設定貼子語言 Set language for posts :
中文
English
中英雙文 English & Chinese

31.07.2007 | 落湯雞

今日食lunch嘅時候見個天氣涼涼哋, 所以同事就建議不如行遠啲去啦.. 於是大家都冇乜所謂, 反正有人提議, 就費事諗咁多(其實應該係話懶得諗)一於行動啦.. 咁就如常咁大家坐埋一圍食嘢喇.. 食到臨尾, 見個天好似就快落雨, 所以就哪哪臨鬆人啦, 仲喺等運到咩?? 點知一踏出間餐廳冇幾遠, 即刻落咗幾滴雨, 趁未落起即刻加快腳步, 希望可以避過呢場雨啦.. 就喺加緊腳步之時, 大家同處進退兩難半途中嘅時候, 個天竟然毫無憐惜之心咁澎澎聲落起場大雨.. 搞到我哋非常瘋狂哋向前跑搵地方避雨.. 卒之企喺路邊一棟屋向外延伸嘅兩呎屋頂下大概10分鐘, 算係避到雨啦, 但係其實都已經一身濕晒架喇.. 真係話咁啱得咁矯, 如果我哋係早10分鐘或者遲10分鐘去食lunch嘅話, 就唔會搞成落湯雞咁樣啦.. 返到公司, 幾個濕笠笠嘅人真係完全毫無形像可言.. 結果搞到我要去廁所用個乾手機嚟吹乾件衫, 不過好彩尚係lunch hour, 所以未畀人撞見我呢種醜態.. 你知啦, 部乾手機固定喺牆上, 所以要吹乾件衫一定要就住就住擺埋晒啲超肉算甫士吖嘛..

30.07.2007 | 明星抵死語錄

  • 蔡卓妍險遭鹹豬手摟胸: 「幸好我範圍不大,好難碰到!」
  • 杜汶澤坦言還不想當爸爸: 「實在不願意造個人出來和自己搶老婆!」
  • 鄭秀文復出開演唱會自嘲身材: 「你喜歡我A4紙這樣的身型呀?」
  • 吳徵慶倖遇上楊瀾: 「優秀的女人是沒有好下場的, 除非你找到一個好老公!」
  • 黄秋生談《無極》: 「看了15分鐘就看不下去了, 簡直就是神經病.. 張東健跑了10分鐘, 我都不知道他在跑甚麼, 太恐怖了!」
  • 趙薇回應走光事件: 「比基尼都可以穿, 走光算甚麼? 哪个女孩穿裙子出門不穿内褲?」
  • 鞏俐指張藝謀两部口碑欠佳的大片存在毛病: 「两部電影太相像, 可以合在一起叫《十面英雄》..」
  • 楊丞琳在一次歌迷會上顯摆其翹臀: 「一定要把屁股肉都塞进内褲里, 才不會下垂!」
  • 費玉清和朋友戲言: 「我和周傑倫一样年輕, 是因为我還是處男..」
  • 李宗盛奉勸選手不要急於當明星:「事實上往往是臺上一個傻瓜, 幕後十個天才在幫着他!」

28.07.2007 | 小時了了...

今日下晝喺某個商場見到一個人, 個樣有九成似一位小學老師, 但係始終都未能夠肯定係佢, 所以都係冇上前去問候.. 話晒小六畢業過後都已經再冇見返呢個班主任喇, 都十幾年前嘅事啦, 計返準啲應該係有十八年咁耐喇.. 嘩, 好恐怖啊呢個數字, 都真係唔諗返起都唔覺有咁耐..

雖然係相隔十八年, 但係我覺得個老師應該都會記得我嘅.. 因為想當年嘅我, 學業運動操行樣樣掂, 的確又係風頭穩健, 個名噠落地下都唪唪聲啦, 真係無人不知架.. 當時校內各大小文武比賽實有我得獎個份, 拎返嚟啲獎都擺滿成個櫃喇.. 最巴閉係連續兩年蟬聯最佳運動員同埋年度模範生添.. 諗返起以前啲威水歷, 的確令自己津津樂道, that has always been such a good memory for myself.. 依家再諗返起, 只能夠誠實講句「小時了了」是為最貼切不過, 哈哈..

