設定貼子語言 Set language for posts :
中文
English
中英雙文 English & Chinese

31.03.2008 | 物輕情義重

頭先一踏入屋企, 就見到有包寄畀我嘅郵件.. 開始盤算, 小春早幾日無啦啦問我要屋企地址噃(實有咩景gwung啦), 唔通就係佢寄嘢畀我?? 拎起包郵件一睇, 成個UK樣, 十成十係呢位老朋友, 走唔甩啦.. 好開心好驚喜囉, 行埋房嗰陣情不自禁係咁摸, 想估吓佢會寄啲咩畀我吖嘛.. 返到入房, 梗係第一時間開封啦.. 有份禮物仔同埋張明信片, 上邊寫住「嗱.. 贈你戰筆貳支.. 俾心機溫書啦! kanbate ne! 2008 white easter」.. 明信片封面係個食緊公仔麵嘅女人, 哈哈, i get the idea of your purpose choosing this postcard, 小春!! maggie麵, 味道好, 真好食, 哈哈~~

好sweet囉, 知我就考PMP試, 咁有心思去買兩支筆過我.. 好鬼paul smith囉個design, 抵死到吖, 不過我好中意囉, 我一向都好欣賞阿paul呢個彩色直間紋架啦, 哈哈.. 特登將兩支筆擺成V字型, 寓意VICTORY成功考取PMP, 呵呵呵~~~ 雖然係小小心意, 不過物輕情義重, 多謝晒你啊, 小春, 覺得好sweet好touch囉.. 放心, 我到時一定會帶兩支幸運戰筆入考場..

30.03.2008 | 意志力

大學畢業都有10年時間, 10年後嘅今日估都估唔到會再為咗考試而勤奮咪書.. 週末呢兩日, 我對於自己嘅自律感到驚訝, 真係估唔到我可以足不出戶, 一日咪成十幾個小時書.. 而家係夜晚11:38, 在下啱啱擺低本書, 好自豪, 因為完成我之前定落嚟嘅使務.. 冇錯喇, 就係已經睇晒成本textbook + lecture notes 喇.. 噚日緩慢嘅進度一度打擊我嘅信心, 不過今日終於越戰越強, 好開心囉, 我後日同埋大後日可以專注understanding, revision同practising喇.. :-)

忽然間覺得自己其實都頗有意志力.. 真係架, 係睇自己肯唔肯踏出第一步, 跟住一路鞭策自己, 其實我相信我可以做得到.. 為自己設下一個目標或者理想, 然後motivate自己去達成.. (四年前努力keep fit嘅驕人成積係一個好例子, 只不過而家就肥肉橫生體重直升囉)..

PMP之後, 我覺得我應該需要用返同樣嘅意志力, 努力去讓自己活得更精彩.. 因為有位朋友曾經inspired我話, 無論發生咩事都好, 唔好因為過去嘅唔開心而整where自己, 相反地傷心一段時間之後, 應該更加積極面對人生, 開心精彩過日子.. 唔好將畀唔開心嘅事阻攔你, 因為人係要往前行.. 願與各位讀者共勉之..

29.03.2008 | 攻

PMP考試在即, 火燒眉毛之際, 星期一開始我就已經的起心肝咪書.. 其實都唔算早, 可以話係遲咗架, 成本textbook幾吋咁厚, 可想而知其實係有太多嘢要知道.. 一共有13章, 最初個plan就係星期一開始每日一章, 週末兩日谷盡每日四章, ideally就可以讀晒.. 下個星期考試前, 專登請兩日假備戰, 主攻revision同埋practising..

想得太過理想喇.. 頭四日冇問題可以keep住個進度, 不過越讀就越多嘢, 進度開始變慢.. 今朝大概10點鐘開始, 到目前6點三為止只係cover到第六章, 距離最初個plan仲有三章咁多囉!! 好離譜遙遠啊, 我諗今晚去到盡都係多一個chapter, 因為我已經好攰喇, 除咗短短二十分鐘break, 我其實係成副心機concentrate喺本書度囉.. 而家覺得成個腦袋好似塞滿嘢就快爆炸咁.. 成10年都冇因為要考試而讀書喇, 今次老貓燒鬚, 真係攻得好辛苦啊..

各路神明仙人, 真係要求大家保祐我今次順利pass一take過啊..

28.03.2008 | 湧

生活往往係兩個極端, 有時他他條條極之休閒, 有時就好似全世界啲人打鑼咁搵你, 亦或者全部之前pending嘅事情一嘢「湧」晒埋嚟等你去處理.. 今日就係一個例子, 無端端一波接住一波咁, 幸好嘅係仲撐得住, plan咗嘅冇受到影響, 突發其來嘅招架得住.. 好似都冇乜機會安安定定咁坐返埋自己個位, 記得我今日好似係喺公司度招搖活動咁.. 難得返埋位, 又見到幾個人同時MSN我(最高記錄係同一時間7個), 慢慢一個一個應對, 嘩!! 都真係不容易嘅事啊, 好彩仲清楚自己同緊邊位MSN講緊乜嘢.. 記得今日時間過得特別快, 忙完一輪啱啱六點三, 等我稍為回魂一陣, 終於有時間睇睇PMP啲notes.. 期間苦中作樂, 同兩位朋友MSN(當然兩個係應付得卓卓有餘啦).. 大約八點半, 其中一位去食飯, 另外一位已經無心裝載要繼續chat(有點對牛彈琴嘅感覺, 實在太過份囉), 所以就收拾行裝歸家去了.. 這就是我今天工作的一日喇~~

27.03.2008 | 大開Eye界

托香港同事鴻福, 終於有機會到呢個Eye On Malaysia旅遊景點.. 2007年適逢國家獨立50週年暨國際旅遊大馬年, 專登興建嘅呢個摩天輪(跟風跟到出晒面), 原本舊年12月31日投入最後一日服務, 但係種種原因之下(最主要係可惜), 終於延長壽命到今年國慶日.. 所以話真係托香港同事鴻福, 借口帶佢遊覽之余, 自己亦能夠大開Eye界一番..

