設定貼子語言 Set language for posts :
中文
English
中英雙文 English & Chinese

29.02.2008 | 無可挑剔

托新加坡同事鴻福, 噚晚又有食神喇.. 今次係sales同事DV極力推薦嘅呢間韓國餐廳, 放工後我哋四位同事齊齊開車去食dinner.. 去到間餐廳, 發現DV原來同個老闆娘好熟落, 原來老闆娘個仔仔正是DV嫂個學生.. 據知老闆娘舉家由韓國過嚟呢度搞生意, 幾年前開韓國迷你市場生意唔錯, 過後轉手就開咗呢間餐廳, 而且廚房由老闆娘嬤嬤一手掌管..

食物方面全由DV話事, 見佢其實都係咁意點個三四樣, 過後老闆娘仲話我哋點得太多, 建議cancel其中一樣.. hmmm, 果然係令人刮目相看囉.. 起初都冇乜特別期待, 因為韓國燒烤都食過唔少, 不過啲嘢食未正式嚟前, 驚喜就已經連續發生.. 基本上食韓國菜, 都會有送上一啲前菜, 呢間就誠意滿瀉, 一共16款不同種類嘅伴碟小菜擺滿成張檯, 而且份量仲係頗generous噃, 認真O大雙眼O大個口.. 逐樣去試, 食到我哋口啞啞, 猛夾嘢食之時猛咁話好食..
跟住我哋柯打啲嘢, 有侍應負責幫我哋烤, 又係食到讚不絕口.. 老闆娘見我哋食得咁開心, 又再捧嚟4款小菜畀我哋品嘗.. 驚喜未停過, 最後老闆娘仲私人送咗碟韓式炒粉絲過我哋呷, 其實已經飽到胃穿, 但係誠意難推啦嘛.. 結果又繼續食, 食晒仲有飯後水果同埋杯我好中意嘅薑汁薏米茶幫助笑話, 的確好貼心囉.. 臨走前, 老闆娘親手一人派一粒提子糖, 實在係招呼得當, 討人喜歡.. 埋單時, 四人合共約105蚊, 一啲都唔貴, 驚喜再現嘅就係, 老闆娘因為認識DV緣故, 自動扣除銷售費同服務費, 所以最後張單係95蚊.. 呢餐飯, 環境+服務+食物+價錢, 全部都無可挑剔, 我有個好幸福嘅感覺囉..

呢間韓國餐廳就係位於Taman Desa嘅Seoul Korea Restaurant喇.. 初時見個名係有啲悶嘅, 不過品嘗過佢啲嘢食之後, 你就會覺得斗膽用自己祖國嗰名嚟命名餐廳, 我贈佢一句「藝高人膽大」.. 極力推薦呢間韓國料理!! 我畀★★★★☆

28.02.2008 | 請得囉..

噚日有位新加坡老細級同事到訪, 於是放工後隔離同事(亦係我幾close嘅頂頭上司)就提議一齊食飯幫佢洗塵.. 公司對面最近新開間嘢(暫時唔知佢呢棟嘢係乜), 入邊有幾間餐廳, 貪佢就腳所以提議不如求其去搵間試試.. 結果揀咗呢間叫做Centro嘅, 檯上紙墊清楚寫明發音係'chen-tro, 「請得囉」咁聲真搞笑.. 餐廳內部裝璜得好時尚, 有啲偏向pub/lounge嘅感覺.. 而且我哋去到, 咁啱個四人live band開始獻唱, 以unplugged形式演唱時下流行曲, 都幾正架..
我懶得睇menu傷腦筋, 所以就是但點咗個set dinner, 前菜: 烤香蕉虎蝦沙律, 主菜: 紅酒汁烤牛肉, 甜品: 雪糕brownies, 西茶.. 覺得啲嘢整得嘛嘛地, 沙律醬嫌有點過酸, 牛肉過熟結果變得好韌, 甜品brownies略為乾, 西茶只係一般冇乜香味.. 可能係set dinner啦, 所以味道可能係次等囉.. 呢間餐廳環境同服務幾好, 不過食物(除咗presentation係ok之外)未能達到在下要求(其實兩位同事都係同樣評價囉, 唔係我嘴刁), 價錢算偏高, 所以理應我好難會再去光顧佢第二次.. 我畀★★☆☆☆

27.02.2008 | 烏煙瘴氣

最近層樓嚟咗間新租戶, 大公司所以員工應該有好多個.. 大廈每層樓都有個廁所係所有租戶公用嘅, 因為呢間公司遷入, 個廁所突然間變得烏煙瘴氣, 成地煙灰.. 每一次上廁所, 實有人企喺廁所窗前食煙, 個位置就喺個正中間, 去尿兜/廁格/洗手盤都一定會行過.. 見啲人喺度吞雲吐霧(講到底咪就係趁工作時間之時吞扑囉), 我真係好唔中意, 因為出嚟實成身煙味, 好臭架嘛!! 以前都未試過成層樓有半個人食煙, 點解呢間公司一搬入嚟, 就製造咁多煙鏟架??

我吸二手煙, 畀佢哋死得仲快啊, 吸煙唔該行遠啲啦.. 至憎人食煙, 實在係忍受唔住, 好想自行整件大大大張poster貼喺廁所各角落, 話畀那眾煙民知, 吸煙危害健康, NO SMOKING啊!! 吸一支煙短7分鐘命, 你哋收手啦~~~

26.02.2008 | 黃頁, 搵得到..