27.07.2007 | 女人可以由40開始美麗

熟悉我嘅朋友都知道我非常之欣賞呢位殿堂級歌手, 佢從來都未同美麗扯上任何關係, 但係當我見到佢早幾日記招影啲相, 簡直可以用「為之驚艷」來形容我當時嘅感覺, 第一次覺得佢靚到爆晒燈.. 四十一歲都仍然keep得咁好, 皮膚靚到呀, 簡簡單單一件白恤衫襯一身casual打扮, 頂住頭簡單bob bob哋嘅髮型, 唔駛點花悄, 我覺得呢個look好掂, 果然係狀態大勇.. 如果演唱會都可以keep住咁就非常之完美喇, 11月9日喺九展匯星一連6場近距離演唱會, 有啲衝動想去睇添..

26.07.2007 | 生病記

今朝起身覺得唔舒服, 於是就去睇醫生, 請咗日病假.. 過後發咗個短訊畀同事通傳聲, 結果佢回覆話: 「呢份工做咗咁耐, 你都係第二次請病假咋噃, 好好哋休息啦」突然間覺得好可笑, 好想覆返佢話係唔係想我病多啲, 用盡公司畀嘅一年十日病假啊?? 但係最後都冇, 因為知道佢都係出自一片關心.. 不過話是話, 佢講得都冇錯, 因為個醫生都覺得驚訝, 因為上一次探佢都已經係成年前嘅事.. 其實要請病假都要天時地利配合得好, 唔係話我中間段時間冇病過, 而係病咗都要頂硬上返工, 因為實在係冇請病假嘅奢侈時間.. 仲記得大概兩三個月前, 個病其實係忙到不知不覺中痊癒嘅.. 小病是福, 因為病癒之後其實係可以更加健康架, 有返晒啲抵抗力吖嘛.. 今日瞓咗成日, 都總算係好好哋咁休息吓充吓電, 所以話小病其實係幸福的.. 哈哈!!

25.07.2007 | 失而復得

話說之前喺上海畀人扒咗銀包, 轉眼都過咗兩個月喇.. 噚晚返到屋企, 終於收到間保險公司郵寄過嚟嘅支票.. 當時都相當之意外, 因為其實事隔咁耐, 我都已經冇咗件事.. 還記得之前fax咗啲索償文件大概兩個星期之後, 收到保險公司書面通知需要我遞交正本文件方為有效.. 當時睇過封信之後, 就擺埋一邊, 諗住得閒先至處理, 點不知拖吓拖吓竟然完完全全忘記咗件事.. 所以收到支票嗰一剎那, 的確係驚喜萬分, 因為萬萬都估唔到竟然喺我仲未遞交正本文件之前, 就已經了解咗件事噃, 真係勁搞笑.. 間保險公司似乎係有啲自打嘴巴咁噃, 一方面要求索償人遞交正本文件, 另一方面就已經賠晒錢畀人.. 錢都到手啦, 仲鬼有人得閒理你咩?? 不如畀我有返份黃浦江公安派出所發出嘅正印police report留為紀念仲好啦.. 所以今朝放工經過銀行哪哪聲入咗張票, 雖然區區幾百蚊, 但係嗰種「失而復得」嘅感覺先至係至開心.. 下次旅行, 我都會買返份旅遊保險架喇, 幾十蚊買個以防萬一吖嘛..

24.07.2007 | 佢返嚟喇..