對呢個摩天輪其實冇乜期望, 同倫敦眼同新加坡眼比較, 簡直係蚊肶同牛肶啦, 所以都係抱住去睇睇嘅心態.. 對於遊客可能覺得個landscape好靚, 轉色燈光照射湖面倒影, 而且隔湖可見城中幾棟聞名國際嘅建築物.. 可惜對與一個大喇喇嘅陀地, 卻係見怪不怪.. 不過都畀吓面用部手機影返幾幅相囉~~可能我哋對於呢個景點所知嘅只有個摩天輪, 其實除此之外, 香港同事發現每晚8時同9時係有個乜水上雷射燈光表演架噃.. 開始都冇乜期待, 雷射表演表來來去去咪又係咁, 有何新奇?? 是但啦, 橫掂一場嚟到, 唔介意浪費嗰20分鐘啦.. 點知?? 點知開show後, 我哋全部都O大個嘴, 好震撼好impressive囉個表演.. 其實係個湖面中央噴射出一個40x15米立方水霧帘, 跟住雷射燈光同埋啲文化錄影就咁投射喺水霧上, 而且有某些環節係利用個湖面倒影呈現, 係外一絕囉, 好勁啊~~ 可惜部手機影唔出個效果, 未能同大家分享..

睇完個show, 全體同事都好滿意喎, 話有機會一定再嚟.. 結果大家覺得20分鐘嘅雷射表演已經好滿足, 最後取消原本要上摩天輪嘅計劃.. 因為覺得上到去, 未必會好impressive囉, 是但喺下邊望望, 應該會完美啲, 呵呵呵!!

26.03.2008 | 雜誌過後, 再上頭條

感謝友人歌樂兒, 我諗佢一定係玩「報紙頭條」玩上癮, 正如我玩「雜誌封面人物」玩上癮咁, 哈哈..

大家埋嚟睇睇, 下邊呢份報紙就係佢嘅傑作喇, 好鬼抵死哦呵?? 其實係佢整咗直接擺上佢自己個blog度, 我一見到就非常之中意, 第一時間去download咗佢落嚟, 擺喺度同各位分享.. 好有心思囉佢, 我諗佢應該係搵勻晒我成個blog先搵到僅有嘅呢幾幅靚相, 仲祝賀我個blog二週年紀念(3月13)添, 認真唔話得喇, 多謝晒..
份報紙叫做"The Lives of Others Daily" 《別人生活日報》, 好戇居.. 哈哈~~

25.03.2008 | 關於617

友人噚日send咗條link畀我, 個網站係用生日日期嚟睇一個人嘅個性如何.. 雖則我通常都唔多相信呢一類嘅人格分析, 事關冚世界有九千幾萬個人係同我同一日生日, 難道我哋全部都係一樣性格咩?? 不過呢個以生日日期作分析, 總好過以生肖作分析囉我覺得.. anyway, 都姑且去睇睇, 長篇大論中其實都有某些point係在下覺得頗準嘅, 我用紅色highlight咗上嚟..

6月17日出生的人做事認真, 不論外表看業多么輕松自在, 他們其實總是專心朝目標前進,努力作個負責任的家人及朋友.. 他們給人的印象似乎是屬于善于安排生活的人, 事實上, 由于對自我的要求太高,可能對他們身邊的已造成嚴重的負擔.. 如果有忠心的跟隨者或部屬, 他們的標准可能會更高, 而且非常嚴厲, 要求絕對的服從..

因為他們心思和行動都很敏捷, 所以對于一起工作的同伴, 會顯得有些不耐煩.. 通常他們不適合當老師, 因為缺乏向學生講解的耐心與體貼.. 另外, 當工作一團亂時, 他們絕不會閑在一旁呆, 只要一眨眼的功夫, 他們就會把事情處理好了..

大部分這天出生的人都有超乎常人的體能跟心智能力, 至于情感表現和直覺觀察的能力就不那么出色了.. 由于情緒起伏變化大, 所以旁人很難與他們相處, 更別提親近他們的內心世界.. 有時候他們會刻意與人保持距離, 有時候又變得熱情洋溢.. 可能前一秒鐘態度成熟, 下一秒鐘卻急躁得像孩子, 所以不太容易獲得別人的信任..

6月17日出生的人會是優秀的企划, 設計者和旅行家.. 他們方向感清晰, 對現實空間也很有概念.. 某些情況下, 他們甚至會因為太前衛, 方法太獨特, 反而把事情弄得太復雜, 像缺乏專業素養一般.. 所以在這天出生的人應該了解到, 要証實自己的方法正確可行, 人們才會了解他們的想法..

[下刪1000字] 認識在下嘅人, 你又覺得點呢??

如果你都有興趣知道自己嘅人格分析係如何, 可以遊覽此網站, 然後點擊閣下生日日期, 咁個網站就會gen一份好詳細嘅報告過你睇, 分文不收架...

24.03.2008 | 封面人物

係唔係曾經夢想過自己容登某某雜誌封面人物啊??