今日立立亂咁忙咗成日, 上上久違的youtube搵啲笑料睇睇輕鬆一下, 結果畀我搵成咋搞笑泰國廣告.. 泰國人啲廣告橋段, 的確係天馬行空, 想象力出人意表.. 不得不佩服佢哋嘅幽默感, 以下共大家分享兩個黃頁(Yellow Pages)廣告..

傻得可愛.. 呢個男主角自從拍過一個ePurse廣告之後, 其戇直形像簡直大受歡迎, 見好多廣告都有佢份, 呢個係其中一個..


用個淒美故事作開頭, 英雄救美後美人尋找英雄蹤跡, 拍得甜蜜動人, 不過結尾真係出乎你我意料之外..

25.02.2008 | 健康之選

隔離同事突然間發起食subway嗰隱, 未有耐食晏時間佢就MSN我話肚餓, 今日好想食subway.. 好啦, 見咁耐都冇食過咯, 就埋隊啦, 因為加多七蚊可以要多個6吋包吖嘛.. subway喺呢度算係半新不舊, 不過最近比較aggressive連開頗多分店, 記得幾個月前公司附近開咗間, 帶呢位同事去食, 結果佢一食就愛上了, 時不時早餐或lunch就幫襯一次.. 今日跟佢要咗個燕麥包Turkey Breast & Ham, 例牌地除咗jalapeno之外乜都殺.. 唔~~好好味..
友人飛びたい豚話佢試過一排齋食subway, 結果好似兩個星期後輕磅咗三公斤.. 咪就係因為佢低脂低卡囉, 好令人羨慕啊.. 其實我都幾中意食subway架, 覺得清清地好味又健康, 不過喺度算係貴價嘢, 食個包要成十幾蚊, 經常食邊負擔得起啊?? 如果可以負擔得起嘅話, 你睇我會唔會好似友人咁日日subway包落肚吖嗱??

24.02.2008 | 長江7號

身邊啲人差唔多全部都喺新年期間睇咗星爺齣2008賀歲片《長江7號》, 當大家都話好睇之時, 我只有話「我未睇」嘅份.. 今日終於同位朋友去睇咗喇, 呢位朋友都真係唔話得, 佢其實都已經睇過兩次, 今日竟然又再捨命配太子, 我諗佢如果唔係很很很很很中意呢齣戲嘅話, 就一定係超級星粉絲..
可能過年期間睇咗齣《Jumper》大失所望嘅緣故, 所以覺得呢齣《長江7號》都幾唔錯噃.. 雖然故事係嘛嘛地, 但係星爺個誠意係十足囉.. 成齣戲最搶鏡就係一班天才童星(小狄, 蛋撻頭, 美嬌), 太空狗都CG得好掂(不過就有啲似曾相識), 星爺同埋佢班兄弟今次就淪為大配角, 成個重心就放喺小狄身上.. 不過講到在下至喜愛嘅角色, 就非美嬌莫屬喇.. 唔知美嬌係邊位?? 咪就係喜歡小狄嗰個巨型女孩囉.. 佢一出場, 含羞答答+嬌聲嗲氣咁, 演得非常傳神, 真係好搞笑, 如同星爺電影御用角色「如花」咁, 搏得全場觀眾歡笑, 確係一絕!!

我覺得呢齣戲, 如果想喜氣洋洋嘅話, 得得地架, 可以一睇..

23.02.2008 | 終於finally...

噚日終於的起心肝, 話畀自己聽一定要放工前submit個PMP Certification Application.. 事關由三個月前順利完成咗個PMP Course之後, 本來滿懷鬥志下定決心要儘快考到個PMP title返嚟(記得當時好似仲有啲囂添), 結果畀個繁複得冇人有嘅application process攪到頭暈眼花, 因為需要好多好詳細嘅資料, 就咁拖吓又拖, 聖誕+新年+農曆新年等佳節一個緊接一個咁嚟, 成個人懶上加爛..

有個同事之前同我咁上下時間去讀course, 不過佢讀part-time用咗幾個月(我full-time五日搞掂).. 結果人哋下個禮拜二就去考試喇, 到時佢實pass啦, 跟住就捷足先登飲咗我啖頭啖湯, 成為公司第一個PMP啦.. 咦~~~ 都係怪自己懶, 爛人就係咁嘅收場喇.. 不過都應該多謝佢推動我的起心肝嘅, 如果唔係怕且我有排都未submit喇, 希望同事順利過關, 高中狀元啦.. 一輪咀講咗成篇故事, 其實我想話大家知, 我已經順利submit咗個application喇, 而家就等PMI啲人核審(見上圖), 要等佢哋回覆先知道可唔可以去考試, 所以唔好問我幾時考, 我希望係三月啦.. 今次真係要求神拜佛喇, 保祐我早日考到個PMP返嚟..

22.02.2008 | 過完年喇~~

隨著噚日元宵節過去, 農曆新年正式落幕, 即係話年已經過完, 係應該收拾心情過返正常生活喇.. 回顧年卅直至元宵, 其實都好似普通不過, 除咗吃吃喝喝其實冇乜特別..