邊個佢返嚟咁大陣仗啊?? 佢唔係咩大人物, 係嗰gym嘅cardio dance導師占美啫.. 話說佢因為要積極迎戰一個頗大規模嘅舞蹈比賽, 所以就請咗兩個月假閉關準備, 聽講佢實力雄厚擠身最後八強, 但係最後結果喺點我尚未探聽到消息.. 我都係最近先至知咋, 怪唔得咁耐都唔見佢啦.. 今日放工去gym, 竟然見到佢出現, 所以就哪哪聲join個class喇.. 初時有少少擔心自己頂唔晒成個鐘, 因為之前嗰project攪到停咗一排都冇郁動過, 到時半途體力不支就好鬼尷尬啦.. anyway最後都可以順順利利跳完成part舞, 今日啲step都唔算複雜, 未出現喘氣現象又可以應付得綽綽有餘, 算係幾enjoy啦.. 不過可能太耐冇跳, 所以今日一擊之後, 即時覺得全身肌肉通通都郁混晒咁滯, 掹吓掹吓咁酸酸哋添, 聽日瞓醒實會週身肌肉隱隱作痛.. 喂, 但係今次我唔認老噃, 呢種情況係好正常嘅噃, 因為霎時間未能夠適應突如其來嘅momentum吖嘛, 下次再跳實唔會有事啫!! 話是話, 其實我覺得跳舞係能夠保持心境同身體機能年輕嘅其中一種方法喎, 哈哈..

23.07.2007 | 星期一

又係星期一, 又係一個極之悶的日子, 好冇心機啊.. 今朝真係好唔想爬起身返工, 因為前兩日週末真係成個人peh晒, 霎時間又要重新捱五日辛苦命, 都唔好話唔驚.. 突然間覺得身心疲累, 好似對工作失去嗰種應有嘅衝勁, 但係又不至於完全失去感覺, 總之就覺得缺少啲咩咁樣, 但係又講唔出係乜嘢.. 我覺得呢種現象應該係週期性嘅, 耐唔耐久對工作鬧吓情緒, 發吓工作牢騷, 過咗一段時間又會自自然然, 甚至係不經不覺咁消失.. 有時會諗, 不如唔好做喇, 求其去打份朝九晚五, 安安定定嘅文員仔工, 準時開工準時放工, 悠悠閑閑冇壓力都幾好.. 不過算啦, 都係諗吓算喇, 幻想係唔會work架, 面對現實就至實際.. 朋友, 仍需繼續努力向上啊, 退休前起碼仲有25年時間要捱, 依家就話累是乎有啲言之過早噃.. 不如今晚早啲瞓, 的起心肝聽日返工吧啦..

22.07.2007 | 長命雨..

今朝瞓醒已經係十一點幾, 再喺張床度懶吓又瞓吓, 結果再張開眼嘅時候, 已經係下晝點幾鐘喇.. 嘩, 不得了, 竟然可以喪瞓到咁樣地步, 真係破晒呢幾年來嘅記錄.. 其實覺得瞓到咁晏, 成朝時間都嘥晒有啲惋惜, 但係另一方面有確實係瞓得好鬼享受噃, 哈哈.. 瞓醒後諗住出街啦, 於是梳洗完畢, 換好衫, 點知開始落雨咁掃興.. 冇所謂啦, 等雨停先出啦.. 於是等啊等, 兩點三點, 等等吓覺得悶悶哋又唔知做咩好, 睇電視又覺得累累哋, 所以又上房懶喺張床度, 就咁又再次呼呼入睡喇.. 其實係諗住邊瞓邊等雨停嘅, 但係最終七點喇場雨都仍然落緊.. 最後都係算啦, 都係乖乖哋留返喺屋企啦, 雖然成日醞喺屋企真係好悶, 但係就當乜都唔做好好咁休息一輪啦, 大大話話今日都瞓咗十幾個小時, 好勁啊.. 場雨其實到家陣都仲未聽, 長命雨一場, 喺度估吓聽日報章頭條新聞會唔會又係上個月咁水浸市中心咧?? 哈哈..