唔駛愁喇, 好簡單, 只需要去呢個MagMyPic網站upload自己幅靚相, 再自選雜誌封面, 一分鐘之內咁就有張型爆封面照畀你架喇!! 拎咗自己幾幅相整咗以下呢幾個封面, 覺得好抵死好好玩囉, 哈哈.. 自己玩厭之後, 輪到拎幾位好朋友啲相去搞搞, 再send返過佢哋, 似乎都氹得佢哋幾開心噃, 嘻嘻..
Natural Geography?? 個名真係改得妙極啊, 哈哈~~

23.03.2008 | MSN

突然間覺得MSN(或者其他同類型IM軟件)佢好強囉, 而家好似人人都離不開佢咁.. 唔好話係同遠方親友嘅聯繫工具, 好多時候就連同坐喺側邊嘅同事, 都係用MSN嚟溝通, 覺得物盡其用得有點荒謬囉.. 不過我平時都係用嚟同親友傾偈, 同事嘅話, 我會prefer直接面對面講嘢囉, 除非係有密偈斟先用MSN.. 因為我唔想成日坐喺部電腦前, 粒聲都唔出, 淨係十隻手指喺度運作..

而家好似唔興講電話, 除咗SMS之外, MSN應該係最快捷方便(最重要係廉價) 嘅聯絡方式.. 親朋戚友聯絡, 情侶維繫感情(甚至提出分手), 同事客戶之間嘅商務事幹, 等等等等, 再加上勁cute icon, 互送文件, 視頻, 傳音之類嘅科技功能.. 好得囉, 我覺得.. 不過有時MSN打字, 語氣上往往令到對方會錯意, 講者無心聽者有意, 誤會一籮籮..你問我中唔中意MSN, 我覺得某個程度上係OK啦, 雖然虛幻但感覺卻係好實在, 不過始終就好似欠缺咗啲人性化嘅互動..

22.03.2008 | 無聊至極

有時後假放得太長, 而你又冇乜搞作, 咁其實未必係件好事, 因為你會覺得好悶好無聊囉.. 呢一次就係一個好好嘅例子喇, 禮拜四係公共假期, 禮拜五請假, 加埋週末一連四日假期.. 本來請假係打算同朋友去玩, 不過天有不測之風雲, 上個星期佢突然間畀咗個晴天霹靂嘅消息我.. 結果擾攘幾日後, 一切計劃唯有取消, 真係乞人憎!! s-i-c-k-e-n-i-n-g..

其實都有考慮過cancel禮拜五嗰日假, 十五十六咁, 到最後費事搞咁多嘢啦, 不如就拎呢一日假期好好地咁溫習PMP啦喂.. 結果, 興致勃勃咁攞咗本書出嚟, 滿心誠意咁話要咪書啦, 點不知睇唔夠幾頁就已經打退堂鼓喇.. 前兩日都有出去gym, 噚日艷陽高掛, 仲好有閑情咁去suntan添, 而家一身古銅色膚色, 好中意啊, 哈哈~~ 今日就超悶, 出邊正滂沱大雨, 成日都「吽」喺屋企, 本PMP書都有睇咗成20頁嘅, 無心裝載情況之下算係難能可貴..

project management knowledge: integration, scope, time, cost, quality, human resource, communications, risk, procurement.. project mangement process: initiating, planning, executing, monitoring & control, closing.. 超悶, 超無聊啊~~

21.03.2008 | 東瀛零食

噚日係公共假期, 留喺屋企無所事事, 諗住想開始溫習PMP啦, 點不知翻唔夠兩頁就決定放棄, 上網又唔見朋友可以傾偈, 落樓睇電視又覺得好悶.. 百般無聊咁拖到三點三, 於是就決定去gym消磨時間.. 做完gym時候尚早, 於是就去超市行行, 點知畀我見到個東瀛零食促銷會喎.. 當時個情況就係花多眼亂, 真係好多好多零食, 全部由東瀛運到, 平時係好難買得到嘅.. 我真係每一樣產品去睇, 發覺好多都好盞鬼得意囉, 不得不佩服東瀛人嘅creativity.. 而且係整得好精緻, 包裝得好精美, 係要叫人睇親就有買嘅衝動先肯罷休囉..
係唔係好吸引啊?? 我當時幾乎喪失咗理智, 想全部都買啲返去試.. 不過好彩到最後能夠臨涯勒馬, 就係齋睇齋影滿足一下自己就算喇, 哈哈~~

20.03.2008 | 腦筋急轉彎

噚日幫公司準備一啲interview嘅考題, 上網週圍搵搵, 發現好多好有趣嘅IQ考題, 真係腦筋急轉彎.. 唔係話平時冇乜用腦, 而係平時個腦唔係用喺呢啲IQ logic上吖嘛, 所以煞時間玩呢啲IQ題都真係頗有難度.. 大家試吓以下呢幾題啦不如, 好有趣架..

{用吓個腦之一}
一個派對結束之前, 當中10個人互相握手, 如果每個人都同每個人握手一次, 咁呢度總共有幾多次握手呢??

{用吓個腦之二}
昨日嘅昨日嘅昨日, 係禮拜六打後第三日, 咁請問今日係禮拜幾呢??

{用吓個腦之三}
謀巴士上有4個女仔, 各自拎住4個袋, 每個袋入邊有4隻貓, 而每隻貓肚裡邊懷有4隻貓仔.. 假設啲貓仔就快出世, 全部都發育健全, 咁呢架巴士一共有幾多隻腳呢??