除夕晚: 大家族食團年飯, 逗利是
年初一: 喺屋企hea咗成日, 夜晚同朋友唱K聚會
年初二: 成日足不出戶, 猛咁喺度煲劇
年初三: 持續煲劇, 終於大結局收場
年初四: 與友人唱K, 飯局直落
年初五: 開工, 年初五就已經開工喇
年初六: 一個照常返工放工嘅年初六
年初七: 夜晚應邀出席友人open house party
年初八: 情人節, 與兩位同是孤單的友人飯局打牌
年初九: 一眾同事用咗三個小時去食一餐開工lunch
年初十: 與友人由朝到晚飯局, 唱K, 睇戲(竟然唔係賀歲片), 打牌
年十一: 算係正常生活了, 去咗闊別已久的gym
年十二: 大老細到訪, 有食神又有財神
年十三: 回復正常, 返工放工
年十四: 回復正常, 返工放工
元宵節: 回復正常, 不過是日晚餐較為豐富

這就是我的農曆新年回憶, 諗返起都真係覺得超悶啊~~

21.02.2008 | 元宵節典故

元宵節在中國已經有兩千多年的歷史, 按照中國古代的習慣, "元"指月亮正圓, 一年之中有所謂"三元"--正月十五稱為"上元", 七月十五稱為"中元", 十月十五稱為"下元", 故元宵節亦稱為"上元節"; "宵"即夜也, 所以元宵亦有一年之中第一個月圓之夜的意思..

根據考證, 元宵節的來歷, 有說與祭祀"泰一神"有關.. 泰一神亦稱"太乙神", 主宰人間的風雨, 饑饉和瘟疫.. 據說, 漢朝武帝曾久病不愈, 求助太乙神後竟奇蹟治愈, 乃於元鼎5年(公元前122年)開始建太乙祠壇祭祀, 每逢正月十五通宵達旦以盛大的燈火祭祀, 從此便形成元宵節張燈結彩的習俗了..

另一說是東漢明帝篤信佛教.. 於上元夜在宮廷寺院燃燈表佛, 命令士族庶民一律掛燈, 遂相沿成俗.. 隋唐諸朝之後, 上元之夜放燈的習俗亦已流傳甚廣, 並演變成民間盛大的元宵佳節, 張燈時間也從一夜增至三夜.. 到北宋時, 放燈增至五夜, 南宋更增至六夜, 明朝官府發布節假日十天的規定, 為中國歷史上時間最長的燈節..

元宵節期間, 民間多吃元宵(即湯圓)來應節, 象徵家人團圓.. 此外還有掛花燈, 猜燈謎, 迎紫姑, 踩高蹺, 舞獅, 舞龍等民間娛樂活動.. 流傳至今, 這一連串充滿熱鬧歡樂的慶典活動稱為"鬧元宵".. 如今, 每到元宵佳節, 各地總要舉行盛大的遊園燈會.. 大抵古代元宵燈節時人流如潮, 節日活動豐富多姿, 而古時男女缺乏交往的機會, 所以元宵節很自然就成了古時情人相會之日, 如歐陽修亦有詩云: "去年元宵時, 花市燈如晝, 月上柳梢頭, 人約黃昏後".. 因此, 元宵節亦稱之為"中國情人節"..

[轉載自http://life.women.sohu.com/20050222/n224389081.shtml]

祝各位元宵節快樂, 情人節快樂!!!

20.02.2008 | 勁勁勁勁勁搞笑

噚日原本等個客速遞份文件過嚟, 今朝收到佢電郵過嚟嘅scanned copy, 不過我都一定要份original copy先可以做嘢架嘛.. 結果佢打畀我問我收唔收到, 咁我梗係話多謝晒, 不過一定要original copy, 麻煩佢速遞過嚟畀我.. 佢話冇問題, 一陣去處理, 咁我又唯有繼續等啦.. 下晝食完飯返嚟, 佢又再打畀我, 話同佢老頂傾過喇, 速遞要錢, 叫我不如搵個人上門拎啦.. 嘩嘩嘩!! 當時我煞時間真係唔知畀咩反應佢..
  • 第一: 噚日開會時, 係佢哋口口聲聲話當日可以將文件速遞到們架嘛..
  • 第二: 大佬, 你間公司山卡啦咁遠, 要成個鐘先去到, 一來一回你以為方便啊??
  • 第三: 速遞一份文件仔洗你幾錢啫? 而且係公務上必要嘅嘛, 咁小錢都睇唔開??
  • 第四: 勁搞笑, 唔該坐穩!! 大佬, 你間係全球出晒名嘅速遞公司嚟噃, 唔係咁都做唔到係嘛??
其實咧, 我當時好想話, 不如你照速遞過嚟畀我喇, 最多我哋公司畀錢喇.. 不過諗諗吓, 如果我咁樣做咪即係間接地where爛佢哋塊面?? 話晒都係客, 而且講到速遞就直接同佢哋公司名譽有關.. 所以冇計啦, 最後都係搭通天地線搵個同事幫手, 親自上門拎份文件返嚟喇.. 唉, 客戶永遠是對的~~

19.02.2008 | 食.. 淨係識得食

一連幾個post都係同食有關, 嗰日友人話我個blog好似美食專欄咁, 當時梗係覺得唔係啦, 因為我只不過係話我食過啲乜嘢啫, 並非特別評論或者介紹食肆喎.. 其實都係志在同他家分享我認為唔錯嘅食物啫.. 不過頭先再睇吓自己個blog, 又的確好似美食專欄咁噃, 有好幾個post都係圖文並茂咁「介紹」我認為唔錯嘅美食, 而且仲連地點, 餸名, 最後埋單價錢都一一詳儘..

