香港架? 今日總共開咗三個會, 面試咗三個人.. 不過可能因為咁, 所以感覺上今日好似眨吓眼就過咗喇, 渾渾噩噩咁都唔知發生咗咩事就快放工喇.. 剩餘一個小時時間哪哪臨做吓自己啲份內嘢, 知道唔會做得晒, 但係暫且求個心安理得, 至少都有做啲嘢啦.. 有時因為工作太忙碌所以會希望唔駛做可以「韌韌腳」, 有時又因為冇乜嘢做所以會覺得好悶想搵多啲嘢嚟做.. 咁其實係自相矛盾多啲, 定係姑且想尋找個平衡點多啲呢?

[後記To我的老細: 請放心, 到今時今日我永遠都係有好多嘢排住隊等住做架, 哈哈!!]

25.04.2007 | 艱巨任務

我諗現階段我有二十萬種理由係需要認認真真落落實實咁去減肥兼且操fit自己喇.. 呢一兩年以嚟, 真係越嚟越放松自己, 喺個健身中心裡頭, 實在係搵唔返當年積極的自己, 生活飲食方面, 簡直就係毫無節制, 猶如一個焚化爐咁乜都窒得落肚.. 眼見自己僅有嘅肌肉一日比一日鬆弛, 豬腩肉一日比一日肥大, 著衫開始覺得贅肉難掩, 連以前喺gym認識啲瘦仔肥仔都已經fit過自己九條街咁遠, 其實唔需要二十萬種理由都已經可以要我撼頭埋牆啦.. 尤其係復活節長假嗰五日橫行無忌咁極之寵幸自己過後, 就連幾日唔見嘅朋友都一眼睇出我肥咗, 應該好好反反省省下喇.. 所以現在下定決心, 實行喺飲食同埋運動方面落手, 畀自己四個月時間, 勁減15磅回復以前大勇狀態.. 今次呢個艱巨任務, 盡力而為啦, 第一步已經踏咗出去喇, 希望可以成功!!

24.04.2007 | 失魂

經過連續四日假期唔駛返工之後, 今日從新返去KL Office返工.. 因為需要搭車返工, 所以唔可以好似喺香港咁瞓到last minute先行過兩條街返工.. 需要早啲起身, 的確係好殘忍嘅一回事, 不過點樣都要令自己習慣架喇.. 第一日返工, 都唔知做乜咁失魂.. 明明臨出門前已經覺得一切都妥當啦, 點不知上咗架輕鐵後, 才一浪接一浪咁發現做漏咗幾樣嘢.. 第一: 平時出門都會噴啲香水, 今日唔記得, 分屬小事可以置之腦後.. 第二: 記得帶運動鞋唔記得帶workout衫, 掹掹哋但係唔緊要, 至多今日唔去gym.. 第三: 部laptop嘅充電器流喺屋企度, 到時電池耗盡就大件事.. 返到公司好想返去完成呢三件事, 但係好彩公司都有spare嘅充電器, 咁就暫且借住用一日先啦.. 唔駛我騰來騰去呀嘛, 一來一回即嘥錢又嘥時間..

23.04.2007 | 變幻莫測的天氣

昨晚到步吉隆坡, 今日就唔駛返工住, 可以抖足精神準備明日報到.. 所以打算出去gym完過後行吓街充吓電.. 天氣確實係變化多端, 變幻莫測, 可以一下子艷陽高掛, 跟住就落咗場傾盆大雨, 雨後又告天晴.. 好耐都冇見過落咁大嘅雨喇, 確實覺得有啲恐怖.. 有個朋友話我知, 因為個天氣時晴時雨, 時熱時涼嘅關係, 搞到佢公司幾個同事都一齊告病假.. 幸好落雨時我都喺室內活動, 未有變成落湯雞.. 本以為雨過天晴之後可以安心回家, 點知到步輕鐵站, 竟然又落緊大雨, 唯有喺度等雨停啦.. 等咗三四個字, 覺得呢場雨應該有排落, 於是趁佢落得細啲, 哪哪臨一支箭飛奔返屋企啦.. 作為一個精明嘅人, 我諗以後都係隨身帶定把遮先至得..