21.07.2007 | 星光幫《因為我相信》

星光幫呢十個人, 我最近先至大概知道佢哋係台灣一個選秀比賽嘅十強人馬.. 不過真正認識嘅, 就得個人氣王楊宗緯, 不時都有呢個人嘅新聞, 最終棄權推出.. 但係都未正式聽過佢哋啲歌聲, 剛剛無意中喺我哋好朋友youtube網站見到呢首星光幫大合唱嘅歌, 於是就不妨一聽啦.. 結果真係要豎起雙手拇指, 好好聽啊~~ 個個都好有實力, 搞好耐都唔知邊個打邊個, 最後上網搵歌詞, 歌詞介紹邊一個唱邊一段, 再對照吓個MV, 大概知道出線嗰幾個..

星光幫(不分先後)係: 林宥嘉[冠軍], 周定緯[亞軍], 潘裕文[季軍], 楊宗緯, 許仁杰, 盧學叡, 劉明峰, 安伯政, 謝政廷同埋唯一一個女仔李宣榕.. 個人覺得楊宗緯, 周定緯, 林宥嘉真係好唔錯..

20.07.2007 | 大馬美食

突然間好掛住佢哋.. 美食當前, 係唔係已經食指大動喇?? 喺度為各位一一介紹, 左至右至下依序為: 阿三叻沙, 酥皮蛋躂, 沙爹, 炒貴刁, 雜雪, 福建炒, 肉乾, 海南雞飯, roti canai, 紅龜糕, 椰漿飯, 薄餅, kuih talam, otak-otak, rojak, 珍多冰, teh tarik, 叉燒雲吞麵, 燒雞翼, 咖哩叻沙, 釀豆腐, 脆皮燒肉, ketayak, 腸粉, 燒魚, 珍珠糯米雞.. 仲有好多好多...

19.07.2007 | 家有囍事

突然間諗返起《家有囍事》呢一齣戲, 其實都應該睇過幾次架喇, 但係都仍然覺得佢真係好經典爆笑.. 戲中不斷幕幕經典, 其中最令我印象深刻嘅, 就係堪稱第一女主角吳君如小姐所飾演嘅程大嫂, 啲對白勁爆笑.. 其實仲有好多經典爆笑場面, 可惜youtube搵唔到, 如果唔係一定喺度同大家分享啦.. 以下其中比較印象深刻兩場戲..

(一)
程大嫂沖出大門, 係咁揮一揮手就截到架的士, 跟住就上車交代司機一定要等到閂門至可以開車.. 追妻心切嘅常大少一心諗住挽留, 點知就咁啱扑親順手閂埋車門, 司機於是立即開車..
吳: 先生, 你貴姓啊? 乜又係你啊, 陳生??

(二)
程大嫂正在如廁, 常家表姐毛瞬筠騎住電單車直闖入屋, 撞見廁所裡的吳君如, 兩人頓時四目交投, 一片寂靜之後..
吳: 表姑奶奶...
毛: 屙屎啊? 哈哈哈哈..

18.07.2007 | 把鬼火...

今日放工後搭lift落樓嘅時候, 按個落樓掣竟然冇乜反應, 於是就轉咗個圈連按其他三個落樓掣, 但係都一樣冇反應.. 心諗你唔係家吓壞lift咁應景係嘛?? 就係呢一刻, 畀我發現喺四部lift中間貼住一張毫不起眼嘅紙, 行埋去一睇, 竟然係因為要維修大廈[唔記得乜嘢]所以需要暫停所有昇降機服務.. 至抵死就係維修時間9pm-11pm, 睇吓隻錶當時剛剛9:10pm, 真係撞到正.. 所以被逼要行樓梯落樓, 不過好彩公司喺五樓, 所以行樓梯都算不成問題.. 一路行落去, 半途遇到另一個人喘晒氣咁好努力咁行上嚟, 忽然覺得自己好幸運因而有點同情佢添..