所以最近如果去親啲稍為特別嘅地方食嘢, 又或者見到食物送到時靚靚咁個樣, 就會有個習慣拎起部手機猛咁影.. 惹人矚目不特止, 最唔好意思就係要同座啲人等我擺正啲餸, 再set好部手機影相功能, 再調整拍攝角度, 叱吒一聲影完之後, 先好客氣咁借意問聲「影完喇??」至隊埋雙筷子夾餸食.. 搞笑啊, 有時仲不單止影一次咁少架, 真係罪過罪過.. 不過下次如果有幸同在下食飯, 又如果驚見在下興奮地拎起部手機喺度猛咁影嘅話, 懇請畀啲耐性, 兼且多多包涵..

18.02.2008 | 又有食神

今日又係大老細一個月一次嘅到訪, 咁由例牌變成習慣變成必定動作, 全體同事都會跟老細去公司對面間《新記》食lunch.. 以為經常去嘅因素, 所以已經識得提前訂位兼點定啲餸, 到時一坐低唔駛等太耐就可以有得食喇.. 每次都係食返咁上下一樣嘅嘢, 所以已經keep住一張list, 打電話落柯打嘅時候係咁照住讀就係架喇.. 好搞笑啊呵, 哈哈..
點解每次都去呢間餐館?? 其實啲嘢真係唔錯架, 所以平時我哋都儘量唔去, 因為知道老細中意, 所以每個月一次必定光顧.. 今日點咗媽搣排骨, 紅燒日本豆腐, 油浸鯇魚(大眾至愛, 必點), 參峇蘇冬(必點), 苦瓜炆雞(老細非佛, 非點不可)同埋清炒菜膽.. 在下偷偷觀察各位同事, 大家都食得不知幾開心, 而且一圍檯坐低之時, 老細好識做咁一人派封開工利是(好大封添噃).. 所以話老細一到各位就有食神喇, 而今日仲雙喜臨門, 財神爺一齊到添, 哈哈..

17.02.2008 | 直落

噚日同幾位朋友一齊食飯行街唱K睇戲打麻雀直落, 好耐都未試過一日之內做咁多嘢.. 雖然睇落好似好多節目咁, 但係時間上安排得非常之好, 所以一啲都唔覺得趕, 不過就由朝出到接近半夜先返到屋企, 一日儘興之後覺得有啲攰啫.. 老人家唔噤捱, 哈哈..

晏晝去咗Paddington House of Pancake(帕定頓班戟之家, 簡稱PHOP)食lunch, 早前聽友人話係貴夾唔飽, 不過有人提議而且又未試過, 所以就一於跟大隊.. 餐牌整得300分咁靚, 選擇好多而且樣樣睇落都很好味, 餐牌左翻右翻從詳計意之後, 大家決定點以下三樣加各自飲品.. 左至右: Tokyo (意大利茄汁雞配生菜crepe卷), Prague(蕃茄雞肉碎on toasted wheat crepe), smoothies飲品, Treasure Box(bite-size pancake雜果撈加一個雪球).. 其實都OK囉, 味道唔錯而且剛剛飽, 不過眾人意見就係爭咁啲滿足感, 埋單一共約120蚊..
跟住唱K睇戲, 齣戲係《Jumper》講有個人係有種超能力可以穿越時空, 個意念話去邊就可以「唪 」一聲就身處其地喇.. 可能之前對佢有點期望(Mr and Mrs Smith同Bourne Identity導演), 所以睇玩整出戲後, 覺得都係嘛嘛地.. 睇完戲成八點, 大家都好肚餓, 於是就去晚飯.. 一間普通不過餐館但係頗有名, 要咗個招牌瓦褒老鼠粉, 福建炒麵, 椒鹽魷魚, 甘香炒蜆.. 全部都非常之好味, 食得大家即開心又滿足.. 埋單一共約62蚊, 係剛才lunch嘅一半, 但係滿意程度係double啊..
最後上友人屋企開檯玩玩衛生麻雀, 邊打邊傾, 大概11點大家都有點倦意, 所以就散band各自歸家去喇.. 真係好儘興嘅一日啊..

16.02.2008 | 蚵仔麵線+炸雞扒

早幾日去某個著名商場買電腦用品, 當完成任務想離去嘅時候, 突然覺得有啲肚餓, 於是對腳就自自然然咁行去搵嘢食.. 最後眼光畀間台灣小食店(叫做士林台灣小吃)所吸引, 決定品嘗佢嘅招牌蚵仔麵線同埋XXL超大炸雞扒.. 餐牌上見個樣的確係百份百令人垂延九尺架, 其實仲有肉鬆蛋卷同埋甜不辣都好誘人, 不過當時孤身作戰未能去馬品嘗..
蚵仔麵線其實已經煮好, 就係用個煲興住佢保溫, serve時拔兩大羹落個碗, 再喺上邊放兩隻肥美鮮蚵, 雞絲同買芫茜, 快捷方便又美味.. 啲麵線煮得好稔, 同埋啲羹撈埋一齊, 一啖啖滑luet-luet入口即溶咁食落肚, 好正囉.. 跟住輪到雞扒出場, 即嗌即整所以都等咗成10分鐘, 舊雞扒真係XXL嘥士足夠兩人份囉, 炸得一啲都唔油膩, 外皮香脆(可以選擇加辣椒粉), 入邊舊雞肉肉汁鎖住, 咬落去啖啖肉感覺好痛快.. 埋單食物連飲品一共13蚊, 有啲貴但係食得好滿足, 下次真係要湊夠人一齊去食..