22.04.2007 | 三衰後必有六旺

今日飛吉隆坡執行我為期六個月嘅任務.. 本來諗住預鬆啲時間早啲出門, 所以就喺班機起飛時間前三個小時出門.. 嚟到中環市區預辦登機, 出示我所有證件畀個地勤人員, 兼且擺埋兩件寄艙行李上架, 點知佢搞吓搞吓都係拗晒頭話「先生, 我哋系統顯示你冇做到booking噃」..

嚇?? 我當時真係晴天霹靂, 個agent明明已經話係confirm咗個booking點解會冇架?? 係唔係搞錯啊, check多次都係咁..冇辦法, 始終個系統冇記錄, 班機又full晒, 就算係潑婦罵街都無補於事, 唯有將我擺入standby list, 希望到時好彩嘅話可以上到機.. 但係真係好興架當時, 點解明明book咗又話冇啊?? 結果將兩件行李拖返落嚟, 輪輪儘儘咁過去機場, 喺機場等咗足足兩個小時..

終於等到個地勤人員嗌候補幾位, 又要同幾個輪候乘客爭先恐後搶位, 派得位嚟check埋in都已經係登機時間final call.. 結果又要過關又要過security check, 最後真係好狼狽咁於機場狂奔直往閘口.. 不過好彩班機多人, 啲人都仲係排緊隊登機, 總算趕得住.. 本以為終於上咗機, 鬆一口氣啦.. 結果不幸事情繼續發生, 因為有個乘客未能及時上機, 結果要將佢嘅行李由機艙抽出.. 之後又要重新等後起飛, 結果搞吓搞吓delay咗成個鐘後先至起飛.. 喺個機位度真係屈得頗辛苦架..

今次去吉隆坡真係出師不利, 頭頭碰著黑.. 之不過可能係咁, 原本超重嘅行李因為個地勤人員要幫我儘快搞掂check-in畀我有足夠時間去閘口上機, 所以就只眼開只眼閉由得我, 幫我慳返唔少超重罰款.. 反正都安全到步, 三衰後必有六旺, 就當係扯平啦, 哈哈..

21.04.2007 | 神奇的化妝

神奇的化妝技術, 真係不得不令人驚嘆.. 簡直可以稱得上係魔術, 可以能人所不能, 你都真係唔好質疑點解化妝品係女人嘅恩物..

佢可以令一個鄰家少女變成萬人擁待(小甜甜Britney Spears)








亦可以令一個丑小鴨變成非凡天仙(明模Kate Moss)







更加可以令一個師奶後生十年(拉丁電臀天后J-Lo)







最緊要嘅就係, 佢竟然可以令一個人「起死回生」(長青Diva麥當娜)

20.04.2007 | 人, 係中意被奉承的動物

之前為咗幾個project忙到唪唪聲, 噚日終於趕起晒全部嘢, 仲同埋班同事齊齊stay到夜晚11點handover晒啲嘢.. 總算完結咗呢個階段, 可以稍微安心繼續我下一個為期六個月嘅mission喇.. 所以今日專程請假唔返工, 休息吓, 放松吓自己.. 好, 就一於去中環, 再戰尖沙咀shopping洗錢掃貨獎勵吓自己..

可能係冇減價兼平日嘅原因, 所以啲店舖都顯得有點冷清.. 又所以咁啲sales就因此頗清閑冇乜嘢做, 於是啲服務就非常之慇懃非常之週到, 好到咧, 搞到我都覺得有點唔自在.. 其中有間嗰幾個sales仲好熱情接待, 完全唔介意我試完再試, 仲好pro咁畀我意見.. 本來就左度右度究竟買唔買, 就喺個sales一句「呢個款啱你噃, 個碼你都著得幾好睇呀」之下, 試問本來就15/16揸唔定主意嘅我, 咪就係咁畀人奉承兩句之後, 就決定要咗啲衫喇..

哼, 我諗時下做sales嘅都已經係受過專業訓練架喇, 因為識得抓緊「人始終係中意被奉承的動物」呢個道理, 確實係十拿九穩可以sale到嘢.. 結果咪就係好成功咁要我埋咗好多件, 兼且入埋VIP會員Club囉..

19.04.2007 | 如果你需要退而求次..