19.03.2008 | blog-blog多繽紛

最近見友人Ed話「時代改變了, 人也相應改變了, 時代進步了, 網絡交友, 網絡購物, 網絡睇新聞, 網絡逛世界, 而家甚至仲有網絡寫日記」.. 呢句話一啲都冇錯, 不過如果而家先至察覺得嘅話, 我就覺得有啲與時脫節囉, 哈哈!! 雖然我未算係乜blog鼻祖, 不過假假哋都算blog咗兩年, blog blog吓就變得中意睇人哋個blog.. 以下呢幾啲blog, 應該係我最近比較常睇嘅幾個, 其中大部份都係朋友, 少部份係素未謀面但係就唔覺意發現到嘅.. [朋友: 有冇留意到你個blog畀我攝咗出嚟啊?? 嘻嘻..]睇吓大家blog得幾咁開心?? 就好似寫日記咁, 當時心情唔覺特別, 但係當你隔一段時間之後再睇返以前所寫所想, 回憶的確係一種好奇特嘅感覺嚟架.. 尚未行動嘅朋友, 一齊嚟blog吓佢哩~~

18.03.2008 | 悶蛋blog

{悶蛋blog實例一}
同事MY見我早兩日寫啲好認真好感慨嘅嘢喺個blog度, 突然間MSN我話, 都係覺得我啲報喜唔報懮嘅blog好睇啲, 因為嗰啲blog好似唔係好襯我一向畀人積極樂天嘅image.. 煞時間覺得有點不知所措, 真係啞口無言, 無言以對.. 咁點啊?? 人家當時真係有感而發, 思緒係咁樣, 寫嘅嘢就自自然然係咁樣架啦..

{悶蛋blog實例二}
友人ET曾經講過我呢個blog寫得有點拘謹有點formal.. 真係?? 其實我覺得我已經寫得頗輕鬆搞笑架喇噃, 而且九成係開心事, 得嗰一成係感慨之作.. 不過話是話, 在下都30歲啦, 點同啲紮紮跳小朋友比啫?? 雖然佢口口聲聲話每朝返到公司上網第一件事情就係睇我呢個blog(都唔知係真唔係, 口甜舌滑), 但係我就從來都未見過佢留言噃.. 反而去到其他朋友嘅blog度, 佢就極速留下讀後感, 好大細超啫~~

{悶蛋blog實例三}
今朝友人JM突然間MSN我, 話好耐都冇去睇我個blog喇, 問我最近有寫咗啲咩勁暴嘢咁喎.. 我又再一次愣咗喺度5秒鐘, 點答佢啊?? 佢係想話好有興趣要睇我個blog咧, 定係覺得太悶所以好耐都冇去睇啊?? 喂, 你不如直接啲唔好一句嘢帶兩個相反意思啦, 我呢種資質會覺得混淆架..

17.03.2008 | 羽毛球大激鬥

剛才放工, 我哋全體同事一齊去(學人)打羽毛球.. 其實算係monthly activity嚟, 咁有人提議不如做吓運動, 而且又要就晒全部人時間, 所以打羽毛球就變成最簡易最適合嘅活動.. 都係第一次成班同事一齊去打波, 所以都唔知孰是臥虎藏龍.. 不過自己心裡有數, 好似成十年未掂過球拍, 更何況實質上自己真係唔識打羽毛球囉.. anyway都係志在大家一齊參與, 一齊豁出去玩玩啫..

結果大家都好sporting, 個個都落場切磋球技, 睇吓啲相, 算係好enjoy架喇.. 個半鐘, 出一身汗, 覺得好精神好舒服囉.. 不過從來都冇諗過自己會去打羽毛球囉, 知道友人ET有打羽毛球嘅習慣, 於是就專登撥個輪畀佢話自己打緊波, 結果連佢都好surprise我竟然會落場打羽毛球喎, 哈哈.. 所謂吃喝玩樂, 有玩樂當然就有吃喝啦.. 打玩波, 梗係大家齊齊整整坐埋一圍食dinner啦.. 於是一早plan好要去附近一間頗出名嘅餐館, 其實大家口口聲聲話要運動減肥, 但係一講到美食就話有運動唔緊要啦.. 於是唔理咁多, 叫咗以下幾味好肥但係非常之好味嘅招牌瓦褒老鼠粉, 燒肉麵, 福建大碌麵.. 其實仲有其他餸唔好意思登出嚟啫, 話晒今日個焦點應該落喺打波度, 唔好畀啲食物喧賓奪主至好噃..
食完嘢之後時候已經唔早喇, 各自散band, 返屋企好好休息, 聽衵仲要返工架.. 希望聽日大家唔會因為突然間劇烈運動而週身酸痛啦, 哈哈..

16.03.2008 | 如果時間倒流..

如果時間可以倒流, 你會唔會第一時間整張list出嚟, 然後慢慢咁去完成嗰啲曾經令你後悔/錯過/遺憾嘅事情呢?? 又或者拾取經驗以及教訓, 將一切無可挽留嘅僵局徹底洗牌, 然後從頭開始?? 執行當中, 你會小心翼翼咁避免同樣問題嘅發生..

我相信人生之中, 無論幾開心幾樂天嘅人, 都必定會有某些遺憾.. 可能事過境遷, 不過每當回首過去, 表面上似乎看破一切, 但係實質上可能仲會耿耿于懷.. 除非呢個人真係神仙, 可以徹徹底底忘記一切囉, 不過我覺得好難, 點都會有條刺係個心裡邊嚹住嚹住嘅..

所以你話, 如果時間以倒流嘅話, 我真係會有好多嘢想做囉.. 咁(我嘅)呢個世界應該唔會再有傷心, 唔會再有遺憾.. 係係係~~ 雖然而家發夢時間倒流尚早, 不過噏吓噏吓可能上天會突然間讓奇跡出現咧??

15.03.2008 | 如果你有事

如果你有事, 覺得好唔開心, 覺得好沮喪, 你通常會做啲乜嘢嚟宣泄??
  • 喪失理智咁瘋狂買嘢? 或者暴飲暴食, 將一切悲憤轉化為食量?
  • 去gym狂操一輪, 等自己筋疲力盡後冇晒力量去諗嘢?
  • 去一個好寬闊嘅地方, 往遠處大大聲咁嗌, 嗌到歇斯底裡?
  • 一個人匿埋間房一個角落, 畀自己靜落嚟?
  • 搵身邊最好嘅朋友訴苦? 然後痛痛快快咁抱頭痛哭?
  • 一個人漫無目的咁喺條街咁行, 見路就行見人就避?
  • 靜靜咁翻開日記簿, 將一切心情轉化為文字, 然後痛苦一場?
  • 好瀟灑咁, 冷靜落嚟之後, 可以一切拋諸於腦後?