15.02.2008 | 開工晏

今日成班同事一齊lunch當係開工飯局, 喺The Gardens間紫藤茶原訂咗位兼預點一份10人套餐.. 原本以為近近地搭電動火車落下一站, 點不知班火車唔知撞乜鬼要等成35分鐘.. 好彩我哋醒目預早出發, 所以到餐館時候時間啱啱好, 而且坐低冇耐就上茶起菜喇..
間嘢原本係做喋茶生意, 而家擴展做埋食肆, 以茶料理.. 餐館環境唔錯, 用個月牙型嘅碟食嘢都幾得意.. 我哋點咗個398蚊「茶香宴 」, 第一道就梗係好例牌嘅撈生(上圖第一排第二張, 叫做豐年金綠茶魚生)啦, 齊齊撈齊齊發發發, 哈哈!! 跟住陸續有嚟, 上圖第一排第三張起, 依序為茶香四熱葷, 香片茶蒸巴丁魚, 水仙豆巾靈芝菇, 紅茶洋蔥雞, 凍頂胚芽茶蝦, 珍珠茶飯糰, 水仙冬菇燴海參, 精選普洱茶, 紅茶杏仁豆腐海底椰.. 有冇注意到每一道餸都係用茶嚟煮啊?? 所以啲嘢其實都幾清, 唔錯架.. 要揀全場最受歡迎, 就非珍珠茶飯糰莫屬喇, 一人一個飯糰有啲似糯米雞, 飯粒煙煙韌韌好好味.. 如果要揀全場最難啃, 就非紅茶杏仁豆腐海底椰莫屬喇, 因為成陣藥水味, 好惡頂..

呢餐飯食咗成兩個鐘, 食完又要頂住個便便大腹等火車返公司, 結果前前後後呢餐開工晏由12:15pm出發到3:45pm返到公司, 一共用咗三個半小時, 嘥大半日去食飯好誇啊..

14.02.2008 | 情人拜天公

今日係二月十四, 西方人情人節, 天下有請人雙雙對對甜蜜渡過.. 今日亦係農曆正月初八, 福建人拜祭天公大日子, 對佢哋嚟講, 今日大過過年.. 早幾日睇報紙, 睇到副刊有個頗有趣嘅標題「二月十四: 你選擇情人定係天公?」.. 覺得兩樣嘢大纜都扯唔埋, 不過見報導訪問幾對情侶, 都各有己見..
  • 選擇拜天公: 拜天公一年一次, 因為我同情人日日都係情人節喎..
  • 選擇情人節: 我哋都唔係福建人, 唔關事, 梗係同愛人浪漫過情人節啦..
  • 選擇通殺: 兩全其美, 先同愛人燭光晚餐, 跟住齊齊攜手拜天公保祐啦..
其實呢個世界仲有好多好似我咁嘅人, 揀第四個option嘅.. 就係一於懶理, 情人節拜天公依然係普通不過嘅日子一個, 冇乜值得大事慶祝.. 點都好, 都會係度祝天下有情人甜甜蜜蜜, 白首諧老, 永遠恩愛.. 祝各位福建籍貫朋友健康平安快樂, 今晚開開心心咁大擦一餐..

仲有仲有, 應承咗人一定唔可以忘記.. 喺度對住全世界人, 祝我廿幾年老友小春生日快樂!! 願每日開心渡過, 願望理想可以如願達成..

13.02.2008 | 天氣無常

呢幾日陰陰天咁, 都唔似過年.. 年卅至年初四日日是好日, 即係話陽光普照, 熱到身水身汗咁解.. 記得年卅前日日都天陰落大雨, 某友人仲批死過年一定會落雨.. 突然間過年期間天氣驟然轉晴, 個太陽猛到就連啲衫洗好晾乾都唔駛半日時間.. 不過大年初五直到而家, 卻又偏偏轉陰, 搞到開工嗰日又gloomy又moody咁, 放完新年假已經係勁懶啦, 仲嚟個咁樣嘅天氣, 真係贈興囉.. 雖則話天氣無常, 不過年卅至年初四依然係好「遵守規律」地炎熱天晴, 等我可以好得戚好開心咁去揶喻那位批死過年一定會落雨嘅友人, 因為佢話佢阿媽話冬至落雨, 新年就一定跟住落雨喎.. 有點無言以對, 只能夠講而家個溫室效應, 已經將全球氣候攪到七國咁亂喇, 陰公..