假如需要你退而求次, 你其實會點樣做抉擇?? 你會粗粗地求其啦, 定係好有原則咁一口拒絕? 其實我覺得就需要睇個情況, 同埋當時自己嘅急需, 同埋自己當時嘅原則可以把持到咩程度.. 就喺度舉個好簡單嘅例子 -- 如果廁所冇晒廁紙,咁你會唔會就咁去廚房拎卷kitchen roll入去用呀??
  • 如果我當時忍無可忍, 我真係會馬死落地行, 將計就計..
  • 如果我當時有能力(應該講忍耐力)可以落街去補倉, 我一定會咁做, 一來去廁所本來就要用廁紙架嘛, 一來買定以防不時之需..
  • 如果我當時可以選擇, 我會諗吓計仔睇睇有冇其他alternative, 例如去去健身房workout時順個便去吓人家嘅廁所啦..

所以話, 世事係無絕對嘅, 由呢個小小嘅狀況就可以睇出一個人嘅性格.. 好多時候係要睇個環境同情況而定, 能夠變通能夠扭轉局勢者先至係成功..

18.04.2007 | 一開二

今日喺HMV網站見到陳醫神即將推出新專輯, 因為都幾欣賞佢啲歌, 所以都幾興奮咁click入去八吓.. 睇睇個track list, 覺得應該係似華語碟多啲噃.. 因為佢都係半年前推出個好評如潮嘅《What's Going On》廣東大碟, 以佢家吓喺香港樂壇嘅地位, 實在冇理由相隔咁短時間又出多張碟嘅.. 稍微研究個track list, 發覺啲歌名同上一張廣東大碟有啲同工異曲嘅關係.. 我諗十成十係將上一張廣東大碟裡邊大hit嘅幾首歌, 一開二咁叫阿林先生將佢之前填嘅廣東歌詞稍微轉做華語歌詞, 跟住就換湯不換藥咁收錄喺呢張華語碟喇, 的確係快捷兼慳油.. 可能對於嗰啲齋聽廣東或者齋聽華語嘅人, 個感覺就係好歌數首.. 但係對於我嚟講, 個人非常鄙視呢種手段, 照版煮碗咁好似對另一個市場缺少咁啲誠意, 最重要就係存在被受騙嘅感覺.. 印象中呢一類歌手, 初咗陳醫神, 仲有黎老闆, 鄭三美, 陳其利, 劉天王, 郭阿王, 梁高妹, 等等等等.. 所以咧, 通常遇見呢啲一開二專輯, 我實唔會自己黯荷包買..

17.04.2007 | 面試感想篇

呢個星期每一日都安排咗陸陸續續嘅面試, 搞到好似好唔得閒咁.. 其實要做面試, 一方面要重複又重複咁睇啲履歷表, 同每一個candidate講埋啲唔駛諗都可以一輪咀講晒嘅company profile, 對每一個candidate問返同樣嘅標準問題, 回答返佢哋問嘅來來去去嗰幾個問題, 跟住就assess and comments等老細參考.. 覺得好公式化.. 但係另一方面又覺得好有趣嘅就係可以見到唔同嘅人, 當係傾吓閒偈咁, 聽吓人哋嘅經驗..

其實當初自己四週圍頻頻扑扑去見工, 都真係好了解啲candidates嘅心態架, 依家換著自己去interview人, 好似對住塊鏡咁, 有時都會隱約見返自己以前見工個樣, 嗰種感覺好神奇.. 以前見工, 有時都會遇到啲好乞人憎好串好高竇嘅interviewer, 現在掉返轉嚟, 希望啲candidates唔會覺得我係好乞人憎啦, 哈哈.. 不過算係好彩啦, 都未遇到啲好刁轉嘅candidate, 至今覺得怪怪地就係interview啲比自己年紀大又經驗多嘅人, 有啲尷尬..