你會坦然面對, 或者逃避現實? 你會好樂觀, 定係好悲觀? 你會變得更積極, 還是一撅不振? 你會檢討自己, 亦或怪罪別人?

14.03.2008 | 由這裡開始

記得某日喺友人架車度, 聽到電台播緊一首英文歌, 當時乍聽之下以為係金曲歌后蔡妲雅.. 過後第二次再聽到呢首歌, 覺得應該係另有他人.. 經友人查證後, 確實唔係蔡小姐噃, 而係一位叫做Joanna嘅台灣新晉女歌手, 資料就係咁多.. 噚晚surf net時候, 無意中畀我搵到呢位小姐張專輯.. 佢就係Joanna Wang王若琳, 帶嚟呢張debut, 由這裡開始《Start From Here》.. 好鬼笠王小姐佢把聲, 好有個性, 沙沙得懶懶地咁, 唱起歌嚟別有一番磁性囉.. 老實講我頗中意沙聲女人唱歌架, 例如Macy Gray及Amy Winehouse, 不過王小姐當然唔係佢哋嗰種funky啦, 佢係好Norah Jones, 好Lisa Ono, 好Linda Ronstadt嘅.. 令人驚喜嘅係王小姐今年只係芳齡19(佢把聲真係聽唔出), 而且喺自學情況下彈得一手唔錯嘅吉他..

呢張專輯收收錄7首原創英文歌, 3首王小姐嘅創作, 2首西洋經典翻唱, 以及5首華語歌曲.. 其中有4首歌已經被選用為台灣連續劇片頭片尾曲, 好勁啊~~ 一把陶喆, 朱衛茵, 林暐哲, 張懸聯名推薦嘅好聲音.. 近期我覺得好正嘅專輯, 其實比較起NJ, 我覺得自己中意呢張專輯多啲囉.. 係嗰種躺於午後陽光下嘅一張梳化, 靜靜咁享受一杯香濃咖啡, 好傭懶嘅感覺.. 全部歌曲一致推介畀大家..

13.03.2008 | 「貳」字行頭

今日係敝部落格二週年紀念日, 兩年前膽大心細學人寫blog, 本來都係諗住得閑過吓日辰, 點知寫寫吓最近竟然變成一個習慣.. 頭先無啦啦醒起呢個日子, 所以快手快腳, 用MS Word砌咗上邊呢個banner, 當係為自己恭賀一番啦.. 好是但咁砌, 不過出嚟個效果又幾好喎, 好喜慶feel囉.. 到目前為止, 兩年內一共累積咗549個post, 雖然唔係咩驚人數字, 但係都對得住自己, 算係咁喇, 哈哈.. 慢慢expand自己個archive, 其實都好長囉個list, 都幾有成就感架.. 得閑睇返自己以前所寫嘅, 個感覺會係好奇妙囉.. 所以如無意外, 我覺得我會再繼續寫寫寫寫寫, 寫完又再寫寫寫寫寫.. 各位記住要「十扑」我先好啊~~~

各位路過嘅朋友, 見東主有喜, 係唔係應該留返兩個字恭喜吓啊?? 嘻嘻~~

12.03.2008 | 一於blog恆佢!!

最近發現身邊好多朋友都開始寫blog喇, 覺得好開心.. 佢哋由當初覺得不過如是, 睇死自己唔會陷入呢個blogger世界.. 到過後興趣越濃, 蠢蠢欲動.. 到最後把持唔住, 終於都開返自己一個blog嚟寫寫啲嘢喇.. 其實自己當初都係咁樣嘅心態一路演變, 仲記得係友人小李inspired我架, 雖然佢「老人家」已經唔再寫blog, 擱置咗N年咁耐喇, 可惜可惜!!

不過如果講到寫blog嘅恆心, 我就覺得一眾朋友之中, 我應該係數一數二啦.. 由幾個月前開始, 我可以永無間斷咁一日一個post, 其實都真係一個好大考驗, 就係寫吓寫吓咁, 如果發覺有一日斷咗嘅話, 個心就係嚹住嚹住囉.. 有啲要求過高啊呵?? 不過比起好多一日幾個長篇大論post嘅真正blogger, 我未算變態啦..

查實我覺得寫blog會經歷以下呢啲階段囉:
(1) 開始好熱衷, 會好經常update
(2) 時間耐咗, 開始覺得唔再新鮮, 懶惰落嚟喇
(3) 跟住好耐好耐先有心情係咁意寫啲嘢, 當係向眾信交代
(4) 過後, 可能幾乎擱置, 危機就此開始
(5a) 如果不能重拾興趣, 個blog就係咁樣折埋喇, 嗚乎哀哉~~
(5b) 如果可以重拾興趣, 之後一定可以一發不可收拾
我諗我係屬於(5b)型嘅..