12.02.2008 | 紅

友人小春一睇到我呢個blog, 就即嗌紅喇, 而且仲係分別於兩日(過年前同埋今日)嗌咗兩次添.. 咁新年流流就梗係要有咁紅得咁紅啦, 而且仲要由年卅晚一路紅到十五晚添噃!! 乜真係紅得好刺眼咩?? 其實我都已經放棄選用鮮紅色, 改為用暗啲嘅紅色架喇, 一年一次(一次十幾日啊其實係)將就吓啦各位..

講到過年點解要紅?? 個故事就係同個年獸有關喇, 大家知道嘛?? 話說中國古時候有一種叫「年」嘅怪獸, 頭長觸角, 兇猛異常.. 年獸長年深居海底, 每到除夕先爬上岸, 吞食牲畜傷害人命.. 原來, 年獸最怕就係紅色, 火光同爆炸聲.. 某年除夕, 有個勇敢婆婆身披紅袍企喺屋企院內哈哈大笑.. 年獸一見紅袍婆婆即大驚失色, 狼狽逃躥.. 暫且勿論究竟係紅色定係婆婆個樣嚇走年獸, 因為個婆婆令我聯想到梅超風!! 總之從此以後, 紅色就代表吉祥, 係新年必要顏色喇..

11.02.2008 | 開工大吉

大年初五據聞係開工大好日子, 所以今日約齊晒所是日有開工同事齊齊開門, 而且仲買埋兩包金光閃閃嘅糖果(咪搞笑, 的確係元寶金條形狀架), 開門時候大灑公司門前, 取其「遍地黃金」之意頭, 踏入公司嘅時候仲大聲講啲吉利說話, 取其「大吉大利」之意.. 之後事頭婆每人派開工利是乙封(都幾闊卓架), 跟住全部一齊落樓飲早茶, 當係開工酒.. 踏正十點吉時, 上公司正式開工, boot-up部電腦都要開盡volume, 等個Windows®音樂可以大響, 意即生意興隆, 盤滿缽滿啊!! 最後扭開收音機大放新年賀歲歌, 恭祝喜氣洋洋, 步步高昇, 發大財啊~~開工其實都係講求好意頭, 我哋一班後生仔女, 識得攪埋咁嘅嘢, 算係咁喇.. 最後恭祝各界生意興隆, 做老細嘅財運亨通, 打工仔陞官發財.. 我要開工做嘢喇, 恭喜恭喜!!

10.02.2008 | 戊子大年初四

今日算係農曆新年假期間節目最多嘅一日, 唔駛成日踎喺屋企度打躉.. 中午時份開始到一位老朋友屋企拜年(其實主要原因係去車佢, 唔係真正拜年), 跟住就成班人一齊落K唱歌, 唱玩之後撈生晚飯, 最後小弟意猶未盡提議去食甜品, 咁其中一位友人話不如就去一位(本人)好耐冇見嘅朋友間cafe, 於是扑鎚全部移師佢嗰間開張兩個月嘅cafe聚一聚.. 成十年冇聯絡過呢位朋友, 見佢一個女人坐擁數間餐廳, 而且仲攪得有聲有色, 果真佩服佢嘅魄力, 犀利!! 點咗個喳喳刨冰, 又真係幾得噃, 不過老闆娘竟然收足我哋錢, 有點意外, 可能真係搵食艱難啦, 哈哈.. anyway, 佳節期間能夠與好耐冇見嘅朋友仔見吓面食吓飯, 聚吓舊傾吓偈, 都唔錯架..

一日就咁過去, 過年就係休息到今日喇, 聽日大年初五開工大吉, 取其吉利以助日後鴻運聲勢, 哈哈.. 同事早前send過封email嚟話, 夾定聽日巳時(即係朝早九點至十一點)開門之時, 灑啲元寶形狀啲嘢落地, 好意頭啊, 實行有財大家齊齊發發發啦~~

09.02.2008 | 戊子大年初三

過年喇, 過年期間其中一個必定任務就梗係拿利是啦.. 大家見到以下呢疊紅噹噹嘅利是, 係唔係好開心啊.. 而呢疊利是就係在下呢四日內嘅收穫喇, 啱啱夠20封, 疊埋應該都有半寸厚.. 未逐封拆開嚟睇, 所以尚未知道究竟有幾多錢, 因為我習慣積埋積埋, 等差唔多時候先至一次過全部一齊拆, 咁啲數目撼埋先過人架嘛.. anyway, 唔好以為20封就等於好多錢啊, 其實每一年都係咁上下少, 今年亦不例外..
多謝晒各位長輩父母, 叔伯兄舅, 姨媽姑姐, 親朋戚友等等慷慨派發利是於在下.. 至嬲聽到大纜都扯唔埋啲親戚話「拎埋今年好喇」呢句嘢.. 喂, 趁我仲有資格繼續拎利是嘅時候, 就梗係盡情拎啦, 我都唔急你急?? 咁你畀得我當然來之不拒啦, 係嘛??

08.02.2008 | 戊子大年初二

大年初二, 除咗短暫拜年時間之外, 其餘時間就係足不出戶, 喺屋企食食瞓瞓睇電視, 而且生活有啲微顛三倒四, 夜睡夜起, 好一副好吃懶做嘅模樣.. 悶悶地冇嘢做, 成個人賴賴閑都懶埋落嚟, 攪到連blog都冇乜topic寫.. 其實一早就已經預咗過年假期期間, 一定係生活糜爛架喇, 每一年都係咁, 都已經習以為慣.. 不過冇所謂啦, 一年一次過番個咁傭懶嘅生活幾日, 取其「唔懮做」嘅意頭.. 新蒸頭, 好意頭, 呢個咪就係過年囉..

