設定貼子語言 Set language for posts :
中文
English
中英雙文 English & Chinese

14.04.2007 | 高爾夫球

今日下晝全公司總動員, 再加埋專程由新加坡飛過嚟嘅大老細, 同埋咁啱嚟香港度假嘅兩個北京同事, 一班人浩浩蕩蕩由新office出發去西貢滘西洲.. 山長水遠去嗰度做咩咧? 話說呢個島上有個全港唯一一個公眾高爾夫球場, 唔需要幾萬蚊入會費, 開放畀公眾使用嘅高爾夫球場.. 咁當然我哋呢班柴娃娃就唔係去高爾夫球場打啦, 而係去嗰driving range玩吓啫.. 個馬會有個98蚊package好抵玩, 包來回西貢碼頭專船接送, buffet dinner同埋喺個driving range冇限任玩.. 個球場環境的確係好唔錯, 風涼水冷有山有水綠草如茵.. 啲嘢食老實講就嘛嘛地啦, 不過成個package最主要都係個golf啫..
食完就哪哪臨落個driving range玩喇, 卅歲人都係第一次玩呢家嘢.. 覺得都幾有趣噃, 由一開始fing空棍打唔到波, 到後來成功將粒波打出去, 再到後來可以飛粒波去到冇雷公咁遠.. 以前齋睇電視啲人玩, 覺得咪就係用支棍打粒波啫.. 但係當自己玩嘅時候, 就覺得呢個咁高尚嘅玩意其實都一啲都唔易.. 打到粒波冇咩大不了, 但係要粒波去到你想要嘅位置, 就的確係件難事.. 對我第一次玩, 可以做到飛起粒波其實已經係件開心嘅事喇.. 因為初哥唔識嘢冇帶手套, 所以連大百多杆後, 個手起晒枕起晒水泡, 真係未快樂付出好大代價啊.. 我覺得我都幾中意高爾夫球呢個玩意噃, 聽人話打高爾夫球有80%係傾生意20%至係真正打波, 可能現在學咗先對日後都有幫助, 哈哈..

2 comments:

  1. yeah.. that was really fun, i enjoyed the night very much.. haha!!

    ReplyDelete