但係覺得個management勁差, 根本都冇預先張揚, 實在應該大發通告話明今晚有維修吖嘛.. 唔發通告都唔緊要啦, 貼喺lift度張告示唔該都顯眼啲啦, 我相信食晏嗰陣我一定會見到架.. 都算啦, 咁明知冇lift搭啲人需要行樓梯, 樓梯口都唔著返晒啲燈, 攪到要喺個昏暗嘅情況之下落樓, 確實係好危險嘅嘛.. 就算唔畀人有機可乘, 自己都極有可能唔小心親啦.. 唉, 真係把鬼火都唔知講咩好呀~

17.07.2007 | 笑個不停

有時候一個人真係會笑個不停, 明明係冷靜咗落嚟, 但係事隔幾秒鐘之後, 個畫面又重現腦海, 跟住就係繼續咁喪笑落去.. 睇見以下啲人真係笑到唔識停嘅表情, 連自己都會跟住喪笑.. 雖然實在是不知所為, 但係都算係一種幾好嘅舒壓方式啦.. 大家笑笑冇煩惱..

16.07.2007 | 心曠體胖??

上個週末過得都唔錯, 雖然係短暫咗啲, 但係都叫做有休息過喇.. 最開心就係可以瞓到日上三竿, 太陽直射pet-pet都仲懶喺張床度, 好享受呢仲好耐都未有過嘅頹廢喇, 哈哈.. 週末兩日去過gym, 睇咗Harry Potter(講開又講, 睇咗覺得麻麻地, 少咗啲刺激), 行街買咗件衫仔, 食咗好多嘢(唔記得食乜, 就係多啦).. 輕輕鬆鬆自自在在之後, 令我醒覺乜嘢叫做心曠體胖.. 事關今朝起身照鏡子, 發覺自己塊面忽然間肥咗咁, 唔係吖嘛?? 事隔兩日稍為放鬆吓自己啫, 唔係咁快見效係嘛?? 噚日下晝食晏嗰陣, 小君仲忽然驚覺我塊面瘦咗嘅噃.. 嘩!! 救命, 好傷心啊, 希望係啲乜起床後暫時性水腫之類嘅現象啦.. 睇怕要飲多啲唔落糖薏米水同埋綠茶去去水腫至得喇..

13.07.2007 | 一周的終結在於此

今日禮拜五, 覺得好想早走, 因為已經連續幾個禮拜都冇好好享受過週末喇, 所以突然間對聽日同埋後日有種好憧憬嘅感覺, 終於可以好好咁休息返兩日充吓點喇.. 於是今日六點踏三就開始準備收工, 咁啱其他同事都係一個見一個準備鬆人, 所以最後個個都早走喇, 返而變成我同隔離個同事係最後兩個一齊走添.. 踏出公司大廈都踏九喇, 望望個天仲係光嘅噃, 有啲唔係好慣, 因為前一排都係不見天日.. 其實可以日光日白嘅情況離開公司, 個心情都真係開心啲, 步伐都輕快啲架.. 一日九個小時呆係間公司度, 其實都好足夠啦, 趁可以早走就唔好錯過呢個難得嘅機會喇, 因為我唔知幾時又會好似前一排咁變態.. 喂喂喂, luer口水講過, 大吉利是, 百無禁忌!! 我日日都可以準時放工.. 喺度預祝我有個開心愉快嘅周末先.. ^_^

12.07.2007 | 壞習慣

最近發覺自己嘅壞習慣又再復發喇.. 究竟係咩壞習慣咧?? 咪就係做做吓嘢, 覺得牙痕痕想食嘢囉.. 撞鬼, 發現最近公司啲同事過份熱情, 失驚無神就買啲嘢食上公司揼喺個pantry奉獻畀大家享用.. 又蛋糕, 又薯片, 又肉乾, 又汽水一大堆口垃圾.. 原本一心一意諗住減肥嘅我, 就咁抵擋唔住誘惑, 再加上壓力嘅推使, 結果好自然咁隔唔耐就行去pantry捻啲捻啲咁, 真係好鬼滋味.. 減肥人士最驟忌就係呢啲口垃圾啦, 營養不良之外, 主要因為通常都係高熱量高脂高糖高鹽, 而且一食就欲罷不能, 其實食落好多都唔覺, 對於致肥佢真係勞苦功高啊.. 所以下星期開始, 一於要逼自己死忍, 唔可以再畀自己放肆落去喇, 因為我嘅減磅計劃睇嚟似乎進度緩慢噃.. :-(

11.07.2007 | overload...

