25.04.2007 | 艱巨任務

我諗現階段我有二十萬種理由係需要認認真真落落實實咁去減肥兼且操fit自己喇.. 呢一兩年以嚟, 真係越嚟越放松自己, 喺個健身中心裡頭, 實在係搵唔返當年積極的自己, 生活飲食方面, 簡直就係毫無節制, 猶如一個焚化爐咁乜都窒得落肚.. 眼見自己僅有嘅肌肉一日比一日鬆弛, 豬腩肉一日比一日肥大, 著衫開始覺得贅肉難掩, 連以前喺gym認識啲瘦仔肥仔都已經fit過自己九條街咁遠, 其實唔需要二十萬種理由都已經可以要我撼頭埋牆啦.. 尤其係復活節長假嗰五日橫行無忌咁極之寵幸自己過後, 就連幾日唔見嘅朋友都一眼睇出我肥咗, 應該好好反反省省下喇.. 所以現在下定決心, 實行喺飲食同埋運動方面落手, 畀自己四個月時間, 勁減15磅回復以前大勇狀態.. 今次呢個艱巨任務, 盡力而為啦, 第一步已經踏咗出去喇, 希望可以成功!!