11.03.2008 | 一串問號

百貨漲價水漲船高之際, 突然間我個腦袋有一連串我不能夠理解嘅問號..
  • 點解有啲雪糕可以賣幾十蚊一杯咁貴?? 食咗會飛咩??
  • 點解有啲朱古力可以賣幾十蚊一盒咁貴?? 食咗會變超人咩??
  • 點解有啲咖啡可以賣十幾蚊一杯咁貴?? 飲咗會發達咩??
  • 點解有啲服飾可以賣幾千蚊甚至幾萬蚊一件咁貴?? 著咗會變超模咩??
  • 點解有啲食肆分明係水準之下, 但係就門庭若市?? 等運到咩??
  • 點解有啲人可以幾百蚊食一碟神戶牛柳?? 食咗會升仙咩??
雖然以上一大堆點解, 但係仍然見啲人趨之若騖咁硬係要預一份.. 可能啲人有錢得我不能理喻, 又或者闊卓得我不能高攀啦.. 身為一個普通草根之民的我, 實在係未能拼入他們之列(講得俗啲就係埋唔到堆), 可能等到某天奇跡地讓我坐擁百萬身家之時, 我或者會過著同樣嘅lifestyle..

寫於不滿自己薄弱身家之時, 其實妒忌別人豐厚身家成份多啲..

10.03.2008 | 零食口不停

上個月阿MY姐忙到冇時間去幫pantry入貨, 攪到個個同事踏正三點三, 自動自住咁行一輪pantry覺諗搵啲嘢嚟嚼, 點知個個都兩手空空行返埋位, 頭嗒嗒咁十分悽慘咁樣.. 結果上個週末, MY姐終於高抬貴手入貨喇, 可能拎得太多嘢上公司, 結果禮拜一竟然請病假(-_-''').. 就喺呢一日, 各位同事可謂「久旱逢甘露」(嘩!! 我好中意呢句形容詞, 真係好貼切囉), 結果不消三日就已經將八成零食一掃而空, pantry又再重返冷清喇.. 我心內只得一個字, 勁!!!
唔好以為上邊呢幅相花花綠綠咁睇落好多啊, 其實三兩下散手, 好會可以折埋.. 而且唔講你唔知, 上邊呢咋嘢, 係上個禮拜五下晝專登第二批入貨架.. 好彩公司有預筆錢過我啲呢班零食鬼用喺pantry上, 如果唔係都好易食窮囉, 呵呵..

09.03.2008 | 歷史性一刻

反風吹襲之下, 在野黨於本屆大選奪下檳州, 吉打, 雪蘭莪及霹靂州嘅執政權.. 同時, 回教黨亦保住吉蘭丹州嘅執政權.. 面對執政黨競選40年以來最大嘅敗績, 首相拿督斯里阿都拉吁請大馬國民保持冷靜, 並強調坦然接受部分地區敗選嘅結局, 畢竟這是民主運作嘅形式.. 截至凌晨2點半, 全國222國議席之中, 執政黨一共贏得121國席, 反觀在野黨也奪得82國席, 歷史性嘅一刻, 成功否決國陣喺國會三份二嘅優勢..
  • [03:40am] 選委會主席: 由於一些州屬包括檳霹雪州, 冇任何政党贏得超過50%議席, 所以冇辦法現時宣佈贏得該些州屬執政權嘅政黨
  • [03:35am] 行動黨吉隆坡武吉免登區國席候選人方貴倫以1萬4277張多數票擊敗馬華候選人李崇孟, 獲悉勝利後幾乎喜極而泣
  • [03:25am] 首相原定喺吉隆坡世界貿易中心舉行嘅新聞發佈會, 於國陣失利消息之後, 改在巫統大廈舉行, 並且只有短短3分幾鐘
  • [03:18am] 行動黨黃泉安奪得檳城日落洞國席後表示, 從部落格走進國會並冇太大喜悅, 反而開始放眼5年後嘅檳州會係點樣嘅局勢
  • [03:10am] 國陣失去雪州政權後, 雪州蘇丹準備接見在野黨領袖商討組織新政府.. 依約區州議員卡立或任新大臣, 行動黨鄧章欽任副大臣
  • [02:50am] 前副首相安華: 人民已向國陣政府傳達明確訊息, 需要清廉可靠嘅大家庭.. 公正黨對於反對黨取得理想成績, 向選民表示感激
  • [02:40am] 在野黨於吉打州共取得11國22州議席, 回教黨主席阿茲然宣佈, 將與公正黨組成聯合政府..
  • [02:24am] 霹靂州在野黨目前共奪30州席(總數59), 並宣佈奪下霹州執政權.. 在野黨目前已奪得吉檳霹州, 並保住丹州執政權
  • [01:53am] 目前為止, 全國222國議席當中, 執政陣一共贏得121個國議席, 在野黨奪76個國議席, 已經成功否決執政陣三份二席位
  • [01:49am] 截至午夜12時, 雪隆警方並沒接獲任何因競選活動發生爭執嘅投報, 亦都冇接獲有中選者進行勝利游行嘅活動
  • [01:15am] 凌晨1點: 國陣已在全國222個國席當中, 贏得113席, 順利取得中央執政權.. 在野黨到目前為止取得69席
  • [00:52am] 國陣重量級人馬許子根, 三美威魯, 陳財和, 卡維斯, 馬袖強, 莎麗扎, 謝寬泰, 再努汀以及姚長祿皆在大選中落敗

轉載自星洲日報[2008年大選]

08.03.2008 | 請投我一票

今年全國性大選舉, 繼2004年第一次投票之後, 今日係第二次一儘良好公民責任.. 比起好多同齡朋友, 我算係「經驗老到」喇, 哈哈.. 投票地點就喺屋苑內兩間學校舉行, 行兩步路就到算係頗方便, 剛剛就行去上一次投票地點, 點知今次被派去另外一個地點.. @#$%^&*累我行多趟冤枉路.. 沿路上拎起手機, 猛拍只有大選期間先可以難得一見嘅「街容」, 四週圍旗海飄揚, 到處都係「請頭我一票, 我會為人民服務」, 仲周街派宣傳freebies添.. 平時唔見咁落力, 大選期間確又無事獻慇懃, 我覺得係超搞笑囉..
成個投票過程其實十分簡單快捷, 採取分流制度.. 入到去各自分流設置嘅課室, 遞上身份證, 索取投票表, 跟住喺上邊劃個X, 折埋投入票箱入邊.. 前後唔到三分鐘, 國家命運就count on每個公民呢一票手上喇.. 一如既往咁, 呢個選區就係得「國黨」同埋「天狗食月黨」, 大家留意到我如何稱呼兩黨派, 應該知道我投邊個啦~~ 其實大家都知道結果係點, 少少綿力只不過係但求該黨唔好贏得太囂啫..

