12.04.2007 | 神奇的中文字

平時都唔覺份《頭條日報》封面左下角原來有一小篇幅係寫啲冷知識.. 頭先做做吓嘢就走去翻翻嗰疊堆積如山嘅報紙, 發現原來啲冷知識都幾有趣噃.. 點解會叫做冷知識, 都搞唔清楚, 個冷字應該係解作冇乜人知道咁啩.. 其實覺得中文字真係一種不可多得嘅文字, 因為三言兩語就可以好精簡好準確咁樣將一樣嘢表達出嚟.. 而且一塊塊獨立字眼, 意形相見, 無論由左至右, 右至左, 上至下, 下至上, 閱讀都不成問題.. 尤其佩服古文嘅濃縮精簡, 往往一個字就可以表達好多意思, 一篇意義深詳嘅文章可以短短十幾個字搞掂(五言詩歌正是), 雖然有時都會幾個字都冇個意思(正是「嗚乎哀哉」也).. 不得不承認佢真係一種好神奇嘅文字, 作為一個華人嘅我, 能夠掌握呢種文字, 確實係一種福份也.. 最近更加發覺有個六字真言, 係非常之意義非凡, 一句既出即令人呆滯嘅--佢就係「超低能,勁搞笑」喇, 哈哈..