最近因為個project覺得自己工作上非常之overload, 所以都有同上頭反應呢個問題.. 結果今朝收到其中一個嘅電郵, forward咗呢個短篇過來, 唔知佢係有心定係無意.. anyway, 我覺得都幾搞笑嘅, 就當做係工作上嘅一點輕鬆點綴囉.. 希望我唔會去到呢個地步啦, 我已經唔襟捱喇..

09.07.2007 | 非常之不健康

經過不知由幾時開始後無數次嘅OT, 今日總算可以稍為放松啲喇.. 回顧過去每日OT已經對身心好唔健康喇, 加上每日lunch同dinner都係叫外賣解決, 簡直係漸漸咁喺度摧毀緊將自己嘅生命.. 再加上抽唔出時間去運動, 每日都係坐喺個位度對住部mon十幾個小時, 真係好唔得啊.. 雖則話我哋呢個行業, 此等現象已經係見怪不怪, 但係覺得隨著自己年紀增長, 確實係不復當年勇, 已經係去唔返以前嗰種鼎盛嘅魄力同埋精力喇.. 忙完一輪之後, 真係可以攤屍幾日先至復原.. 呢幾日未夠11點就覺得好累, 韃落床即刻可以瞓得著喇, 雖則早瞓, 但係第二朝起身仍然覺得好虛脫, 好似前一晚做過啲乜嘢大事咁.. 隔離同事仲衰, 佢話32小時之役後, 佢足足瞓咗廿幾個鐘都補唔返.. 佢都估唔到, 32小時之役後, 其實我哋某部份同事連禮拜日都仲返足成日工架.. 諗返起都覺坎坷, 當初實在唔應該入呢一行啦, 真係希望止之於此, 我年紀大唔再受得起呢種折磨架喇..

寫寫吓呢篇嘢, 其實我開始覺得頭重重, 非常之眼瞓喇..

07.07.2007 | 不眠不休32小時

又係因為呢個project, 又係因為要趕起個永遠不能壓後嘅deadline, 又係因為個客猛咁摧, 搞到我哋成team人連續不眠不休咁做足32個小時嘢.. 由06.07.2007朝早9:00am返工開始, 破晒記錄咁一路做到07.07.2007下晝5:00pm先至收工.. 嘩, 真係成世人未嘗過做得咁勁啊.. 返到屋企, 搞到阿媽仲問我噚日係唔係去咗旅行添, 勁搞笑.. 不過都覺得個team都好有team spirit囉, 個個人都肯通頂捱眼瞓.. 最難頂其實就係睡神來襲嗰一刻, 真係成個人變得惛陀陀, 但係仲係要死撐落去, 不過一過咗呢一刻, 就即刻變返正常啦.. 好彩成晚嘅精力都冇白費, 個result出嚟真係improve咗好多好多, 多得成team人一齊付出嘅effort, 令我深深體會到真正嘅team spirit..

漫長32個小時點過, 已經唔係好清楚記得, 其實應該都唔好去記住呢個慘痛嘅經歷喇.. 最印象深刻就係07年7月7日踏正朝早7點07分, 有個舊同事好有心咁買咗早餐外賣上嚟公司, 當時我哋一共7人一齊break番吓嘆早餐, 算係成日最warm嘅一part喇..大家同個7都好有緣, 哈哈..