後記: 好中意友人歌樂兒所寫呢篇關於選舉嘅post, 寫得一針見血, 尖酸刻薄, 不妨去睇睇吖[那票真的很鬼神聖] ..

07.03.2008 | 孩時記趣

頭先同小春MSN, 唔記得點解無端端講返起好多以前細個時候偷食零食啲嘢.. 略為list down以下呢幾點, 如果你同我哋年紀相若嘅話, 相信都應該會會意一笑表示讚同..
  • 死慳死抵啲零用錢, 瞞天過海偷偷地用嚟買零食口垃圾..
  • 買零食至緊要係神不知鬼不覺, 一於收藏喺父母唔會搵到, 極度隱蔽嘅地方..
  • 買咗返嚟嘅零食, 一定係趁父母唔留心情況之下, 匿埋起嚟偷偷品嘗..
  • 無驚無險享用晒包零食之後, 包裝袋放返書包拎去學校揼..
  • 一切戰局處理妥當之後, 雙手一定要洗乾淨, 不可留低零食啲色素任何明顯痕跡..

可能就係因為咁樣偷偷地嘅刺激, 所以越係覺得食過返尋味.. 如果當時父母好大方咁準我哋經常食嘅話, 可能就一啲都唔會珍惜囉.. 仲記得cheezels, mamee, twisties, chickadees之類嘅零食嘛?? 其實事到如今, 我都仲係好中意食架, 不過成30歲人, 已經唔駛偷偷摸摸, 可以光明正大咁大啖食啦.. 哈哈~~

06.03.2008 | 四合一慶生會

今日係某位同事生日, 公司例子牌都會幫壽星仔女慶祝生日嘅.. 三月份一共有四位同事生日(IV今日, MY十二號, ST廿五號, DV廿七號), 日子好唔集中, 所以唯有今日一次過幫佢哋全部一齊慶祝.. 今日我負責去買蛋糕, 因為先前建議唔好買大大隻蛋糕, 搞搞新意思, 不如一人買隻個人蛋糕仔啦.. 於是lunch time就去公司對面買咗四隻蛋糕仔--mocha, choc mud, pistachio cream, macadamia cheese..

開會時間招集齊人之後, 我首先將今朝臨時整好嘅slide投射喺布幕上, 跟住四位同事輪流捧住蛋糕仔(有點蠟燭架), 同我個timing好夾, 跟住我個slide transition一個接一個行入會議室.. 嘩, 好perfect啊!! 今次嘅鋪排, 可能IV知道自己生日一早預料會有此一刻, 不過其他三位肯定估唔到, 咁早有個surprise生日蛋糕啩??
大家都對今次嘅的色精緻蛋糕仔頗感興趣, 於是猛咁影相, 影到蠟燭就快燒完咁濟.. 跟住一輪歌唱許願之後, 全體11人分食呢四件蛋糕仔, 每人分得每個蛋糕嘅一細塊仔, 可以試晒各種口味, 其實細細塊食得仲滋味, 嗰種意猶未盡嘅感覺確係好開心喎.. 公司仔人少少, 大家年齡又相若, 感情係比較融洽啲架啦..

喺度祝IV及MY及ST及DV生日快樂.. 希望佢哋日日都過得開開心心啦~~

05.03.2008 | 歲月摧人老

噚晚放咗工去剪頭髮, 同個hairstylist其實都好有默契架喇, 下晝撥個輪畀佢話一陣去「探」吓佢, 咁佢就會等我架喇.. 唔駛book時間, 總之我人一到就隨時剪得, 可能呢啲就係多年嚟不捨不棄捧場嘅特權喇.. 閑談間突然講返起以前佢仲係新仔一名, 我就開始將個頭交咗畀佢.. 應該係2003年嘅事, 時間過得特別快, 一眨眼就5年喇..

其實當初我都唔記得點解斗膽畀個新丁剪頭髮, 可能當時冇乜要求, 是但剪得企企業理理就收貨.. 仍然好記得佢幫我剪頭髮嘅時候, 雙手都仲喺度震緊添噃, 哈哈.. 不過人哋就今時唔同往日啦, 成間salon由佢一人打晒骰, 揾佢剪要畀全場最高收費喎(雖然比起好多salon都仲係好平), 算係捱出頭啦(雖然仍然日呻夜呻話做得辛苦)..

而我自己呢?? 呢5年間, 其實轉化都頗大啦.. 論身材, 由肥變fit, 再由fit變返肥.. 論事業, 當初熱血青年一名, 而家都算不過不失, 但不至於高高在上.. 論身家, 係畀以前稍為豐厚, 但不至於係富裕一族.. 論外型, 雖然仍然係呢個死樣, 但係至少我呢幾年尚且有點要求, 嚟識得御用hairstylist幫我剪頭髮(舊年一個極度失敗之作係一大遺憾).. 論心境, 應該係成熟穩重咗啲咁啲囉, 但不至於老氣橫秋..

回首過去, 確實係歲月不留人, 留下只有絲絲記憶, 待你細細回味..

04.03.2008 | 報應...