07.02.2008 | 戊子大年初一

新年到!! 新年期間收到好多朋友發送過嚟嘅短訊, 除咗啲正正經經傳傳統統嘅祝賀之外, 亦都有啲好有創意嘅.. 今年係鼠年, 就有好多祝賀係以鼠掛帥嘅, 好過癮.. 以下例子要用普通話嚟讀方可感受當中韻味: 鼠一鼠二鼠來寶, 財富鼠之不盡, 早日找到心中所鼠, 生活鼠適快樂.. 今日大年初一, 恭祝各位身體健康, 財源廣進, 一帆風順, 事事順利, 心想事成, 步步高昇, 蒸蒸日上, 新年如意, 龍馬精神, 招財進寶, 大吉大利, 如意吉祥, 四季平安, 五福臨門, 祿祿無窮, 財運亨通, 萬事盛意, 金銀滿屋, 百尺竿頭, 橫財就手, 盤滿缽滿, 事事亨通, 一本萬利, 福星高照, 大富大貴, 添福添壽..

2008戊子鼠年, 恭喜發財!!!

06.02.2008 | 丁亥年除夕

除夕日, 公司例牌都係返半日工, 但係呢半日其實都唔會productive到邊, 因為全世界八成人放假, 而且十成人已經holiday mood.. 所以大家輕輕鬆鬆咁, 唔駛一瞬間就可以收工走人, 有乜嘢留返過年後先打理啦.. 臨收工時係咁意收拾檯面, 求其送舊迎新嘅意頭, 一點鐘準時鬆人.. 之後去咗健身院作新年頹廢生活錢嘅最後衝刺, 跟住就行去隔離商場作新年前最後一個購物衝刺.. 大概晚飯時間, 當啲商店都收早可讓員工回家團圓之時, 我亦都稍有斬獲地歸家喇.. 回到家中, 親戚們都已經嚟齊晒咁濟, 我都算頗大牌喇, 哈哈.. 結果成晚夜就係食嘢, 傾偈, 睇電視, 畀長輩摧婚, 逗細路玩, 攤大手板收利是..

好似每一年都係咁樣嘅模式過除夕, 每一年食嘅嘢都係大同小異, 每一年收到嘅利是錢都係咁上下.. 真係冇點新意, 但係又每次都好期望佢嘅來臨噃!! 過新年, 其實係件好開心嘅事嚟嘅~~

05.02.2008 | 新年「燈」飾

上個禮拜四, 網絡服務連續down咗成個星期咁耐, 冇咗internet好多嘢都做唔到, 「省」咗個ISP三百幾次都仍然係徒勞無功, 幾乎想死咁濟.. 各位同事無所事事, 加上年又快到, 結果攪到個個無心戀戰, 於是(唔清楚邊個發起)大家就索性圍埋一齊, time sharing用利是封DIY砌返啲新年「燈」飾喇.. 公司女將眾多, 所以做起呢啲美工事幹特別得心應手, 總指揮ST及IV更是落足心機.. 三大猛男唯有企埋一邊睇嘅份, 等完成之後就靠我哋強勁嘅臂力一個個掛上天花板灑水器度..
公司美工資源有限, 所以女將門就僅靠利是封同埋書釘做出一個個有板有眼地嘅裝飾, 掛上天花板後, 成個公司煞時間增添不少過年氣氛.. 估唔到我哋除咗識得programming之外, 做呢啲嘢都好掂.. 尤其牆上嗰個用利是封砌成嘅實驗性春字, 同買最後嗰個中秋feel多過過年feel嘅黃色走馬燈, 簡直係是日二絕!! 而家成間公司紅噹噹咁, 等過年喇喂~~

04.02.2008 | 海闊天空..

距離農曆新年尚有數日時間, 其實好多游子都已經離城回鄉, 好多人都開始放假準備過年架喇.. 所以今朝返工特別順利, 輕鐵站不見平日擁擠嘅人潮, 如常同樣時間返工, 可以比平時早到公司15分鐘.. 唔駛苦等幾趟列車方可逼入車廂, 唔駛夾喺車廂人潮之間盡嗦萬人氣味, 唔駛夾喺車廂人潮之間與樣衰乘客面對面近距離身體接觸.. 車站冇人潮, 大家都好守次序上車落車.. 車廂內乘客減少, 每個人都可以好鬆動, 感覺海闊天空.. 老實講, 咁樣嘅情況之下返工, 個人嘅心情都真係會好啲囉.. 所以我真係好中意過年期間, 一半人走晒返鄉下, 到處都係一片寧靜, 至少嚟緊呢10日我相信會係好海闊天空嘅.. 唔駛人逼人, 呢種感覺很好啊, OH, 我喜歡~~

p/s: 在此絕無任何歧視成份, 純屬個人意見與感受..

03.02.2008 | 佳節期間不宜遠行..