16.04.2007 | 姣婆遇著脂粉客

頭先街度見到一對後生男女, 感覺上佢哋應該係剛認識唔係好耐嗰種, 但係就懶係好咩咁樣, 男嘅大獻慇懃, 女嘅欲拒還迎.. 唔知點解, 腦袋裡突然間涌現「姣婆遇著脂粉客」呢一句嘢, 而唔係「一見鐘情, 兩情相悅」嗰啲浪漫嘢.. 可能要我聯想到浪漫, 對男女主角至少個樣要係喋得杯落啊, 但係眼見呢一對, 女嘅尚算過得去, 但係個男嘅就成個木咀咁嘅樣.. 奀挑鬼命骨嶄嶄咁, 一把我至憎嘅髮型(中長髮微微波浪型, 好似F4嗰種, 再染埋髮), 青靚白淨講嘢又陰聲細氣, 一副睇落去點都唔覺得開胃嘅樣.. 唔知啊, 其實都唔知點講, 硬係覺得得啖笑係啦.. 所謂各花入各眼, 情人眼裡出西施, 旁人係唔會明白佢哋係幾咁樂在其中嘅.. 不過話是話, 雖然我感受唔到佢哋嘅甜蜜, 但係的而且確一諗起就得到啖好笑.. 好衰哦呵?? 哈哈..

15.04.2007 | 好一個防止受騙嘅方法

呢個廣告好絕, 多謝蠄蠼send畀我欣賞, 我先知道原來呢個smart purse廣告除咗之前嗰個「瀨屎」橋段之外, 仲有呢一個「阿茂成功揭穿騙局, 老闆娘被拆穿騙局後大發爛咋」.. 我覺得如果可以背起張銀紙上嘅編號, 確實不失係保障自己嘅一個好方法, 記住喇..

14.04.2007 | 高爾夫球

今日下晝全公司總動員, 再加埋專程由新加坡飛過嚟嘅大老細, 同埋咁啱嚟香港度假嘅兩個北京同事, 一班人浩浩蕩蕩由新office出發去西貢滘西洲.. 山長水遠去嗰度做咩咧? 話說呢個島上有個全港唯一一個公眾高爾夫球場, 唔需要幾萬蚊入會費, 開放畀公眾使用嘅高爾夫球場.. 咁當然我哋呢班柴娃娃就唔係去高爾夫球場打啦, 而係去嗰driving range玩吓啫.. 個馬會有個98蚊package好抵玩, 包來回西貢碼頭專船接送, buffet dinner同埋喺個driving range冇限任玩.. 個球場環境的確係好唔錯, 風涼水冷有山有水綠草如茵.. 啲嘢食老實講就嘛嘛地啦, 不過成個package最主要都係個golf啫..
食完就哪哪臨落個driving range玩喇, 卅歲人都係第一次玩呢家嘢.. 覺得都幾有趣噃, 由一開始fing空棍打唔到波, 到後來成功將粒波打出去, 再到後來可以飛粒波去到冇雷公咁遠.. 以前齋睇電視啲人玩, 覺得咪就係用支棍打粒波啫.. 但係當自己玩嘅時候, 就覺得呢個咁高尚嘅玩意其實都一啲都唔易.. 打到粒波冇咩大不了, 但係要粒波去到你想要嘅位置, 就的確係件難事.. 對我第一次玩, 可以做到飛起粒波其實已經係件開心嘅事喇.. 因為初哥唔識嘢冇帶手套, 所以連大百多杆後, 個手起晒枕起晒水泡, 真係未快樂付出好大代價啊.. 我覺得我都幾中意高爾夫球呢個玩意噃, 聽人話打高爾夫球有80%係傾生意20%至係真正打波, 可能現在學咗先對日後都有幫助, 哈哈..

13.04.2007 | 搬office, 我經驗老到...

今日搬office, 搬去同一棟大廈再上三樓一間大啲嘅單位.. 因為係同一棟大廈, 所以完全唔覺得有點勞師動眾.. 反而係因為咁樣, 今日搭咗幾廿輪lift上三樓落三樓, 搭到有啲腳軟.. 不過開心嘅係, 終於可以有返個自己嘅位喇, 以後都唔駛同另外兩個同事一齊逼喺間會議室入邊.. 現在個office實在係細到可憐, 原本容納四個人嘅單位, 竟然要塞九個人, 你話點樣唔逼啊?? 搬咗新office, 每個人都可以有自己個位, 而且仲可以預埋第時expansion要請人添.. 明日擇個吉時正式全動員搬入去, 喺個新環境咁闊落嘅空間做嘢, 個人都冇咁躁啦..

諗諗吓.. 我好似每做一份工, 都至少搬過office一次.. 第一份搬兩次, 上一份搬一次, 呢份剛剛呢一次.. 講到搬office, 我的確經驗老到啦.. 查實都開始懷疑我腳頭好喇, 因為餐餐都係細office搬大office嘅.. 哈哈!!