記得幾日前喺個blog度對啲廁所煙民大發牢騷,爭在未有行動整張大告示禁止佢哋喺廁所吸煙.. 頭先同事email個video過嚟, 係將一啲狂躁人士作風嘅搞笑片段串燒起嚟嘅.. 咁其中呢一part我私底下覺得勁搞笑, 係完完全全由心度笑出嚟囉, 係嗰種好痛快好心涼嘅感覺囉, 你明唔明我講緊邊種感覺啊?? 睇咗你就自然會明架喇..

如果真係有個人咁樣去對付啲廁所煙民, 我會好開心兼封佢做偶像囉, 嘩哈哈!! 唉, 都話咗唔好喺廁所食煙架啦, 你自己睇吓喇, 引起公憤會有報應架..

03.03.2008 | 一個月時間

上個禮拜三傍晚終於收到PMI通知, 話已經approve我個考試申請, 我可以去安排考試時間.. 於是收到通知電郵後第一時間, 就上網去排期喇.. 佢畀啲指示其實好唔清楚, register嘅時候真係提心吊膽, 好驚自己攪錯.. 事先聲明又呢樣又嗰樣, 結果到最後咪就係畀咗錢, 一切都妥妥當當囉.. 好窮啊, 考呢個試要食我US$555啊~~ 畀咗錢就可以拎到個Exam Authorisation Code, 可以憑呢個code去考試中心排期考試, 不過大大隻字話要至少72小時之後, 一啲都唔efficient, 仲諗住即刻可以報考添..
好喇, 今日禮拜一, 超過72小時啦.. 返到公司第一件事就係上網登記考試.. 全馬就得一間考試中心, 不過好彩都好容易去.. 慎重考慮片刻, 最後把心一橫, 揀咗2008年4月3號下午1點個slot.. 距離今日有足足一個月時間畀我去準備, 唔理佢時間夠唔夠, 橫掂點都要死, 又唔想拖太耐, 所以早日fix咗個date可以鞭策吓自己囉, 要生性溫書喇.. 4月3號係一個好重要嘅日子, 祝我順順利利, 旗開得勝, 高中科舉!!!

02.03.2008 | 一個如此的hi-tea..

今日中午同幾位朋友去hi-tea, 已經唔記得上一次hi-tea係幾時喇, 應該都係超過5年前嘅事.. 本來係雀躍萬分咁去嘅, 一來係因為好耐都冇high過, 二來係因為在下十分中意浦飛形式食嘢, 見到四週圍都係美食, 我會變得好興奮.. 結果去到, 都唔係好多款嘢食啫, 一眼望過去睇晒全部嘢, 而且都冇乜稱得上係特別嘅美食, 打咗個折扣.. 拎咗位坐低一陣即可行動去攞嘢食, 都係嘛嘛地囉, 可以送得入口但係就冇嗰種滿足感囉.. 同友人食咗幾碟嘢, 啲碟疊到成層樓咁高都唔見有人過嚟收, 而且坐咗咁耐連杯水都冇.. 結果真係要我哋「提醒」, 先至有個waiter行過嚟坐嘢, 真係吹帳.. 不過最離譜嘅事, 就係食到一半冇咁多客嘅時候, 個部長竟然走去拎咗碟嘢, 就光明正大咁坐喺我哋後邊檯食佢個lunch喇.. 嘩, 大佬, 雖然你唔係咩五星級大酒店, 不過話晒點都係間酒店, 咁樣做好唔專業啫..

不過算數一於懶理啦,二十五蚊咁平食個hi-tea就唔好期望咁高, 求其食得落口唔會嘔出嚟就得啦, 至多咪冇下次囉.. 除咗食之外, 其實都係志在同朋友一齊聚聚傾吓偈, 我哋志不在食而在聚啫..

p/s: 雖然又係美食篇一個, 但係今次呢個係唔會有靚相睇嘅, 當時已經冇心情去影喇~~

01.03.2008 | 死穴

同友人閑談之間, 天南地北講到我係一個超愛食麵包, 蛋糕, 餅乾, 粉麵之類啲嘢嘅, 總括嚟講任何用麵粉整成可以食嘢嘅, 我都應該唔會抗拒去試食, 如果係覺得好食嘅話, 就更加會食不離口, 物不釋手.. 所以呢一類麵粉食品堪稱得上係我嘅死穴喇, 譬如話下邊呢一大碟嘅BBQ Chicken Bowtie Pasta (前日喺Tony Roma's 食嘅set lunch, 成個面盆咁大個碟裝住成座山嘅pasta)..
同某些友人比較熟落, 好清楚知道佢哋嘅死穴係乜, 該款食品一旦擺喺佢哋面前, 一定無法抗拒其中誘惑.. 有個廿幾年老朋友第一死穴係咖哩, 任何偏咸片算偏辣嘅嘢佢都一定死於味下(你自己知我講緊邊位啦).. 又有個好close嘅朋友, 死穴係煎炸嘢, 任何上粉後油炸嘅嘢佢永遠唔會言倦(你自己知我講緊邊位啦).. 亦有朋友鐘情於蛋料理, 唔理點樣煮法, 總之係蛋就一定啱晒佢口味(你自己知我講緊邊位啦)..

好多時候聽友人口口聲聲話要diet, 但係一見到以上各自死穴, 一定把持不住, 通通事情先拋諸於腦後, 一於食咗至算(你自己知我講緊邊位啦).. 不過最有趣嘅就係, 我好中意扮演魔鬼嘅角色, 兩分推三分氹五分誘惑, 「食啦食啦你睇佢幾咁好味喺度向你揮手?? 你忍心拋棄佢咩??」,一定要友人破戒為止, 見佢哋個又愛又恨嘅搞笑神情, 真係「幸災樂禍」地戥佢哋高興啊, 哈哈~~