呢個週末南下到新加坡一趟, 與幾位友人相聚, 以及出席同事喜宴.. 因為農曆新年在即, 所以離開城市返往全國各鎮嘅游子特別多, 大多數都選擇呢個週末提早返去hometown過年.. 所以就係因為呢個原因, 攪到呢次南下(新加坡赴約)北上(吉隆坡返歸)非常之累, 難忘經歷我不得不在此發泄一下..

先講出發南下嗰日, 長途巴士開車駛出車站, 個司機無啦啦將架巴士停放路邊, 跟住自己就消失得無影無蹤.. 成架巴士30位乘客, 好無辜咁喺架巴士齋坐上長達一小時十分鐘, 個司機先至大搖大擺拎住份文件上車繼續上路(簡直就係當冇事發生過).. 原本6:00pm嘅車, 竟然遲至7:15pm先由吉隆坡出發.. 嗰一個小時入邊, 真係越等越火架, 試過打電話巴士公司問個究竟, 但係竟然冇人接聽, 認真火到扯爆!! 車上其他乘客大多數都好耐心等待, 真係佩服佢哋嘅忍耐力, 難到真係我少見多怪??

再講今日北上返歸, 雖然巴士準時出發, 不過都係遲咗15分鐘, anyway我自己都遲咗5分鐘到車站, 所以應該多謝司機遲出發先啱.. 原本預算四個小時嘅車程, 竟然用咗五個半小時!!! 我坐喺個巴士上, 真係坐到屁股都痺晒.. 一開始就覺得個司機開得比較慢架喇, 再加上有幾段路交通稍為阻塞(佳節期間大家忙上路回鄉緣故), 而且又落雨嘅緣故(過年期間竟然落大雨, 好唔尋常), 所以就慢上加慢.. 醞喺個巴士度咁耐時間, 攪到我心都煩晒..

所以話, 冇乜必要嘅話, 佳節期間真係不宜遠行喇, 因為真係好攰架, 在此奉勸.. 如果大家想知我幫襯邊間長途旅巴公司嘅話, 私底下問我啦..

02.02.2008 | 與友共聚

今日與幾位朋友相聚於新加坡, 四面八方來自吉隆坡+倫敦+香港+新加坡嘅朋友濟濟一堂相聚與友人ML屋企.. 第一次到訪, 竟然被個公寓嘅保安措施難倒, 幾經重重波折之後終於上到友人家裡.. 兩手空空得兩梳蕉上到去, ML丈母娘經已準備大堆食恭候, 生炒糯米飯(one of my死穴), 燒鴨, 潮州筍粿, 荳漿荳花等, 加上小春私人帶上嚟嘅勁正chocolate moist cake, 食得好開心啊真係, 不過抱歉唔記得影返兩幅相.. 傾吓偈逗吓ML個囡囡玩, 逗留片刻之後, 因為小春需要趕下一場, 所以正值tea time就散band喇.. [更多相片]
距離去飲嘅時間仲有點鬆動, 於是就同友人小徽及飛びたい豚去烏節路行街買嘢.. 每次都滿懷希望可以有啲收穫, 但係始終擺脫不了我shopping兩手空嘅命運, 唯有好羨慕咁睇住小徽買得見牙唔見眼.. 大概7:30pm左右小徽就送我去飲同事嗰餐喜酒, 幸好去到都唔駛等太耐就開席, 啲嘢都真係唔錯好好味, 結果一共九樣餸未有miss過.. 其實都有過影低啲相供大家欣賞, 不過當時情況真係唔容許我咁樣做, 因為會好尷尬.. 散席時簡直就係捧住個大肚行出去, 個感覺?? 咪就係好飽好滿足囉..

臨過年前能夠安排到與朋友及同事小聚, 仲可以順便預祝恭喜發財, 實屬難能可貴啊..

01.02.2008 | 美食小貼士

清理舊電郵之時, 眾多友人forward過嚟嘅趣怪附件裡頭, 發現有個關於美食小貼士嘅, 覺得頗有趣, 在此同大家分享分享.. 未試過未知係唔係真嘅確有其事, 但係不妨一試, no harm..

  • 想要個檸檬可以搾得多啲汁出嚟, 個檸檬一定要係室溫, 搾汁前先用手掌輕輕喺個檯面上碌兩碌..
  • 手指上如留下食物污跡, 可以用生薯片拭擦, 跟住用清水洗洗就攪掂啦..
  • 想知道隻蛋是否新鮮?? 將佢浸入凍鹽水入便, 如果係沉嘅話, 即係話隻蛋係新鮮嘅.. 如果係浮喺面嘅, 隻蛋揼得架喇..
  • 買咗太多西芹食唔晒?? 用錫紙包起嚟擺入雪櫃, 可以儲存幾個星期架..
  • 炒飯唔一定要用隔夜飯.. 煮飯時落兩滴油, 咁啲飯煮好過後就會粒粒分開, 用嚟炒飯另舍好味啦..
  • 紅酒飲唔晒, 唔駛搏命灌落肚或者揼咗佢.. 將啲紅酒雪成冰粒, 以後仲可以用嚟煮紅酒炆牛腩褒架..
  • 啲橙啊, 檸檬啊, 青檸啊, 如果擺喺雪櫃太耐一定巢晒皮.. 唔緊要, 將佢哋全部浸入熱水數分鐘, 等佢哋吸收水份後, 就會變返靚靚仔仔架喇..