12.04.2007 | 神奇的中文字

平時都唔覺份《頭條日報》封面左下角原來有一小篇幅係寫啲冷知識.. 頭先做做吓嘢就走去翻翻嗰疊堆積如山嘅報紙, 發現原來啲冷知識都幾有趣噃.. 點解會叫做冷知識, 都搞唔清楚, 個冷字應該係解作冇乜人知道咁啩.. 其實覺得中文字真係一種不可多得嘅文字, 因為三言兩語就可以好精簡好準確咁樣將一樣嘢表達出嚟.. 而且一塊塊獨立字眼, 意形相見, 無論由左至右, 右至左, 上至下, 下至上, 閱讀都不成問題.. 尤其佩服古文嘅濃縮精簡, 往往一個字就可以表達好多意思, 一篇意義深詳嘅文章可以短短十幾個字搞掂(五言詩歌正是), 雖然有時都會幾個字都冇個意思(正是「嗚乎哀哉」也).. 不得不承認佢真係一種好神奇嘅文字, 作為一個華人嘅我, 能夠掌握呢種文字, 確實係一種福份也.. 最近更加發覺有個六字真言, 係非常之意義非凡, 一句既出即令人呆滯嘅--佢就係「超低能,勁搞笑」喇, 哈哈..

11.04.2007 | 抵死..

同事噚日send咗個link過嚟, 嘩嘩嘩, 勁好笑啊!! 睇完覺得如果要暗地裡做壞事嘅話, 都真係要量力而為先好.. 唔知佢點樣將自己抽返出嚟咧?? 好想睇睇個下場係點樣啊.. 哇哈哈..

10.04.2007 | 又係噃..

今日收到小瑩封email, 個內容係話我哋讀英文單字嘅時候, 其實只係認住頭尾兩個字母, 中間啲字母就算點串, 我哋都可以理解無誤.. 試吓讀讀以下呢一段文字啦, 雖然唔再係咩新鮮發現, 但係都叫做係個頗有趣嘅..

i cdnuolt blveiee taht I cluod aulaclty uesdnatnrd waht I was rdanieg. The phaonmneal pweor of the hmuan mnid, aoccdrnig to a rscheearch at Cmabrigde Uinervtisy, it dseno't mtaetr in waht oerdr the ltteres in a wrod are, the olny iproamtnt tihng is taht the frsit and lsat ltteer be in the rghit pclae. The rset can be a taotl mses and you can still raed it whotuit a pboerlm. Tihs is bcuseae the human mnid deos not raed ervey lteter by istlef, but the wrod as a wlohe. Azanmig huh? yaeh and I awlyas tghuhot slpeling was ipmorantt!

雖然係咁, 但係我覺得一半半啦.. 因為我覺得呢個point係要你以較快嘅速度嚟閱讀先可以成立, 如果放慢閱讀速度, 逐個字去仔細咁睇嘅話, 我就覺得唔work喇, 因為你察覺個字串錯咗, 所以你需要時間將佢重組先知道正確係個咩字..

09.04.2007 | 嘆為觀止

最近喺網上發現一個陌生人嘅blog, 睇完之後令我嘆為觀止, 五體投地.. 好佩服佢可以對香港樂壇的一切這般瞭如指掌, 由樂壇趨勢, 唱片公司, 歌手到歌曲佢都可以好有心思咁娓娓道來, 而且資料仲係好詳盡, 甚至乎有好多嘢都未必係一般人所知.. 最令我津津樂道就係果篇寫1989-2005年度個新人蒸發實錄, 簡直就係樂壇活字典啦.. 發現裡頭有超過50%新人我係完全唔知道佢哋嘅存在, 超過30%新人我係已經淡忘, 淨低少於20%新人先至為我熟悉, 問你怕未?? 除此之外, 喺呢個blog度有另外link去另外一個(相信係佢朋友嘅)blog.. 裡頭有兩篇類似嘅文章, 係集齊晒1973-1980同埋1981-1989 歷屆港姐嘅去向, 個人認為好睇至極, 從中得知同回味一啲飯後話題港姐緋聞.. 好嘢喺度齊分享, 並且熱切期待港姐蒸發實錄Part III的來臨啊..