05.07.2007 | 與時競賽

最近硬係覺得一日24小時唔夠用, 因為每日返到公司之後, 就一味喪做趕個deadline.. 好似feel到個計時炸彈猛咁喺度滴答滴答咁響.. 每日好自然咁會做做吓, 望望牆上個掛鐘, 第一次望已經係食晏時間, 餓餓地行去pantry拎兩塊蘇打餅食.. 第二次望就已經係6:00pm放工時間, 但係依然都需要繼續做.. 第三次望很多時候已經係十點幾鐘.. 覺得點解時間會過得咁快架, 好似都仲有好多嘢未clear完噃.. 的確係喺度同緊時間競賽咁, 但係就往往都會唔過佢, 好唔公平啊.. 如果可以任由留住時間, 等我可以就住我個步伐做嘢就好喇.. 唉, 神仙咩?? 不如慳返啲胡思亂想嘅時間, 積極啲爭取僅有的時間做嘢好過啦~~

04.07.2007 | 又剪頭髮喇

今日難得可以早收工, 於是就決定去剪頭髮, 因為驚今日唔剪嘅話, 就唔知幾時可以有時間去剪喇.. 經過上一次慘痛嘅經歷之後, 用咗差唔多兩個月時間留長嘅頭髮, 應該係時候修修佢喇.. 於是打醒十二分精神再次光顧我的「御用」髮型師, 打醒十二分精神唔可以畀佢再次將我個頭攪非, 千吩萬咐剪個似返個人樣嘅.. 可能佢都覺得上一次失咗手, 所以今日都小心翼翼, 最後登登登登--我好滿意咁行出個salon, 有種好似報咗深仇大恨嘅感覺, 唔識形容, 應該係類似否極泰來嘅感覺.. 因為終於唔覺得自己頭髮係醜樣喇, 照照鏡反而覺得自己終於靚仔返啦.. 返到屋企, 家姐突然驚覺原來我頭髮已經咁長喇, 而且仲馬後炮咁贊我最近好似好睇咗啲噃.. hmmm, 我諗如果我唔意外地剪咗之前個醜怪頭, 就唔會發覺其實依家呢個新髮型(額前頭髮全部剪短)都幾啱我噃.. 所以未來一段時間, 都會繼續keep住呢個look架喇..

02.07.2007 | 好耐冇見屋企人

最近發覺見同事多過見屋企人, 甚至乎同住一間屋都可能幾日都見唔到, 因為每一日都日出而作月出而息.. 每朝都係瞓到最後一分鐘先甘願起身, 梳洗換衫後就急急腳咁趕住返工, 屋企人有啲已經出門, 有啲仲同周公約會緊, 所以平時一早好難見到.. 加上最近日日都要開OT, 禮拜六日又要返工, 所以最近幾日放工返到屋企都已經係深夜時分, 屋企人通通都瞓晒啦.. 有時稍為早啲嘅話, 我都已經成個喪屍咁喇, 沖完涼抖一抖就去瞓喇.. 基本上簡直就冇時間同屋企人相處, 的確好咩(... 諗唔到個字, 大家明就得啦)架.. 唔想見到屋企人嘅時候, 佢哋係同我講好耐唔見, 好怪囉個感覺, 通常都係啲朋友先會有咁樣嘅對白吖嘛.. 冇乜嘢望啦, 依家就好似為咗工作而生活咁, 但求可以快快脆脆搞掂晒啲嘢, 等我可以有返自己嘅私人時間.. 我唔係個工作狂, 所以我需要嘅係工作同生活上有點平衡啫..

01.07.2007 | 賀香港回歸10週年

不必奔 不必飄 扑往遠處到處找了
尋覓的 珍惜的 往往像耳目近得被忘掉
回歸 今日飛奔向熟悉的你
我發覺被我靈魂和肉體 收起的愛也在回歸

分不開 拋不低 即使我他方都有歡笑
在內心 心的根 始終於此我不多慣遠飄
在外我更加想你 多豐足我也像缺少火花美妙

你像個滔滔深海叫喚遠山 即使各在異地
我像那山中清溪要回歸你 必須再次與你一起
願一起 十世紀 呼吸你 我回歸於你
願一起 直至死 呼吸你 分開方知你是全部記憶