16.07.2007 | 心曠體胖??

上個週末過得都唔錯, 雖然係短暫咗啲, 但係都叫做有休息過喇.. 最開心就係可以瞓到日上三竿, 太陽直射pet-pet都仲懶喺張床度, 好享受呢仲好耐都未有過嘅頹廢喇, 哈哈.. 週末兩日去過gym, 睇咗Harry Potter(講開又講, 睇咗覺得麻麻地, 少咗啲刺激), 行街買咗件衫仔, 食咗好多嘢(唔記得食乜, 就係多啦).. 輕輕鬆鬆自自在在之後, 令我醒覺乜嘢叫做心曠體胖.. 事關今朝起身照鏡子, 發覺自己塊面忽然間肥咗咁, 唔係吖嘛?? 事隔兩日稍為放鬆吓自己啫, 唔係咁快見效係嘛?? 噚日下晝食晏嗰陣, 小君仲忽然驚覺我塊面瘦咗嘅噃.. 嘩!! 救命, 好傷心啊, 希望係啲乜起床後暫時性水腫之類嘅現象啦.. 睇怕要飲多啲唔落糖薏米水同埋綠茶去去水腫至得喇..