08.04.2007 | BIG

就係佢喇.. 記得約莫8年前收錄喺佢第一張大碟《On How Life Is》裡頭嘅《I Try...》令我為之驚艷.. 一把絕無僅有嘅獨特聲線, 我覺得edgy得來確實係正到睧, 果張大碟至今都仍然係我嘅all time favourite之一.. 今日呢張大碟叫做《BIG》, 的確係好BIG勇氣嘅一張碟, 因為佢完全冇首作品喺入邊, 通通依靠另一個人全權負責.. 所以風格同以前啲專輯相比, 真係南轅北轍, 連帶唱腔同演繹都一同大躍進.. 同一班全新班底合作, 驚喜確實係有, 但係敗筆都係有, 就好似《Ghetto Love》同埋《Treat Me Like Your Money》呢兩首歌, 真係唔適合佢唱, 聽咗真係覺得鬼揸咁樣(Oh Macy, that's only right for Fergie), 一定skip!! 除咗果兩首, 其他都好正好啱聽, 尤其主打《Finally Made Me Happy》同另外一首叫做《Get Out》嘅, 完全帶出佢嘅獨特型格.. 順帶一提, 轉咗個新髮型, 發覺佢原來係可以咁靚架噃, 一早就應該搣甩以前個afro頭癲婆形像啦..

07.04.2007 | 本草藥膳

呢兩日趁假期睇返《本草藥王》呢套劇集, 覺得裡邊啲藥膳好有趣, 從而學識好多聞所未聞嘅藥膳當然仲有好多從未見過, 讀都唔識讀嘅生字.. 劇中提及以下一啲例子, 應該都係有根有據呱??
  • 減輕鼻鼾: 辛夷花五錢, 川芎五錢, 茜草根五錢, 茅根花五錢, 用水浸透, 用紗布袋裝好, 浸藥嘅水同清水加埋一齊, 再加一個豬鼻, 四兩海蜇, 煲成老火湯飲用..
  • 肝經濕熱型臭狐: 白芷, 陳皮, 蒿本, 當歸, 桂心碾成粉, 再同魚湯一齊煲..
  • 脾胃虛弱, 食慾不振: 用白朮同乾薑熬成汁, 然後將紅棗去核磨成泥, 溝入麵粉度烘成餅..
  • 風疹(俗稱水痘): 杭菊, 桑葉, 牛蒡子, 桔梗, 甘草, 浙貝母, 枝子皮, 金蟬衣, 連翹, 葦莖, 木通加埋薄荷煲水服用..

06.04.2007 | 享受頹廢

清明節加上復活節倆一連五日嘅假期, 真係平日百忙中難得嘅一個抖氣機會.. 好多人都會藉此機會出外旅遊, 但係我就選擇好好地relax吓修養自己.. 今日已經係第二日, 都係足不出戶, 但係又一啲都唔覺得悶噃.. 朝早可以瞓晏啲, 唔駛趕住返工.. 成日流流長一啲都唔緊張, 好放松好relax, 終於有時間去睇我兩年前由舊同事度copy過嚟嘅劇集喇.. 一睇落去即刻窮追不捨, 睇睇吓心血來潮整番兩味, 覺得累就好隨意咁瞓番個晏覺.. 真係好難得可以抽時間做啲咁「奢侈」嘅嘢, 勁正啊.. 但係覺得連續五日都係要咁樣地「享受頹廢生活」, 的確唔係幾掂, 個人熬得太耐好容易發霉架.. 所以聽日都係時搵番啲嘢做喇..

05.04.2007 | 蠟筆小新

記得十年前還是學生嘅時候, 好中意追睇《蠟筆小新》呢個漫畫.. 當時可稱得上係風靡一時, 尤其係當佢失驚無神, 有意無意咁露出佢嘅「小象象」, 真係超低能.. 睇嘅人一定覺得佢百厭得好可愛, 但係如果我他日有咁嘅一個仔, 實在係會激餐飽啊, 哈哈..

04.04.2007 | 激氣

噚日係寫咗個《飯氣攻心》嘅blog, 跟住明明就係已經post咗上去, 絕對冇搞錯, 因為每次post完我都會再睇吓個blog確定冇花冇假.. 但係當我返到屋企, 諗住睇吓有冇人留comments之時, 竟然發現連個post都唔見埋, 係完全不留痕跡, 完全好似冇咗件事咁唔鬼見咗.. 確係晴天霹靂!! 嘩, 明明之前睇到仲喺度, 隔咗幾個鐘後點會冇啦啦唔見咗架?? 去返blogger又冇告示話當時有咩technical問題, 又搵唔到可以詢問之處喎, 好激氣啊!! 咁點啊?? 埋唯有委屈自己, 憑住記憶重新再寫多次囉.. 不過總算不幸中的大幸, 憑住猶新記憶好快就寫返好篇嘢, 完全係不費吹灰之力呀..

03.04.2007 | 飯氣攻心

小銘之前四周圍唱衰我, 話我唔畀面佢唔同佢食晏, 真係冤枉啊.. 所以今日plan好晒同佢一齊食晏, 咁就去咗間以前一路嚟都有去開嘅泰國餐廳, 佢啲set lunch都幾抵食架.. 結果兩人叫咗個泰式咖哩雞同埋辣椒香菜炒肉碎, 係跟飯嘅.. 好耐都冇出去食lunch, 所以都隔咗頗長一段時間冇嚟呢度食嘢.. 點知啲嘢跌晒watt而且價錢又起咗, 有點大失所望.. 但係依然成碟飯食晒落肚, 就因為食咗呢碟飯, 返到公司一坐低對住個mon, 就即刻覺得想瞓喇.. 唔掂啦咁樣, 於是即刻去廁所稍微清減吓兼切洗埋塊面, 但係仍然都覺得昏昏欲睡.. 正如同事所講嘅「飯氣攻心」, 真係一啲都冇錯.. 我諗以後lunch都儘量避免食飯較為上策, 啲energy集中晒消化果一兜飯, 又點會有精神可言啊??

02.04.2007 | 出其不意

新年前換咗部新手提電腦, 因為要做partition所以將原先裝好嘅嘢, 狠狠咁一嘢format咗.. 結果乜都冇晒, 全部software同driver都要從新裝過.. 搞掂之後發覺少咗個DVD Codec, 結果虛有個DVD-RW但係連舊DVD都睇唔到, 鬼咁激氣.. 於是就好唔憤氣, 上網搵吓有啲咩free software 啦, 結果一路落嚟反反復復咁下載->安裝->唔啱駛->刪除, 至今都成個半月喇.. 今日竟然好出其不意咁畀我喺office度搵到舊CD, 正係我想要架.. 明明係同一個model嘅manufacturer CD set, 但係偏偏我部就係少咗呢一舊.. 是但啦, 求祈畀我搵到一於裝咗先.. 好開心, 終於可以靚靚仔仔咁睇DVD喇部laptop..

好多嘢, 你越係著緊就越係得唔到, 反而有啲嘢你明明已經係死咗條心, 但係偏偏就喺你好無期待望之下, 突然出現眼前.. 都唔知想點??

01.04.2007 | 四月一日

今日四月一日, 我記得呢一日係愚人節, 係張哥哥死忌, 係我一位舊同事嘅生日..

愚人節, 一個越是覺得陌生嘅節日, 十幾年前仲係學生嘅時候, 或者都會應節夾埋啲同學仔整蠱老師同埋其他同學.. 當然都係歡喜收場果啲整蠱啦, 今日留一線他日好想見呀嘛.. 依家一把年紀, 省起四月一日係愚人節都算係咁喇..

張哥哥死忌, 只係記得四年前2003年4月1日聽到消息嘅果一刻, 感到非常震驚, 不能夠相信事實, 直至新聞報章證實報導之後, 才痛惜一個樂壇巨星嘅隕落.. 在此希望佢在天國安息.. 我有時都會喺K度揀佢啲歌嚟唱..

一位舊同事嘅生日, 當初見到佢喺份唔記得係乜嘢表格上填寫出生日期, 呢個人居然喺個愚人節生日, 覺得勁搞笑.. 佢係我第一個識得喺愚人節生日嘅人, 而且第一次同佢講聲生日快樂之後, 竟然係問佢知唔知張哥哥跳樓身亡嘅消息.. 喺度祝你生日快樂!

今日四月一日星期日, 如果一個月份嘅第一日係星期日嘅話, 咁果個月份就會出現黑色星期五..